Epafras—“Sarong Fiel na Ministro kan Cristo”

SIISAY an nagpundar kan Kristianong mga kongregasyon sa Corinto, Efeso, asin Filipos? Tibaad dai kamo mag-aalangan sa pagsimbag: ‘Si Pablo, an “apostol sa mga nasyon.”’ (Roma 11:13) Tama kamo.

Minsan siring, siisay an nag-establisar kan mga kongregasyon sa Colosas, Hierapolis, asin Laodicea? Minsan ngani dai niato masisierto, tibaad sia sarong lalaki na an ngaran Epafras. Ano man an nangyari, tibaad gusto nindong maaraman nin orog pa an manongod sa paraebanghelyong ini, mantang sia inaapod na “sarong fiel na ministro kan Cristo.”​—Colosas 1:7.

Paraebanghelyo sa Kababan nin Lico

An ngaran na Epafras pinahalipot na Epafrodito. Alagad si Epafras dai dapat ikamalo ki Epafrodito na taga-Filipos. Si Epafras taga-Colosas, saro sa tolong sentro kan Kristianong mga kongregasyon sa kababan sa Salog nin Lico, sa Asia Minor. An Colosas 18 kilometros sana hale sa Laodicea asin 19 kilometros hale sa Hierapolis, sa suanoy na rehion nin Frigia.

Dai sinasabi nin malinaw sa Biblia kun paano nakaabot sa Frigia an maogmang bareta kan Kahadean nin Dios. Minsan siring, presente an mga taga-Frigia sa Jerusalem kan aldaw nin Pentecostes 33 C.E., tibaad an nagkapira sa sainda taga-Colosas. (Gibo 2:​1, 5, 10) Durante kan ministeryo ni Pablo sa Efeso (mga 52-55 C.E.), an patotoo na itinao sa lugar na iyan mapuersa asin epektibong marhay kaya bako sana an mga taga-Efeso kundi siring man “an gabos na nag-eerok sa distrito nin Asia nakadangog kan tataramon kan Kagurangnan, kapwa mga Judio asin mga Griego.” (Gibo 19:10) Minalataw na si Pablo dai naghulit kan maogmang bareta sa bilog na Kababan nin Lico, mantang an dakol na nagin Kristiano sa lugar na iyan dai sia noarin man naheling.​—Colosas 2:1.

Oyon ki Pablo, an saro na nagtokdo sa mga taga-Colosas manongod sa “dai na kutana maninigong kabootan nin Dios sa katotoohan” iyo si Epafras. An bagay na inapod ni Pablo an kapwa paragibo na ini na “sarong fiel na ministro kan Cristo para sa samo” nagpapaheling na si Epafras aktibong paraebanghelyo sa lugar na iyan.​—Colosas 1:​6, 7.

Kapwa si apostol Pablo asin an paraebanghelyo na si Epafras igwa nin dakulang pagmakolog sa espirituwal na ikararahay kan saindang mga kapagtubod sa Kababan nin Lico. Bilang an “apostol sa mga nasyon,” seguradong naggayagaya si Pablo na madangog an bareta dapit sa saindang pag-oswag. Sa katunayan, ki Epafras nadangog ni Pablo an manongod sa espirituwal na kamugtakan kan mga taga-Colosas.​—Colosas 1:​4, 8.

An Report ni Epafras

An mga taga-Colosas napaatubang sa mga problema na may igong gabat tanganing kombensiron si Epafras na magbiahe nin halawig pasiring sa Roma para sa espesipikong katuyohan na ipakipag-olay an mga bagay na ini ki Pablo. Malinaw na an detalyadong report na ginibo ni Epafras an nagpahiro ki Pablo na gumibo nin duwang surat sa mga tugang na idto na dai man nia kutana midbid. An saro iyo an surat sa mga taga-Colosas. An saro pang surat, na minalataw na dai napreserbar, ipinadara sa mga taga-Laodicea. (Colosas 4:16) Rasonableng isipon na an mga laog kan mga surat na idto may katuyohan na asikasohon an mga pangangaipo kan mga Kristianong idto siring sa namasdan ni Epafras. Ano an naheling niang mga pangangaipo? Asin ano an ipinaheheling kaini sa sato manongod sa saiyang personalidad?

