“Tawan nin Onra si Jehova Paagi sa Saimong Mahahalagang Bagay”​—Paano?

“TAWAN nin onra si Jehova paagi sa saimong mahahalagang bagay asin paagi sa enot na mga bunga kan saimong inani.” Nasa ipinasabong na mga tataramon na ini nin kadonongan, na isinurat mga 2,600 na taon na an nakaagi, an liabe tanganing maeksperyensiahan an abundang bendisyon ni Jehova, huli ta idinugang pa kan kagsurat: “Dangan an saimong mga tambobong mapapano nin abunda; asin an saimong mga tangke kan pugaan maglilipwas sa bagong arak.”​—Talinhaga 3:​9, 10.

Alagad ano an boot sabihon kan pagtao nin onra sa Dios? Ano an mahahalagang bagay na paagi kaiyan matatawan niato nin onra si Jehova? Asin paano niato ini magigibo?

“Tawan nin Onra si Jehova”

Sa Kasuratan, an pangenot na Hebreong termino para sa onra, an ka·vohdhʹ, sa literal nangangahulogan na “gabat.” Kaya an pagtao nin onra sa sarong persona nangangahulogan na ibilang sia na magabat, maoomaw, o igwa nin halaga. An saro pang termino sa Hebreo para sa onra, an yeqarʹ, tinatradusir man na “mahal na marhay” asin “mahal na marhay na mga bagay.” Siring man, an Griegong termino na ti·meʹ, na trinadusir na “onra” sa Biblia, may kahulogan na halangkaw na pagheling, halaga, pagigin mahal na marhay. Sa siring an saro nagtatao nin onra sa iba paagi sa pagpaheling sa personang iyan nin hararom na paggalang asin halangkaw na pagheling.

May saro pang aspekto an pagtao nin onra. Estudyaran an pagkasaysay manongod sa fiel na Judio na si Mardoqueo, na sa sarong okasyon ihinayag an pagpakana tumang sa buhay ni Hadeng Assuero kan suanoy na Persia. Paghaloyhaloy, kan maaraman kan hade na mayo pang ginibo tanganing tawan nin onra si Mardoqueo para sa ginibong iyan, hinapot nia an saiyang primer ministro, si Aman, kun ano an pinakamarahay na paagi na tawan nin onra an saro na naogmahan kan hade. Hinona ni Aman na an siring na onra para sa saiya, alagad sala nanggad sia! Maski paano, sinabi ni Aman na an siring na tawo maninigong gubingan nin “makahadeng gubing” asin pasakayon sa “kabayo na kinakabayuan kan hade.” Sia nagkonklusyon: “Pasakayon sia ninda sa kabayo sa plasa kan siudad, asin sinda magkurahaw sa atubangan nia, ‘Ini an ginigibo sa tawo na an onra naogmahan kan hade.’” (Ester 6:​1-9) Sa kasong ini, kaiba sa pagtao nin onra sa sarong tawo an pagpamuraway sa saiya sa publiko tanganing sia magin estimadong marhay kan gabos na tawo.

Kaagid kaiyan, an pagtao nin onra ki Jehova igwa nin duwang aspekto: personal na pagpaheling sa saiya nin halangkaw na pagpahalaga asin pagpamuraway sa saiya sa publiko paagi sa pakikikabtang asin pagsuportar sa gibohon na pagbalangibog kan saiyang ngaran sa publiko.

An ‘Saindong Mahahalagang Bagay’​—Ano Iyan?

Kaiba nanggad sa satong mahahalagang bagay an satong buhay, an satong panahon, an satong mga abilidad, asin an satong kosog. Kumusta man an satong materyal na mga rogaring? Estudyare an mga tataramon ni Jesus kan maheling nia an sarong dukhang balo na naghoholog nin duwang sadit na sinsilyo na kadikiton an halaga sa sarong kaha sa templo. Sia nagsabi: “An balong ini, minsan ngani dukha, nagholog nin labi ki kan ihinolog ninda gabos. Huli ta an gabos na ini [an ibang nagkontribwir] nagholog nin mga regalo gikan sa saindang kalabihan, alagad an babaeng ini nagholog gikan sa saiyang kadaihan kan gabos niang pagbuhay.” (Lucas 21:​1-4) Inomaw ni Jesus an balong ini huli sa paggamit kan saiyang materyal na mga kayamanan sa pagsuportar sa pagsamba ki Jehova.

