“An Dios Namomoot sa Maogmang Paratao”

SI Jehova an personipikasyon nin pagigin buka an palad. Tunay nanggad, an Biblia nagsasabi na sia an Paratao nin “lambang marahay na balaog asin lambang sangkap na regalo.” (Santiago 1:17) Halimbawa, estudyare an mga bagay na linalang nin Dios. Naggibo sia nin mga kakanon na masiram, bakong daing namit; mga burak na makolor, bakong daing kabuhaybuhay; pagsolnop nin saldang na pambihira, bakong daing kinang. Iyo, an gabos na aspekto kan linalang ni Jehova nagtatao nin ebidensia kan saiyang pagkamoot asin pagigin buka an palad. (Salmo 19:​1, 2; 139:14) Apuera kaini, si Jehova sarong maogmang Paratao. Naoogma siang marhay sa paggibo nin marahay para sa saiyang mga lingkod.​—Salmo 84:11; 149:4.

Pinagbotan an mga Israelita na ipabanaag an pagigin buka kan palad nin Dios sa saindang mga pagtratar sa lambang saro. “Ika dapat na dai magpakatagas kan saimong puso o magin gugom an kamot sa saimong dukhang tugang,” an sabi sa sainda ni Moises. “Ika maninigo nanggad na tumao sa saiya, asin an saimong puso dai maninigong magin maimot.” (Deuteronomio 15:​7, 10) Mantang an pagtao dapat na gikan sa puso, an mga Israelita dapat na maogma sa mga gibo nin pagigin buka an palad.

An mga Kristiano tinawan nin kaparehong konseho. Tunay nanggad, sinabi ni Jesus na igwa nin “kaogmahan sa pagtao.” (Gibo 20:35) An mga disipulo ni Jesus arogan sa maogmang pagtao. Halimbawa, ibinabareta kan Biblia na sa Jerusalem an nagturubod ‘ipinabakal an saindang mga rogaring asin sadiri patin iwinaras an kabakalan sa gabos, sono sa pangangaipo nin siisay man.’​—Gibo 2:​44, 45.

Alagad an buka an palad na mga taga Judeang ini kan huri nagtios. Dai sinasabi nin espesipiko kan Biblia kun ano man nanggad an dahelan kan saindang nagin kamugtakan. May mga intelektuwal na nagsasabi na an gutom na nasasambitan sa Gibo 11:​28, 29 tibaad iyo an dahelan. Ano man an nangyari, an mga Kristianong taga Judea masakit an kamugtakan, asin boot na seguradohon ni Pablo na maaasikaso an saindang mga pangangaipo. Paano nia iyan gigibohon?

Pangongolekta Para sa mga Nangangaipo

Nagpatabang si Pablo sa mga kongregasyon sagkod sa Macedonia, asin iinareglo nia an pangongolekta para sa nagtitios na mga Kristiano sa Judea. Sa mga taga Corinto, si Pablo nagsurat: “Siring sa ipinagboot ko sa mga kongregasyon sa Galacia, iyan man an gibohon nindo. Sa kada enot na aldaw kan semana an lambang saro sa saindo sa saiyang sadiring harong magtagama na sono sa saiyang nakukua.”a​—1 Corinto 16:​1, 2.

Plano ni Pablo na an mga pondong ini tolos-tolos na ipadara sa mga tugang sa Jerusalem, alagad an mga taga Corinto maluway sa pagresponde sa mga instruksion ni Pablo. Taano? Bako daw sindang sensitibo sa mamondong kamugtakan kan saindang mga tugang sa Judea? Dai, huling aram ni Pablo na an mga taga Corinto “abunda sa gabos na bagay, sa pagtubod asin tataramon asin kaaraman asin bilog na kaigotan.” (2 Corinto 8:7) Posible na sinda sibot sa pag-asikaso sa ibang mahalagang marhay na mga bagay na tinawan nin atension ni Pablo sa saiyang enot na surat sa sainda. Alagad ngonyan apurado an situwasyon sa Jerusalem. Kaya tinawan ni Pablo nin atension an isyu sa saiyang ikaduwang surat sa mga taga Corinto.

Pagpukaw sa Pagigin Buka an Palad

Enot, iinestorya ni Pablo sa mga taga Corinto an manongod sa mga taga Macedonia, na arogan an pagresponde sa pag-ayuda. “Sa panahon nin dakulang pagbalo sa irarom nin kasakitan,” an isinurat ni Pablo, “an abunda nindang kagayagayahan asin an saindang grabeng kadukhaan pinapagsopay an mga kayamanan kan saindang pagigin buka an palad.” An mga taga Macedonia dai na kaipuhan na sadolon. Sa kabaliktaran, sinabi ni Pablo na “sinda sa sadiri nindang kagustohan padagos na nakimaherak sa samo na may makuring pagngayongayo para sa pribilehio na maboot na pagtao.” An maogmang pagigin buka an palad kan mga taga Macedonia orog pa nganing pambihira kun satong iisipon na sinda mismo nasa “grabeng kadukhaan.”​—2 Corinto 8:​2-4.

