Estorya nin Buhay

An Saradit na Sakripisyo Nagtao sa Samo nin Darakulang Bendisyon

ISINAYSAY NI GEORGE ASIN ANN ALJIAN

Dai noarin man nagsabong sa isip mi kan sakong agom na maabot an aldaw an “maestra” ipapareho mi sa “kino.” Dai mi noarin man naisip na sa edad ming 60 pepensaron mi an bakong pamilyar na mga letra sa paghihingoa na makikomunikar sa mga tawo hale sa Harayong Sirangan. Pero ini an ginibo mi ni Ann kan huring mga taon nin 1980. Togoti nindo kaming iestorya sa saindo kun paanong an saradit na sakripisyo na ginibo niamo sa nag-aging mga taon nagbunga nin dakol na bendisyon.

HALE ako sa sarong pamilya na may Armenianong ginikanan asin kabilang sa Iglesia Armeniano. Si Ann sarong Katoliko Romano kaidto. Pareho mi ikinompromiso an samong relihiosong mga paniniwala kan magpakasal kami kan 1950. Ako 27 anyos kaidto, asin 24 si Ann. Nag-istar kami sa sarong apartment sa itaas kan sakong puesto para sa dry-cleaning sa Jersey City, New Jersey, E.U.A. Kan panahon na idto sadiri ko na an negosyong ini sa laog nin mga apat na taon.

Kan 1955 nagbakal kami nin sarong magayon na harong na may tolong kuartong torogan sa Middletown, New Jersey. An harong na iyan mga 60 kilometros hale sa sakong negosyo, na duman ako nagtatrabaho nin anom na aldaw kada semana. Banggi nang marhay ako nakakapuli. Nakakaolay ko sana an mga Saksi ni Jehova kun sinda minaduman sa sakong puesto sa panapanahon asin dinadarahan ako nin mga babasahon sa Biblia. Binabasa ko an mga babasahon na may dakulang interes. Minsan ngani an kadaklan kan oras asin atension ko nasa negosyo, nagkaigwa ako nin hararom na paggalang sa Biblia.

Dai nahaloy naaraman ko na an estasyon nin radyo kan Watchtower, an WBBR, nagbobrodkast nin mga diskurso sa Biblia durante kan panahon na ako nagmamaneho pasiring asin hale sa sakong puesto. Maingat akong naghihinanyog sa mga diskursong ini, asin nagdakula an sakong interes sagkod sa punto na hinagad ko sa mga Saksi na dalawon ako. Kan Nobyembre 1957, dinalaw ako ni George Blanton sa sakong harong asin pinonan akong adalan sa Biblia.

Nagkasararo an Samong Pamilya sa Dalisay na Pagsamba

Ano an nagin saboot ni Ann manongod sa gabos na ini? Togoti nindo siang estoryahan kamo.

“Kan enot grabe an pagkontra ko. Grabe an pan-aabala ko durante kan pag-adal sa Biblia ni George kaya nagdesisyon sia na mag-adal sa ibang lugar, na ginibo iyan sa laog nin walong bulan. Durante kan panahon na iyan, si George nagpoon na umatender sa mga pagtiripon kun Domingo sa Kingdom Hall. Aram ko na kaidto na seryoso sia sa saiyang pag-adal sa Biblia huli ta iyo sana ini an solamenteng aldaw na mayo sia nin trabaho. Pero nagdanay siang marahay na agom asin ama​—nagin mas marahay pa ngani​—asin nagpoon na mabago an sakong aktitud. Sa katunayan, kun beses mantang pinupunasan ko an lamesa sa sala na mayo nin nagheheling, kinukua ko an magasin na Awake! na pirmeng winawalat duman ni George, asin binabasa ko iyan. May beses man na binabasa sako ni George an mga artikulo sa Awake! na dai direktang nagtotokar nin doktrina alagad pirmeng nagtatampok sa Kaglalang.

“Sarong banggi mantang mayo si George na nakikipag-adal sa Biblia ki Tugang na Blanton, kinua ko an sarong publikasyon na ibinugtak kan samong dos anyos na aking lalaki, si George, sa ibabaw kan lamesa na kataed kan sakong kama. Tinotokar kaiyan an paglaom para sa mga nagadan. Minsan ngani pagal ako kaidto, pinonan kong basahon iyan huli ta nagagadan pa sana an sakong lola, asin desesperado akong marhay. Nasabotan ko tolos an katotoohan sa Biblia na an mga gadan dai nagdudusa sa sarong lugar asin na sinda mabubuhay giraray sa maabot na pagkabuhay liwat. Dai nahaloy nagtutukaw na ako nin deretso sa kama, na galagang binabasa asin kinukuritan an mga punto na gusto kong ipaheling ki George pagpuli nia hale sa saiyang pag-adal sa Biblia.