Kun siring, malinaw na kaiba man sa mahahalagang bagay na nasambitan ni Salomon an ano man na tibaad materyal na mga rogaring niato. Asin an pananaram na “enot na mga bunga kan saimong inani” nagpaparisa kan ideya na pagtao ki Jehova kan pinakamarahay sa satong mahahalagang bagay.

Pero, paano nakatatao nin onra sa Dios an pagtao nin materyal na mga bagay? Bako daw na an gabos na bagay sadiri nia na? (Salmo 50:10; 95:​3-5) “An gabos hale sa saimo,” an pag-admitir ni Hadeng David sa sarong odok sa pusong pamibi ki Jehova. Asin kun manongod sa dakulang donasyon na itinao nia asin kan saiyang mga sakop para sa pagtogdok kan templo, si David nagsabi: “Hale sa saimong sadiring kamot kami nagtao sa saimo.” (1 Cronica 29:14) Kaya kun kita nagtatao nin mga regalo ki Jehova, ibinabalik sana niato an itinao nia sa sato huli sa karahayan kan saiyang puso. (1 Corinto 4:7) Alagad, siring sa nasambitan kasubago, kaiba sa pagtao nin onra ki Jehova an pagpamuraway sa saiya sa pagheling kan iba. Asin an materyal na mga regalo na ginagamit para sa pagpaoswag kan tunay na pagsamba nagtatao nin onra sa Dios. An Biblia igwa nin marahayon na mga halimbawa kan paaging ini nin pagtao nin onra ki Jehova.

Mga Halimbawa kan Suanoy

Mga 3,500 na taon na an nakaagi, kan dumatong an panahon na itagama ni Jehova an tabernakulo sa kaawagan bilang lugar nin pagsamba para sa mga Israelita, naglataw an pangangaipo para sa manlaenlaen na mahahalagang bagay na kahagadan sa disenyo na itinao nin Dios. Pinagbotan ni Jehova si Moises na ‘an lambang may dusay na puso magdara nin kontribusyon ki Jehova.’ (Exodo 35:5) An pagkasaysay nagpadagos: “Sinda nagdaratong, an gabos na pinahiro kan saiyang puso, asin sinda nagdara, an gabos na pinukaw kan saiyang espiritu, nin kontribusyon ki Jehova para sa paggibo sa tolda nin katiriponan asin para sa gabos na paglilingkod dian asin para sa banal na mga gubing.” (Exodo 35:21) An saindang gikan sa boot na dolot, sa katunayan, nagin sobra ki kan kaipuhan para sa trabaho kaya an banwaan kinaipuhan na ‘pogolan sa pagdara kaiyan’!​—Exodo 36:​5, 6.

Estudyare an saro pang halimbawa. Kan tapos nang gamiton an tabernakulo asin pinoponan na an mga pag-andam para sa pagtogdok kan templo, si David nagtao nin dakulang personal na kontribusyon sa templo na itotogdok kan saiyang aki na si Salomon. Sia nangapodan man sa iba na makiayon, asin an mga tawo naghimate paagi sa pagtao nin mahahalagang bagay na regalo para ki Jehova. An pirak asin bulawan sana nagkakantidad nin mga 50 bilyones na dolyar sa presenteng halaga. “Asin an banwaan nag-ogma sa saindang pagtao nin gikan sa boot na mga dolot.”​—1 Cronica 29:​3-9; 2 Cronica 5:1.

“Gikan sa Boot na mga Dolot” sa Satong Aldaw

Paano kita puedeng makikabtang sa kagayagayahan nin pagtao nin gikan sa boot na mga dolot sa satong aldaw? An pinakaimportanteng gibohon sa kinaban sa panahon na ini iyo an paghuhulit kan Kahadean asin paggibo nin mga disipulo. (Mateo 24:14; 28:​19, 20; Gibo 1:8) Asin pinagmarahay ni Jehova na ipagkatiwala an daganon na intereses kan Kahadean sa saiyang mga Saksi.​—Isaias 43:10.

