Nagigirumdoman daw Nindo?

Nanompongan daw nindo na may praktikal na halaga sa saindo an dai pa sana nahahaloy na mga luwas kan An Torrengbantayan? Kun siring taano ta dai baloon an saindong memorya kan minasunod na mga hapot?

◻ Magigin siring sa ano an Armagedon? (Kapahayagan 16:​14, 16)

Iyan dai magigin nuklear na apocalipsis o grabeng kapahamakan na poprobokaron nin mga tawo. Dai, iyan ralaban nin Dios tanganing taposon an gabos na ralaban nin tawo, pohoon an gabos na nagpapalakop kan siring na mga ralaban, asin tawan nin tunay na katoninongan an mga namomoot sa katoninongan. Iyan dai maaatraso. (Habacuc 2:3)​—4/15, pahina 17.

◻ Anong klaseng kasal an nagtatao nin onra ki Jehova?

An kasal na dian nangongorog an espirituwal na mga aspekto kisa sa kinabanon na gawe-gawe tunay na magtatao nin onra ki Jehova. Ikaoogma nin mga Kristiano an okasyon na iyan kun lilikayan ninda an marigsok na kinabanon na mga kostumbre, superstisyon, asin pagpalabilabi; kun dai ninda itinotogot na iyan makaentremeter sa regular na teokratikong mga aktibidad; asin kun sinda nagpapaheling nin kababaan nin boot imbes na pagpaabaw-abaw.​—4/15, pahina 26.

◻ Ano an midbidan sa tawong may integridad?

An tawong may integridad puedeng pagtiwalaan, bako sanang kan saiyang kapwa tawo kundi, orog na mahalaga, nin Dios. An kadalisayan sa puso kan siring na tawo naheheling sa saiyang mga gawe-gawe. Mayo sia nin pagsaginsagin. Bako siang tuso o maraot. (2 Corinto 4:2)​—5/1, pahina 6.

◻ Taano ta nagsabi si Jeremias: “Marahay sa makosog na tawo na sia magdara kan sakal sa saiyang pagkabarobata”? (Lamentacion 3:27)

An pakanood na makapanggana sa mga pagbalo mientras na hoben pa nakatatabang na andamon an saro na atubangon an mga angat nin pagkaadulto. (2 Timoteo 3:12) An mga pakinabang sa pagigin fiel nakalalabi nanggad sa ano man na temporaryong kaginhawahan na puedeng ibunga nin pakikikompromiso.​—5/1, pahina 32.

◻ Ano an ipinanganino kan paglataw ni Moises asin Elias sa bisyon nin transpigurasyon?

Sa konteksto kan transpigurasyon, si Moises asin Elias angay na mga simbolo kan linahidan na mga tugang ni Jesus. Na sinda, siring man si Jesus, “nagpaheling na may kamurawayan” nagsimbolisar na an fiel na linahidan na mga Kristiano ‘iribang mapamumuraway’ kaiba ni Jesus sa areglo kan langitnon na Kahadean. (Lucas 9:​30, 31; Roma 8:​17; 2 Tesalonica 1:10)​—5/15, pahina 12, 14.

◻ Ano an “sagradong hilom” nin Dios? (1 Corinto 2:7)

An “sagradong hilom” nin Dios nasesentro ki Jesu-Cristo. (Efeso 1:​9, 10) Minsan siring, iyan bako sanang an pagpamidbid ki Jesus bilang iyo an ipinanugang Mesiyas. Kalabot dian an sarong langitnon na gobyerno, an Mesiyanikong Kahadean nin Dios, asin kabale an kabtang na iinasignar ki Jesus sa katuyohan nin Dios.​—6/1, pahina 13.

◻ Paano maninigong mansayon nin sarong Kristiano an paggurang o helang? Imbes na mansayon an siring na mga pagbalo bilang nakalilimitar sa saiyang paglilingkod ki Jehova, maninigo na mansayon nia iyan na sarong oportunidad na dugangan an saiyang pagsarig sa saiya. Maninigo man niang girumdomon na an halaga nin sarong Kristiano sinosokol bako sanang sono sa kadakolan kan ginigibo nia kundi sono man sa saiyang pagtubod asin rarom nin pagkamoot. (Marcos 12:​41-​44)​—6/1, pahina 26.

◻ Paano an paggamit ni Jehova nin mga tawo imbes na mga anghel sa pagsurat kan Biblia nagpapaheling kan saiyang dakulang kadonongan?

Kun biyong mayo an sa tawong kualidad, tibaad madepisilan kitang saboton an mensahe kan Biblia. Siring man, yaon sa Biblia an init, pagkalaenlaen, asin pan-akit na itinatao dian kan sa tawong kualidad.​—6/15, pahina 8.

◻ Ano an sekreto sa kaogmahan nin pamilya?

An sekreto yaon sa mga pahina kan Tataramon nin Dios, an Biblia, asin sa pag-aplikar kan mga prinsipyo kaiyan, siring baga kan pagpopogol sa sadiri, pagrekonoser sa pagkapayo, marahay na komunikasyon, asin pagkamoot.​—6/15, pahina 23, 24.

◻ Paano an pagpaomay ni Jesus laen na marhay sa komun na ginigibo kan mga naghihingako na may kapangyarihan na magpaomay ngonyan?

Mayo nin makosog na emosyonal na pasale an kadaklan asin mayo nin dramatikong pagkataranta sa parte ni Jesus. Dugang pa, nungkang nasudya si Jesus sa pagpaomay sa may kamatean huli sa sarahotan na kulang an itinao nindang dolot o na sinda kulang nin pagtubod.​—7/1, pahina 5.

◻ Paano tinabangan ni Jehova an saiyang banwaan na magkaigwa nin lugar sa saiyang banal na katuyohan mapadapit sa saiyang ngaran asin Kahadean?

Enot, ipinagkatiwala ni Jehova sa saiyang banwaan an katotoohan. Ikaduwa, itinao nia sa sainda an saiyang banal na espiritu. Asin ikatolo, yaon sa sato an pambilog na kinaban na kasararoan nin magturugang asin an organisasyonal na areglo ni Jehova para sa pagsamba.​—7/1, pahina 19, 20.

◻ Ano an birtud?

An birtud pagigin ekselente sa moral, karahayan, tamang paghiro asin pag-isip. Iyan bakong kualidad na daing hiro-hiro kundi aktibo, positibo. An kahulogan nin birtud bako sanang paglikay sa kasalan; iyan nangangahulogan nin pagmamaigot na magibo an marahay. (1 Timoteo 6:11)​—7/15, pahina 14.

◻ Ano an pinakamahalagang pamana na ikatatao nin mga magurang sa saindang mga aki?

An pinakamahalagang pamana iyo an sainda mismong halimbawa nin pagpaheling nin pagkamoot sa iba. Nangongorog nanggad, kaipuhan na maheling asin madangog nin mga aki an saindang mga magurang na nagpapahayag asin nagpapaheling nin tunay na pagkamoot sa Dios sa gabos nindang ginigibo.​—7/15, pahina 21, 22.

◻ Ano an nagkapirang kaipuhan na marhay para sa epektibong pampamilyang pag-adal?

An pampamilyang pag-adal dapat na regular. Dapat nindong ‘tuboson an panahon’ para sa pag-adal. (Efeso 5:​15-17) Gibohon na nakaaanimar an mga panahon nin pag-adal para sa mga aki paagi sa paggibong buhay sa Biblia. Tanganing ikaogma iyan kan mga aki, dapat na mamatean ninda na sinda kalabot.​—8/1, pahina 26, 28.