Si Enoc—Daing Takot sa Ibong nin mga Kasakitan

PARA sa sarong marahay na tawo, idto an pinakamasakit na panahon. An daga sagom sa karatan. Padagos an pagruro kan kamugtakan sa moral nin katawohan. Sa katunayan, masasabi dai naghaloy: “Naheling ni Jehova na an karatan nin tawo labi-labi na sa daga asin an gabos na tendensia kan mga kaisipan kan saiyang puso danay na sa karatan na sana.”​—Genesis 6:5.

Si Enoc, an ikapitong tawo sa linya kan linahe poon ki Adan, igwa kan kapusoan na magin laen. Nanindogan sia nin marigon apabor sa katanosan ano man an magin mga resulta. An mensahe ni Enoc ikinasumong marhay kan maraot na mga parakasala kaya tinandaan sia tanganing gadanon, asin si Jehova sana an makatatabang sa saiya.​—Judas 14, 15.

Si Enoc Asin an Unibersal na Isyu

Haloy pa bago mamundag si Enoc, pinalataw na an isyu may labot sa unibersal na soberaniya. An Dios daw igwa nin diretsong mamahala? Garo man sana sinabi ni Satanas na Diablo na dai. Iininsister nia na mas mapaparahay an intelihenteng mga linalang kun sinda dai didirehiran nin Dios. Hiningoa ni Satanas na iestablisar an saiyang ebidensia tumang ki Jehova Dios paagi sa tusong pagmaniobra sa mga tawo na kumampi sa saiya. Si Adan, an saiyang agom na si Eva, asin an saindang enot na aki, si Cain, midbid sa pagkampi ki Satanas paagi sa pagpili sa sadiring pamamahala imbes na sa pamamahala nin Dios. Ginibo ini kan enot na mag-agom paagi sa pagkakan kan bunga na ipinangalad nin Dios, asin ginibo iyan ni Cain paagi sa tuyong paggadan sa saiyang matanos na tugang, si Abel.​—Genesis 3:​4-6; 4:8.

Si Abel marigon na nanindogan sa kampi ni Jehova. Mantang sinuportaran kan integridad ni Abel an dalisay na pagsamba, daing duwa-duwa na naogma si Satanas na maheling si Cain na ipinahayag sa saiya an mapangadan na pagkaanggot. Poon kan panahon na iyan, ginamit ni Satanas an “pagkatakot sa kagadanan” bilang pantakot na armas. Mawot niang takoton an puso nin siisay man na gustong sumamba sa tunay na Dios.​—Hebreo 2:​14, 15; Juan 8:​44; 1 Juan 3:​12.

Kan panahon na mamundag si Enoc, posible na garo baga dakol na an nagsusuportar sa pagmansay ni Satanas na dai sosorogon nin mga tawo an soberaniya ni Jehova. Gadan na si Abel, asin dai sinusunod an saiyang fiel na halimbawa. Pero, pinatunayan ni Enoc na laen sia. Marigon an basehan kan saiyang pagtubod, huli ta aram niang marhay an mga nangyari sa tatamnan nin Eden.a Seguradong minahal nia an hula ni Jehova na nagsasabi na sarong ihinulang Banhi an matapos ki Satanas asin sa saiyang mga pakana!​—Genesis 3:​15.

Huling perming nasa atubangan nia an paglaom na ini, si Enoc dai natakot sa makasaysayan na paggadan ki Abel na ipinasabong kan Diablo. Imbes, padagos siang naglakaw sa kaibanan ni Jehova, na sinusunod an parasiempreng dalan nin katanosan. Si Enoc nagdanay na siblag sa kinaban, na isinisikwal an independienteng espiritu kaiyan.​—Genesis 5:​23, 24.

Dugang pa, si Enoc may kapusoan na nagtaram asin lininaw nia na masusudya an maraot na mga gibo kan Diablo. Pinahihiro kan banal na espiritu, o puersa aktiba, nin Dios, si Enoc naghula mapadapit sa mga maraot: “Uya! si Jehova nagdatong na kaibanan an manampulong ribo kan saiyang mga banal, tanganing maghokom tumang sa gabos, asin tanganing silotan an gabos na maraot mapadapit sa gabos nindang maraot na gibo na saindang ginibo sa maraot na paagi, asin mapadapit sa gabos na nakakukubhan na bagay na itinaram kan maraot na mga parakasala tumang sa saiya.”​—Judas 14, 15.

