Si Jehova—An Dios na May Katuyohan
“Sierto nanggad na siring sa sakong plano, iyan dapat na mangyari; asin siring sa sakong isinabi, iyan an maootob.”—ISAIAS 14:24.
1, 2. Ano an sinasabi nin dakol manongod sa katuyohan nin buhay?
AN MGA tawo sa gabos na lugar naghahapot: “Ano an katuyohan nin buhay?” An sarong namomoon sa politika na taga-Solnopan nagsabi: “Dakol na tawo kisa kasuarin pa man an naghahapot, ‘Siisay kita? Ano an satong katuyohan?’” Kan sinurbey nin sarong peryodiko an mga hobenes manongod sa hapot na kun ano an katuyohan nin buhay, an tipikong mga simbag iyo an: “Paggibo kan minamawot kan saimong puso.” “Pamumuhay kada segundo sa pinakalubos na paagi.” “Pagpasiramsiram sa buhay.” “Magkaigwa nin mga aki, magin maogma dangan magadan.” An kadaklan naghohona na arog na sana kaini an buhay. Mayo nin siisay man na nagtaram dapit sa ano man na halawig na katuyohan nin buhay digdi sa daga.
2 An sarong iskolar na Confuciano nagsabi: “An pundamental na kahulogan nin buhay manonompongan sa satong ordinaryo, sa tawong pag-eksister.” Sono digdi, an mga tawo padagos na imumundag, magsasakit sa laog nin 70 o 80 taon, dangan magagadan asin dai na mag-eeksister sagkod lamang. An sarong sientista sa ebolusyon nagsabi: “Puwedeng mawoton niato an sarong ‘mas halangkaw’ na simbag—pero mayo nin manonompongan.” Para sa mga ebolusyonistang ini, an buhay sarong pagsusumakit tanganing mabuhay, na kagadanan an minatapos kaiyan gabos. An siring na mga pilosopiya nag-aatubang nin daing paglaom na pananaw sa buhay.
3, 4. Paano an mga kamugtakan sa kinaban nakaaapektar sa pagmansay kan dakol manongod sa buhay?
3 Dakol an nagdududa na an buhay igwa nin katuyohan kun saindang naheheling na an pag-eksister nin tawo pano-pano nin grabeng pagsakit. Sa satong panahon, na an tawo nakaabot na daa sa alitoktok nin industriyal asin sientipikong mga nahaman, mga sarong bilyon katawo sa bilog na kinaban an seryoso an helang o may malnutrisyon. Minilyon na kaakian an nagagadan kada taon sa siring na mga dahelan. Dugang pa, an ika-20 siglong ini mas dakol nin apat na doble an mga nagadan huli sa guerra kisa kan mga nagadan sa pinagbiyong nakaaging kuwatro sientos na taon. Krimen, kadahasan, pag-abuso sa droga, pagkalaglag nin pamilya, AIDS asin iba pang helang na ikinaoolakit sa seksuwal na pagdodorog—an lista nin negatibong mga dahelan nadudugangan. An mga namomoon sa kinaban mayo kan solusyon sa mga problemang ini.
4 Huli sa mga kamugtakan na iyan, ipinahayag nin sarong babae an paniniwala nin dakol: “Mayo nin katuyohan sa buhay. Kun nangyayari an gabos na maraot na bagay na ini, kun siring daing kahulogan an buhay.” Asin an sarong gurang na lalaki nagsabi: “Ihinahapot ko kun taano ta yaon ako digdi sa bilog kong buhay. Kun igwa nin katuyohan, dai na akong labot.” Kaya huling kadakol kan dai nakakaaram kun taano ta tinotogotan nin Dios an pagsakit, an nakasusustong mga kamugtakan sa kinaban nagpapangyari sainda na mawaran nin tunay na paglaom para sa ngapit.
