Ano an Saindong Magigin Ngapit?

KUN an Makakamhan sa gabos na Dios nakaaaram kan gabos, na nakaaaram kan gabos na nakaagi, presente, asin ngapit, bako daw na an gabos na bagay nakatalagang mangyari na eksaktong kapareho kan patienot nang naaraman nin Dios? Kun patienot nang naaraman asin iminanda nin Dios an direksion asin ultimong kaaabtan kan gabos na tawo, masasabi daw talaga na may katalingkasan kita na pumili kan satong magigin buhay, kan satong ngapit?

An mga hapot na ini haloy nang pinagdedebatehan sa laog nin dakol na siglo. An kontrobersia nakababanga pa man giraray sa pangenot na mga relihion. An abilidad daw nin Dios na aramon an ngapit puedeng ioyon sa libreng kabotan nin tawo? Saen kita maninigong maghanap nin simbag?

An minilyon na tawo sa bilog na globo maoyon na an Dios nakikomunikar sa katawohan paagi sa saiyang nasusurat na Tataramon na ipinaabot paagi sa saiyang mga representante sa pagtaram, an mga propeta. Halimbawa, nasasambitan kan Koran an mga kapahayagan na naggigikan sa Dios: an Taurāh (Tora, an Ley, o limang libro ni Moises), an Zabūr (an Salmo), asin an Injīl (an Ebanghelyo, Kristianong Griegong Kasuratan, o “Bagong Tipan”), siring man an ihinayag sa mga propeta sa Israel.

Sa Kristianong Griegong Kasuratan, mababasa niato: “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay.” (2 Timoteo 3:16) Malinaw nanggad, an ano man na paggiya o kaliwanagan na inaako niato maninigong sa katapustapusi gumikan sa Dios mismo. Bako daw na madonong kun siring na siyasaton an mga isinurat kan enot na mga propeta nin Dios? Ano an ihinahayag kaiyan manongod sa satong ngapit?

Ngapit na Patienot na Isinurat

An siisay man na nakabasa na kan Banal na Kasuratan nakaaaram na iyan aktuwal na igwa nin ginatos na hula. An makasaysayan na mga pangyayari na siring kan pagbagsak kan suanoy na Babilonya, an pagtogdok liwat kan Jerusalem (ikaanom sagkod ikalimang siglo B.C.E.), asin an pagtindog asin pagkapukan kan suanoy na mga hade nin Medo-Persia asin Grecia gabos ihinula nin detalyado. (Isaias 13:​17-​19; 44:24–​45:1; Daniel 8:​1-7, 20-​22) An kaotoban kan siring na mga hula saro sa pinakamakosog na mga prueba na an Banal na Kasuratan tunay nanggad na Tataramon nin Dios, huli ta an Dios sana an may kapangyarihan na aramon nin patienot asin desisyonan kun ano an mangyayari sa ngapit. Sa sentidong ini tunay nanggad na irinekord kan Banal na Kasuratan an ngapit na isinurat nin patienot.

Ipinahahayag mismo nin Dios: “Ako an Banal na Saro asin mayo na nin ibang Dios, ni siisay man na kabaing ko; an Saro na nagpapaisi kan mangyayari sa huri poon pa sa kapinonan, asin kan mga bagay na dai pa nahahaman poon pa kan suanoy; an Saro na nagsasabi, ‘An sakuyang hatol magdadanay, asin an gabos na sakong ikinaoogma sakong gigibohon’ . . . Itinaram ko iyan; padadatngon ko man iyan. Inisip ko iyan, gigibohon ko man iyan.” (Isaias 46:​9-11; 55:​10, 11) An mismong ngaran na paagi kaiyan ipinamidbid nin Dios an saiyang sadiri sa saiyang suanoy na mga propeta Jehova, na sa literal nangangahulogan “Saiyang Pinapangyayari.”a (Genesis 12:​7, 8; Exodo 3:​13-​15; Salmo 83:18) Ihinahayag nin Dios an saiyang sadiri bilang an Saro na Paraotob kan saiyang tataramon, an Saro na pirmeng nagpapangyari kan saiyang mga katuyohan.

Sa siring, ginagamit nin Dios an saiyang kakayahan na aramon an ngapit sa paghaman kan saiyang mga katuyohan. Ginamit nia iyan sa parate tanganing patanidan an mga maraot manongod sa maabot na paghokom siring man tanganing tawan nin paglaom para sa kaligtasan an saiyang mga lingkod. Alagad ginagamit daw nin Dios an kakayahan na ini na daing limitasyon? Igwa daw nin ano man na ebidensia sa Banal na Kasuratan manongod sa mga bagay na pinagmarahay nin Dios na dai aramon nin patienot?

