Taano ta Dapat Magpasalamat?
HULI sa operasyon sa udog si Harley napiritan na bagohon an saiyang karera hale sa pagigin mekaniko pasiring sa pagigin klerk sa opisina. Kan hapoton kun ano an saiyang saboot manongod sa pagbabagong ini, si Harley nagsabi: “Hinihidaw ko talaga an pagtrabaho sa mga makina. Alagad, sa totoo sana, mas maogma ako sa trabaho ko sa presente kisa sa dati kong trabaho.”
Sa pagtao nin dahelan sa saiyang pagkakontento, si Harley nagsasaysay: “Huli iyan sa aktitud kan mga kaibahan ko sa trabaho. Bakong arog kan dati kong mga katrabaho, an sakong superbisor asin mga katrabaho sa presente mapag-apresyar sa sakong ginigibo, asin sinda dai nag-aalangan sa pagtao nin komendasyon. Dakula nanggad an ginibong kalaenan kaini.” Nakamamateng kapakipakinabang asin kaipuhan, si Harley saro nang maogmang trabahador ngonyan.
An komendasyon o pagpasalamat, kun maninigo, tunay na nakaoogma. An epekto nin pagigin ingrato, sa ibong na lado, puedeng magin siring kanakapangigirabo kan komento ni Shakespeare: “Humuyop ka, humuyop ka, doros sa tiglipot, ika na dai nanggad nin kabootan kapareho nin pagigin ingrato nin tawo.” Makamomondo, dakol an nag-ako kan siring na kadaihan nin kabootan.
Magmaan Tumang sa Pagigin Ingrato
Sa kinaban ngonyan an sinserong mga kapahayagan nin pagpasalamat nawawara na. Halimbawa, an sarong parasurat nagpalataw nin hapot: “Kun an nobya nagkaigwa nin panahon na bugtakan nin adres an 200 na imbitasyon sa kasal, taano ta dai sia magkaigwa nin panahon na magsurat nin mensahe nin pasasalamat para sa 163 na regalo?” Sa parate dawa an simpleng tataramon na “salamat” dai nasasabi. An pagpasalamat paorog nang paorog na nasasalidahan nin ako ngunang aktitud. An situwasyon na ini saro sa nagpapamidbid na tanda kan huring mga aldaw. Nagpatanid si apostol Pablo: “Dapat nindong masabotan na sa huring mga aldaw an mga panahon magigin pano nin peligro. An mga tawo magigin grabe kamakisadiri . . . Sinda magigin grabe kadaing pagpasalamat.”—2 Timoteo 3:1, 2, Phillips.
Sa ibang kaso, an pagpasalamat nariribayan nin pambobola. An mga kapahayagan nin pagpasalamat hale sa puso na daing iniisip na personal na pakinabang. Minsan siring, an pambobola, na sa parate bakong sinsero asin sobra an pagkasabi, puedeng maggikan sa natatagong motibo na makasakat sa posisyon o makakua nin personal na mga bentaha. (Judas 16) Apuera sa pan-eenganyar sa nag-aako, an siring na magagayon na tataramon minalataw na bunga nin kapalangkawan asin kapaabhawan. Kun siring, siisay an magugustong mabiktima nin bakong sinserong pambobola? Alagad ta an tunay na pagpasalamat nakagiginhawa nanggad.
An tawong nagpapahayag nin pagpasalamat nakikinabang sa paggibo kaiyan. An init na naeeksperyensiahan nia huli sa pagigin mapagpasalamat gikan sa puso nagkokontribwir sa saiyang kaogmahan asin katoninongan. (Ikomparar an Talinhaga 15:13, 15.) Asin bilang positibong kualidad, an pagpasalamat nagpoprotehir sa saiya tumang sa negatibong mga saboot na siring kan kaanggotan, pag-imon, asin paghinanakit.
“Ipaheling Nindo na Kamo Nagpapasalamat”
Sinasadol kita kan Biblia na kultibaron an espiritu nin pagpasalamat, o pagigin mapagpasalamat. Si Pablo nagsurat: “Magpasalamat kamo para sa gabos na bagay. Huli ta iyo ini an kabotan nin Dios sa kasaro ni Cristo Jesus manongod sa saindo.” (1 Tesalonica 5:18) Asin hinatolan ni Pablo an mga taga-Colosas: “Togotan nindo na an katoninongan kan Cristo mamogol sa saindong puso . . . Asin ipaheling nindo na kamo nagpapasalamat.” (Colosas 3:15) An dakol na salmo igwa nin mga kapahayagan nin pasasalamat, na ipinaririsa na an odok sa pusong pagpasalamat sarong diosnon na birtud. (Salmo 27:4; 75:1) Malinaw nanggad, si Jehova Dios naoogma kun kita nagpapasalamat sa ordinaryong mga bagay sa buhay.
Alagad anong mga dahelan sa bakong mapagpasalamat na kinaban na ini an nagpapasakit sa sato na kultibaron an espiritu nin pagpasalamat? Paano ta puedeng ipaheling an mapagpasalamat na aktitud sa pan-aroaldaw na buhay? An mga hapot na ini ipaliliwanag sa masunod na artikulo.