5. Taano an mga relihiyon sa kinaban na ini ta nakadadagdag sa pagkaribaraw dapit sa katuyohan nin buhay?
5 Maski an mga namomoon sa relihiyon nagkakabaranga, asin dai segurado, manongod sa katuyohan nin buhay. An sarong dating dekano sa St. Paul’s Cathedral sa Londres nagsabi: “Sa bilog kong buhay nagsakit akong manompongan an katuyohan nin buhay. . . . Nasudya ako.” Totoo, dakol na klerigo an nagtotokdo na pagkagadan an mga marahay minaduman sa langit asin an mga maraot minaduman sa nagkakalayong impierno sagkod lamang. Pero an pagmansay na ini binayaan man giraray an katawohan digdi sa daga sa pagpapadagos sa masakit na dalan kaini. Asin kun katuyohan nin Dios na an tawo mabuhay sa langit, taano ta dai na sana nia sinda ginibong langitnon na mga linalang sa kapinonan, arog kan ginibo nia sa mga anghel, asin sa siring mawara sa tawo an balakid na kasakitan? Kaya lakop an pagkaribaraw manongod sa katuyohan nin buhay digdi sa daga o an pagsayumang maniwala na iyan igwa nanggad nin katuyohan.
An Dios na May Katuyohan
6, 7. Ano an sinasabi sato kan Biblia manongod sa Unibersal na Soberano?
6 Minsan siring, an librong pinakamahiwas na idinidistribuwir sa kasaysayan, an Banal na Biblia, nagsasabi sato na si Jehova, an Soberano kan uniberso, iyo an Dios na may katuyohan. Ipinaheheling kaiyan sato na sia igwa nin halawig, sa katunayan, daing sagkod, na katuyohan para sa katawohan digdi sa daga. Asin kun katuyohan ni Jehova an sarong bagay, iyan siertong mangyayari. Kun paanong pinangyayari kan oran na tumubo an banhi, an sabi nin Dios, “magigin siring man an sakong tataramon na magluwas sa sakong ngoso. Dai iyan mabalik sako na daing laog, kundi gigibohon kaiyan an sakong boot, asin iyan siertong magigin mapanggana sa sakuyang sinobolan kaiyan.” (Isaias 55:10, 11) An ano man na sabihon ni Jehova na saiyang ootobon “maootob.”—Isaias 14:24.
7 Kitang mga tawo puwedeng magkaigwa nin lubos na kasarigan na an Makakamhan sa gabos ootobon an saiyang mga panuga, huling an Dios “dai makakapagputik.” (Tito 1:2; Hebreo 6:18) Kun saiyang sinasabi sato na may gigibohon siang sarong bagay, an saiyang tataramon sarong garantiya na iyan mangyayari. Iyan garo man sana haman na. Ipinahayag nia: “Ako an Banal na Saro asin mayo na nin ibang Dios, ni siisay man na kabaing ko; an Saro na nagpapaisi kan mangyayari sa huri poon pa sa kapinonan, asin kan mga bagay na dai pa nahahaman poon pa kan suanoy; an Saro na nagsasabi, ‘An sakuyang hatol magdadanay, asin an gabos na sakong ikinaoogma sakong gigibohon’ . . . Itinaram ko iyan; padadatngon ko man iyan. Inisip ko iyan, gigibohon ko man iyan.”—Isaias 46:9-11.
8. Idto daw na mga sinserong boot na mamidbid an Dios makukua sia?
8 Dugang pa, si Jehova ‘habo na an siisay man malaglag kundi boot nia na an gabos makapagsolsol.’ (2 Pedro 3:9) Sa rason na ini, habo nia na an siisay man ignorante manongod sa saiya. An sarong propeta na an ngaran Azarias nagsabi: “Kun [an Dios] hahanapon nindo, itotogot nia na sia makua nindo, alagad kun bayaan sia nindo babayaan man nia kamo.” (2 Cronica 15:1, 2) Kun siring, an mga sinserong boot na mamidbid an Dios asin an saiyang mga katuyohan siertong magigibo iyan kun maghihingoa sinda na hanapon sia.
