Kultibaron an Espiritu nin Pagpasalamat

ILINIGTAS nin sarong doktor sa Estado nin Nueva York an buhay ni Marie sa sarong emerhensia. Alagad an 50 anyos na si Marie dai man lamang nagpasalamat sa doktor ni nagbayad kan saiyang nagastos. Kanigoan na halimbawa nin pagigin ingrato!

Isinasaysay kan Biblia na sarong beses, paglaog sa sarong baryo, nasabatan ni Jesus an sampulong lalaki na may makatatakot na helang na daot. Sinda nagkururahaw nin makosog sa saiya: “Jesus, Paratokdo, kaheraki kami!” Si Jesus nagboot: “Lakaw asin pumaheling kamo sa mga saserdote.” Sinunod kan mga daoton an saiyang pagboot, asin mantang nagbabaklay, naheling asin namatean ninda na nagbabalik sa dati an saindang salud.

An siyam sa mga naomayan na daoton nagpadagos sa saindang paglakaw. Alagad an sarong daoton, na sarong Samaritano, nagbuelta tanganing hanapon si Jesus. An dating daoton na ini nag-omaw sa Dios, asin kan manompongan si Jesus, luminaob sia sa pamitisan ni Jesus, na nagpapasalamat sa saiya. Bilang simbag si Jesus nagsabi: “An sampulo nagkarilinigan, bakong iyo? Kun siring, haen na an siyam? Ano mayo nin nagbuelta sa pagtao nin kamurawayan sa Dios kundi an tawong ini na tagaibang nasyon?”​—Lucas 17:​11-19.

Sarong mahalagang leksion an ipinasesentido kan hapot na: “Kun siring, haen na an siyam?” Arog ni Marie, an siyam na daoton may seryosong pagkukulang​—dai sinda nagpaheling nin pagpasalamat. An siring na pagigin ingrato lakop na marhay ngonyan. Ano an dahelan kaini?

Pundamental na Dahelan nin Pagigin Ingrato

An pagigin ingrato sa pundamental huli sa kapasloan. Horophoropa an enot niatong mga magurang, si Adan asin Eva. Linalang sinda ni Jehova na may mga atributo nin Dios asin itinao an gabos para sa kaogmahan ninda, kabale na an sarong magayon na istaran na tatamnan, sangkap na palibot, asin makahulogan patin nakakokontentong gibohon. (Genesis 1:​26-​29; 2:​16, 17) Pero, kan iniimpluwensiahan ni Satanas an saindang pansadiring interes, bilang mag-agom sinda nagin masinuhay asin binalosan nin kalapastanganan an pagkamatinao ni Jehova.​—Genesis 3:​1-5; Kapahayagan 12:9.

Horophoropa man an banwaan nin suanoy na Israel, na pinili nin Dios na magin saiyang espesyal na rogaring. Sierto nanggad na nagpasalamat an gabos na magurang na Israelita kan banggi nin Nisan 14, 1513 B.C.E.! Sa importanteng bangging idto, ginadan kan anghel nin Dios an “gabos na matua sa daga nin Egipto” alagad linihisan an may tamang marka na mga harong nin mga Israelita. (Exodo 12:​12, 21-​24, 30) Asin kan iligtas sa hukbo ni Faraon sa Dagat na Pula, may pusong pano nin pagpasalamat, ‘si Moises asin an mga aki ni Israel nag-arawit ki Jehova.’​—Exodo 14:​19-​28; 15:​1-​21.

Minsan siring, pira sanang semana pakahale sa Egipto, “an bilog na kasararoan kan mga aki ni Israel nagpoon na maggumodgumod.” Madalion nanggad sindang nabiktima nin pagigin ingrato! Nahidaw ninda an ‘pagtukaw kataed nin mga koron na may karne . . . , pagkakan nin tinapay sagkod na makontento,’ na nakamtan ninda sa Egipto, an daga kan saindang kaoripnan. (Exodo 16:​1-3) Malinaw nanggad, an kapasloan katumang kan pagkultibar asin pagpaheling nin pagpasalamat.

Bilang mga gikan kan makasalan na si Adan, an gabos na tawo namundag na may digta nin kapasloan asin tendensia na magin ingrato. (Roma 5:12) An kadaihan nin pagpasalamat kabtang man kan paslong espiritu na nagdodominar sa mga tawo sa kinaban na ini. Kapareho kan doros na hinahangos niato, an espiritung iyan yaon sa gabos na lugar, asin iyan nakaaapektar sa sato. (Efeso 2:​1, 2) Kun siring, kaipuhan niatong kultibaron an mapagpasalamat na ugale. Paano ta iyan magigibo?

Kaipuhan an Paghorophorop!