“Haros dai makapaniwala sa sako an sakong agom. Kan humale sia sa harong, kontra ako, asin ngonyan biyo akong nagsusulwak sa kaogmahan huli sa makangangalas na mga katotoohan sa Biblia na nanodan ko! Nagdanay kaming mata sagkod maagahon na nag-oolay manongod sa Biblia. Ipinaliwanag ni George an katuyohan nin Dios para sa daga. Hinapot ko sia kan banggi mismong idto kun puede niang gibohon an saiyang pag-adal sa harong tanganing makaayon ako dian.

“Irinekomendar ni Tugang na Blanton na umayon an mga aki sa samong pag-adal. Inisip niamo na aki pa sindang marhay, huling duwa asin apat na taon pa sana an mga ini. Minsan siring, ipinaheling sa samo ni Tugang na Blanton an Deuteronomio 31:​12, na nagsasabi: ‘Tiponon mo an banwaan, an mga lalaki asin an mga babae asin an saradit . . . , tanganing sinda maghinanyog asin tanganing sinda makanood.’ Inapresyar niamo an paggiyang iyan asin iinareglo pa ngani na an mga aki magkomento durante kan pag-adal sa Biblia. Iriba niamong inaandam an samong mga komento, alagad dai niamo noarin man sinda dinidiktahan kun ano an sasabihon. Sa boot niamo ini nakatabang na giyahan an mga aki na isapuso an katotoohan. Pirme niamong pasasalamatan an paggiya na itinao sa samo ni Tugang na Blanton tanganing tabangan an samong pamilya na tumalubo sa espirituwal.”

Mga Angat na Nagkakaipo nin Sakripisyo

Ngonyan na nagkakasararo na kami sa pag-adal sa Biblia, may bagong mga angat kami na dapat atubangon. Mantang an sakong puesto harayoon, sa parate mga alas nuebe nin banggi na ako nakakapuli. Huli kaini, dai ako nakakaatender sa mga pagtiripon sa ordinaryong mga aldaw, minsan ngani nakakaatender ako nin Domingo. Kan panahon na idto, si Ann nag-aatender na sa gabos na pagtiripon asin marikas na nag-ooswag. Gusto ko man na atenderan an gabos na pagtiripon saka mamayo nin sarong makahulogan na pampamilyang pag-adal. Aram ko na kaipuhan kong gumibo nin nagkapirang pagsakripisyo. Kaya nagdesisyon ako na palipoton an oras ko sa negosyo, dawa mawara an nagkapira kong parokyano.

Marahayon an nagin resulta kaiyan. Ibinilang mi an pampamilyang pag-adal na siring kaseryoso kan iba pang limang semanal na pagtiripon sa Kingdom Hall. Inapod mi iyan na an samong ikaanom na pagtiripon. Kaya nagbugtak kami nin espesipikong aldaw asin oras​—kada Mierkoles nin alas 8:00 n.b. Kun beses pakatapos nin pamanggihan, mantang tapos na an paghugas nin kinakanan, sasabihon kan saro sa samo, “Oras na para sa ‘pagtiripon’!” Pinoponan ni Ann an pag-adal kun naaatraso ako, asin ipinapadagos ko iyan oras na mag-abot ako.

An saro pang bagay na nagpadanay sa samo na makosog asin nagkakasararo bilang pamilya iyo an pagbasa kan pan-aroaldaw na teksto na iriba sa pagkaaga. Minsan siring, may problema kaidto sa pag-areglo kaini. Dai nagmamata nin sarabay an gabos. Pinag-olayan mi ini asin nagdesisyon na sarabay kami gabos na mamata, mapamahaw nin alas 6:30 n.a., asin iribang pag-oolayan an pan-aroaldaw na teksto. Nagin kapakipakinabang na marhay ini para sa samo. Kan dakula na an samong mga aking lalaki, pinili nindang lumaog sa paglilingkod sa Bethel. Sa boot niamo nakakontribwir an pan-aroaldaw na pag-orolay na ini sa saindang espirituwalidad.

