Nagpapasalamat sa Halawig na Buhay sa Paglilingkod ki Jehova
ISINAYSAY NI OTTILIE MYDLAND
Sa huring kabtang kan ika-19 siglo, an mga barkong panlayag magkakataraed na nakaduong sa pier nin Kopervik sa solnopan na Norway. Kan mga aldaw na idto may mga tawo asin kabayo na nagguguyod nin mga kareta sa mga tinampo. An mga tawo naggagamit nin mga gasera bilang ilawan, asin an pintado nin puti na kahoy na mga harong pinaiinit nin kahoy asin uring. Namundag ako duman kan Hunyo 1898, an ikaduwa sa limang aki.
KAN 1905, si Tatay mayo nin trabaho, kaya nagduman sia sa Estados Unidos. Nagpuli sia pakalihis nin tolong taon na may darang maleta na pano nin nakaoogmang mga regalo para sa mga aki asin mga telang seda patin iba pang mga bagay para ki Nanay. Alagad an saiyang pinakamahalagang mga rogaring iyo an mga tomo ni Charles Taze Russell na may titulong Studies in the Scriptures.
Si Tatay nagpoon na ipakipag-olay sa mga amigo asin paryente an mga bagay na saiyang nanodan sa mga librong ini. Sa mga pagtiripon sa lokal na kapilya, saiyang ginamit an Biblia tanganing ipaheling na mayong nagkakalayong impierno. (Eclesiastes 9:5, 10) Kan 1909, an taon pakabuelta ni Tatay hale sa Estados Unidos, si Tugang na Russell nagbisita sa Norway asin nagtao nin mga pahayag sa Bergen asin Kristiania, na ngonyan Oslo. Si Tatay nagduman sa Bergen tanganing maghinanyog sa saiya.
An kadaklan na tawo sinahotan si Tatay nin pagpalakop nin falsong mga katokdoan. Naherak ako saiya asin tinabangan ko sia na idistribwir an mga pulyeto sa Biblia sa kataraed. Kan 1912, tinawan ko nin pulyeto dapit sa impierno an aking babae nin sarong klerigo. Minuda nia kami ni Tatay. Nabigla ako na an aking babae nin sarong klerigo makagagamit nin siring na usmak na tataramon!
An ibang Mga Estudyante sa Biblia, na apod kaidto sa Mga Saksi ni Jehova, paminsanminsan nagbibisita sa samo sa Kopervik, kabale si Theodor Simonsen, sarong may kakayahan na espiker. Iniimbitaran ko an mga tawo sa mga pahayag na saiyang itinatao sa samong harong. Bago an saiyang pahayag pinatutugtog nia an sitara asin nagkakanta, asin pakatapos kan saiyang pahayag minaawit sia nin pamamaaram na kanta. Hararom an paggalang mi sa saiya.
An saro pang nagin bisita sa samong harong iyo si Anna Andersen, sarong colporteur, o bilog na panahon na ministro. Pabarobalyo sia nin mga banwaan sa bilog na Norway, sa pangenot paagi sa bisikleta, na nagwawaras nin mga babasahon sa Biblia sa mga tawo. Dati siang opisyal sa Salvation Army asin midbid nia an nagkapirang opisyal sa Salvation Army sa Kopervik. Tinogotan ninda sia na magtao nin pahayag sa Biblia sa saindang tiriponan na harong, asin inimbitaran ko an mga tawo na dumuman asin maghinanyog sa saiya.
An saro pang colporteur na nagbisita sa samo sa Kopervik iyo si Karl Gunberg. An hababa an boot, toninong, alagad mapagpangising lalaking ini, naglingkod man sa panapanahon bilang paratradusir sa sangang opisina sa Oslo. Pakalihis nin pirang taon nagtrabaho kaming magkaibanan duman.
