Tinokdoan na Gumibo kan Kabotan ni Jehova
“Tokdoan mo ako na gibohon an saimong kabotan, huli ta ika an sakong Dios.” —SALMO 143:10.
1, 2. (a) Noarin kita maninigong tokdoan, asin may anong realistikong katuyohan? (b) Taano ta mahalagang marhay an pagigin tinokdoan ni Jehova?
SA KADA aldaw na an sarong tawo buhay asin aktibo, may ikatotokdo sa saiya na kapakipakinabang. Totoo iyan sa saindo, asin totoo iyan sa iba. Alagad ano an nangyayari sa pagkagadan? Dai puedeng tokdoan nin ano man o makanood sa kamugtakan na iyan. Malinaw na sinasabi kan Biblia na an gadan ‘mayo man lamang nin pakaaram.’ Mayo nin kaaraman sa Sheol, an pankagabsan na lolobngan nin katawohan. (Eclesiastes 9:5, 10) Ini daw nangangahulogan na an pagigin tinokdoan niato, na nakatitipon nin kaaraman, daing kamanungdanan? Depende iyan sa kun ano an itinotokdo sa sato asin kun paano niato ginagamit an kaaraman na iyan.
2 Kun an itinotokdo sana sa sato kinabanon, mayo kita nin nagdadanay na ngapit. Pero, makaoogma, minilyon na tawo sa gabos na nasyon an tinotokdoan kan kabotan nin Dios na an katuyohan buhay na daing katapusan. An basehan kan paglaom na ini iyo an pagigin tinokdoan ni Jehova, an Gikanan nin kaaraman na nagtatao nin buhay.—Salmo 94:9-12.
3. (a) Taano ta masasabi na si Jesus an enot na estudyante nin Dios? (b) Ano an garantiya sa sato na an mga tawo totokdoan ni Jehova, asin may anong resulta?
3 An panganay na Aki nin Dios, bilang Saiyang enot na estudyante, tinokdoan na gumibo kan kabotan kan saiyang Ama. (Talinhaga 8:22-30; John 8:28) Sinabi man ni Jesus na an manampulong ribong tawo totokdoan kan saiyang Ama. Ano an mga oportunidad niato na nakanonood sa Dios? Si Jesus nagsabi: “Nasusurat sa Mga Propeta, ‘Asin sinda gabos totokdoan ni Jehova.’ An gabos na nakadangog sa Ama asin nakanood minadolok sa sako. . . . Sa katotoohan ako nagsasabi sa saindo, An minatubod igwa nin buhay na daing katapusan.”—Juan 6:45-47.
4. Paano naaapektaran kan pagtotokdo nin Dios an minilyon na tawo, asin ano an mga oportunidad ninda?
4 Si Jesus nagkokotar sa Isaias 54:13, na isinabi sa simbolikong babae nin Dios, an langitnon na Sion. An hulang iyan partikular na aplikado sa mga aki kaini, an 144,000 na linahidan nin espiritu na mga disipulo ni Jesu-Cristo. An natatada sa espirituwal na mga aking iyan aktibo ngonyan, na nangengenot sa lakop sa globong programa nin pagtotokdo. Bilang resulta, an minilyon pang iba na minakompuesto sa “dakulang kadaklan” nakikinabang man sa pagigin tinokdoan ni Jehova. Igwa sinda kan nasosolong oportunidad na makanood na dai napuputol nin kagadanan. Taano man? Bueno, nalilinya sinda na maligtas na buhay sa marikas an pagdangadang na “dakulang kahorasaan” asin magkamit nin buhay na daing katapusan sa sarong paraisong daga.—Kapahayagan 7:9, 10, 13-17.
Orog na Pagdodoon sa Paggibo kan Kabotan nin Dios
5. (a) Ano an teksto kan taon para sa 1997? (b) Ano an maninigong magin saboot niato manongod sa pag-atender sa Kristianong mga pagtiripon?
