Ginibo Ninda an Kabotan ni Jehova

Sarong Ama na Andam na Magpatawad

INAPOD iyan na an nakalalabi sa gabos na halipot na estorya na isinurat kasuarin man​—na may marahay na dahelan. An parabola ni Jesus manongod sa pagkamoot nin sarong ama sa saiyang nawarang aking lalaki siring sa sarong bintana na dian kahangahangang natatanaw niato an pakikidamay nin Dios para sa nagsosolsol na mga nagkasala.

Nawara Asin Nakua

An sarong tawo may duwang aking lalaki. An ngohod nagsabi sa saiya: ‘Gusto ko nang makua an pamana sa sako ngonyan, imbes na maghalat sagkod na ika magadan.’ Suminunod an ama, na posibleng itinao sa saiya an ikatolong kabtang kan gabos na sadiri nia​—an legal na kahirasan para sa ngohod sa duwang aking lalaki. (Deuteronomio 21:17) Dali-daling tinipon kan hoben an saiyang mga rogaring asin nagduman sa harayong daga kun saen ginasto nia an gabos niang kuarta sa marigsok na pamumuhay.​—Lucas 15:​11-​13.

Dangan nangyari an makuring gutom. Sa pagkadesesperar, an hoben na lalaki nag-ako nin trabaho bilang paraataman nin mga orig​—sarong makasosopog na okupasyon para sa sarong Judio. (Levitico 11:​7, 8) Kulang na marhay an kakanon kaya pinonan niang himuyawoton an mga algarroba na kakanon kan mga orig! Sa katapustapusi, nakapag-isip-isip an hoben na lalaki. ‘Mas marahay an pagkakan kan mga oripon kan sakong ama kisa sako!’ an inisip-isip nia. ‘Mapuli ako, matuga kan sakong mga kasalan, asin makikimaherak ako na magin saro sa mga tangdanan kan sakong ama.’a​—Lucas 15:​14-​19.

Nagbaklay an hoben na lalaki papuli. Daing duwa-duwa na dakulaon an ipinagbago kan itsura nia. Pero, namidbid sia kan saiyang ama “mantang sia harayo pa.” Napahiro nin pagkaherak, duminalagan sia pasiring sa saiyang aking lalaki, kinugos sia, asin “mapagpadangat na hinadokan sia.”​—Lucas 15:20.

An mainit na pag-akong ini pinagin mas pasil para sa hoben na lalaki na ipahayag an ikinagagabat kan boot nia. “Ama,” sabi nia, “ako nagkasala tumang sa langit asin tumang sa saimo. Ako bako nang angay na apodon pang aki mo. Giboha akong saro sa saimong mga tangdanan.” Inapod kan ama an saiyang mga oripon. “Dali!” nagboot sia. “Kua kamo nin gubing, an pinakamarahay, asin isulot nindo iyan sa saiya, asin bugtake nindo nin singsing an saiyang kamot asin nin sandalyas an saiyang mga bitis. Asin daraha nindo digdi an pinatabang ogbon na baka, bunoa nindo iyan asin magkarakan kita patin mag-ogma, huli ta an aki kong ini gadan na asin nabuhay liwat; sia nawara asin nakua.”​—Lucas 15:​21-24.

Pinonan an plinanong marhay na bangkete, kabale an musika asin pagbayle. Nadangog kan matuang aking lalaki an kaorogmahan mantang papuli hale sa oma. Kan maisihan nia na nagpuli na an saiyang tugang na lalaki asin na ini an dahelan kan kaorogmahan, naggurobgutob sia. ‘Kadakol nang taon na ako nagpaoripon sa saimo, asin ako dai noarin man nakisuway sa saimo, pero dai mo lamang ako tinawan nin ogbon na kanding tangani na makapaggayagaya ako kaiba kan sakong mga katood,’ an reklamo nia sa saiyang ama. ‘Alagad ngonyan pakaabot-abot kan aki mong ini na nagrakwa kan saimong kayamanan, nagpabangkete ka para sa saiya.’ ‘Aki,’ an mapagpadangat na simbag kan saiyang ama, ‘danay kang nasa kaibahan ko, asin an gabos na sakuya saimo. Alagad kaipuhan nanggad kitang maggayagaya huli ta an tugang mo gadan na asin nabuhay. Sia nawara dangan nakua.’​—Lucas 15:​25-32.

