Sairisay an Nagsusunod sa Liwanag kan Kinaban?
“Kamo nagliliwanag siring sa mga ilaw kan kinaban.”—FILIPOS 2:15.
1. Ano an sinasabi kan Biblia manongod sa palsipikadong mga liwanag nin relihiyon?
AN Biblia malinaw na ipinamimidbid si Jesus bilang “dakulang liwanag,” “an liwanag kan kinaban.” (Isaias 9:2; Juan 8:12) Alagad, kakadikit sana an nagsunod saiya kan sia yaon digdi sa daga. Pinili kan kadaklan na sumunod sa palsipikadong mga liwanag na, sa katunayan, mga paradara nin kadikloman. Manongod kan mga ini an Tataramon nin Dios nagsasabi: “An siring na mga tawo mga falsong apostol, madayang mga trabahador, na nagmamalemale na mga apostol ni Cristo. Asin iyan bakong makangangalas, huli ta minsan si Satanas nagmamalemale na anghel nin liwanag. Kaya bako man na dakulang bagay kun an saiyang mga ministro nagmamalemale na mga ministro nin katanosan. Alagad an saindang masasagkodan sono sa saindang mga gibo.”—2 Corinto 11:13-15.
2. Ano an sinabi ni Jesus na magigin basihan sa paghokom sa mga tawo?
2 Kaya bakong gabos na tawo boot nin liwanag, minsan iyan gurano kamakangangalas. Sabi ni Jesus: “Ini an basihan nin paghokom, na an liwanag nagdatong sa kinaban alagad an mga tawo namoot sa kadikloman imbes na sa liwanag, huli ta an saindang mga gibo maraot. Huli ta an naggigibo nin marigsok na mga bagay naoongis sa liwanag asin dai minadolok sa liwanag, tanganing an saiyang mga gibo dai masagwe.”—Juan 3:19, 20.
Mga Mamomoton sa Kadikloman
3, 4. Paano ipinaheling kan mga poon nin relihiyon kan kaaldawan ni Jesus na habo nindang sumunod sa liwanag?
3 Horophoropa kun paano na iyan an nagin kamugtakan kan si Jesus yaon digdi sa daga. Tinawan nin Dios nin kapangyarihan si Jesus na gumibo nin makangangalas na mga milagro bilang paagi na mapatunayan na sia an Mesiyas. Halimbawa, sarong aldaw nin Sabbath, ibinalik nia an pakaheling nin sarong lalaki na namundag na buta. Makangangalas nanggad na gibo nin pagkaherak! Dakulaon na pasasalamat kan lalaki! Nakaheheling na sia sa kaenot-enote! Alagad, ano an nagin reaksion kan mga poon nin relihiyon? Nagsasaysay an Juan 9:16: “An nagkapira sa mga Fariseo nagpoon na magsabi [dapit ki Jesus]: ‘An tawong ini bakong hale sa Dios, ta dai sia nag-ootob kan Sabbath.’” Grabe karaot kan saindang puso! Nangyari na digdi an makangangalas na pagpaomay, alagad imbes na ipahayag an kagayagayahan para sa dating butang lalaki asin apresasyon para sa nagpaomay, kinondenar ninda si Jesus! Sa paggibo nin siring, daing duwa-duwa na nagkasala sinda tumang sa kapahayagan kan banal na espiritu nin Dios, sarong kasalan na daing kapatawadan.—Mateo 12:31, 32.
4 Dai nahaloy, kan hapoton kan mga parasaginsagin na idto an dating butang lalaki manongod ki Jesus, an lalaki nagsabi: “Ini siertong sarong ngangalasan, na dai nindo aram kun saen sia [si Jesus] hale, alagad binuklat nia an sakong mga mata. Aram niato na an Dios dai naghihinanyog sa mga parakasala, alagad kun an siisay man natatakot sa Dios asin naggigibo kan saiyang kabotan, sia naghihinanyog sa sarong ini. Poon pa kan suanoy dai pa noarin man nadangog na an siisay man nakapabuklat sa mata nin saro na namundag na buta. Kun an tawong ini [si Jesus] bakong gikan sa Dios, mayo sia nin ano man na magigibo.” Paano nagsimbag an mga poon nin relihiyon? “Sa pagsimbag sinda nagsabi saiya: ‘Ika lubos na namundag sa kasalan, asin tinotokdoan mo kami?’ Asin ilinuwas sia ninda!” Mayo nanggad nin pagkaherak! Matagas an saindang puso. Kaya sinabihan sinda ni Jesus na minsan sinda nakaheheling paagi sa saindang pisikal na mga mata, sinda buta sa espirituwal.—Juan 9:30-41.
5, 6. Ano an ginibo kan mga poon nin relihiyon kan enot na siglo na nagpaheling na namotan ninda an kadikloman?