5 Sa 1997, sa labing 80,000 na kongregasyon sa bilog na kinaban, an Mga Saksi ni Jehova perming gigirumdomon an enot na mga tataramon kan Salmo 143:10: “Tokdoan mo ako na gibohon an saimong kabotan.” Iyan an magigin teksto kan taon para sa 1997. An mga tataramon na iyan, na heling na marhay sa mga Kingdom Hall, magseserbing pagirumdom na an sarong lataw na lugar para sa pag-ako kan pagtotokdo nin Dios iyo an mga pagtiripon kan kongregasyon, na duman makapakikikabtang kita sa nagpapadagos na programa nin pagtotokdo. Kun nakikiiba sa satong mga tugang sa mga pagtiripon tanganing matokdoan kan satong Kaharohalangkaweng Paratokdo, an magigin saboot niato arog kan salmista, na nagsurat: “Ako naogma kan sinda nagsasabi sa sako: ‘Sa harong ni Jehova magduruman kita.’”—Salmo 122:1; Isaias 30:20.
6. Sa pananaram ni David, ano an rinerekonoser niato?
6 Iyo, boot niatong matokdoan na gibohon an kabotan nin Dios imbes na an kabotan kan satong kaiwal na Diablo o an kabotan nin mga tawong bakong sangkap. Kaya, arog ni David, satuyang rinerekonoser an Dios na satuyang sinasamba asin pinaglilingkodan: “Huli ta ika an sakong Dios. An saimong espiritu marahay; giyahan logod ako kaiyan sa daga nin katanosan.” (Salmo 143:10) Imbes na magmawot na makiiba sa mga tawong putikon, mas gusto ni David na mamugtak duman sa lugar na ginigibo an pagsamba ki Jehova. (Salmo 26:4-6) Mantang ginigiyahan an saiyang mga lakad kan espiritu nin Dios, si David makalalakaw sa mga dalan nin katanosan.—Salmo 17:5; 23:3.
7. Paano naghiro an espiritu nin Dios sa Kristianong kongregasyon?
7 Sinierto kan David na Orog na Dakula, si Jesu-Cristo, sa mga apostol na an banal na espiritu matokdo sa sainda kan gabos na bagay asin ipagigirumdom sa sainda an gabos na isinabi nia sa sainda. (Juan 14:26) Poon kan Pentecostes padagos, progresibong ihinahayag ni Jehova “an hararom na mga bagay nin Dios” na yaon sa saiyang nasusurat na Tataramon. (1 Corinto 2:10-13) Ini ginibo nia paagi sa sarong naheheling na pinakapaagihan na inapod ni Jesus na “an fiel asin madonong na oripon.” Iyan an nagtatao nin espirituwal na kakanon na pinag-oolayan sa programa nin pagtotokdo para sa mga kongregasyon kan banwaan nin Dios sa bilog na kinaban.—Mateo 24:45-47.
Tinotokdoan kan Kabotan ni Jehova sa Satong mga Pagtiripon
8. Taano ta mahalagang marhay an pakikakabtang sa Pag-adal sa Torrengbantayan?
8 An pag-aadalan sa semanal na Pag-adal sa Torrengbantayan kan kongregasyon sa parate mapadapit sa pag-aplikar kan mga prinsipyo sa Biblia. Tunay na ini nakatatabang sa sato na makaya an mga kapurisawan sa buhay. Sa ibang mga pag-adal pinag-oolayan an hararom na espirituwal na mga katotoohan o mga hula sa Biblia. Abaa kadakol kan itinotokdo sa sato durante kan mga pag-adal na iyan! Sa dakol na kadagaan pano-pano an mga Kingdom Hall para sa mga pagtiripon na ini. Pero sa nagkapirang nasyon, buminaba an mga nag-aatender sa mga pagtiripon. Taano daw sa paghona nindo? Posible daw na an nagkapira tinotogotan an sekular na trabaho na makaentremeter sa saindang regular na pagtiripontipon “tanganing mandagka sa pagkamoot asin sa marahay na mga gibo”? O posible daw na dakol na oras an inuubos sa sosyal na mga aktibidad o sa pagdalan nin telebisyon, na garo baga sibot-sibot na an iskedyul tanganing makaduman sa gabos na pagtiripon? Girumdoma an ipinasabong na pagboot sa Hebreo 10:23-25. Bako daw na mas mahalaga ngonyan an pagtiripontipon para sa pagtotokdo nin Dios mantang satong ‘naheheling na an aldaw harani na’?