Sa pag-omaw sa mga taga Macedonia, hinihingoa daw ni Pablo na pukawon an espiritu nin pakipagdaogan sa tahaw kan mga taga Corinto? Dai man, ta aram nia na bako ining tamang paagi nin pagmotibar. (Galacia 6:4) Apuera kaini, aram nia na an mga taga Corinto dai kaipuhan na sopogon tanganing gumibo sinda kan tama. Imbes, may kompiansa sia na talagang namomotan kan mga taga Corinto an saindang mga tugang na taga Judea asin mawot nindang mag-ambag para sa pag-ayuda. “Sarong taon na an nakaaagi,” an sabi nia sa sainda, “pinonan nindo bako sanang an paggibo kundi an pagigin man boot na gumibo.” (2 Corinto 8:10) Tunay nanggad, sa nagkapirang aspekto kan pag-ayuda, arogan mismo an mga taga Corinto. “Aram ko an pagigin andam kan saindong isip na iyo kong ipinananagsag sa mga taga Macedonia manongod sa saindo,” an sabi sa sainda ni Pablo, na idinadagdag pa: “An saindong kaigotan nakapukaw sa kadaklan sa sainda.” (2 Corinto 9:2) Pero ngonyan, kaipuhan kan mga taga Corinto na isagibo an saindang kaigotan asin an saindang pagigin andam.

Huli kaini, sinabi sa sainda ni Pablo: “Gumibo an lambang saro nin oyon sa napagdesisyonan nia sa saiyang puso, bakong sa maraot na boot o sa kapiritan, huli ta an Dios namomoot sa maogmang paratao.” (2 Corinto 9:7) Kun siring, an katuyohan ni Pablo bakong piriton an mga taga Corinto, ta an saro dai nanggad puedeng magin maogmang paratao kun sia pinipirit. Minalataw na ipinamugtak ni Pablo na yaon na an tamang motibo, na an lambang saro nakapagdesisyon nang magtao. Dugang pa, sinabi sa sainda ni Pablo: “Kun an pagigin andam yaon na, iyan orog nang inaako sono sa kun ano an nasa tawo, bakong sono sa kun ano an mayo sa tawo.” (2 Corinto 8:12) Iyo, kun yaon na an pagigin andam​—kun an saro motibado nin pagkamoot—​an saiyang itinatao aakoon nin Dios, gurano man garo baga kasadit an kantidad.​—Ikomparar an Lucas 21:​1-4.

Maogmang mga Paratao Ngonyan

An pag-ayuda para sa mga Kristianong taga Judea nagtatao nin marahayon na halimbawa para sa satong kaaldawan. An Mga Saksi ni Jehova naggibo nin pambilog na kinaban na kampanya nin paghuhulit, na nagdadara nin kakanon sa minilyon na nagugutom sa espirituwal. (Isaias 65:​13, 14) Ginigibo ninda ini bilang pagkuyog sa pagboot ni Jesus: “Kun siring paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda . . . na tokdoan nindo sinda na otobon an gabos na bagay na ipinagboot ko sa saindo.”​—Mateo 28:​19, 20.

Bakong pasil an pag-otob sa sugo na ini. Kalabot dian an pagmantener nin mga erokan para sa mga misyonero asin labi sa sanggatos na pasilidad nin sangang opisina sa bilog na kinaban. Kaiba man dian an pagtogdok nin mga Kingdom Hall asin Assembly Hall tanganing an mga nagsasamba ki Jehova magkaigwa nin angay na mga lugar tanganing magtiripon asin magparinigonan nin boot. (Hebreo 10:​24, 25) Kun beses, an Mga Saksi ni Jehova nag-aayuda man sa mga lugar na dinestroso nin natural na kalamidad.

Isip-isipa man an dakulaon na gastos sa pag-imprenta. Kada semana, sa promedyo, labing 22,000,000 na kopya kan An Torrengbantayan o mga 20,000,000 na kopya kan Awake! an iniimprenta. Dagdag pa sa regular na suplay na ini nin espirituwal na kakanon an minilyon na libro, brosyur, audiocassette, asin videocassette na ginigibo kada taon.

