Paghilom sa Ngaran kan Kagurangnan
AN PAGBUGTAK nin nakahihilong gas sa tren sa irarom kan daga sa Tokyo, Hapon, kan Marso 1995 guminadan nin 12 katawo, pinapaghelang an rinibo pa, asin nakatabang na ihayag an sarong hilom. An sarong sektang relihioso na inaapod Aum Shinrikyo (Supremong Katotoohan) hilom na nagtipon nin dakol na suplay nin sarin gas, tanganing gamiton sa pag-aabot sa misteryosong mga pasohan.
Pakalihis nin sarong bulan rinumpag nin pagputok nin bomba an sarong edipisyo kan gobyerno pederal sa Siudad nin Oklahoma, E.U.A., asin guminadan nin 167. Garo baga ipinaririsa nin ebidensia na an pagsalakay medyo may koneksion sa dai pagkaoyon kan gobyerno asin kan kultong relihioso na Branch Davidian sa Waco, Texas, eksaktong duwang taon bago kaini. Kan panahon na idto mga 80 miembro kan kulto an nagadan. An pagputok nin bomba naghayag man nin sarong bagay na hilom sa kadaklan na tawo: Dakol na paramilitar na grupong garo mga soldados an nagpupunsionar ngonyan sa Estados Unidos, na an kisuerra nagkapira kaiyan pinagdududahan na hilom na nagpaplano nin aksion kontra sa gobyerno.
Pagkatapos, mantang naghihinanapos an 1995, an sinolong mga bangkay nin 16 katawo nanompongan sa sarong makahoy na lugar harani sa Grenoble, Pransia. Mga miembro sinda kan Orden kan Templo Solar, sarong sadit na kultong relihioso na napabareta sa Switzerland asin Canada kan Oktubre 1994 kan an 53 na miembro kaiyan magsalang naghugot o ginadan. Alagad ta minsan pagkatapos kan trahedyang ini, an sekta nagpadagos. Sagkod ngonyan, an motibasyon asin mga pasohan kaiyan nagdadanay na hilom.
An mga Peligro nin Paghilom na Relihioso
Huli sa siring na mga pangyayari, makangangalas daw na pagsuspetsahan nin dakol na tawo an mga grupong relihioso? Tunay na mayo nin magugustong sumuportar sa sarong hilom na organisasyon—relihioso o bakong relihioso—na inaabuso an saiyang pagtitiwala asin pinapangyayari siang aboton an mga pasohan na dai nia inooyonan. Pero ano an magigibo nin mga tawo tanganing makalikay na masiod sa pakikilabot sa hilom na mga sosyedad na kustionable?
Malinaw na an siisay man na nag-iisip na magmiembro sa sarong hilom na sosyedad magigin madonong na seguradohon an tunay na mga katuyohan kaiyan. An pamimirit nin mga katood o kamidbid maninigo na likayan, asin an mga desisyon kaipuhan na basado bakong sa emosyon kundi sa mga katunayan. Girumdomon, may posibilidad na an indibiduwal mismo—bakong an iba—an maagi nin ano man na posibleng mga epekto.
An pagsunod sa mga prinsipyo kan Biblia an pinakaseguradong paagi nin paglikay sa peligrosong mga grupo na an mga motibo bakong kagalanggalang. (Isaias 30:21) Kalabot digdi an pagdadanay na neutral sa politika, pagpaheling nin pagkamoot sa iba, minsan sa mga kaiwal, paglikay sa “mga gibo kan laman,” asin pagkultibar kan mga bunga kan espiritu nin Dios. Orog sa gabos, an tunay na mga Kristiano dapat na bakong kabtang kan kinaban, kun paanong si Jesus bakong kabtang kaiyan, asin dai puede digdi an pagpartisipar sa kinabanon na hilom na mga sosyedad—Galacia 5:19-23; Juan 17:14, 16; 18:36; Roma 12:17-21; Santiago 4:4.
An Mga Saksi ni Jehova maigot na mga estudyante kan Biblia na isinasaboot an saindang pagtubod asin naghihingoang hayag na mamuhay sono dian. Sa bilog na kinaban, sinda midbid na marhay bilang relihiosong grupo na ‘hinahanap an katoninongan asin ginigibo iyan.’ (1 Pedro 3:11) An saindang librong Jehovah’s Witnesses—Proclaimers of God’s Kingdom tamang nagsasabi: “An Mga Saksi ni Jehova bako nanggad na hilom na sosyedad. An saindang mga tinutubod na basado sa Biblia lubos na ipinaliliwanag sa mga publikasyon na makukua nin gabos. Dugang pa, naggigibo sinda nin espesyal na paghihingoa na imbitaran an publiko na umatender sa mga pagtiripon tanganing maheling asin madangog mismo ninda an nangyayari.”
An tunay na relihion bako nanggad na mahinilom. An mga nagsasamba sa tunay na Dios pinagbotan na dai itago kun siisay sinda o tahoban an saindang katuyohan bilang Mga Saksi ni Jehova. An enot na mga disipulo ni Jesus pinano an Jerusalem kan saindang katokdoan. Dai sindang tago-tago kun dapit sa saindang mga tinutubod asin aktibidad. Totoo man iyan sa Mga Saksi ni Jehova ngonyan. Siempre, kun salang ipagbawal nin diktatoryal na mga rehimen an katalingkasan sa pagsamba, may pagmamaan asin kapusoan na ipapadagos kan mga Kristiano an saindang aktibidad, na kinukuyog an “Dios bilang namamahala kisa sa mga tawo,” sarong situwasyon na ipinirit sa sainda huli sa saindang mapusong pagpatotoo sa publiko.—Gibo 5:27-29; 8:1; 12:1-14; Mateo 10:16, 26, 27.
Kun suminabong sa isip nindo na an Mga Saksi ni Jehova tibaad sarong hilom na kulto o sekta, iyan posibleng huli ta kakadikit an aram nindo manongod sa sainda. Sierto na iyan an situwasyon kan dakol kaidtong enot na siglo.
An Gibo kapitulo 28 nagsasaysay sa sato dapit sa sarong pakipag-olay ni apostol Pablo sa Roma sa “pangenot na mga lalaki kan mga Judio.” Sinda nagsabi sa saiya: “Sa paghona mi tama na madangog sa saimo kun ano an saimong mga iniisip, huli ta an totoo kun dapit sa sektang ini naaaraman mi na sa gabos na lugar iyan pinaglilibak.” (Gibo 28:16-22) Bilang simbag, “ipinaliwanag [ni Pablo] an bagay sa sainda paagi sa pagtao nin lubos na patotoo manongod sa kahadean nin Dios,” asin “an nagkapira nagpoon na tumubod.” (Gibo 28:23, 24) Tunay na para sa saindang nagdadanay na pakinabang na aramon an aktuwal na mga katunayan mapadapit sa tunay na Kristianismo.
Mantang sinda dusay sa paglilingkod sa Dios nin hayag asin sa publiko, an Mga Saksi ni Jehova maoogmang ihayag an malinaw na mga impormasyon kan saindang aktibidad asin mga tinutubod sa siisay man na gustong makaaram kan mga katunayan. Taano ta dai kamo magsiyasat mismo, sa siring kamo mapasa kamugtakan na tamang maimpormaran dapit sa saindang pagtubod?
[Retrato sa pahina 6]
An Mga Saksi ni Jehova naoogmang ihayag kun sairisay sinda asin kun ano an ginigibo ninda