An Webster’s Third New International Dictionary tinatawan nin kahulogan an pagpasalamat na “pagigin mapagpasalamat: mainit asin makikatood na pagmate sa paratabang na nagpapahiro sa saro na balosan an kabootan.” An pagmate dai puedeng buhayon o gadanon sa mekanikal na paagi; iyan dapat na sueltong maggikan sa boot nin sarong tawo. An pagpasalamat labi pa kisa sa pagpaheling sana nin marahay na hiro-hiro o sarong klase nin marahay na ugale; iyan hale sa puso.

Paano ta pag-aadalan na mamatean an pagigin mapagpasalamat hale sa puso? Iinaatribwir kan Biblia an kadaklan kan satong namamatean sa gusto tang isipon. (Efeso 4:​22-24) An pag-adal na mamatean an pagigin mapagpasalamat nagpopoon sa mapag-apresyar na paghorophorop kan mga kabootan na inaako niato. Kaoyon kaini, si Dr. Wayne W. Dyer, na nagtatrabaho sa langtad nin salud kan isip, nagsasabi: “Dai kamo magkakaigwa nin pagmate (emosyon) kun dai nguna kamo mag-isip.”

Halimbawa, an pagigin mapagpasalamat huli sa mga linalang na nasa palibot niato. Kun titingkalagon nindo an langit na pano nin bitoon sa daing panganoron na banggi, ano an saindong namamate manongod sa saindong naeeksperyensiahan? Si Hadeng David nagpahayag kan paghanga na namatean nia: “Kun naheheling ko an saimong kalangitan, an mga gibo kan saimong mga moro, an bulan asin mga bitoon na saimong hinaman, ano an magagadanon na tawo ta sia ginigirumdom mo, asin an aki nin daganon na tawo ta sia inaataman mo?” Asin sa matoninong na banggi, an mga bitoon nagtaram ki David, na nagpahiro sa saiya na magsurat: “An kalangitan nagpapahayag kan kamurawayan nin Dios; asin an gibo kan saiyang mga kamot ipinagsasaysay kan kahiwasan.” Taano ta naapektaran na marhay si David kan mabitoon na kalangitan? Sia mismo nagsisimbag: “Naghorophorop ako sa gabos mong gibo; gikan sa boot na dayaday akong nagtao nin atension sa gibo kan saimong mga kamot.”​—Salmo 8:​3, 4; 19:1; 143:5.

An aki ni David na si Salomon inapresyar man an halaga kan paghorophorop manongod sa mga ngangalasan sa paglalang. Halimbawa, mapadapit sa kabtang kan iooran na panganoron sa pagparepresko sa satong daga, sia nagsurat: “An gabos na kasalogan nin tiglipot minapasiring sa dagat, pero an dagat mismo dai napapano. Sa lugar na pinadudumanan kan kasalogan nin tiglipot, duman sinda minabaralik tanganing bumolos giraray.” (Eclesiastes 1:7) Kaya nangyayari na pakatapos na parepreskohan kan oran asin mga salog an daga, an katubigan kaiyan irineresiklo hale sa kadagatan pabalik sa mga panganoron. Ano daw an mangyayari sa dagang ini kun mayo an pagdalisay asin pagresiklong ini kan tubig? Sierto nanggad na nakamate nin pagpasalamat si Salomon kan hinohorophorop nia an mga ini!

An tawong mapagpasalamat pinahahalagahan man an saiyang relasyon sa mga miembro nin pamilya, katood, asin kamidbid. An saindang mga gibo nin kabootan nakaaapod kan saiyang atension. Mantang mapag-apresyar niang hinohorophorop an saindang kabootan, nakamamate sia nin pasasalamat hale sa puso.

Pagpahayag nin Pagpasalamat

Simple sana nanggad an tataramon na “salamat”! Pasil sanang sabihon an siring na tataramon. Asin kadakol kan oportunidad na gibohon iyan. Kanigoan kanakarerepresko kan mainit asin sinserong Salamat sa saro na nagbubukas kan pinto para sa sato o nagpupurot kan bagay na naholog niato! An pakadangog kan tataramon na iyan puedeng gibohon na mas magian asin mas nakakokontento an trabaho nin sarong tindero o serbidora sa sarong restawran o kartero.

An pagpadara nin mga kard bilang pasasalamat angay na paagi tanganing ipahayag an pagpasalamat para sa mga gibo nin kabootan. Dakol sa mga kard na makukua sa mga tindahan an nagpapahayag nin mga saboot sa magayon na paagi. Alagad bako daw na mamomoton na personal na kapahayagan an pagdagdag nin mga tataramon nin pag-apresyar na kamo mismo an nagsurat? An iba mas gusto pa ngani na dai maggamit nin inimprentang kard, na nagpapadara na sana nin personal na surat.​—Ikomparar an Talinhaga 25:11.