An mga Pribilehio Pakatapos nin Bautismo Naghagad nin Mas Dakulang Sakripisyo

Nabautismohan ako kan 1962, asin pakatapos na magin sadiri ko an sakong negosyo sa laog nin 21 taon, ipinabakal ko iyan asin naglaog sa trabaho sa lokal tanganing mas maparani sa sakong pamilya tangani na iriba kaming makapaglingkod ki Jehova. Nagbukas ini kan dalan para sa dakol na bendisyon. Nagbugtak kami nin pasohan na kami gabos malaog sa pambilog na panahon na ministeryo. Nagpoon iyan kan enot na mga taon nin 1970 kan an matua ming aking lalaki, si Edward, nagin bilog na panahon na ministro, o regular payunir, tolos-tolos pagkagradwar sa haiskul. Paghaloyhaloy, nagpoon na magpayunir an samong aking lalaki na si George, dangan dai nahaloy suminunod si Ann. Naparigon na marhay nindang tolo an boot ko, huling ineestoryahan ninda ako manongod sa nagin mga eksperyensia ninda sa paglilingkod sa langtad. Bilang pamilya, pinag-oolayan mi kun paano mi gigibohon na simple an samong buhay tangani na kami gabos makalaog sa bilog na panahon na paglilingkod. Nagdesisyon kami na ipabakal an harong. Nag-istar kami sa harong na iyan sa laog nin 18 taon asin dian kami nagpamilya. Talagang sunoon ming marhay an samong harong, alagad binendisyonan ni Jehova an samong desisyon na ipabakal iyan.

Si Edward inimbitaran sa Bethel kan 1972, asin si George, kan 1974. Minsan ngani kami ni Ann napupungaw sa sainda, dai mi pinagparaisip kun gurano karahay kutana kun sinda yaon sana sa harani, maagom, asin magkakaigwa nin mga aki. Imbes, naggayagaya kami na an samong mga aki naglilingkod ki Jehova sa Bethel.a Minaoyon kami sa Talinhaga 23:​15, na nagsasabi: “Aki ko, kun an saimong puso nagin madonong, maggagayagaya man an sakong puso.”

Naglaog Kami sa Paglilingkod Bilang Espesyal Payunir

Mantang nasa Bethel an duwa ming aking lalaki, nagpadagos kami sa pagpapayunir. Dangan sarong aldaw kan 1975, nakaresibi kami nin surat na nag-iimbitar sa samo na maglingkod bilang espesyal payunir sa dai pa nakaasignar na teritoryo sa Clinton County, Illinois. Kanigoan na sorpresa iyan! Nangahulogan ini na kaipuhan ming maghale sa New Jersey, na duman harani kami sa samong mga aki sa Nueva York asin yaon duman an samong mga katood asin paryente. Minsan siring, inako mi iyan bilang asignasyon hale ki Jehova asin naggibo nin sakripisyo, na nagbunga nin bagong mga bendisyon.

Pakalihis nin nagkapirang bulan na paghuhulit sa dai pa nakaasignar na teritoryo, nagpoon kaming magkaigwa nin mga pagtiripon sa sarong tiriponan kan mga nag-eerok sa komunidad sa Carlyle, Illinois. Alagad gusto mi nin permanenteng pagtitiriponan. An sarong tugang sa lokal asin an saiyang agom na babae nakanompong nin sarong propiedad na may saditon na harong na inarkila niamo. Lininig mi iyan​—an enterong harong sagkod an kasilyasan sa luwas​—asin ginibo mi iyan na saditon na tiriponan. Nagigirumdoman mi na may pagkawili an sarong kabayo na nag-uusyoso sa samo. Sa parate ilinalaog nia an saiyang payo sa bintana tanganing helingon kun ano an nangyayari sa pagtiripon!

Pag-abot nin panahon, nabilog an Kongregasyon nin Carlyle, asin naogma kami na magkaigwa nin kabtang digdi. Tinabangan kami nin sarong hoben na mag-agom na payunir, si Steve asin Karil Thompson, na nagdatong man tanganing maghulit sa dai pa nakaasignar na teritoryo. An mag-agom na Thompson nagdanay duman sa laog nin nagkapirang taon asin kan huri nag-atender sa Paadalan sa Biblia kan Watchtower sa Gilead asin ibinalyo nin destino sa pagmimisyonero sa Sirangan na Aprika, na duman sinda naglilingkod sa gibohon na nagbibiahe.

