Pakikipagtabangan na Maghulit sa Teritoryo na Manlain-lain an Lengguwahe

Sa parati mas naghihimati an mga tawo sa mensahe kan Kahadian pag nadadangog ninda ini sa sadiri nindang lengguwahe. Posibleng ini an dahilan kaya kan Pentecostes 33 C.E., pinangyari ni Jehova na madangog kan “mga maki-Diyos na Judio hali sa gabos na nasyon sa kinaban” an maugmang bareta sa “sadiri [nindang] mga lengguwahe,” dawa ngani posibleng nakakataram man sinda kan lengguwaheng ginagamit kan kadaklan na tawo, arog kan Hebreo o Griego. (Gi 2:5, 8) Sa mga lugar ngunyan na may manlain-lain na lengguwahe, an mga kongregasyon na magkakalain an lengguwahe tibaad naghuhulit sa saro sanang teritoryo. Paano an mga parahayag sa mga kongregasyon na iyan magtatarabangan para mahulitan an gabos mantang linilikayan na madoble an paghuhulit sa teritoryo na puwedeng makairitar sa mga kagharong?

• 

  Makikomunikar (Tal 15:22): An mga paraataman sa paglilingkod kaipuhan na makikomunikar sa lambang saro tanganing magkaigwa nin sarong napagkauyunan na paagi para maihulit an maugmang bareta. Kun limitado an saindang teritoryo, tibaad mas gusto kan mga kongregasyon na naghuhulit sa ibang lengguwahe na laktawan nindo an mga residensiya na sakop kan saindang teritoryo na iba an lengguwahe. Pero, kun dai ninda kayang kobrehan nin regular an saindang teritoryo huling hararayo an distansiya kaini, tibaad mas gugustuhon ninda na dai nindo paglaktawan an arin man na harong pero ipaaram sa sainda kun may nagpahiling nin interes sa teritoryong iyan. (od 93 ¶37) O tibaad magpatabang sinda sa saindong kongregasyon na maghanap nin mga tawo na nagtataram kan lengguwahe kan kongregasyon ninda asin na an mga adres puwedeng ilipat sa saindang teritoryo. (km 7/12 5, kahon) Girumdumon na sa nagkapirang sitwasyon, puwedeng labi sa sarong lengguwahe an ginagamit sa sarong harong. An mga areglo sa pagkobre sa mga teritoryo dapat na kauyon kan ley dapit sa mga restriksiyon nin paggamit nin mga impormasyon nin sarong indibidwal.

• 

  Makikooperar (Efe 4:16): Maingat na sundon an arin man na instruksiyon na hali sa saindong paraataman sa paglilingkod. May tinutukduan ka daw sa Bibliya na mas gustong gamiton sa pag-adal nindo an lengguwahe na bako an lengguwahe kan saindong kongregasyon? Posibleng mag-uswag tulos an tinutukduan sa Bibliya kun ililipat mo siya sa karaning kongregasyon o grupo na nagtataram kan lengguwahe niya.

• 

  Mag-andam (Tal 15:28; 16:1): Kun an sarong kagharong sa saindong teritoryo iba an lengguwahe, gibuhon an pinakamakakaya mo na maihulit sa saiya an maugmang bareta. Makakapag-andam ka paagi sa pag-aram kan mga lengguwahe na posibleng ginagamit kan mga makakaulay mo asin paagi sa patiinot na pag-download kan mga traduksiyon nin Bibliya saka mga video sa saimong gadyet. Puwede mo man gamiton an JW Language app para makanuod ka nin mga pangungumusta sa pirang mga lengguwahe.