9. (a) Paano kita masasangkapan kan Pagtiripon sa Paglilingkod para sa ministeryo? (b) Ano an maninigong magin aktitud niato manongod sa pagpatotoo?
9 An saro sa enot niatong mga paninimbagan iyo an paglilingkod bilang mga ministro nin Dios. An Pagtiripon sa Paglilingkod sinadya sa pagtokdo sa sato kun paano niato ini magigibo nin epektibo. Nanonodan niato kun paano madolok sa mga tawo, kun ano an sasabihon, kun paano an reaksion kun paborable an pag-ako, asin pati an dapat na gibohon kun hinahaboan nin mga tawo an satong mensahe. (Lucas 10:1-11) Mantang pinag-oolayan asin idinedemonstrar an epektibong mga paagi sa semanal na pagtiripon na ini, mas andam kitang kaolayon an mga tawo bako sanang kun naghaharongharong kundi patin kun naghuhulit sa mga tinampo, sa mga paradahan, sa pampublikong mga sasakyan, sa mga aeropuerto, sa mga lugar nin negosyo, o sa mga eskuelahan. Kaoyon sa kahagadan niato, “Tokdoan mo ako na gibohon an saimong kabotan,” bobooton niato na aprobetsaran an lambang oportunidad na gibohon an isinadol kan satong Kagurangnan: “Pasiranga an saindong liwanag sa atubangan nin mga tawo, tanganing . . . pamurawayon ninda an saindong Ama na nasa kalangitan.”—Mateo 5:16.
10. Paano niato tunay na matatabangan an ‘mga maninigo’?
10 Sa siring na mga pagtiripon kan kongregasyon, tinotokdoan man kita na gibohon na disipulo an iba. Oras na makanompong nin interesado o makapasakamot nin babasahon, an katuyohan niato sa pagdalaw liwat makapoon nin pag-adal sa Biblia. Sa nagkapirang paagi, kaagid ini kan ‘pagdanay kan mga disipulo sa mga maninigo’ tangani na tokdoan sinda kan mga ipinagboot ni Jesus. (Mateo 10:11; 28:19, 20) Mantang igwa kan marahayon na mga pantabang, arog kan librong Kaaraman na Minagiya Pasiring sa Buhay na Daing Katapusan, tunay na kompleto an kasangkapan niato tanganing lubos na magibo an satong ministeryo. (2 Timoteo 4:5) Serosemana mantang kamo nag-aatender sa Pagtiripon sa Paglilingkod asin Teokratikong Paadalan sa Pagmiministro, hingoahon na masabotan dangan gamiton an nakatatabang na mga punto na magrerekomendar sa saindo bilang saro sa kualipikado nin igo na mga ministro nin Dios, na inootob an saiyang kabotan.—2 Corinto 3:3, 5; 4:1, 2.
11. Paano an nagkapira nagpaheling nin pagtubod sa mga tataramon na yaon sa Mateo 6:33?
11 Kabotan nin Dios na kita “padagos na hanapon nguna an kahadean asin an saiyang katanosan.” (Mateo 6:33) Hapota an saindong sadiri, ‘Paano ko iaaplikar an prinsipyong ini kun an mga kahagadan sa sekular na trabaho ko [o kan agom ko] nakaeentremeter sa pag-atender sa pagtiripon?’ An dakol na maygurang sa espirituwal magibo nin aksion na kaolayon an saindang mga among manongod sa bagay na iyan. An sarong bilog na panahon na ministro ipinaaram sa saiyang among na kaipuhan nia na magkaigwa nin libreng oras kada semana tanganing makaatender sa mga pagtiripon kan kongregasyon. Itinao kaini an kahagadan. Alagad huling gustong makaaram kun ano an nangyayari sa mga pagtiripon, nakiolay ining umatender. Duman nadangog kaini an paisi manongod sa nagdadangadang na pandistritong kombension. Bilang resulta, iinareglo kan among na magsarong aldaw sa kombension. Anong leksion an nakukua nindo sa halimbawang ini?
