Tunay na Kaogmahan—Ano an Liabe?
AN MGA tawo ginibo na magin maogma. Taano ta nakaseseguro kita kaiyan? Bueno, estudyare an kapinonan nin tawo.
Linalang ni Jehova Dios an enot na tawong mag-agom na may kakayahan na magin maogma. Si Adan asin Eva ibinugtak sa sarong paraiso, sarong hardin nin kaalingan na inaapod Eden. Tinawan sinda kan Kaglalang nin gabos na kinakaipuhan na pisikal na bagay sa buhay. Yaon sa hardin “an lambang kahoy na magayon na paghelingon asin masiram na kakanon.” (Genesis 2:9) Si Adan asin Eva marahay an salud, makosog, asin magayon—sinda sangkap asin tunay na maogma.
Pero, ano an liabe sa saindang kaogmahan? An sainda daw na paraisong erokan o tibaad an saindang pagkasangkap sa pisikal? An mga balaog na ini na gikan sa Dios talagang nagkontribwir sa saindang pag-ogma sa buhay. Alagad an saindang kaogmahan bakong depende sa siring na nadudutaan na mga bagay. An hardin nin Eden bako sanang magayon na parke. Iyan sarong santuaryo, lugar sa pagsamba sa Dios. An liabe sa saindang daing sagkod na kaogmahan iyo an saindang kakayahan na establisaron asin papagdanayon an mamomoton na relasyon sa Kaglalang. Tanganing magin maogma, sinda kaipuhan ngunang magin espirituwal.—Ikomparar an Mateo 5:3.
An Espirituwalidad Minagiya sa Kaogmahan
Kan primero si Adan may espirituwal na relasyon sa Dios. Idto mamomoton, mapagpadangat na relasyon kapareho kan sa sarong aki sa ama. (Lucas 3:38) Sa hardin nin Eden, yaon ki Adan asin Eva an pinakamarahay na mga kamugtakan na nagtogot sa sainda na panigoan an saindang pagmawot na sumamba. Paagi sa saindang gikan sa boot, mamomoton na pagkuyog ki Jehova, sinda magtatao nin onra asin kamurawayan sa Dios na laen na marhay sa ikatatao nin linalang na mga hayop. Maoomaw ninda an Dios sa intelihenteng paagi huli sa saiyang marahayon na mga kualidad asin masusuportaran ninda an saiyang soberaniya. Padagos man nindang aakoon an mamomoton asin mapagpadangat na pag-ataman ni Jehova.
An marahay na pakikiibang ini sa Kaglalang asin pagkuyog sa saiyang mga ley nagdara nin tunay na kaogmahan sa satong enot na mga magurang. (Lucas 11:28) Si Adan asin Eva dai linaoman na makaeksperyensia nin dakol na taon nin pagpatibasang bago madiskobre an liabe sa kaogmahan. Sinda maogma poon kan oras na sinda lalangon. An pagigin may pakipagkatoninongan sa Dios asin mapagpasakop sa saiyang autoridad ginibo sindang maogma.
Minsan siring, natapos an kaogmahan na idto kan oras na sinda sumuway sa Dios. Paagi sa pagrebelde, pinutol ni Adan asin Eva an saindang espirituwal na relasyon ki Jehova. Bako na sindang katood nin Dios. (Genesis 3:17-19) Minalataw na poon kan aldaw na sinda paluwason sa hardin, pinondo ni Jehova an gabos na pakikomunikar sa sainda. Nawara ninda an saindang pagkasangkap, an oportunidad na mabuhay sagkod lamang, asin an saindang hardin na erokan. (Genesis 3:23) Alagad orog na mahalaga, huling nawara ninda an saindang relasyon sa Dios, nawara ninda an liabe sa kaogmahan.
An Satong Kakayahan na Pumili
Bago magadan, ipinamana ni Adan asin Eva sa saindang mga aki an saindang mga karakteristiko bilang tawo, an saindang natural na konsensia, asin an kapasidad para sa espirituwalidad. An pamilya nin tawo dai ibinaba sa kamugtakan nin mga hayop. Puede kitang makapakipag-uli sa Kaglalang. (2 Corinto 5:18) Bilang intelihenteng mga linalang, an mga tawo nagpapadagos na igwa kan kakayahan na pumili kun baga kukuyogon an Dios o dai. Ipinaheling ini pakalihis nin dakol na siglo kan papilion ni Jehova nin buhay o kagadanan an bago pa sanang mabilog na nasyon nin Israel. Paagi sa saiyang representante sa pagtaram na si Moises, an Dios nagsabi: “Ibinubugtak ko ngonyan sa atubangan mo an buhay asin karahayan, patin an kagadanan asin karatan.”—Deuteronomio 30:15-18.