9, 10. (a) Ano an itinao para duman sa mga boot na mamidbid an Dios? (b) An pagsiyasat sa Tataramon nin Dios pinangyayari kitang magibo an ano?
9 Saen hahanapon? Para duman sa mga tunay na naghahanap sa Dios, itinao nia an saiyang Tataramon, an Biblia. Paagi kan saiyang banal na espiritu, an iyo man sanang puwersa aktiba na ginamit nia sa paglalang kan uniberso, dinirehiran nin Dios an maimbod na mga lalaki na isurat an kaipuhan niatong maaraman mapadapit sa saiyang mga katuyohan. Halimbawa, manongod sa hula sa Biblia, si apostol Pedro nagsabi: “An hula nagdatong bakong sa kabotan nin tawo, kundi an mga tawo nagtaram hale sa Dios huling sinda pinahiro kan banal na espiritu.” (2 Pedro 1:21) Kaagid kaiyan, si apostol Pablo nagpahayag: “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan, tanganing an tawo nin Dios magin lubos na may kakayahan, andam nanggad para sa lambang marahay na gibo.”—2 Timoteo 3:16, 17; 1 Tesalonica 2:13.
10 Mangnohon na an Tataramon nin Dios pinangyayari kitang magin, bakong sa sarong kabtang sana o dai kompleto, kundi “lubos na may kakayahan, andam nanggad.” Pinangyayari kaiyan na an saro magin segurado dapit sa kun siisay an Dios, ano an saiyang mga katuyohan, asin ano an hinahagad nia sa saiyang mga lingkod. Ini an malalaoman sa sarong libro na an Dios an autor. Asin iyan an solamenteng reperensia na puwede niatong siyasaton sa pagkua kan tamang kaaraman dapit sa Dios. (Talinhaga 2:1-5; Juan 17:3) Sa paggibo kaiyan, ‘dai na kita magigin mga omboy, na inaanod nin mga alon asin ipinapadpad nin lambang doros nin katokdoan huli sa kadayaan nin mga tawo, huli sa katusohan sa pagpakana nin karatan.’ (Efeso 4:13, 14) Ipinahayag kan salmista an tamang punto-de-vista: “An saimong [nin Dios] tataramon ilawan sa sakong bitis, asin liwanag sa sakong dalan.”—Salmo 119:105.
Progresibong Ihinahayag
11. Paano ihinayag ni Jehova an saiyang mga katuyohan sa katawohan?
11 Sa mismong pagpopoon kan pamilya nin tawo, si Jehova ihinayag an saiyang mga katuyohan sa dagang ini asin sa mga tawo sa ibabaw kaiyan. (Genesis 1:26-30) Pero kan an enot niatong mga magurang isikwal an pagkasoberano nin Dios, an katawohan naholog sa espirituwal na kadikloman asin kagadanan. (Roma 5:12) Alagad, aram ni Jehova na magkakaigwa nin mga gustong maglingkod sa saiya. Kaya, sa laog nin mga siglo, progresibo niang ihinayag an saiyang mga katuyohan sa saiyang maimbod na mga lingkod. An pira sa mga pinakikomunikaran nia iyo si Enoc (Genesis 5:24; Judas 14, 15), si Noe (Genesis 6:9, 13), si Abraham (Genesis 12:1-3), asin si Moises (Exodo 31:18; 34:27, 28). An propeta nin Dios na si Amos nagsurat: “An Soberanong Kagurangnan na Jehova dai magibo nin ano man sagkod na dai pa nia ikinapahahayag an saiyang hilom sa saiyang mga lingkod na propeta.”—Amos 3:7; Daniel 2:27, 28.
