Nakapaoogma daw sa Dios an mga Kapiestahan sa Pag-ani?

AN MASISIRAM na prutas, nakaoogmang marhay na mga gulay, asin mga goygoy nin matataba an ngipon na mais na halangkaw na nakatambak nakaaakit na paghelingon. Sa tig-anihan an siring na mga paheling adorno sa mga altar asin pulpito nin mga simbahan sa bilog na Inglaterra. Sa Europa, siring sa iba pang lugar, kadakol na kapiestahan kapwa sa pagpoon asin sa katapusan kan panahon nin pag-ani.

An mga an hanapbuhay nakadepende sa daga nangorognang nagpapasalamat sa ani sa daga. Sa katunayan, hinagad nin Dios sa suanoy na nasyon nin Israel na iselebrar an tolong taonan na kapiestahan na konektadong marhay sa pag-ani. Sa kapinonan nin tigsoli, durante kan Kapiestahan kan Tinapay na Mayo nin Lebadura, an mga Israelita nagdodolot sa Dios nin sarong goygoy kan enot na mga bunga kan inaning sebada. Sa Kapiestahan nin mga Semana (o, Pentecostes) sa huring kabtang kan tigsoli, sinda nagdodolot nin mga tinapay na gibo sa enot na mga bunga kan inaning trigo. Sa tigrakdag minaabot an Kapiestahan nin Pagsaray, na minatapos sa taon nin pagtanom sa Israel. (Exodo 23:​14-​17) An mga kapiestahan na ini “banal na mga kombension” asin mga panahon nin paggayagaya.​—Levitico 23:2; Deuteronomio 16:16.

Kumusta man, kun siring, an mga selebrasyon sa pag-ani sa presenteng panahon? Iyan daw nakapaoogma sa Dios?

Mga Koneksion sa Pagano

Napupurisaw sa pagkakinabanon kan tradisyonal na bangkete sa tig-anihan asin sa pagbuburat na kaiba sa selebrasyon na iyan, an sarong klerigong Anglicano sa Cornwall, Inglaterra, nagdesisyon kan 1843 na ibalik an sarong kostumbre sa pag-ani kan edad media. Nagkua sia nin nagkapira sa enot na inaning tipasi asin hale dian naggibo nin tinapay para sa selebrasyon nin komunyon sa saiyang simbahan. Sa paggibo kaiyan, ipinagpadagos nia an kapiestahan nin Lammas​—sarong “Kristianong” selebrasyon na may mga nagsasabing naghale sa suanoy na pagsamba sa dios kan mga Celta na si Lugh.a Sa siring, an presenteng Anglicanong kapiestahan may paganong pinaghalean.

Kumusta man an iba pang mga selebrasyon na ginigibo sa katapusan kan panahon nin pag-ani? Sono sa Encyclopædia Britannica, an dakol sa mga kostumbre sa mga kapiestahan na ini masususog an pinaghalean sa “animistikong paniniwala sa espiritu kan mais [tipasi] o inang mais.” Sa nagkapirang rehion an mga paraoma naniwala na may espiritu na nag-eerok sa ultimong goygoy nin tipasi na aanihon. Tanganing mapahale an espiritu, rinarapas ninda an goygoy sagkod na marakdag an mga tipasi. Sa iba pang lugar sinasalasala ninda an nagkapirang poon kan mais na magin “munyekang mais” na sinasaray ninda para sa “kapaladan” sagkod sa pagsabwag nin banhi sa sunod na taon. Dangan iinaarado giraray ninda an mga puso nin mais sa daga sa paglaom na bebendisyonan kaini an bagong ani.

May mga leyenda na ikinokonektar an tig-anihan sa pagsamba sa dios kan Babilonya na si Tamuz, an konsorte kan diosa nin pagkamainaki na si Istar. An pagputol sa hinog nang ohoy nin tipasi katimbang kan mayo pa sa panahon na pagkagadan ni Tamuz. An iba pang mga leyenda ikinokonektar pa ngani an tig-anihan sa pag-atang nin tawo​—sarong gibo na ikinauuyam nin makuri ni Jehova Dios.​—Levitico 20:2; Jeremias 7:​30, 31.

Ano an Pagheling nin Dios?