Paano sinusustentohan an gabos na gibohon na ini? Paagi sa boluntad na mga donasyon. Ginigibo ini, bakong para sa publisidad o huli sa paslong motibo, kundi tanganing paoswagon an tunay na pagsamba. Huli kaini, an siring na pagtao nagbubunga nin kaogmahan sa nagtatao, kaiba an bendisyon nin Dios. (Malaquias 3:​10; Mateo 6:​1-4) Ipinaheheling man kan mga aking kabilang sa Mga Saksi ni Jehova na sinda buka an palad, maogmang paratao. Halimbawa, pakatapos na mabaretaan an nagin destroso nin sarong bagyo sa sarong kabtang kan Estados Unidos, an kuatro anyos na si Allison nagkontribwir nin $2. “Ini na gabos an kuarta ko sa sakong alkansia,” an isinurat nia. “Aram ko na nawara an gabos na kawatan asin libro patin munyeka kan mga aki. Tibaad puede nindong gamiton an kuartang ini na pambakal nin libro para sa sarong aki na kagubay ko.” Si Maclean, otso anyos, nagsurat na naoogma sia na mayong mga tugang na nagadan sa bagyo. Idinugang nia: “Nakaganansia ako nin $17 sa pagpabakal nin mga takop sa ehe kaibahan ni tatay. May babakalon kutana ako kan sakong kuarta, alagad ta naisip ko an mga tugang.”​—Helingon man an kahon sa itaas.

Tunay nanggad, naggagayagaya an puso ni Jehova na maheling kapwa an mga aki asin gurang na ineenot an intereses kan saiyang Kahadean paagi sa ‘pagtao nin onra sa saiya paagi sa saindang mahahalagang bagay.’ (Talinhaga 3:​9, 10) Siempre, an totoo mayo nin makakapayaman ki Jehova, huling sia an kagsadiri kan gabos na bagay. (1 Cronica 29:​14-​17) Alagad an pagsuportar sa gibohon sarong pribilehio na nagtataong oportunidad sa parasamba na ikapaheling an saiyang pagkamoot ki Jehova. Nagpapasalamat kita sa gabos na an puso nagtulod sa sainda sa siring na paagi.

[Nota sa Ibaba]

[Kahon sa pahina 26, 27]

Mga Paaging Pinipili nin Iba sa Pagtao nin mga Kontribusyon sa Pambilog na Kinaban na Gibohon

An dakol nagtatagama, o nagbabadyet, nin kantidad na ibinubugtak ninda sa mga kahon nin kontribusyon na may nakasurat: “Mga Kontribusyon Para sa Pambilog na Kinaban na Gibohon kan Sosyedad​—Mateo 24:14.” Kada bulan ipinadadara kan mga kongregasyon an kantidad na ini magsalang sa pankinaban na opisina prinsipal sa Brooklyn, Nueva York, o sa lokal na sangang opisina.

An boluntad na mga donasyon na kuarta puede man na direktang ipadara sa Treasurer’s Office, Watch Tower Bible and Tract Society of the Philippines, P.O. Box 2044, 1060 Manila, o sa opisina kan Sosyedad na naglilingkod sa saindong nasyon. An mga alahas o iba pang mahalagang bagay puede man na idonar. An sarong halipot na surat na nagsasabing iyan sarong direktang regalo maninigong iiba sa mga kontribusyon na ini.

Areglo sa Kondisyonal na Donasyon

An kuarta puedeng itao sa Watch Tower Society paagi sa sarong espesyal na areglo na dian, kun magkaigwa nin personal na pangangaipo an nagdonar, an donasyon ibabalik sa saiya. Para sa dugang na impormasyon, makikomunikar tabi sa Treasurer’s Office sa adres na sinabi sa enotan.

Plinanong Pagtao

Dugang pa sa direktang mga regalo na kuarta asin kondisyonal na mga donasyon na kuarta, igwa nin iba pang mga paagi nin pagtao para sa kapakinabangan kan paglilingkod sa Kahadean sa bilog na kinaban. Kabale digdi an:

Seguro: An Watch Tower Society puedeng gibohon na benepisyaryo nin polisa sa seguro sa buhay o nin plano sa pagretiro/pension.

Mga Deposito sa Bangko: An mga deposito sa bangko, sertipiko nin deposito, o indibiduwal na deposito sa pagretiro puedeng ipagkatiwala sa o bayadan sa Watch Tower Society pagkagadan kan nagdeposito, kaoyon sa lokal na mga kahagadan sa bangko.

Aksiones Asin mga Bono: An aksiones asin mga bono puedeng idonar sa Watch Tower Society magsalang bilang direktang regalo o paagi sa sarong areglo na paagi kaiyan an ganansia padagos na ibabayad sa nagdonar.

Daga Asin Harong: An ikapababakal na daga asin harong puedeng idonar sa Watch Tower Society magsalang paagi sa pagtao nin direktang regalo o paagi sa pagreserba sa nagdonar nin propiedad sagkod na nabubuhay, na puedeng magpadagos na mag-istar dian sagkod na sia nabubuhay. Maninigong paaramon nin saro an Sosyedad bago ibalyo sa ngaran kan Sosyedad an ano man na daga asin harong.