Posible na an pinakamaninigo para sa satong pagpasalamat iyo an mga pinakadayupot sa sato sa harong. An Biblia nagsasabi dapit sa sarong may kakayahan na agom na babae: “An saiyang kagsadiri minatindog, asin sia nag-oomaw sa saiya.” (Talinhaga 31:28) Bako daw na an odok sa pusong mga kapahayagan nin pasasalamat nin sarong agom na lalaki sa saiyang agom na babae nakakokontribwir sa matoninong asin nakakokontentong kamugtakan sa harong? Asin bako daw na an agom na lalaki naoogma na abotan sa harong an sarong mainit asin mapag-apresyar na pataratara kan saiyang agom na babae? Sa mga aldaw na ini, dakol an mga pangigipit sa pag-agoman, asin kun nagdadakol an pangigipit, madaling mag-init an payo. An saro na mapagpasalamat andam na magpasensia saka madaling magpasipara asin magpatawad.

An mga hoben kaipuhan man na magin mapagrisa na ipaabot sa saindang mga magurang an odok sa pusong mga kapahayagan nin pasasalamat. Siempre, an mga magurang bakong sangkap, alagad bakong dahelan iyan na magin ingrato sa nagibo ninda para sa saindo. An pagkamoot asin atension na itinao ninda sa saindo poon kan kamo mamundag dai puedeng bakalon. Kun itinokdo ninda sa saindo an kaaraman dapit sa Dios, igwa kamo nin dugang pang dahelan na magin mapagpasalamat.

“An mga aki mana hale ki Jehova,” an ipinahahayag kan Salmo 127:3. Kaya an mga magurang maninigong humanap nin mga oportunidad na komendaran an saindang mga aki imbes na pagparaanggotan sinda manongod sa saradit na bagay. (Efeso 6:4) Asin pribilehio nanggad ninda na tabangan an mga hoben na nasa poder ninda na kultibaron an espiritu nin pagpasalamat!​—Ikomparar an Talinhaga 29:21.

Mapagpasalamat sa Dios

Si Jehova Dios iyo an Paratao kan “lambang marahay na balaog asin lambang sangkap na regalo.” (Santiago 1:17) Nangorognang mahalaga an balaog na buhay, huli ta an gabos na yaon sa sato o tibaad pinaplano niato magigin daing halaga kun mawaran kita nin buhay. Sinasadol kita kan Kasuratan na girumdomon na “yaon [ki Jehova Dios] an gikanan nin buhay.” (Salmo 36:​5, 7, 9; Gibo 17:28) Tanganing makultibar an mapagpasalamat na puso sa Dios, kaipuhan tang horophoropon an saiyang abundang mga probisyon na nagsusustenir sa satong pisikal asin espirituwal na buhay. (Salmo 1:​1-3; 77:​11, 12) An siring na puso mapahiro sa sato na magpaheling nin apresasyon paagi sa mga tataramon asin gibo.

An pamibi sarong risang paagi nin pagpahayag kan satong pagpasalamat sa Dios. Ipinahayag kan salmistang si David: “Dakol an bagay na saimo mismong ginibo, O Jehova na sakong Dios, minsan an saimong makangangalas na mga ginibo asin an saimong mga pagmakolog samo; mayo nin ikakabaing saimo. Kun ako magmawot na isaysay asin itaram iyan, iyan dai ko na kayang isaysay huli sa kadakolan.” (Salmo 40:5) Kita logod mapahiro man sa siring na paagi.

Si David determinado man na ipaheling sa Dios an saiyang apresasyon paagi sa mga tataramon na sinabi nia sa iba. Sia nagsabi: “Oomawon taka, O Jehova, sa bilog kong puso; ipahahayag ko an gabos mong makangangalas na mga gibo.” (Salmo 9:1) An pagtaram sa iba manongod sa Dios, na ipinahahayag an satong sadiri paagi sa paghiras sa sainda kan katotoohan hale sa saiyang Tataramon, iyo an posibleng pinakamarahay na paagi na ipaheling sa saiya an satong pagpasalamat. Asin tatabangan kita kaini na magin orog na mapagpasalamat sa iba pang mga aspekto kan buhay.

“An saro na nagdodolot nin pasasalamat bilang saiyang atang iyo an nagpapamuraway sa sako; asin kun para sa saro na nagdadanay sa husay na dalan, pangyayarihon ko na maheling nia an kaligtasan,” an sabi ni Jehova. Maeksperyensiahan logod nindo an kagayagayahan na hale sa pagpaheling nindo nin odok sa pusong pagpasalamat sa saiya.​—Salmo 50:23; 100:2.

[Retrato sa pahina 7]

An buhay balaog hale sa Dios. Siertohon na idugang an personal na kapahayagan