Tinokdoan kan Kabotan ni Jehova nin Diosnon na mga Magurang
12. Tanganing an mga aki matokdoan kan kabotan ni Jehova, ano an maninigong gibohon nin Kristianong mga magurang na may pagpapasensia asin karigonan?
12 Alagad an mga pagtiripon kan kongregasyon asin kombension bako sanang iyo an probisyon na kita tinotokdoan na gibohon an kabotan nin Dios. An diosnon na mga magurang pinagbotan na patoodon, disiplinahon, asin padakulaon an saindang mga aki na mag-omaw ki Jehova asin gumibo kan saiyang kabotan. (Salmo 148:12, 13; Talinhaga 22:6, 15) An paggibo kaiyan naghahagad na iiba niato an satong “saradit” sa mga pagtiripon na duman sinda puedeng ‘maghinanyog asin makanood,’ alagad kumusta man an pagtokdo sa sainda sa harong hale sa banal na mga kasuratan? (Deuteronomio 31:12; 2 Timoteo 3:15) Dakol na pamilya an maatom na pinonan an mga programa nin regular na pampamilyang pag-adal sa Biblia, alagad paghaloyhaloy pinababayaan ining mawara o mapabayaan. Nagkaigwa na daw kamo nin siring na eksperyensia? Iisipon daw nindo na bakong maninigo an rekomendasyon na magkaigwa nin siring na regular na pag-adal o na an saindong pamilya napapalaen na marhay kaya iyan dai talaga magigin epektibo sa saindo? Ano man an kamugtakan, tabi repasohon nindo mga magurang an marahay na mga artikulong “Our Rich Spiritual Heritage” sa The Watchtower kan Agosto 1, 1995 asin “An mga Balos sa Pagkadesidido” sa An Torrengbantayan kan Agosto 1, 1995.
13. Paano makikinabang an mga pamilya sa pag-estudyar sa pan-aroaldaw na teksto?
13 An mga pamilya pinaririgon an boot na ugaleon an pag-estudyar sa pan-aroaldaw na teksto hale sa Pagsiyasat sa Kasuratan Aroaldaw. Marahay an pagbasa sana kan teksto asin komento, alagad mas kapakipakinabang an pag-orolay sa teksto asin pag-aplikar kaiyan. Halimbawa, kun ineestudyaran an Efeso 5:15-17, an mga miembro kan pamilya puedeng isip-isipon kun paano ‘tutuboson an angay na panahon’ para sa personal na pag-adal, tanganing makikabtang sa sarong klase nin bilog na panahon na ministeryo, asin asikasohon an ibang teokratikong asignasyon. Iyo, an pag-orolay nin pamilya sa pan-aroaldaw na teksto puedeng gumiya sa saro o sa dakol na “padagos na saboton [nin mas lubos] kun ano an kabotan ni Jehova.”
14. Ipinaririsa kan Deuteronomio 6:6, 7 na an mga magurang maninigong magin anong klaseng mga paratokdo, na naghahagad nin ano?
