Bareta kan mga Parabalangibog kan Kahadean

Pinatutubo Iyan nin Dios sa Alaska

NATATAHOBAN nin niebe asin yelo, an sarong sadit na banhi naghahalat nin oportunidad na tumubo sagkod na dumakula. Sa laog kan tolong halipot na bulan na tig-init sa Alaska, an tres milimetros kadakula na banhi nin repolyo tibaad tumubo nin sagkod sa haros 40 kilos! Iyo, an dagang ini na kaidto hinohona nin dakol na tagiltil, malipoton na desierto puedeng magbunga nin abunda.

Ini nangorognang totoo kun manongod sa espirituwal na oma sa Alaska. Duman, sa daga nin halawig na tiglipot, an Mga Saksi ni Jehova nagpapadagos sa pagsabwag kan banhi nin Kahadean. Siring sa ibang mga parte kan daga, pinatutubo nin Dios an banhi sa balunbon na mga puso.​—1 Corinto 3:​6, 7.

● Mantang nakasakay sa autong naghahatod sa mga eskuela, an sarong hoben na Saksi na an ngaran Vanessa naobserbaran an sarong kapwa estudyante, si Ann, na pirmeng nagtutukaw nin solo. Si Ann risang mamondo, kaya inagda ni Vanessa si Ann na tumukaw sa kataed nia. Bako nanggad na makangangalas na si Ann mamondo! An saiyang ina nagadan sa atake sa puso, asin dai nahaloy, an saiyang ama nagadan sa kanser. Kaya si Ann nakikiistar sa mga paryente sa Alaska.

Sarong Sabado mantang naglilingkod sa langtad si Vanessa naghapit sa harong kan bago niang kamidbid asin winalatan nia ini nin brosyur na An Dios daw Talagang May Pagmakolog sa Sato? Kan suminunod na Lunes sa eskuelahan, hinanap ni Ann an hoben na Saksi. Si Ann dakol an hapot sa Biblia, na nakaya man na simbagon ni Vanessa. “Saen ginigibo an saindong mga pagtiripon?” sia naghapot. Kan bangging idto si Ann uminatender sa kaenot-enote sa pagtiripon sa Kingdom Hall.

Dai nahaloy para sa 17 anyos na ilong ini na makanompong nin dakol na “ama” asin “ina,” siring sa panuga ni Jesus. (Mateo 19:29) Asin kanigoan kagayagayang okasyon na maheling an maogma asin nakahuyom na si Ann na sinisimbolisaran an saiyang pagdusay ki Jehova paagi sa pagpabautismo sa tubig sa “Mga Mensahero nin Diosnon na Katoninongan” na Pandistritong Kombension!

● Sa puerang mga lugar kan mahiwas na rehion nin Artico sa Alaska​—kun saen an mga baryo pinagsusuruwaysuway nin ginatos na kilometros na kaawagan—​an duwa an makinang eroplano kan Watch Tower Society ginagamit sa pagsabwag kan banhi nin Kahadean sa labing 150 komunidad. Alagad an espirituwal na pagtubo paagi sa regular na pag-adal kan Biblia minadepende sa pagsusuratan. Huling an pagsurat masakit para sa dakol, an sarong paratokdo sa Biblia kaipuhan na magin mapag-imbento tanganing mapagdanay na buhay an interes kan estudyante. Paano ini magigibo?

Si Kathy nagkondukta nin sarong progresibong pag-adal sa Biblia ki Edna, maski ngani labing 600 kilometros an rayo ninda sa lambang saro! Imbes na kopyahon sana an mga hapot sa pinag-aadalan na materyal, si Kathy naggigibo nin suhay na papel na may mga hapot asin naglalaag nin blangko para sa susuratan nin mga simbag. Pagkatapos na simbagon ni Edna, si Kathy minasurat liwat asin isinasaliot an mga komento na kaipuhan tanganing linawon an sarong punto. Nagsasabi si Kathy: “Itinatagama ko an Mierkoles na banggi para sa samong ‘pag-adal,’ asin hinihingoa ko na masunod iyan arog kan ginigibo ko sa iba pang mga inaadalan ko sa Biblia. Pinadadarahan ko man si Edna nin sobreng igwa nang adres ko asin selyo. Huling nagduduwang semana an koreo, an pag-adal paagi sa pagsuratan garo baga medyo maluway.”

Imahinaron an kaogmahan kan si Kathy asin Edna maghelingan nin personal sa pandistritong kombension sa Anchorage pakalihis nin sampulong bulan na pag-adal paagi sa surat! An mga Saksi naogma man na makaibahan sa pag-atender an mga nakikipag-adal sa Biblia asin an iba pang interesado na hale sa pirang napapasuway na baryo sa Alaska.

Minsan ngani an pagtubo tibaad kun beses garo maluway, may mga “banhi” na minatubo nin marikas kun natatamaan kan liwanag nin katotoohan. Sa promedyo, labi sa sanggatos na bagong paraomaw ki Jehova an nababautismohan kada taon sa Alaska! Kita nagsasabi, “Salamat saimo, Jehova,” sa pagpapatubo kaiyan!