Huli sa daing takot na mga kapahayagan ni Enoc, an apostol na si Pablo, sa pagsurat sa mga Kristianong Hebreo, iiniba sia sa dakulang “panganoron nin mga saksi” na nagtao nin marahayon na halimbawa nin pagtubod na may kaibang gibo.b (Hebreo 11:5; 12:1) Bilang tawong may pagtubod, si Enoc nagmaigot sa dalan nin integridad sa laog nin labing 300 na taon. (Genesis 5:​22) An pagigin fiel ni Enoc sierto nanggad na ikinairitar kan mga kaiwal nin Dios sa langit asin digdi sa daga! An malanit na hula ni Enoc ikinaongis ni Satanas, alagad iyan nagbunga kan proteksion ni Jehova.

Kinua nin Dios si Enoc​—Paano?

Dai tinogotan ni Jehova si Satanas o an mga lingkod kaini digdi sa daga na gadanon si Enoc. Imbes, an ipinasabong na rekord nagsasabi: “Kinua sia nin Dios.” (Genesis 5:24) Siring kaini an pagkaladawan ni apostol Pablo sa mga bagay: “Huli sa pagtubod si Enoc ibinalyo tanganing dai makaheling nin kagadanan, asin dai na sia nanompongan minsan saen huli ta ibinalyo sia nin Dios; huli ta bago kan pagbalyo sa saiya nagkamit sia kan patotoo na napaoyonan nia an Dios.”​—Hebreo 11:5.

Paano si Enoc “ibinalyo tanganing dai makaheling nin kagadanan”? O siring kan nasa traduksion ni R. A. Knox, paano si Enoc “kinua na dai naeksperyensiahan an kagadanan”? Matoninong na tinapos nin Dios an buhay ni Enoc, na dai ipinamate sa saiya an mga kolog nin kagadanan magsalang bunga nin helang o kadahasan sa kamot kan saiyang mga kaiwal. Iyo, pinahalipot ni Jehova an buhay ni Enoc sa edad na 365​—medyo hoben pa kun ikokomparar sa saiyang mga katemporanyo.

Paano si Enoc tinawan nin “patotoo na napaoyonan nia an Dios”? Ano an saiyang ebidensia? Posible na pinapangyari nin Dios na pangalipadngan si Enoc, kun paanong si apostol Pablo “inagaw,” o ibinalyo, na malinaw na nag-aako nin sarong bisyon kan maabot na espirituwal na paraiso kan Kristianong kongregasyon. (2 Corinto 12:​3, 4) An patotoo, o ebidensia, na an Dios napaooyonan ni Enoc puedeng may kaibang patanaw paagi sa bisyon kan maabot na Paraiso sa daga na dian an gabos na nabubuhay masuportar sa soberaniya nin Dios. Posible na mantang si Enoc nakaeeksperyensia nin siring na nakaoogmang marhay na bisyon na sia kinua nin Dios paagi sa daing kolog na kagadanan tanganing matorog sagkod sa aldaw na sia buhayon liwat. Minalataw na, siring sa nangyari ki Moises, ilinobong ni Jehova an bangkay ni Enoc, huli ta “dai na sia nanompongan minsan saen.”​—Hebreo 11:5; Deuteronomio 34:​5, 6; Judas 9.

An Hula Naotob

Ngonyan, ipinahahayag kan Mga Saksi ni Jehova an kahulogan kan hula ni Enoc. Gikan sa Kasuratan, ipinaheheling ninda kun paano iyan maootob kun laglagon na nin Dios an mga maraot sa harani nang ngapit. (2 Tesalonica 1:​6-10) Dahelan sa saindang mensahe dai sinda nagugustohan kan mga tawo, huli ta iyan napapalaen na marhay sa mga pagmansay asin pasohan kan kinaban na ini. Dai ninda ikinabibigla an pagtumang na inaatubang ninda, huli ta pinatanidan ni Jesus an saiyang mga parasunod: “Ikaoongis kamo nin gabos na tawo huli sa ngaran ko.”​—Mateo 10:22; Juan 17:14.

Minsan siring, arog ni Enoc, an mga Kristiano sa presenteng aldaw ginagarantiyahan na sa maabot sinda ililigtas sa mga kaiwal ninda. Si apostol Pedro nagsurat: “Si Jehova tataong magligtas sa mga tawong may diosnon na debosyon hale sa pagbalo, alagad itagama an mga tawong maraot para sa aldaw nin paghokom tanganing gadanon.” (2 Pedro 2:9) Tibaad pagmarahayon nin Dios na haleon an sarong problema o masakit na situwasyon. An paglamag tibaad matapos. Pero, kun dai, aram nia kun paano ‘matao nin luluwasan’ tanganing mapangganahan kan saiyang banwaan an mga pagbalo sa sainda. Nagtatao pa ngani si Jehova nin “kapangyarihan na lihis sa ordinaryo” kun kinakaipuhan.​—1 Corinto 10:13; 2 Corinto 4:7.