14 An mga magurang dapat na magin mahigos na mga paratokdo sa saindang mga aki. (Deuteronomio 6:6, 7) Alagad iyan bako sanang paglektura o pagtao nin mga pagboot sa saindang aki. An ama asin ina kaipuhan man na maghinanyog, sa siring mas naaaraman kun ano an kaipuhan na ipaliwanag, linawon, iilustrar, o otrohon. Sa sarong Kristianong pamilya, pinupukaw kan mga magurang an bukas na komunikasyon paagi sa pag-enkaminar sa saindang mga aki na maghapot manongod sa mga bagay na dai ninda nasasabotan o na ginigikanan nin kapurisawan. Sa siring, naaraman ninda na an sarong solterito ninda nadedepisilan na marorop na si Jehova mayo nin kapinonan. Nagamit kan mga magurang an impormasyon hale sa mga publikasyon kan Watch Tower Society na nagpapaheling na an panahon asin espasyo inaako na daing sagkod. Iyan nakailustrar kan punto, asin nanigoan dian an saindang aki. Kaya tawan nin panahon an pagsimbag nin malinaw asin gikan sa Kasuratan sa mga hapot kan saindong mga aki, na tinatabangan sindang masabotan na an pag-adal na gibohon an kabotan nin Dios puedeng magin nakakokontento nanggad. Ano pa an itinotokdo ngonyan sa banwaan nin Dios—hoben asin gurang?
Tinotokdoan na Mamoot Asin Lumaban
15. Noarin puedeng mabalo an pagigin tunay kan satong pagkamoot sa tugang?
15 Kaoyon sa bagong pagboot ni Jesus, kita “tinotokdoan nin Dios na magkaminorootmootan.” (1 Tesalonica 4:9) Kun trangkilo asin marahay an dalagan nin mga bagay, tibaad iniisip niato na talagang namomotan niato an gabos niatong tugang. Pero ano an nangyayari kun minalataw an personal na dai pagkaintindihan o nakolgan an boot niato huli sa sinabi o ginibo nin ibang Kristiano? Sa panahon na ini tibaad mabalo an pagigin tunay kan satong pagkamoot. (Ikomparar an 2 Corinto 8:8.) Ano an itinotokdo sato kan Biblia na gibohon sa siring na mga kamugtakan? An sarong bagay magmaigot na ipaheling an pagkamoot sa pinakalubos na kahulogan. (1 Pedro 4:8) Imbes na hanapon an sadiri niatong kapakanan, maanggot sa saradit na pagkukulang, o kuentahon an danyos, maninigo kitang maghingoa na patahoban sa pagkamoot an dakol na kasalan. (1 Corinto 13:5) Aram niato na ini an kabotan nin Dios, huli ta iyan an itinotokdo kan saiyang Tataramon.
16. (a) Sa anong klaseng pakikilaban tinotokdoan an mga Kristiano? (b) Paano kita sinasangkapan?
16 Mantang an dakol dai pagkokonektaron an pagkamoot asin pakikilaban, an ikaduwa saro pang itinotokdo sa sato, alagad sarong napapalaen na klase nin pakikilaban. Minidbid ni David an pagdepende nia ki Jehova na tokdoan sia kun paano makikilaban, minsan ngani kan saiyang panahon kaiba dian an literal na pakikilaban tumang sa mga enemigo nin Israel. (1 Samuel 17:45-51; 19:8; 1 Hade 5:3; Salmo 144:1) Kumusta man an pakikilaban niato ngonyan? An satong mga armas bakong sa laman. (2 Corinto 10:4) An satong pakikilaban espirituwal, na para dian kaipuhan na kita masangkapan nin espirituwal na pangalasag. (Efeso 6:10-13) Paagi sa saiyang Tataramon asin sa saiyang tiripon na banwaan, tinotokdoan kita ni Jehova na magin mapanggana sa espirituwal na pakikilaban.
17. (a) Anong mga taktika an ginagamit kan Diablo tanganing ikarayo kita? (b) Ano an madonong na likayan niato?
17 Sa mapandaya, pairarom na mga paagi, parateng ginagamit kan Diablo an mga bagay sa kinaban, apostata, asin iba pang kontra sa katotoohan sa paghihingoa na irayo kita pasiring sa mga bagay na bakong importante. (1 Timoteo 6:3-5, 11; Tito 3:9-11) Garo baga aram nia na kakadikit an posibilidad nia na madaog kita paagi sa direkta, hayag na pagsalakay, kaya pinoprobaran niang pasingkogon kita paagi sa pagsugot sa sato na ipahayag an satong mga parateng reklamo asin rungaw na mga hapot, na mayo man nin espirituwal na halaga. Bilang mapagmatong mga parapakilaban, maninigo na kita alisto man sa siring na mga peligro kun paanong kita alisto sa hayag na mga pananalakay.—1 Timoteo 1:3, 4.