An relasyon nin Dios sa suanoy na Israel malinaw na naghahayag na si Jehova, an Kaglalang asin Burabod nin buhay, naghagad kan dai nababangang debosyon kan mga nagsasamba sa saiya. (Salmo 36:9; Nahum 1:2) Kan kaaldawan ni propeta Ezequiel, an kaugalean na pagtangis para sa dios na si Tamuz sarong ‘dakulang makauuyam nin makuring bagay’ sa pagheling ni Jehova. Ini, pati an iba pang rituwal nin falsong relihion, nagin dahelan na dai dangogon nin Dios an mga pamibi kan falsong mga parasamba na idto.​—Ezequiel 8:​6, 13, 14, 18.

Ikomparar an kalaenan kaini sa ipinaotob ni Jehova Dios sa Israel may koneksion sa pag-ani. Sa Kapiestahan nin Pagsaray, an mga Israelita may solemneng pagtiripon na durante kaiyan an mga hoben asin gurang, mayaman asin dukha, nag-iistar sa temporaryong mga erokan na may dekorasyon na marambong na mga dahon nin magagayon na marhay na kahoy. Ini panahon nin dakulang paggayagaya para sa sainda, alagad panahon man iyan na pensaron an pagliligtas na itinao nin Dios sa saindang mga apoon sa panahon kan Exodo hale sa Egipto.​—Levitico 23:​40-​43.

Durante kan mga kapiestahan kan mga Israelita, may mga dolot na itinatao ki Jehova, an iyo sanang tunay na Dios. (Deuteronomio 8:​10-​20) Kun dapit sa nasambitan sa enotan na animistikong mga paniniwala, saen man an Biblia dai nagsasabi na an mga ani, arog baga nin mga goygoy nin trigo, igwa nin kalag.b Asin an Kasuratan malinaw na nagpapaheling na an mga idolo nagdadanay na daing buhay, dai nakatataram, nakaheheling, nakadadangog, nakapaparong, nakamamate, o nakatatabang man lamang sa mga nagsasamba sa sainda.​—Salmo 115:​5-8; Roma 1:​23-25.

An mga Kristiano ngonyan bako nang sakop kan tipan nin Ley na ipinakipagtipan nin Dios sa suanoy na nasyon nin Israel. Sa katunayan, iyan “hinale [nin Dios] paagi sa pagpako kaiyan sa hariging pasakitan” ni Jesus. (Colosas 2:​13, 14) An mga lingkod ni Jehova sa presenteng panahon namumuhay sono sa “ley kan Cristo” asin mapag-apresyar sa gabos na itinatao nin Dios.​—Galacia 6:2.

Si apostol Pablo sayod na nagsabi na an Judiong mga kapiestahan “anino kan mga bagay na madatong,” na sinasabi pa, “alagad an katunayan dian ki Cristo.” (Colosas 2:​16, 17) Bilang resulta, inaako kan tunay na mga Kristiano an pangangatanosan kan Kasuratan: “An mga bagay na iinaatang kan mga nasyon iinaatang ninda sa mga demonyo, asin bakong sa Dios . . . Dai kamo puedeng uminom sa kopa ni Jehova asin sa kopa nin mga demonyo.” (1 Corinto 10:​20, 21) Saro pa, kinukuyog kan mga Kristiano an pagboot na ‘dai dumotdot sa maating bagay.’ An mga kapiestahan daw sa pag-ani sa saindong komunidad may pagkapagano o konektado sa falsong relihion? Kun iyo, malilikayan kan tunay na mga Kristiano na mapaanggot si Jehova paagi sa pagsayumang magkaigwa nin ano man na pakikilabot sa siring na naatian na pagsamba.​—2 Corinto 6:17.

Kun an sarong mapag-apresyar na aki mag-ako nin regalo hale sa saiyang ama, siisay an pinasasalamatan nia? An sarong biyong estranghero o an saiyang magurang? Paagi sa odok sa pusong pamibi an mga nagsasamba sa Dios aroaldaw na nagpapasalamat ki Jehova, an saindang langitnon na Ama, para sa saiyang bulaos na pagkabuka nin palad.​—2 Corinto 6:​18; 1 Tesalonica 5:17, 18.

[Mga Nota sa Ibaba]