Naimpluwensiahan nin Relihiosong mga Ideya
Kan panahon na idto an kadaklan na tawo bako sanang makosog an pagtubod sa Dios asin sa Biblia kundi pati sa nakagamot na mga paniniwala, siring kan kalayo sa impierno asin Trinidad. Kun siring nakapukaw iyan nin atension kan an Mga Estudyante sa Biblia magtokdo na an mga doktrinang ini bakong kaoyon sa Biblia. Naimpluwensiahan ako kan mapuersang mga sahot kan samong kataraed na si Tatay erehe. Sarong beses tinaraman ko pa ngani sia: “An saindong itinotokdo bakong totoo. Erehiya iyan!”
“Madia digdi, Ottilie,” an pagparigon nia sa boot ko, “asin helinga an sinasabi kan Biblia.” Dangan binasahan nia ako sa Kasuratan. Bilang resulta, an sakong pagsarig sa saiya asin sa saiyang itinotokdo nagtalubo. Inenkaminar nia ako na basahon an Studies in the Scriptures, kaya durante kan tig-init nin 1914, parate akong nakatukaw na nagbabasa sa sarong bolod na natatanaw an banwaan.
Kan Agosto 1914 an mga tawo nagsurusuan sa luwas kan edipisyo nin lokal na diaryo na nagbabasa dapit sa pagputok kan Guerra Mundial I. Nagtunga si Tatay asin naheling nia an nangyayari. “Mabalos sa Dios!” an kagsing nia. Nasabotan nia sa pagputok kan guerra an kaotoban kan mga hula sa Biblia na saiyang ihinuhulit. (Mateo 24:7) An dakol na Estudyante sa Biblia kaidto nagtutubod na sa dai na mahahaloy dadarahon sinda sa langit. Kan dai ini mangyari, an nagkapira nadesganar.
An Sakong Paninindogan Apabor sa Katotoohan sa Biblia
Kan 1915, sa edad na 17, nakatapos ako sa sekondarya asin nagpoon nin sekular na trabaho sa sarong opisina. Pinonan ko kaidtong basahon nin regular an The Watch Tower. Alagad pag-abot sana kan 1918 na ginibo an regular na mga pagtiripon sa Kopervik. Sa primero, lima kami na nag-aatender. Binabasa niamo an mga publikasyon kan Watch Tower Society, siring kan Studies in the Scriptures, asin pinag-oolayan an materyal paagi sa hapot-simbagan. Maski ngani inoomaw ni Nanay sa iba an Mga Estudyante sa Biblia, nungka siang nagin kabilang sa samo.
Sa opisinang pinagtatrabawohan ko, poon kan 1918, namidbid ko si Anton Saltnes, na natabangan kong magin Estudyante sa Biblia. Sa panahon na ini ako nagin nang regular na parahayag asin nabautismohan sa sarong asamblea sa Bergen kan 1921.
Kan Mayo 1925 nagkaigwa nin asamblea para sa bilog na Scandinavia sa Örebro, Sweden. Labi sa 500 an nag-atender, kaibanan si Joseph F. Rutherford, an presidente kan Watch Tower Society. Mga 30 kaming nagbiahe hale sa Oslo lunad sa sarong reserbadong tren.
Iinanunsiar sa asambleang ini na may ititindog na Sangang Opisina para sa Amihanan na Europa sa Copenhagen, Denmark, tanganing mangataman sa gibohon na paghuhulit sa bilog na Scandinavia asin sa mga nasyon na Baltiko. Si William Dey hale sa Scotland an iinasignar na magdirehir sa paghuhulit. Nagustohan siang marhay, asin dai nahaloy inapod siang Dakulang Eskoses. Sa pagpopoon si Tugang na Dey daing aram sa ano man na tataramon sa Scandinavia, kaya minatukaw sia sa hurihan durante kan mga pagtiripon asin asamblea asin inaasikaso an mga aki tanganing an saindang mga magurang makakonsentrar sa sinasabi sa plataporma.