Aram Na daw nin Dios nin Patienot an Gabos na Bagay?

An gabos na argumento na nagsusuportar sa patienot na pagtalaga basado sa pagpamugtak na mantang an Dios dai madedeharan na igwa nin kakayahan na aramon nin patienot asin desisyonan an mga pangyayari sa ngapit, siertong aram na nia nin patienot an gabos na bagay, kabale na an mga gigibohon sa ngapit nin lambang indibiduwal. Minsan siring, tama daw an pagpamugtak na ini? Laen man an ihinahayag nin Dios sa saiyang Banal na Kasuratan.

Halimbawa, an Kasuratan nagsasabi na “binalo nin Dios si Abraham” paagi sa pagboot sa saiya na iatang an saiyang aki na si Isaac bilang dolot na tinotong. Kan iaatang na ni Abraham si Isaac, pinogolan sia nin Dios asin nagsabi: “Ngonyan aram ko nang ika may pagkatakot sa Dios mantang dai mo man lamang isinayuma an saimong aki, an saimong bugtong na aki, sa sako.” (Genesis 22:​1-12) Sasabihon daw iyan nin Dios kun dati na niang aram na kukuyogon ni Abraham an saiyang pagboot? Iyan daw magigin onestong pagbalo?

Dugang pa, an suanoy na mga propeta nagsasaysay na paorootrong nagsabi an Dios na ‘pinagbabasolan’ nia an saiyang ginibo o inisip na gibohon. Halimbawa, sinabi nin Dios na ‘nagbasol [hale sa Hebreong na·chamʹ] sia na ibinugtak niang hade si Saul sa Israel.’ (1 Samuel 15:​11, 35; ikomparar an Jeremias 18:​7-​10; Jonas 3:​10.) Huli ta an Dios sangkap, an mga bersikulong ini dai puedeng mangahulogan na nasala an Dios sa pagpili ki Saul na magin enot na Hade sa Israel. Imbes, iyan siertong nagpaparisa na an Dios namondo na si Saul nawaran nin pagtubod asin nagin bakong makinuyog. An paggamit nin Dios sa siring na pananaram sa pagpanongod sa saiya magigin daing kamanungdanan kun patienot na niang aram an mga gigibohon ni Saul.

An iyo man sanang termino manonompongan sa pinakasuanoy na kabtang kan Kasuratan na dian, sa pagtaram manongod sa kaaldawan ni Noe, iyan nagsasabi: “Si Jehova nagbasol na saiyang ginibo an mga tawo sa daga, asin ta nakolgan an saiyang puso. Kaya si Jehova nagsabi: ‘Paparaon ko an mga tawo na linalang ko sa ibabaw nin daga . . . huli ta nagbabasol ako na ginibo ko pa sinda.’” (Genesis 6:​6, 7) Sa giraray, ini nagpaparisa na an mga ginigibo nin tawo dai patienot na itinalaga nin Dios. An Dios nagbasol, namondo, asin nakolgan pa ngani, bakong huli ta napasala an saiyang mga ginibo, kundi huli ta an karatan nin tawo nagdakol. An Kaglalang nagbasol na kinaipuhan na laglagon an gabos na tawo apuera ki Noe asin an saiyang pamilya. Sinisierto sa sato nin Dios: ‘Dai ako naoogma sa pagkagadan kan maraot.’​—Ezequiel 33:11; ikomparar an Deuteronomio 32:​4, 5.

Kaya aram na daw nin patienot nin Dios asin iminanda pa ngani nia an pagkaholog ni Adan sa kasalan, siring man an kapahapahamak na mga resulta na ibubunga kaini sa pamilya nin tawo? An pinag-olayan niato nagpapaheling na ini dai puedeng magin totoo. Dugang pa, kun talagang aram na nin patienot nin Dios an gabos na ini, sia kutana an nagin autor nin kasalan kan lalangon nia an tawo, asin an Dios tuyong magigin may paninimbagan sa gabos na karatan asin pagdusa nin tawo. Malinaw nanggad, ini dai puedeng ioyon sa ihinahayag nin Dios sa Kasuratan manongod sa saiyang sadiri. Sia Dios nin pagkamoot asin nin hustisya na naoongis sa karatan.​—Salmo 33:5; Talinhaga 15:9; 1 Juan 4:8.