Maski ngonyan, rinibong taon pagkawara kan orihinal na Paraiso, kitang mga tawo igwa pa kan kakayahan na pilion an tama. Yaon sa sato an nagpupunsionar na konsensia asin pundamental na kapasidad na kuyogon an mga ley nin Dios. An Biblia nagtataram dapit sa “samong pagkatawo sa laog” asin sa tawo “sa laog.” (2 Corinto 4:16; Roma 7:22) An mga pananaram na ini nanonongod sa natural na potensial niato gabos na ipabanaag an personalidad nin Dios, na mag-isip sa paaging kapareho nia, na magin espirituwal.
Mapadapit sa satong moral na naturalesa asin konsensia, si apostol Pablo nagsurat: “Kun an mga tawo nin mga nasyon na mayo nin ley minagibo sa saindang naturalesa nin mga bagay kan ley, an mga tawong ini, minsan ngani mayo nin ley, iyo na mismo an ley sa saindang sadiri. Sinda mismo an nagpapaheling na an ley nasusurat sa saindang puso, mantang an saindang konsensia nagpapatotoo sa kaibanan ninda asin, sa sainda mismong mga pag-isip, sinda inaakusar o ipinahahayag na daing kasalan.”—Roma 2:14, 15.
Diosnon na Kadonongan Asin Pagkuyog—An Liabe
Pero tibaad may maghapot, ‘Kun gabos kita igwa nin natural na inklinasyon na sumamba sa Dios asin, bilang resulta, magkamit nin tunay na kaogmahan, taano ta lakop na marhay an kamondoan?’ Huli ta tanganing magin maogma, an lambang saro sa sato dapat na tumalubo sa espirituwal. Minsan ngani sa kaenot-enote linalang sa ladawan nin Dios, an tawo nagin suhay sa saiyang Kaglalang. (Efeso 4:17, 18) Huli kaini, an lambang saro sa sato dapat na gumibo nin depinidong mga lakdang na establisaron asin papagdanayon an espirituwal na relasyon sa Dios. An siring na relasyon dai automatikong matalubo.
Sinabi ni Jesus an duwang importanteng prinsipyo sa pagpatalubo nin espirituwalidad. An saro pagkua nin tamang kaaraman dapit sa Dios, asin an saro pa makinuyog na pagpasakop sa saiyang kabotan. (Juan 17:3) Kinokotar an Tataramon nin Dios, si Jesus nagsabi: “Nasusurat, ‘An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.’” (Mateo 4:4) Sa saro pang okasyon, si Jesus nagsabi: “An sakong kakanon iyo an sakong paggibo kan kabotan nia na nagsugo sa sako asin pagtapos kan saiyang gibohon.” (Juan 4:34) Dai kita kaipuhan na gumamit nin dakol na dekada sa patibasang na paghanap sa kaogmahan. An eksperyensia bakong liabe sa kaogmahan. Imbes, solamente an diosnon na kadonongan asin pagkuyog sa satong Kaglalang an puedeng gumiya sa tunay na kagayagayahan sa buhay.—Salmo 19:7, 8; Eclesiastes 12:13.
Malinaw nanggad, an kaogmahan na bunga nin paggibo nin diosnon na kadonongan asin pagkaigwa nin marahay na kamugtakan sa atubangan nin Dios bakong dai niato maaabot. (Gibo 17:26, 27) An kaaraman dapit ki Jehova asin sa saiyang katuyohan makukua kan gabos. Binilyon an kopya sa dakol na lenguahe, an Biblia nagpapadagos na iyo an librong pinakamahiwas an pagkawaras sa kinaban. Matatabangan kamo kan Biblia na magin katood nin Dios asin makamtan an tunay na kaogmahan, huli ta an Kasuratan nagsasabi sa sato na “maogma an banwaan na an Dios iyo si Jehova!”—Salmo 144:15.
[Kahon sa pahina 6]
Mga Lakdang Pasiring sa Kaogmahan
1. Apresyaron asin kultibaron an espirituwalidad. Si Jesus nagsabi: “Maogma an mga nagdadangog sa tataramon nin Dios asin nag-ootob kaiyan!”—Lucas 11:28.
2. Midbidon na an pag-oyon nin Dios mas mahalaga kisa sa kayamanan o mga luho. Si Pablo nagsurat: “Sa katotoohan, iyan may dakulang pakinabang, ining diosnon na debosyon kaiba an pagigin naninigoan sa sadiri. . . . Kun igwa na nin kakanon asin gubing, manigoan na kita kan mga bagay na ini.”—1 Timoteo 6:6-8.
3. Pagmaigotan na kultibaron asin himateon an konsensia na sinanay sa Biblia.—Roma 2:14, 15.
4. Magdesisyon na kuyogon si Jehova Dios, sa siring nagigin kualipikadong mapabilang sa saiyang banwaan. Si David kan suanoy nagsurat: “Maogma an banwaan na an Dios iyo si Jehova!”—Salmo 144:15.
[Retrato sa pahina 7]
“Maogma idtong mga nakamamate kan saindang espirituwal na pangangaipo.”—Mateo 5:3