An The Watch Tower kan Marso 1, 1925, ipinaliwanag an Kapahayagan kapitulo 12 asin iyan nagpaliwanag na an kapitulong ini may koneksion sa pagkamundag kan Kahadean nin Dios asin na an pagkamundag na ini nangyari sa langit kan 1914. Nasakitan akong saboton ini, kaya binasa ko nin paorootro an artikulo. Kan sa katapustapusi masabotan ko ini, nakamate ako nin dakulang kaogmahan.
Kan gibohon an mga pagliliwat sa samong pakasabot sa mga tema sa Biblia, an nagkapira nasingkog asin naghale sa banwaan nin Dios. Alagad kun an siring na pagliliwat masakit saboton, permi kong binabasa nin paorootro an materyal tanganing pagmaigotan na masabotan an pangangatanosan. Kun dai ko pa giraray nasasabotan an bagong paliwanag, hinahalat ko an paglilinaw. Paorootro na binalosan ako kan siring na pagpapasensia.
Paglilingkod sa Bethel
Pirang taon akong nagtrabaho bilang bookkeeper, sekretaryo, asin auditor nin distrito. Kan 1928 an nag-aasikaso sa kuenta kan Sosyedad naghelang asin kinaipuhan na lumuwas sa Bethel. Mantang igwa ako nin eksperyensia sa siring na trabaho, hinagad na sumalida ako. Nagpoon ako sa paglilingkod sa Bethel kan Hunyo 1928. Sa panapanahon, si Tugang na Dey sinosongko kami asin sinisiyasat an sakong kuenta. An samuyang pamilyang Bethel nangenot man sa pampublikong paghuhulit sa Oslo, na duman sasaro kaidto an samuyang kongregasyon.
An nagkapira sa samo tinatabangan an nag-aasikaso sa pagpaktora sa Bethel, si Tugang na Sakshammer, sa pagpatos asin pagpadara kan The Golden Age (ngonyan Awake!). Si Tugang na Simonsen asin Gunberg kabilang sa mga nagtabang sa samo. Maogma kami, na parateng nag-aawit mantang kami nagtatrabaho.
Kompiado sa Paglaom sa Kahadean
Kan 1935 nasabotan niamo na an “dakulang kadaklan” bakong sekondaryong langitnon na grupo. Nanodan niamo na iyan palan nagrerepresentar sa sarong grupo na makaliligtas sa dakulang kahorasaan asin igwa kan oportunidad na mabuhay sagkod lamang sa Paraiso digdi sa daga. (Kapahayagan 7:9-14) Huli sa bagong pakasabot na ini, an nagkapira na nakikikabtang sa mga emblema sa Memorial nakarealisar na daganon an paglaom ninda, asin nagpondo sinda sa pakikikabtang.
Minsan ngani nungka akong nagduda dapit sa sakong langitnon na paglaom, parate kong iniisip-isip, ‘Taano an Dios ta gusto sa sako?’ Alangan ako sa siring na dakulang pribilehio. Bilang sarong sadit, masosopgon na daraga, pambihira para sa sako na isipon na ako sarong hade na mamamahala kaiba ni Cristo sa langit. (2 Timoteo 2:11, 12; Kapahayagan 5:10) Minsan siring, pinensar ko an mga tataramon ni apostol Pablo na “bakong dakol na makapangyarihan” an inapod, kundi “pinili nin Dios an mga maluya kan kinaban, tanganing sopogon nia an mga makosog.”—1 Corinto 1:26, 27.
Aktibidad Durante kan Guerra Mundial II
Kan Abril 9, 1940, an Norway sinakyada kan mga tropang Aleman, asin dai naghaloy an nasyon nasakop. Bilang resulta kan guerra, dakol an naghimate sa mensahe kan Kahadean. Poon kan Oktubre 1940 sagkod kan Hunyo 1941, nakapasakamot kami nin labi sa 272,000 na libro asin pulyeto. Nangahulogan iyan na an kada saro sa labing 470 Saksi kaidto sa Norway nakapasakamot, sa promedyo, nin labi sa 570 libro asin pulyeto durante kan siyam na bulan na idto!