Maliwanag na kaipuhan an kuarta tanganing may magasto sa gibohon kan Mga Saksi ni Jehova ngonyan. Kalabot sa pagtogdok asin pagmantener nin mga Kingdom Hall, Assembly Hall, sangang opisina, imprentahan, asin Erokan na Bethel an kuarta. Kalabot man sa pagpublikar asin pagdistribwir nin mga Biblia asin mga publikasyon na basado sa Biblia sa manlaenlaen na lenguahe an mga gastos. Paano natataparan an siring na mga organisasyonal na mga gastos? Paagi sa mga kontribusyon na talagang gikan sa boot!

An kadaklan kan mga kontribusyon hale sa mga indibiduwal na​—arog kan balo na naobserbaran ni Jesus—​tama sana an kabuhayan. Huli ta habong mawaran kan oportunidad sa aspektong ini nin pagtaong onra ki Jehova, sinda nagkokontribwir nin kadikit na kantidad “sono sa saindang talagang kakayahan,” asin, kun beses, dawa “labi pa sa saindang talagang kakayahan.”​—2 Corinto 8:​3, 4.

“Gumibo an lambang saro nin oyon sa napagdesisyonan nia sa saiyang puso, bakong sa maraot na boot o sa kapiritan, huli ta an Dios namomoot sa maogmang paratao,” an sinabi ni apostol Pablo sa mga Kristiano sa Corinto. (2 Corinto 9:7) An maogmang pagtatao nangangaipo nin marahay na pagpaplano. Sinabihan ni Pablo an mga taga-Corinto: “Sa kada enot na aldaw nin semana an lambang saro sa saindo sa saiyang sadiring harong magtagama na sono sa saiyang nakukua, tanganing dai na mag-arambagan kun dumatong ako.” (1 Corinto 16:2) Kaagid kaiyan, sa paaging pribado asin gikan sa boot, an mga gustong magdonar tanganing mapaoswag an gibohon kan Kahadean ngonyan puedeng itagama an kabtang kan saindang entrada para sa katuyohan na iyan.

Binebendisyonan ni Jehova an mga Nagtatao nin Onra sa Saiya

Minsan ngani an materyal na prosperidad mismo dai minagiya pasiring sa espirituwal na prosperidad, an buka an palad na paggamit kan satong mahahalagang bagay​—an satong panahon, an satong kosog, asin an satong materyal na mga kayamanan—​tanganing tawan nin onra si Jehova nagbubunga nin mayaman na mga bendisyon. Totoo ini huli ta an Dios, na kagsadiri kan gabos na bagay, sinisierto sa sato: “An matinaong kalag mismo patatabaon, asin an saro na sueltong nagbabaribi sa iba mismo man na sueltong mababaribian.”​—Talinhaga 11:25.

Pagkagadan ni Hadeng David, an saiyang aki na si Salomon ginamit an gikan sa boot na mga kontribusyon na nakolekta kan saiyang ama tanganing itogdok an sarong mamuraway na templo, siring sa idinirehir ni Jehova. Asin sagkod na fiel si Salomon sa saiyang pagsamba sa Dios, “an Juda asin Israel padagos na nag-erok na may seguridad . . . poon sa Dan sagkod sa Beer-seba, sa gabos na aldaw ni Salomon.” (1 Hade 4:25) An mga tambobong pano, an mga tangke nin arak nagsusulwak​—sagkod na an Israel ‘tinatawan nin onra si Jehova paagi sa saindang mahahalagang bagay.’

Paghaloyhaloy, paagi ki propeta Malaquias, si Jehova nagsabi: “‘Tabi baloa nindo ako sa bagay na ini,’ sabi ni Jehova nin mga hukbo, ‘kun baga dai ko bukasan sa saindo an mga gaha kan kalangitan asin ulaan ko kamo nin bendisyon sagkod na mayo na nin kulang.’” (Malaquias 3:10) An espirituwal na prosperidad na nakakamtan ngonyan kan mga lingkod ni Jehova ebidensia na inotob nin Dios an saiyang panuga.

Si Jehova naoogma nanggad kun ginigibo niato an satong kabtang sa pagpaoswag kan intereses kan Kahadean. (Hebreo 13:​15, 16) Asin sia nanunuga na sususteniran kita kun satuyang ‘hahanapon nguna an kahadean asin an saiyang katanosan.’ (Mateo 6:33) May dakulang paggayagaya sa puso, kita logod ‘magtao nin onra ki Jehova paagi sa satong mahahalagang bagay.’