12. Paano si Jesus nagtao nin orog pang liwanag dapit sa mga katuyohan nin Dios?
12 Kan an Aki nin Dios, si Jesu-Cristo, nasa daga mga 4,000 na taon pakatapos kan pagrebelde sa Eden, dakol pang detalye dapit sa mga katuyohan ni Jehova an ihinayag. Partikularmenteng totoo ini manongod sa katuyohan nin Dios na magpatindog nin sarong langitnon na Kahadean na mamamahala sa daga. (Daniel 2:44) Ginibo ni Jesus na tema kan saiyang pagtotokdo an Kahadean na iyan. (Mateo 4:17; 6:10) Sia asin an saiyang mga disipulo nagtokdo na sa irarom kan Kahadean, an orihinal na katuyohan nin Dios para sa daga asin sa katawohan maootob. An daga gigibohon na paraiso na eerokan nin sangkap na mga tawo, na mabubuhay sagkod lamang. (Salmo 37:29; Mateo 5:5; Lucas 23:43; 2 Pedro 3:13; Kapahayagan 21:4) Dugang pa, ipinaheling ni Jesus asin kan saiyang mga disipulo an mga mangyayari sa bagong kinaban na iyan paagi sa mga milagro na pinangyari nin Dios na magibo ninda.—Mateo 10:1, 8; 15:30, 31; Juan 11:25-44.
13. Manongod sa mga pagtratar nin Dios sa katawohan, anong pagbabago an nangyari kan Pentecostes 33 C.E.?
13 Kan Pentecostes 33 C.E., 50 aldaw pagkabuhay liwat ni Jesus, an espiritu nin Dios ibinubo sa kongregasyon kan mga parasunod ni Cristo. Sinalidahan kaiyan an masumbikal na Israel bilang katipan na banwaan ni Jehova. (Mateo 21:43; 27:51; Gibo 2:1-4) An pagbubo kan banal na espiritu sa okasyon na idto ebidensia na, magpoon kan panahon na idto, ipahahayag nin Dios an mga katotoohan manongod sa saiyang mga katuyohan paagi sa bagong ahensiang ini. (Efeso 3:10) Durante kan enot na siglo C.E., an organisasyonal na estruktura kan Kristianong kongregasyon naestablisar.—1 Corinto 12:27-31; Efeso 4:11, 12.
14. Paano mamimidbid kan mga naghahanap sa katotoohan an tunay na Kristianong kongregasyon?
14 Ngonyan, an mga naghahanap sa katotoohan mamimidbid an tunay na Kristianong kongregasyon paagi sa dai nagliliwat na pagpaheling kaiyan kan pangenot na kuwalidad nin Dios, an pagkamoot. (1 Juan 4:8, 16) Tunay nanggad, an sa-magturugang na pagkamoot sarong nagpapamidbid na tanda nin tunay na Kristianismo. Si Jesus nagsabi: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.” “Ini an sakong togon, na kamo magkaminorootmootan siring kan pagkamoot ko sa saindo.” (Juan 13:35; 15:12) Asin pinagirumdom ni Jesus an saiyang mga paradangog: “Kamo an mga katood ko kun gibohon nindo an mga pagboot ko sa saindo.” (Juan 15:14) Kaya an tunay na mga lingkod nin Dios iyo idtong mga namumuhay sono sa pagboot na pagkamoot. Dai sana sinda nagtataram manongod kaiyan, huli ta “an pagtubod na daing gibo gadan.”—Santiago 2:26.
Pagtao nin Liwanag
15. Sa ano nakaseseguro an mga lingkod nin Dios?
15 Ihinula ni Jesus na sa pag-agi nin panahon, an tunay na Kristianong kongregasyon paliliwanagan nin paorog nang paorog manongod sa mga katuyohan nin Dios. Pinanugaan nia an saiyang mga parasunod: “An paratabang, an banal na espiritu, na isusugo kan sakong Ama sa ngaran ko, an sarong iyan matokdo sa saindo kan gabos na bagay.” (Juan 14:26) Nagsabi man si Jesus: “Uya! ako danay na nasa saindo sagkod sa pagtatapos kan palakaw nin mga bagay.” (Mateo 28:20) Kaya, an pagtao nin liwanag manongod sa katotoohan dapit sa Dios asin sa saiyang mga katuyohan nag-oorog sa tahaw kan mga lingkod nin Dios. Iyo, “an dalan kan mga matanos kabaing kan liwanag na paorog nang paorog na nagliliwanag sagkod na magin lubos an aldaw.”—Talinhaga 4:18.