Kan Hulyo 8, 1941, an Gestapo nagsongko sa gabos na nangengenot na paraataman asin sinabihan sinda na kun an paghuhulit dai mapondo, dadarahon sinda sa mga kampo de konsentrasyon. Limang pulis na Aleman an nagduman sa Bethel asin dakol na rogaring kan Watch Tower Society an kinompiskar. Kinua an pamilyang Bethel asin inusisa, alagad mayo ni saro sa samo na ibinilanggo. Sa katapustapusi, kan Hulyo 21, 1941, an edipisyo kan Sosyedad, sa Inkognitogaten 28 B, kinompiskar, asin an samong paghuhulit pigprohibir. Nagbuelta ako sa Kopervik asin nagkua nin sekular na trabaho tanganing sustentohan an sakong sadiri.
Kan panahon na idto, si Tatay naglilingkod bilang payunir. Sarong aldaw an mga Nazi nag-abot asin rinekisa an harong ni Tatay. Kinua ninda an gabos na babasahon nia, kaiba an saiyang mga Biblia asin konkordansia. Kadikit sanang suplay nin espirituwal na pagkakan an inaako mi durante kan panahon na ini. Tanganing magdanay na makosog sa espirituwal, pinag-adalan niamo nin paorootro an daan na mga libro, siring kan librong Government, asin nagpadagos kami sa paghuhulit.
Makamomondo, sa dakol na lugar an mga tugang nagkabaranga. An opinyon kan nagkapira dapat kaming maghulit nin hayag asin magharongharong mantang an saboot kan iba maninigo kaming maghulit nin mas patago, na kinakaolay an mga tawo sa ibang mga paagi. Sa siring an prominenteng mga tugang, na kan enot nagtitinabangan na marhay asin samong namotan na marhay, dai na naggigirirongan. An pagkabaranga ninda nagtao sa sako nin mas grabeng kakologan sa puso kisa sa arin man na iba pang situwasyon sa sakong buhay bilang Saksi.
Pagbalik kan Aktibidad Pakatapos kan Guerra
Kasunod kan guerra, kan tig-init nin 1945, si Tugang na Dey nagbisita sa Norway asin naggibo nin mga pagtiripon sa Oslo, Skien, asin Bergen. Nakiolay sia sa mga tugang na husayon an dai pagkaoroyon asin hinagad niang tumindog an gabos na gustong gumibo kaiyan. An gabos nagtirindog! An pagpasuruhay permanente nang nahusay kan Disyembre 1945, pakatapos nin pagbisita ni Nathan H. Knorr, an presidente kaidto kan Watch Tower Society.
Mientras tanto, kan Hulyo 17, 1945, nakaresibi ako nin telegrama hale sa lingkod kan sangang opisina, si Tugang na Enok Öman, na nagsasabi: ‘Noarin ka puedeng bumalik sa Bethel?’ An iba nagsabi na maninigong magdanay ako sa harong asin atamanon an sakong ama, na labi nang 70 anyos kaidto. Alagad ta inenkaminar ako ni Tatay na ipadagos ko an paglilingkod sa Bethel, na sakuyang ginibo. Kan 1946, si Marvin F. Anderson, sarong tugang hale sa Estados Unidos, nagin samong paraataman sa sangang opisina, asin an paghuhulit inorganisar giraray.