An Duwang Kaaabtan nin Tawo

An Banal na Kasuratan dai nagsasabi na an satong indibiduwal na ngapit maski paano patienot nang dinesisyonan, o patienot nang itinalaga, nin Dios. Imbes, an sinasabi kaiyan iyo na an Dios naghula nin duwa sanang posibleng kaaabtan nin tawo. Tinawan nin Dios an gabos na tawo kan libreng kabotan na pumili kun arin na kaaabtan an mapapasaiya. An propetang si Moises kaidto pa nagsabi sa mga Israelita: “Ibinugtak ko an buhay asin kagadanan sa atubangan mo, . . . asin kaipuhan na pilion mo an buhay tanganing makapagpadagos kang mabuhay, ika asin an saimong aki, paagi sa pagkamoot ki Jehova na saimong Dios, paagi sa paghinanyog sa saiyang tingog asin paagi sa pagdadanay sa saiya; huli ta sia an saimong kabuhayan asin an kahalawigan kan saimong mga aldaw.” (Deuteronomio 30:​19, 20) An propeta nin Dios na si Jesus nagpatanid: “Maglaog kamo sa tatang hayakpit, huli ta halakbang asin mahiwas an dalan na pasiring sa kalaglagan, asin dakol an mga nagraralaog dian; mantang hayakpit an tata asin piot an dalan na pasiring sa buhay, asin diit an mga nakakukua kaiyan.” (Mateo 7:​13, 14) Duwang dalan, duwang kaaabtan. An satong ngapit nakadepende sa sadiri niatong mga gibo. An pagkuyog sa Dios nangangahulogan nin buhay, an pagsuway sa saiya nangangahulogan nin kagadanan.​—Roma 6:23.

“Sinasabihan [nin Dios] an katawohan na sinda gabos saen man na lugar maninigong magsorolsol. Huli ta sia nagtalaan nin aldaw na katuyohan niang hokoman an ineerokan na daga sa katanosan.” (Gibo 17:​30, 31) Kun paanong an mayoriya kan katawohan kan kaaldawan ni Noe piniling makisuway sa Dios asin napoho, siring man ngonyan an mayoriya dai inootob an mga pagboot nin Dios. Pero, dai pa dinesisyonan nin Dios kun siisay an lalaglagon asin kun siisay an maako nin kaligtasan. Sa katunayan, an Tataramon nin Dios nagsasabi na “habo nia na an siisay man malaglag kundi boot nia na an gabos makapagsolsol.” (2 Pedro 3:9) Dawa an labi-labi karaot na mga tawo puedeng magsolsol, magin makinuyog, asin maggibo nin mga pagbabago na kaipuhan tanganing kamtan an pag-oyon nin Dios.​—Isaias 1:​18-​20; 55:​6, 7; Ezequiel 33:​14-​16; Roma 2:​4-8.

Sa mga makinuyog, an Dios nanunuga nin buhay na daing katapusan sa sarong matoninong na paraiso, sarong daga na lininig sa gabos na karatan, kadahasan, asin guerra, sarong kinaban na mayo na nin pagkagutom, pagdusa, helang, asin kagadanan. (Salmo 37:​9-​11; 46:9; Isaias 2:4; 11:​6-9; 25:​6-8; 35:​5, 6; Kapahayagan 21:4) Minsan an mga gadan bubuhayon liwat asin tatawan kan oportunidad na maglingkod sa Dios.​—Daniel 12:2; Juan 5:​28, 29.

“Pagmasdan mo an daing kanawayan asin helingon mo an tanos,” an sabi kan salmista, “huli ta an ngapit kan tawong iyan magigin matoninong. Alagad an mga paralapas tunay na iribang paparaon; an ngapit kan mga maraot tunay na tataposon.” (Salmo 37:​37, 38) Ano an saindong magigin ngapit? Iyan depende nanggad sa saindo. An mga kagpublikar kan magasin na ini maoogmang tawan kamo nin dugang pang impormasyon tanganing masierto nindo para sa saindong sadiri an sarong maogma, matoninong na ngapit.

[Nota sa ibaba]

[Blurb sa pahina 6]

Ginagamit nin Dios an saiyang kakayahan na aramon an ngapit sa paghaman kan saiyang mga katuyohan

[Blurb sa pahina 8]

“Habo [nin Dios] na an siisay man malaglag kundi boot nia na an gabos makapagsolsol.” 2 Pedro 3:9

[Retrato sa pahina 7]

Kun dati nang aram nin Dios na si Abraham gikan sa boot na iaatang an saiyang aking lalaki, iyan daw magigin onestong pagbalo?