Leksion Para sa Sato

An ama sa parabola ni Jesus nagrerepresentar sa satong maheherakon na Dios, si Jehova. Siring sa nawarang aking lalaki, an nagkapirang tawo minahale sa seguridad kan kairiba sa harong nin Dios sa laog nin kadikit na panahon alagad sa huri minabalik. Paano daw minamansay ni Jehova an mga siring? An mga minabalik ki Jehova na may odok sa boot na pagsolsol maaasegurar na “dai sia maghahanap nin sala sagkod lamang, ni na sia magdadanay na anggot sagkod sa panahon na daing katapusan.” (Salmo 103:9) Sa parabola, duminalagan an ama tanganing akoon liwat an saiyang aking lalaki. Kaagid kaiyan, si Jehova bako sanang andam kundi galagang patawadon an nagsosolsol na mga nagkasala. Sia “andam na magpatawad,” asin ginigibo nia iyan nin “bulaos.”​—Salmo 86:5; Isaias 55:​7; Zacarias 1:3.

Sa parabola ni Jesus, an tunay na pagkamoot kan ama pinagin mas pasil para sa aking lalaki na magkaigwa kan kapusoan na bumalik. Alagad konsiderara: Ano daw kutana an nangyari kun isinikwal kan ama an aking lalaki o huli sa makuring kaanggotan sinabihan sia na dai na noarin man bumalik? An siring na aktitud posibleng permanente nang makaparayo kan boot kan hoben na lalaki.​—Ikomparar an 2 Corinto 2:​6, 7.

Kun siring, sa nagkapirang paagi ilinaag kan ama an pundasyon para sa pagbalik kan saiyang aking lalaki kan panahon na ini maghale. Kun beses, dapat na haleon kan Kristianong kamagurangan ngonyan an dai nagsosolsol na mga nagkasala sa kongregasyon. (1 Corinto 5:​11, 13) Sa paggibo kaiyan, mapoponan nindang ilaag an pundasyon para sa pagbalik kan nagkasala paagi sa mamomoton na pagsabi kan mga aksion na puede niang gibohon para sa pagbabalik sa ngapit. An paggirumdom sa siring na odok sa pusong pakimaherak sa huri nakapahiro sa dakol na nawara sa espirituwal na paagi na magsolsol asin nakadagka sa sainda na bumalik sa kairiba sa harong nin Dios.​—2 Timoteo 4:2.

Nagpaheling man an ama nin pakikidamay kan bumalik an saiyang aking lalaki. Dai nahaloy na namatean nia an odok sa boot na pagsolsol kan aking lalaki. Dangan, imbes na mag-insistir na paluwason an gabos na detalye kan paglapas kan saiyang aking lalaki, inako na sana nia liwat ini, asin sia nagpahayag nin dakulang kaogmahan sa paggibo kaiyan. Puedeng arogon nin mga Kristiano an halimbawang ini. Maninigo sindang maggayagaya na nakua na an sarong nawara.​—Lucas 15:10.

An paggawe kan ama malinaw na nagpapaheling na haloy na niang inaantisipar an pagbalik kan saiyang sumbikalan na aking lalaki. Siempre, iyan anino sana kan paghimuyawot ni Jehova para sa gabos na nagbaya sa saiyang kairiba sa harong. “Habo nia na an siisay man malaglag kundi boot nia na an gabos makapagsolsol.” (2 Pedro 3:9) An mga nagsosolsol sa saindang mga kasalan maaasegurar kun siring na bebendisyonan sinda nin “mga panahon nin kaginhawahan hale sa persona ni Jehova.”​—Gibo 3:19.

[Nota sa Ibaba]