Durante nin mga bakasyon kun tig-init minabalik ako sa Kopervik tanganing dalawon an sakong pamilya. An sakong duwang tugang na lalaki asin duwang tugang na babae dai nagin Saksi, alagad permi sindang makiamigo sa samuya ni Tatay. An saro sa sakong mga tugang na lalaki nagin opisyal sa pier asin superbisor na timonel, asin an saro nagin paratokdo. Maski ngani dikit an sakong kaya sa materyal, sinasabihan sinda ni Tatay: “Mas mayaman kisa sa saindo si Ottilie.” Asin totoo iyan! An saindang nakamit dai ikakokomparar sa espirituwal na kayamanan ko! Nagadan si Tatay sa edad na 78 kan 1951. Si Nanay nagadan kan 1928.
An sarong tampok na kabtang kan sakong buhay iyo an pag-atender sa internasyonal na kombension kan banwaan ni Jehova sa Siudad nin Nueva York kan 1953. Kan taon na iyan an pankinaban na langtad nalampasan an 500,000 na parahayag, asin labi sa 165,000 an nag-atender sa kombension! Bago an kombension kan 1953, nagtrabaho ako nin sarong semana sa Bethel sa Brooklyn, an opisina prinsipal kan organisasyon ni Jehova digdi sa daga.
Paggibo kan Sakong Makakaya
Sa nag-agi pa sanang mga taon naraot an sakong pagheling huli sa katarata. Paagi sa halangkaw an gradong salming asin lente, nababasa ko pa man nin dikit an darakulang letra. Asin an mga tugang na babae binibisita ako asin binabasahan ako duwang beses kada semana, na sakong pinasasalamatan na marhay.
An sakuyang gibohon na paghuhulit limitado na man. Sa panahon nin tig-init, an mga tugang na Kristiana sa panapanahon ilinuluwas ako sakay sa sakong silyang de rueda sa lugar na makapaghuhulit ako. Regular ko man na pinadadarahan nin mga magasin asin brosyur an mga eskuelahan sa Kopervik, siring kan eskuelahan sa elementarya na estudyante ako haros 100 na taon na an nakaagi. Naoogma ako na sagkod ngonyan puede pa akong magin regular na parahayag.
Marahay sana ta an komedor asin Kingdom Hall nasa eskalon man sana kan sakong kuarto sa Bethel, na poon kan 1983 yaon sa Ytre Enebakk sa luwas kan Oslo. Kaya nakaduduman pa ako sa pan-agang pagsamba, sa pagkakan, asin sa samong mga pagtiripon sa tabang nin sulay sa paglakaw. Asin naoogma ako na nakaaatender pa ako sa mga kombension asin asamblea. Naoogma akong makaolay an mga katood na dakol nang taon na kamidbid ko, siring man an bagong mga tugang na lalaki asin babae patin dakol na toltol na aki.
Pagpadanay nin Pagtubod Sagkod sa Katapusan
Sarong bendisyon na makaibaiba an aktibo, nakaoogma, asin espirituwal na mga tawo digdi sa Bethel. Kan ponan ko an sakong paglilingkod sa Bethel, an bilog na pamilya kompuesto kan mga may langitnon na paglaom. (Filipos 3:14) Ngonyan an gabos sa Bethel apuera sa sako naglalaom na mabuhay sagkod lamang digdi sa daga.
Totoo, naglaom kami na si Jehova naghiro na kutana kaidto pa. Pero, naggagayagaya ako na maheling an dakulang kadaklan na orog pang nagdadakula. Kanigoan na mga pag-aumento an sakong naheling! Kan makiiba ako sa ministeryo sa kaenot-enote, nasa mga 5,000 sana an parahayag sa bilog na kinaban. Ngonyan labi na sa 5,400,000! Sa katunayan, naheling ko ‘an sadit mismo na nagin sangribo, asin an sadangoton nagin makosog na nasyon.’ (Isaias 60:22) Kita kaipuhan na padagos na maglaom ki Jehova, siring kan isinurat ni propeta Habacuc: “Minsan pa iyan maatraso, padagos iyan na halaton; huli ta sierto nanggad na iyan maootob.”—Habacuc 2:3.