Kun Iba an Lenguahe nin Kagharong
1. Taano ta may nag-oorog na pangangaipo para sa kooperasyon kun naghuhulit sa teritoryo?
1 Mas nagigin parate na an mga parahayag kan Kahadean sa bilog na kinaban nakakanompong nin mga interesado na an lenguahe iba sa lenguahe kan kongregasyon. Tanganing matabangan sa espirituwal an siring na mga tawo, kaipuhan kan dakol na sangang opisina na bumilog nin mga grupo asin kongregasyon nin magkakalenguahe. Huling tibaad dakol na lenguahe an ginagamit sa sarong lugar, tibaad maghulit sa iyo man sanang teritoryo an nagkapirang kongregasyon na laen-laen an lenguahe. Paano puedeng makikooperar an mga kongregasyon tanganing siertohon na ginigibo sa aregladong paagi an paghuhulit?—1 Cor. 14:33.
2. Kun naghuhulit sa harong-harong, paano kita puedeng makikooperar sa ibang grupo o kongregasyon nin magkakalenguahe sa satong lugar?
2 Marahay na Kooperasyon: Kun naghuhulit sa tinampo o nagpapatotoo nin impormal, maninigo na an sarong parahayag dai mag-alangan na dolokon an siisay man, pati na an mga tawong tibaad iba an lenguahe, asin mag-alok nin babasahon sa lenguahe na mas gustong basahon kan tawong iyan. Minsan siring, kun naghaharongharong sa teritoryo na hinuhulitan man nin ibang grupo o kongregasyon nin magkakalenguahe, sa pangkagabsan maninigo na an sarong parahayag magkonsentrar sa mga harong nin mga tawo na an lenguahe iyo an lenguahe kan kongregasyon na inaatenderan kan parahayag. Kun laen-laen na kongregasyon an naghuhulit sa iyo man sanang teritoryo, mahalaga nanggad an pagkaigwa nin marahay na rekord. Maninigo na an mga paraataman sa paglilingkod makikomunikar sa lambang saro asin mag-organisar nin mga bagay-bagay sa paagi na kapakipakinabang para sa gabos. (Tal. 11:14) Minsan siring, kun may manompongan na tawong iba an lenguahe mantang naghaharongharong asin mayo nin mga kongregasyon sa lenguaheng iyan sa harani, maninigong maghingoa an parahayag na magpatotoo asin padagos na tabangan an interesado.
3. Ano an maninigo niatong gibohon kun nakakanompong kita nin mga parahayag hale sa ibang grupo o kongregasyon nin magkakalenguahe na naghuhulit man sa teritoryong hinuhulitan niato?
3 Iyo Man Sanang Gibohon: Ano an maninigong gibohon kun an mga parahayag hale sa laen-laen na kongregasyon nanongod na sabay na naghulit sa parehong teritoryo sa iyo man sanang aldaw? Siempre, paagi sa Kristianong pagkamoot, mapapangganahan an ano man na pagkakalaen nin lenguahe, asin an gabos sa pangenot magigin interesado sa mga pangangaipo kan teritoryo. (Juan 13:34, 35) Kun siring, an mga nangengenot mapaheling nin pagkarasonable asin pagkamoot sa pagdesisyon kun baga maninigong bumalyo nguna sa ibang teritoryo an sarong grupo.—Sant. 3:17, 18.
4. Anong hula an naootob ngonyan?
4 Ihinula kan Biblia na makakadangog kan maogmang bareta an mga tawo na laen-laen an lenguahe. (Kap. 14:6, 7) Paagi sa maingat na kooperasyon kan gabos na kalabot, malilikayan an dai kaipuhan na pagkadoble nin paghihingoa sa sarong teritoryo asin dakol na bagohan an mapapaabotan kan maogmang bareta, pati na an mga iba an lenguahe.—Efe. 4:16.