Mga Testamento Asin Kabuhayan na Ipinagkatiwala: An propiedad o kuarta puedeng ipamana sa Watch Tower Society paagi sa sarong testamento na ginibo sa legal na paagi, o an Sosyedad puedeng gibohon na benepisyaryo nin sarong kontrata sa kabuhayan na ipinagkatiwala. An kabuhayan na ipinagkatiwala na an nakikinabang sarong relihiosong organisasyon puedeng magtao nin nagkapirang bentaha sa pagbuhis.

Siring sa ipinaririsa kan terminong “plinanong pagtao,” an klaseng ini nin mga donasyon natural sanang nagkakaipo nin pagplano kan nagdonar. Tanganing tabangan an mga indibiduwal na gustong pakinabangon an Sosyedad paagi sa sarong klase nin plinanong pagtao, an Sosyedad nag-andam nin sarong Ingles na brosyur na may titulong Planned Giving to Benefit Kingdom Service Worldwide. Isinurat an brosyur bilang simbag sa dakol na hapot na naresibi kan Sosyedad mapadapit sa mga regalo, testamento, asin kabuhayan na ipinagkatiwala. Igwa man iyan nin makakatabang na impormasyon sa pagplano manongod sa daga, pinansial, asin buhis. Asin dinisenyo iyan tanganing tabangan an mga taga Estados Unidos na nagpaplanong magtao nin espesyal na regalo sa Sosyedad ngonyan o magwalat nin pamana pagkagadan sa pagpili kan pinakamarahay asin episienteng paagi na kinokonsiderar an saindang pampamilya asin personal na mga kamugtakan.

Pakatapos na mabasa an brosyur asin magkonsulta sa Planned Giving Desk, dakol an nakatabang sa Sosyedad asin kadungan kaiyan, ginagamit sa pinakalubos na paagi an mga benepisyo sa buhis huli sa paggibo kaiyan. An Planned Giving Desk maninigong paaramon kan asin makaresibi nin kopya nin ano man na may koneksion na dokumento dapit sa arin man kan mga areglong ini. An mga interesado sa brosyur o sa arin man sa mga areglong ini sa plinanong pagtao maninigong paaramon an Planned Giving Desk, magsalang paagi sa pagsurat o telepono, sa adres na nakalista sa ibaba o sa opisina kan Sosyedad na naglilingkod sa saindong nasyon.

Planned Giving Desk

Watch Tower Bible and Tract Society of Pennsylvania

100 Watchtower Drive, Patterson, New York 12563-​9204

Telepono: (914) 878-​7000

[Kahon sa pahina 28]

Maogmang mga Paratao man an mga Aki!

Gusto kong itao ini sa saindo tanganing makagibo nin dakol pang libro para sa samo. Nadamot ko an kuartang ini gikan sa pagtabang ki tatay. Salamat na marhay sa gabos na kahigosan nindo.​—Pamela, siete anyos.

Nagpadara ako sa saindo nin $6.85 tanganing makatabang sa pagtogdok nin dakol pang Kingdom Hall. Naganar ko iyan kan tig-init kan magtinda ako nin lemonada.​—Selena, sais anyos.

Nag-ataman ako nin sarong guna na nagsiwo nin sulog asin saro pang guna. Idinedikar ko an huri ki Jehova. Sa katapustapusi nagsiwo iyan nin tolong guna, na ipinabakal ko. Iiniba ko an kantidad para sa gibohon ni Jehova.​—Thierry, otso anyos.

Ini na gabos an kuarta ko! Tabi gamiton nindo iyan sa madonong na paagi. Masakit magdamot. Uya an $21.​​—Sarah, dies anyos.

Nanggana ako nin primera premyo sa sarong asignasyon sa eskuelahan, kaya nakaentra ako sa pandistritong kompetisyon. Nanggana man ako duman nin primera premyo dangan segunda premyo sa pangultimong kompetisyon sa distrito. Sa gabos na ini, kuarta an premyo ko. Boot kong ihiras an ibang kuarta sa Sosyedad. Sa pagmate ko nakua ko an mga premyong ini huli sa pagsasanay na inako ko sa Teokratikong Paadalan sa Pagmiministro. Kompiado ako sa pagtao kan sakong report sa atubangan kan hurado.​—Amber, ikaanom na grado.

Gusto kong itao ini sa saindo para ki Jehova. Hapota nindo sia kun ano an gigibohon nindo dian. Sia an nakakaaram kan gabos.​—Karen, sais anyos.

[Mga retrato sa pahina 25]

An mga aktibidad kan Mga Saksi ni Jehova sustentado nin boluntad na mga donasyon