Dai nahaloy nagsusurusoan na an mga yaon sa samong sadit na tiriponan, asin kaipuhan mi na an mas dakulang tiriponan. An iyo man sanang tugang sa lokal asin an saiyang agom na babae an suminukoro asin nagbakal nin propiedad na mas angay para sa sarong Kingdom Hall. Kanigoan an samong kaogmahan kan nagkapirang taon an nakalihis, inimbitaran kami sa dedikasyon nin sarong bagong itogdok na Kingdom Hall sa Carlyle! Nagkapribilehio ako na magtao kan pahayag sa dedikasyon. An samong asignasyon duman sarong makangangalas na eksperyensia para sa samo, sarong bendisyon hale ki Jehova.

Nabukasan an Sarong Bagong Langtad Para sa Samo

Kan 1979 nakaresibi kami nin sarong bagong asignasyon, sa Harrison, New Jersey. Naglingkod kami duman nin mga 12 taon. Durante kan panahon na idto pinonan mi an sarong pag-adal sa Biblia sa sarong babaeng Intsik, asin nagresulta ini sa dakol na iba pang pag-adal sa mga Intsik. Mientras tanto, naaraman mi na may rinibong estudyante asin pamilyang Intsik na nag-eerok sa samong lugar. Huli kaini, naparigon an samong boot na mag-adal kan lenguaheng Intsik. Minsan ngani nangahulogan ini nin paggamit nin panahon kada aldaw sa pag-adal kan lenguahe, iyan nagresulta sa dakol na magayagayang pag-adal sa Biblia sa mga Intsik sa samong lugar.

Durante kan mga taon na idto, naeksperyensiahan mi an dakol na makangingising situwasyon, nangorogna sa samong pagprobar na magtaram nin Intsik. Sarong aldaw ipinamidbid ni Ann an saiyang sadiri bilang sarong “kino” sa Biblia imbes na sarong “paratokdo” sa Biblia. An mga tataramon magkakaagid na marhay. An kagharong naghuyom asin nagsabi: “Dagos tabi kamo. Mayo pa akong nakaolay kasuarin man na kino sa Biblia.” Sagkod ngonyan nasasakitan pa kaming magtaram kan lenguahe.

Dangan iinasignar kami sa saro pang lugar sa New Jersey na duman nakapagpadagos kaming maghulit sa mga Intsik. Kan huri inimbitaran kami na bumalyo sa Boston, Massachusetts, na duman may sarong grupo na nagtataram nin Intsik an nagtatalubo sa laog na nin tolong taon. Nagin pribilehio mi na magtao nin suporta sa grupong ini sa nakaaging pitong taon asin magkaigwa nin kagayagayahan na maheling iyan na magin sarong kongregasyon kan Enero 1, 2003.

Mga Bendisyon na Gikan sa Pagsakripisyo kan Sadiri

Sa Malaquias 3:​10, nabasa niamo an pangagda ni Jehova sa saiyang banwaan na itao an saindang mga dolot asin atang tangani na iula nia an saiyang mga bendisyon sagkod na mayo na nin kulang. Isinakripisyo mi an sarong negosyo na pinagkainteresan kong marhay. Ipinabakal mi an samong harong, na sunoon ming marhay. Asin isinakripisyo mi man an iba pang bagay. Pero kun ikokomparar sa mga bendisyon, an mga sakripisyo sadit sana.

Tunay nanggad, kanigoan na bendisyon an iinula ni Jehova sa samo! Nakamtan mi an satispaksion na maheling an samong mga aki na naghimate sa katotoohan, namatean mi an kagayagayahan na makikabtang nin bilog na panahon sa nagliligtas-buhay na ministeryo, asin naheling mi na itinatao ni Jehova an samong mga pangangaipo. Tunay nanggad, an samong saradit na sakripisyo nagtao sa samo nin darakulang bendisyon!

[Nota sa Ibaba]

[Ritrato sa pahina 25]

Si Louise asin George Blanton kaiba si Ann, 1991

[Ritrato sa pahina 26]

An Kingdom Hall sa Carlyle, na idinedikar kan Hunyo 4, 1983

[Ritrato sa pahina 27]

Kaiba an bago pa sanang mabilog na Boston Chinese Congregation

[Ritrato sa pahina 28]

Kaiba si Edward, Connie, George, asin Grace