18. Ano an talagang kalabot sa pamumuhay na bako nang para sa sato man sana?
18 Dai niato sinusuportaran an mga kamawotan nin tawo o an kabotan kan mga nasyon. Tinokdoan kita ni Jehova paagi sa halimbawa ni Jesus na kita dapat na dai na mabuhay para sa sato man sana; imbes, maninigo kitang magkaigwa kan kaisipan na kapareho kan ki Cristo Jesus asin mamuhay para sa kabotan nin Dios. (2 Corinto 5:14, 15) Kan nakaagi, tibaad labi-labi, marompot na marhay an nagin buhay niato, na sinasayang an panahon na mahalagang marhay. An maraot na kinaban na ini midbid sa mga sobrang kaogmahan, daraogan sa pag-inom, asin inmoralidad. Ngonyan na tinotokdoan kita na gibohon an kabotan nin Dios, dai daw kita nagpapasalamat na magin siblag sa marigsok na kinaban na ini? Kaya makilaban kita nin maigot sa espirituwal tanganing makalikay na mapalabot sa nakararamog na mga gibo kan kinaban.—1 Pedro 4:1-3.
Pagtotokdo sa Sato na Pakinabangon an Satong Sadiri
19. An pagigin tinokdoan kan kabotan ni Jehova dangan paggibo kaiyan magbubunga nin anong mga pakinabang?
19 Kaipuhan na midbidon na an pagigin tinokdoan na gibohon an kabotan ni Jehova magtatao sa sato nin dakulang pakinabang. Siempre, dapat na gibohon niato an satong kabtang paagi sa pag-atentong marhay tanganing makanood dangan sunodon an mga instruksion na minaabot sa sato paagi sa saiyang Aki saka paagi sa saiyang Tataramon asin tiripon na banwaan. (Isaias 48:17, 18; Hebreo 2:1) Sa paggibo niato kaiyan, kita mapasasarig na magin marigon sa kapahapahamak na mga panahon na ini asin sagupaon an mga krisis na maabot. (Mateo 7:24-27) Ngonyan pa, mapaoogma na niato an Dios paagi sa paggibo kan saiyang kabotan asin masisierto niato na sisimbagon an satong mga pamibi. (Juan 9:31; 1 Juan 3:22) Asin maeeksperyensiahan niato an tunay na kaogmahan.—Juan 13:17.
20. Ano an marahay na horophoropon mantang naheheling nindo an teksto kan taon sa bilog na 1997?
20 Sa laog kan 1997, parate kitang magkakaoportunidad na basahon asin estudyaran an teksto kan taon, Salmo 143:10: “Tokdoan mo ako na gibohon an saimong kabotan.” Mantang ginigibo niato ini, gamiton niato an nagkapira sa mga okasyon na pensaron an mga probisyon na ginibo nin Dios tanganing matokdoan kita, arog kan sinasabi sa enotan. Asin gamiton niato an siring na paghorophorop sa mga tataramon na iyan bilang pan-engganyar na gumawe kaoyon sa pagngayongayong iyan, sa pakaaram na “an naggigibo kan kabotan nin Dios magdadanay sagkod lamang.”—1 Juan 2:17.
Ano an Isisimbag Nindo?
◻ Sairisay ngonyan an tinotokdoan na gibohon an kabotan ni Jehova?
◻ Paano kita maninigong maapektaran kan Salmo 143:10 durante kan 1997?
◻ Paano kita tinotokdoan na gibohon an kabotan ni Jehova?
◻ Ano an hinahagad sa Kristianong mga magurang sa pagtotokdo sa saindang mga aki?