Bilang “an parabalos sa mga maigot na naghahanap sa saiya,” bebendisyonan man ni Jehova nin buhay na daing katapusan an saiyang fiel na mga lingkod. (Hebreo 11:6) Para sa dakulang mayoriya sa sainda, ini magigin buhay na daing sagkod sa sarong paraiso digdi sa daga. Arog ni Enoc, ibalangibog logod niato na daing takot an mensahe nin Dios. May pagtubod, gibohon niato ini sa ibong nin mga kasakitan.

[Mga Nota sa Ibaba]

[Kahon sa pahina 30]

Linanghadan an Ngaran nin Dios

Mga apat na siglo bago si Enoc, namundag an makoapo ni Adan na si Enos. “Kaidto nagpoon an pag-apod sa ngaran ni Jehova,” an sabi kan Genesis 4:26. An nagkapirang iskolar sa lenguaheng Hebreo nagtutubod na an bersikulong ini maninigong magsabing “nagpoon na may paglanghad” na apodon an ngaran nin Dios o, “kaidto nagpoon an paglanghad.” Mapadapit sa peryodong iyan sa kasaysayan, an Targum sa Jerusalem nagsasabi: “Idto an kapag-arakian na sa mga aldaw kaiyan sinda nagpoon na magkasala, asin gibohon na idolo an saindang sadiri, asin bansagan an saindang mga idolo kan ngaran kan Tataramon kan Kagurangnan.”

Kan panahon ni Enos lakop na marhay an salang paggamit sa ngaran ni Jehova. Posible na an ngaran nin Dios iinaplikar kan mga tawo sa saindang sadiri o sa nagkapirang tawo na paagi sa sainda nagsagin sindang minadolok ki Jehova Dios sa pagsamba. O tibaad iinaplikar ninda an ngaran nin Dios sa mga idolo. Sa arin man na kaso, an rasa nin tawo higot na iginapos ni Satanas na Diablo sa siod nin idolatriya. Kan panahon na mamundag si Enoc, bihirang manompongan an tunay na pagsamba. An siisay man na arog ni Enoc, na namuhay sono sa katotoohan asin ihinulit iyan, dai nagustohan asin kun siring pinaglamag.​—Ikomparar an Mateo 5:​11, 12.

[Kahon sa pahina 31]

Nagduman daw si Enoc sa Langit?

“Huli sa pagtubod si Enoc ibinalyo tanganing dai makaheling nin kagadanan.” Sa pagtradusir ninda kan kabtang na ini kan Hebreo 11:5, an nagkapirang traduksion kan Biblia nagpaparisa na si Enoc dai man talaga nagadan. Halimbawa, an A New Translation of the Bible, ni James Moffatt, nagsasabi: “Huli sa pagtubod kaya si Enoc dinara sa langit kaya sia nungkang nagadan.”

Minsan siring, mga 3,000 na taon pakalihis kan kaaldawan ni Enoc, si Jesu-Cristo nagsabi: “Mayo nin tawo na nagsakat sa langit kundi idtong naghilig hale sa langit, an Aki nin tawo.” (Juan 3:13) An The New English Bible nagsasabi: “Dai nin siisay man na nagsakat sa langit kasuarin man apuera sa saro na naghilig hale sa langit, an Aki nin Tawo.” Kan sabihon iyan ni Jesus, maski sia dai pa nagsakat sa langit.​—Ikomparar an Lucas 7:28.

Sinasabi ni apostol Pablo na si Enoc asin an iba pa na minakompuesto sa dakulang panganoron nin mga saksi kaidtong mga panahon bago kan mga Kristiano “gabos nagkagaradan” asin ‘dai nagkamit kan kaotoban kan panuga.’ (Hebreo 11:​13, 39) Taano? Huli ta an gabos na tawo, kabale si Enoc, nagmana nin kasalan ki Adan. (Salmo 51:5; Roma 5:​12) An solamenteng paagi nin kaligtasan iyo an pantubos na atang ni Cristo Jesus. (Gibo 4:​12; 1 Juan 2:​1, 2) An pantubos na iyan dai pa ibinayad kan kaaldawan ni Enoc. Kun siring, si Enoc dai nagduman sa langit, kundi natotorog sia sa kagadanan na naghahalat nin pagkabuhay liwat digdi sa daga.​—Juan 5:​28, 29.

[Pasasalamat para sa pinagkuanan kan retrato sa pahina 29]

Rineprodusir sa Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s