16. Ano an sinasabi sato kan satong espirituwal na kaliwanagan manongod sa kun haen na kita may koneksion sa mga katuyohan nin Dios?
16 Ngonyan, an espirituwal na liwanag na iyan orog kaliwanag kisa kasuarin pa man, huling nasa panahon kita na an dakol na hula sa Biblia nagkakaorotob o madali nang magkaorotob. Ipinaheheling kaiyan sato na kita nabubuhay na sa “huring mga aldaw” kan maraot na palakaw na ini nin mga bagay. Ini an peryodo nin panahon na inaapod na “pagtatapos kan palakaw nin mga bagay”; susundan iyan kan bagong kinaban nin Dios. (2 Timoteo 3:1-5, 13; Mateo 24:3-13) Siring kan ihinula ni Daniel, an langitnon na Kahadean nin Dios sa dai na mahahaloy ‘roronoton asin tatapuson an gabos na ining kahadean [na nag-eeksister ngonyan], asin iyan magdadanay sagkod lamang.’—Daniel 2:44.
17, 18. Anong mamuraway na mga hula an nagkakaorotob na ngonyan?
17 Kabilang sa mga hulang naootob ngonyan iyo an nakarekord sa bersikulo 14 kan Mateo kapitulo 24. Dian si Jesus nagsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” Sa bilog na daga, an paghuhulit na iyan kan Kahadean ginigibo kan minilyon na Saksi ni Jehova. Asin ginatos na ribo an minaiba sa sainda taon-taon. Kaoyon ini kan hula sa Isaias 2:2, 3, na nagsasabi na “sa huring kabtang kan mga aldaw” kaining maraot na kinaban, an mga tawo hale sa dakol na nasyon maduruman sa tunay na pagsamba ki Jehova, asin ‘saiyang totokdoan sinda dapit sa saiyang mga dalan, asin sinda maglalakaw sa saiyang mga dana.’
18 An mga bagohan na ini burunyog na minadolok sa pagsamba ki Jehova na “garo panganoron,” siring kan ihinula sa Isaias kapitulo 60, bersikulo 8. Idinudugang kan bersikulo 22: “An sadit mismo magigin sangribo, asin an sadangoton magigin makosog na nasyon. Ako mismo, si Jehova, maparikas kaiyan sa kapanahonan kaiyan.” An panahon na iyan, ipinaheheling kan ebidensia, ngonyan na mismo. Asin an mga bagohan makapananarig na sa pakikiasosyar sa mga Saksi ni Jehova, sainda nang nanompongan an tunay na Kristianong kongregasyon.
19. Taano ta sinasabi niato na an mga bagohan na nakikiasosyar sa mga Saksi ni Jehova minalaog sa tunay na Kristianong kongregasyon?
19 Taano ta nasasabi niato ini na may kasegurohan? Sa dahelan na an mga bagohan na ini, kaiba kan minilyon na nasa laog na kan organisasyon ni Jehova, idinusay an saindang sadiri sa Dios asin ginigibo an saiyang kabotan. Kabale digdi an pamumuhay kaoyon kan pagboot na diosnon na pagkamoot. Bilang sarong patotoo kaini, an mga Kristianong ini ‘dinaragopdop na an saindang mga minasbad na magin tarom nin arado asin an saindang mga budyak na magin mga sanggot asin dai na nag-aadal sa pakilaban.’ (Isaias 2:4) An gabos na Saksi ni Jehova sa bilog na kinaban ginibo ini huling sinda naggigibo nin pagkamoot. Nangangahulogan ini na nungka sindang makabibingat nin mga armas sa guerra tumang sa lambang saro o sa siisay pa man. Huli kaini sinda napapalaen na marhay—bakong arog kan mga relihiyon sa kinaban. (Juan 13:34, 35; 1 Juan 3:10-12, 15) Dai sinda nakikilabot sa nakababangang nasyonalismo, huli ta minabilog sinda nin pankinaban na asosasyon nin magturugang na marigon na binobogkos nin pagkamoot, an “sangkap na bogkos nin pagkasararo.”—Colosas 3:14; Mateo 23:8; 1 Juan 4:20, 21.