An surat sa mga taga-Colosas garo nagpaparisa na nahahadit si Epafras na namemeligro an mga Kristiano sa Colosas sa paganong mga pilosopiya may labot sa pagpainda sa sadiri, espiritismo, asin idolatrosong superstisyon. Dugang pa, an Judiong katokdoan dapit sa paglikay sa mga kakanon asin pag-otob nin nagkapirang aldaw tibaad nakaimpluwensia sa nagkapirang miembro kan kongregasyon.​—Colosas 2:​4, 8, 16, 20-​23.

An bagay na si Pablo nagsurat manongod sa mga temang ini nagpapaheling sa sato kun gurano kaalisto asin kasensitibo ni Epafras sa mga pangangaipo kan saiyang mga kapwa Kristiano. Nagpaheling sia nin mamomoton na pagmakolog sa saindang espirituwal na ikararahay, na mapagrisa sa mga peligro kan mga kamugtakan na kinabubuhayan ninda. Hinagad ni Epafras an hatol ni Pablo, asin ipinaheheling kaini na sia mapakumbaba. Tibaad namatean nia an pangangaipo na pahatol sa saro na may orog na eksperyensia. Sa paano man, si Epafras madonong na naghiro.​—Talinhaga 15:22.

Sarong Tawo na Nagpahalaga sa Pamibi

Sa konklusyon kan surat na ipinadara nia sa mga Kristiano na taga-Colosas, si Pablo nagsabi: “Si Epafras, na gikan sa tahaw nindo, sarong oripon ni Cristo Jesus, nagpapaabot sa saindo kan saiyang mga pangungumusta, na danay na nagmamaigot para sa saindo sa saiyang mga pamibi, tangani na sa katapustapusi kamo makatindog na lubos asin may marigon na panarig sa gabos na kabotan nin Dios. Ako nagpapatotoo nanggad sa saiya na sia naghihingoang gayo manongod sa saindo asin sa mga nasa Laodicea asin sa mga nasa Hierapolis.”​—Colosas 4:​12, 13.

Iyo, dawa kan sia ‘kapwa bihag’ ni Pablo sa Roma, iniisip ni Epafras an saiyang namomotan na mga tugang sa Colosas, Laodicea, asin Hierapolis patin ipinamimibi sinda. (Filemon 23) Sa literal, ‘sia nagsakit’ para sa sainda sa pamibi. Oyon sa iskolar na si D. Edmond Hiebert, an Griegong termino na ginamit digdi tanda nin “sarong magabat asin masakripisyong aktibidad,” bagay na nakaaagid sa “labi-labing kasakitan” sa isip na naeksperyensiahan ni Jesu-Cristo mantang sia namimibi sa tatamnan nin Getsemani. (Lucas 22:44) Si Epafras odok na nagmawot na an saiyang espirituwal na mga tugang na lalaki asin babae makaabot sa pagkadai natatanyog asin lubos na Kristianong pagkamaygurang. Kanigoan na bendisyon para sa mga kongregasyon an siring na tugang na mapag-isip sa espirituwal!

Mantang si Epafras inapod na sarong “namomotan na kapwa oripon,” daing duwa-duwa na namotan sia nin mga kapwa Kristiano. (Colosas 1:7) Kun itinotogot kan mga kamugtakan, an gabos na miembro kan kongregasyon maninigong sueltong magtao kan saindang panahon asin kosog para sa iba na may init asin pagkamoot. Halimbawa, puedeng itao an atension sa pagtabang sa mga may helang, maedad, o iba pa na may espesyal na mga pangangaipo. Tibaad igwa nin manlaenlaen na mga paninimbagan na kaipuhan na asikasohon sa kongregasyon, o tibaad posibleng magkontribwir sa teokratikong mga proyekto sa pagtotogdok.

An pamimibi para sa iba, arog kan ginibo ni Epafras, sarong porma nin sagradong paglilingkod na puedeng gibohon nin gabos. An siring na mga pamibi puedeng kabale an mga kapahayagan nin pagmalasakit para sa mga parasamba ki Jehova na kaipuhan na umatubang sa manlaenlaen na mga peligro o kasakitan na espirituwal o pisikal. Paagi sa satong maigot na paghihingoa sa paaging ini, puede kitang magin arog ni Epafras. An lambang saro sa sato puedeng magkaigwa kan pribilehio asin kagayagayahan na pagigin sarong “namomotan na kapwa oripon” sa pamilya kan fiel na mga lingkod ni Jehova.