Ginibo Ninda an Kabotan ni Jehova

Pinamumuraway ni Elias an Tunay na Dios

SIA an pangenot na hinahanap na tawo sa Israel. Siertong sia gagadanon na kun sia manompongan kan hade. Siisay an pinaghahanap na tawong ini? An propeta ni Jehova na si Elias.

Pinalakop ni Hadeng Acab asin kan saiyang paganong agom, si Jezabel, an pagsamba ki Baal sa Israel. Bilang resulta, pinangyari ni Jehova an tigmara sa daga, na ngonyan nasa ikaapat na taon na. An anggoton na si Jezabel nagsabing ipagadan an mga propeta ni Jehova, alagad si Elias an partikularmenteng hinahanap ni Acab. Si Elias an suminabi ki Acab mga tolong taon na an nakaaagi: “Dai magkakaigwa nin ambon ni oran sa mga taon na ini, apuera sana sa pagboot kan sakuyang tataramon!” (1 Hade 17:​1) Asin an ibinungang tigmara nagpadagos.

Sa peligrosong situwasyon na ini, si Elias sinabihan ni Jehova: “Lakaw, pumaheling ka ki Acab, ta ako desididong magtao nin oran sa ibabaw kan daga.” Sa atubangan nin dakulang personal na peligro, si Elias kuminuyog sa pagboot ni Jehova.​—1 Hade 18:​1, 2.

Naghampangan an Duwang Magkalaban

“Ika ini, an paradara nin ostrasismo sa Israel?” an hapot ni Acab kan maheling si Elias. “Dai ako nagdara nin ostrasismo sa Israel,” an mapusong simbag ni Elias, “kundi ika asin an harong kan saimong ama, huli ta tinalikdan nindo an mga togon ni Jehova, asin nagsurunod kamo sa mga Baal.” Dangan ipinagboot ni Elias na an bilog na Israel magtiripon sa Bukid nin Carmelo, kaiba “an apat na gatos may limang polong propeta ni Baal asin an apat na gatos na propeta kan sagradong palo.” Dangan kinaolay ni Elias an kadaklan: “Sagkod noarin kamo magkikiangkiang sa duwang magkalaen na opinyon?a Kun si Jehova an tunay na Dios, sumunod kamo sa saiya; alagad kun si Baal, sumunod kamo sa saiya.”​—1 Hade 18:​17-​21.

An banwaan silensio. Tibaad namidbid ninda an saindang pagkakulpable sa dai pagtao nin esklusibong debosyon ki Jehova. (Exodo 20:​4, 5) O puede man na an saindang konsensia labi na katagas kaya dai ninda ibinibilang na kasalan an pagkabanga kan saindang kaimbodan ki Jehova asin ki Baal. Sa paano man, pinagbotan ni Elias an mga tawo na magkua nin duwang ogbon na tarnera​—an saro para sa mga propeta ni Baal asin an saro para saiya. An duwang tarnera iaatang, alagad dai magmamakot nin kalayo. “Dapat kamong mag-arang sa ngaran kan saindong dios,” an sabi ni Elias, “asin ako man maarang sa ngaran ni Jehova; asin mangyari na an tunay na Dios na sumimbag paagi sa kalayo iyo an tunay na Dios.”​—1 Hade 18:​23, 24.

Pinamuraway si Jehova

An mga propeta ni Baal puminoon nang ‘magkiangkiang sa palibot kan altar na saindang ginibo.’ Sa bilog na aga sinda nagkukurahaw: “O Baal, simbaga kami!” Alagad si Baal dai suminimbag. (1 Hade 18:​26) Dangan si Elias puminoon nang tuyatuyaon sinda: “Pag-apod kamo sa pinakamakosog nindong tingog, huli ta sia sarong dios.” (1 Hade 18:​27) An mga propeta ni Baal nagpoon na nganing lugadon an sadiri ninda nin mga kutsilyo asin mga lanseta​—sarong kaugalean na parateng ginigibo nin mga pagano tanganing kaherakan sinda kan saindang mga dios.b​—1 Hade 18:​28.

Hapon na kaidto, asin an mga parasamba ki Baal padagos na “minagawe bilang mga propeta”​—sarong frase na sa kontekstong ini nagtatao kan ideya nin padagos na pagkataranta asin kadaihan nin pagpopogol sa sadiri. Kan hapon nang marhay, si Elias sa katapustapusi suminabi sa mga tawo: “Rani kamo sa sako.” An gabos atentong nagdadalan mantang si Elias hinihirahay an altar ni Jehova, nagkakali sa palibot kaiyan, pinipiridaso an ogbon na tarnera, asin ibinugtak iyan sa ibabaw kan altar na may mga songo. Pagkatapos, an tarnera, an altar, asin an songo binoboan nin dakol na tubig, asin an kali binugtakan nin tubig (na daing duda na tubig na kinua hale sa Dagat Mediterraneo). Dangan, si Elias namibi ki Jehova: “Ngonyan maaraman logod na ika an Dios sa Israel asin ako an saimong lingkod patin paagi sa saimong tataramon na ginibo ko an gabos na bagay na ini. Simbaga ako, O Jehova, simbaga ako, tanganing an banwaan na ini makaaram na ika, Jehova, iyo an tunay na Dios asin ika mismo an nagpabalik kan saindang puso.”​—1 Hade 18:​29-​37.

Biglang may nahulog na kalayo hale sa langit “asin inubos an dolot na tinotong asin an mga kapidasong kahoy asin an mga gapo patin an kabokabo, asin dinila kaiyan an tubig na yaon sa kali.” An mga tawo na nagheheling tolos-tolos na nagralaob asin nagsarabi: “Si Jehova iyo an tunay na Dios! Si Jehova iyo an tunay na Dios!” Sa pagboot ni Elias, an mga propeta ni Baal dinarakop asin dinara sa kasapaan nin Cison, na duman sinda ginaradan.​—1 Hade 18:​38-​40.

Leksion Para sa Sato

Si Elias nagpaheling nin garo baga lihis sa tawong kapusoan. Alagad ta an parasurat sa Biblia na si Santiago inaasegurar kita na “si Elias sarong tawo na may mga pakamate na arog kan sa sato.” (Santiago 5:​17) Natatakot asin nahahadit man sia. Halimbawa, kan si Jezabel magsumpang ipapamalos an pagkagadan kan mga propeta ni Baal, si Elias duminulag asin uminagrangay ki Jehova sa pamibi: “Igo na! Ngonyan, O Jehova, kuana an sakong kalag.”​—1 Hade 19:​4.

Dai kinua ni Jehova an kalag ni Elias sa kagadanan. Imbes, maheherakon siang nagtao nin tabang. (1 Hade 19:​5-8) An mga lingkod nin Dios ngonyan makasisierto na arog man kaiyan an gigibohon ni Jehova kun sinda mapaatubang sa grabeng kahaditan, na tibaad huli sa pagtumang. Tunay na kun sinda mamimibi para sa tabang ni Jehova, sia puedeng magtao sainda nin “kosog na lihis sa ordinaryo,” kaya dawa kun sinda “nagigipit sa palibot,” dai sinda “naiipit na dai na makahiro.” Sa siring, sinda tatabangan na makatagal, arog ki Elias.​—2 Corinto 4:​7, 8.

[Mga Nota sa Ibaba]