An Kadaklan Pinili an Dai Pakaaram
20, 21. Taano an dakulang mayoriya nin katawohan ta nasa espirituwal na kadikloman? (2 Corinto 4:4; 1 Juan 5:19)
20 Mantang an espirituwal na ilaw nagliliwanag sa tahaw kan mga lingkod nin Dios, an iba sa populasyon sa daga naghihilig pasiring sa orog pang espirituwal na kadikloman. Dai ninda midbid si Jehova o an saiyang mga katuyohan. An propeta nin Dios ilinadawan an panahon na ini kan sia magsabi: “Uya! an kadikloman mismo makalalakop sa daga, asin an saiyang mahibog na kaduloman sa mga nasyon.” (Isaias 60:2) Totoo ini huli ta an mga tawo dai nagpapaheling nin sinserong interes sa pakanood dapit sa Dios, ni nagpapaheling man sinda nin pagmawot na maghingoang paogmahon sia. Si Jesus nagsabi: “Ngonyan ini an basihan nin paghokom, na an liwanag nagdatong sa kinaban alagad an mga tawo namoot sa kadikloman imbes na sa liwanag, huli ta an saindang mga gibo maraot. Huli ta an nagsasagibo nin marigsok na mga bagay naoongis sa liwanag asin dai minadolok sa liwanag, tanganing an saiyang mga gibo dai masagwe.”—Juan 3:19, 20.
21 An siring na mga tawo bakong tunay na interesado sa pag-aram kan kabotan nin Dios. Imbes, isinisentro ninda an saindang buhay sa paggibo kan sadiri nindang kabotan. Sa dai pag-intindi sa kabotan nin Dios, ibinubugtak ninda an saindang sadiri sa peligrosong kamugtakan, huling ipinahahayag kan saiyang Tataramon: “An irinarayo an saiyang talinga tanganing dai makadangog kan pagboot—minsan an saiyang pamibi bagay na makababalde.” (Talinhaga 28:9) Titioson ninda an mga resulta kan pinili nindang dalan. Si apostol Pablo nagsurat: “Dai kamo madayaan: An Dios dai maoolog-olog. Huli ta an ano man na itinatanom nin tawo, iyan man sana an saiyang aanihon.”—Galacia 6:7.
22. An mga kaburunyogan na boot na mamidbid an Dios naggigibo ngonyan nin ano?
22 Minsan siring, may mga kaburunyogan na boot nanggad na makaaram kan kabotan nin Dios, na sinserong naghahanap sa saiya, asin minarani sa saiya. “Rumani kamo sa Dios, asin sia marani sa saindo,” an sabi kan Santiago 4:8. Dapit sa mga siring si Jesus nagsabi: “An naggigibo nin totoo minadolok sa liwanag, tanganing an saiyang mga gibo mahayag na ginibong kaoyon sa Dios.” (Juan 3:21) Asin kanigoan nanggad kamakangangalas na ngapit an itinagama nin Dios para duman sa mga minadolok sa liwanag! An satong masunod na artikulo ipaliliwanag an makaoogmang mga paglaom.
Paano Nindo Sisimbagon?
◻ Ano an sinasabi nin dakol manongod sa katuyohan nin buhay?
◻ Paano ihinahayag ni Jehova an saiyang sadiri bilang Dios na may katuyohan?
◻ Anong dakulang pagtao nin liwanag an nangyari kan enot na siglo C.E.?
◻ Paano mamimidbid an tunay na Kristianong kongregasyon ngonyan?