[Kahon sa pahina 28, 29]

Mga Paaging Pinipili nin iba sa Pagtao mga Kontribusyon sa Pambilog na Kinaban na Gibohon

An dakol nagtatagama, o nagbabadyet, nin kantidad na ibinubugtak ninda sa mga kahon nin kontribusyon na may nakasurat: “Mga Kontribusyon Para sa Pambilog na Kinaban na Gibohon kan Sosyedad​—Mateo 24:14.” Kada bulan ipinadadara kan mga kongregasyon an kantidad na ini magsalang sa pankinaban na opisina prinsipal sa Brooklyn, Nueva York, o sa lokal na sangang opisina.

An boluntad na mga donasyon na kuarta puede man na direktang ipadara sa Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, o sa opisina kan Sosyedad na naglilingkod sa saindong nasyon. An mga alahas o iba pang mahalagang bagay puede man na idonar. An sarong halipot na surat na nagsasabing iyan sarong direktang regalo maninigong iiba sa mga kontribusyon na ini.

Areglo sa Kondisyonal na Donasyon

An kuarta puedeng itao sa Watch Tower Society tanganing ipagkatiwala iyan sagkod na magadan an nagdonar, na may kondisyon na kun magkaigwa nin personal na pangangaipo, iyan ibabalik sa nagdonar. Para sa dugang na impormasyon, sumurat tabi sa Treasurer’s Office sa adres na sinabi sa enotan.

Plinanong Pagtao

Dugang pa sa direktang mga regalo na kuarta asin kondisyonal na mga donasyon na kuarta, igwa nin iba pang mga paagi nin pagtao para sa kapakinabangan kan paglilingkod sa Kahadean sa bilog na kinaban. Kabale digdi an:

Seguro: An Watch Tower Society puedeng gibohon na benepisyaryo nin polisa sa seguro sa buhay o nin plano sa pagretiro/pension. An Sosyedad maninigong paisihon kan ano man na siring na areglo.

Mga Deposito sa Bangko: An mga deposito sa bangko, sertipiko nin deposito, o indibiduwal na deposito sa pagretiro puedeng ipagkatiwala sa o bayadan sa Watch Tower Society pagkagadan kan nagdeposito, kaoyon sa lokal na mga kahagadan sa bangko. An Sosyedad maninigong paisihon kan ano man na siring na mga areglo.

Aksiones Asin mga Bono: An aksiones asin mga bono puedeng idonar sa Watch Tower Society magsalang bilang direktang regalo o sa irarom nin sarong areglo na paagi kaiyan an ganansia padagos na ibabayad sa nagdonar.

Daga Asin Harong: An ikapababakal na daga asin harong puedeng idonar sa Watch Tower Society magsalang paagi sa pagtao nin direktang regalo o paagi sa pagreserba sa nagdonar nin propiedad sagkod na nabubuhay, na puedeng magpadagos na mag-istar dian sagkod na sia nabubuhay. Maninigong paaramon nin saro an Sosyedad bago ibalyo sa ngaran kan Sosyedad an ano man na daga asin harong.

Mga Testamento Asin Kabuhayan na Ipinagkatiwala: An propiedad o kuarta puedeng ipamana sa Watch Tower Society paagi sa sarong testamento na ginibo sa legal na paagi, o an Sosyedad puedeng gibohon na benepisyaryo nin sarong kontrata sa kabuhayan na ipinagkatiwala. An kabuhayan na ipinagkatiwala na an nakikinabang sarong relihiosong organisasyon puedeng magtao nin nagkapirang bentaha sa pagbuhis. An sarong kopya kan testamento o kontrata sa kabuhayan na ipinagkatiwala maninigong ipadara sa Sosyedad.

An Sosyedad nag-andam nin sarong Ingles na brosyur na may titulong Planned Giving. Tibaad makatabang an impormasyon na ini sa mga taga-Estados Unidos na nagpaplanong magtao nin espesyal na regalo sa Sosyedad ngonyan o magwalat nin pamana pagkagadan. Nangorognang totoo iyan kun minamawot nindang maotob an sarong pampamilyang pasohan o pagplano kan mga rogaring mantang ginagamit an mga benepisyo sa buhis tanganing mainaan an gastos sa regalo o pamana.

Para sa dugang na impormasyon mapadapit sa arin man sa mga bagay na nasambit, sumurat sa Watch Tower, P.O. Box 2044, 1060 Manila, o sa opisina kan Sosyedad na naglilingkod sa saindong nasyon.