5 Na ining relihiyosong mga parasaginsagin nagkakasala tumang sa espiritu nin Dios madaling maheheling sa saro pang okasyon, kan buhayon liwat ni Jesus si Lazaro hale sa mga gadan. Huli sa milagrong iyan, an dakol sa ordinaryong mga tawo nagtubod ki Jesus. Pero mangnoha kun ano an ginibo kan mga poon nin relihiyon. “An poon nin mga saserdote asin mga Fariseo tiniripon an Sanhedrin asin nagpoon na magsabi: ‘Ano an satong gigibohon, huli ta an tawong ini naggigibo nin dakol na tanda? Kun pabayaan ta sana sia nin siring, sinda gabos maturubod sa saiya, asin madatong an mga taga-Roma asin kukuanon an satong lugar asin an satong nasyon.’” (Juan 11:47, 48) Sinda naghahadit manongod sa saindang mga katongdan asin kabantogan. Ano man an mangyari boot nindang paogmahon an mga taga-Roma, bakong an Dios. Kaya ano an saindang ginibo? “Magpoon kan aldaw na iyan nagpaharatolhatol sinda na ipagadan [si Jesus].”—Juan 11:53.
6 Iyo sana daw idto? Dai. An saindang sunod na ginibo nagpapaheling kun gurano ninda kanamomotan an kadikloman: “An poon na mga saserdote nagpaharatolhatol na gadanon man si Lazaro, ta huli sa saiya an dakol na Judio nagduduruman asin nagturubod na ki Jesus.” (Juan 12:10, 11) Dai nanggad mapaniwalaan na karatan! Minsan ngani ginibo ninda ini gabos tanganing maprotehiran an saindang mga posisyon, ano an nangyari? Sa iyo man sanang kapag-arakian na iyan, sinda nagrebelde tumang sa mga taga-Roma, na nagdatong tumang sa sainda kan 70 C.E. asin kinua an saindang lugar, an saindang nasyon, asin siring man an saindang buhay!—Isaias 5:20; Lucas 19:41-44.
An Pagkaherak ni Jesus
7. Taano an mga namomoot sa katotoohan ta buronyog na nagduruman ki Jesus?
7 Iyo man sa satuyang panahon, bakong gabos boot nin espirituwal na kaliwanagan. Pero an mga namomoot sa katotoohan boot nanggad na dumolok sa liwanag. Gusto ninda na an Dios an saindang Soberano, asin galaga sindang nagheheling ki Jesus, na sinugo nin Dios tanganing ipaliwanag kun ano an liwanag, asin nagsusunod saiya. Iyan an ginibo kan mapakumbabang mga tawo kan si Jesus yaon digdi sa daga. Buronyog sindang nagduduruman saiya. Minsan an mga Fariseo inako iyan. Sinda nagreklamo: “An kinaban nagsusunod na sa saiya.” (Juan 12:19) An arog-karnerong mga tawo namomotan si Jesus huli ta sia an kabaliktaran kan paslo, mapaabaw-abaw, gutom-sa-kapangyarihan na mga poon nin relihiyon na sainda sinabi ni Jesus: “Sinda nagbobogkos nin magabat na mga pasanon asin ibinubugtak iyan sa mga abaga nin mga tawo, alagad sinda mismo harabong humiro kaiyan minsan kan saindang mga moro. An gabos nindang gibo ginigibo ninda sa pagpaheling sa mga tawo.”—Mateo 23:4, 5.
8. Kabaliktaran sa relihiyosong mga parasaginsagin, ano an paggawe ni Jesus?
8 Sa kabaliktaran, mangnoha an maheherakon na paggawe ni Jesus: “Kan maheling nia an kadaklan naherak sia sainda, huli ta sinda maniwang asin nagkakaralagalag siring sa mga karnero na mayong pastor.” (Mateo 9:36) Asin ano an ginibo nia manongod dian? Sinabi nia sa mga inaprobetsaran na kan palakaw ni Satanas: “Madia kamo sa sako, kamo gabos na napapagal asin nagagabatan, asin tatawan ko kamo nin kaginhawahan. Pasana nindo an sakong sakal asin magin sakong mga disipulo, huli ta ako maboot asin mapakumbaba sa puso, asin makakukua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.” (Mateo 11:28-30) Ginibo ni Jesus an ihinula manongod sa saiya sa Isaias 61:1, 2, na dian satong mababasa: “Linahidan ako ni Jehova na magsabi kan maogmang bareta sa mga mahoyo. Isinugo nia ako sa pagpaomay sa mga nasasakitan an puso, sa pagbalangibog nin katalingkasan sa mga nabihag asin sa pagpabuklat sa mga mata kan mga bilanggo; sa pagbalangibog kan taon nin marahay na boot ni Jehova asin kan aldaw nin pamalos kan satong Dios; sa pagranga kan gabos na nagtatangis.”
Pagtipon sa mga Paradara nin Liwanag
9. Ano an mahahalagang nangyari kan 1914?
9 Pakasakat nia sa langit, kinaipuhan ni Jesus na maghalat sagkod na umabot an panahon na itao nin Dios sa saiya an kapangyarihan kan Kahadean. Dangan ibubulag nia an “mga karnero” sa “mga kanding.” (Mateo 25:31-33; Salmo 110:1, 2) Nag-abot an panahon na iyan kan pumoon “an huring mga aldaw” kan 1914. (2 Timoteo 3:1-5) Tinawan nin kapangyarihan bilang Hade sa langitnon na Kahadean nin Dios, pinonan ni Jesus na tiponon sa saiyang toong kamot nin pag-oyon an mga boot na sumunod sa liwanag. Pakalihis kan Guerra Mundial I, nagpadagos an gibong pagtipon na iyan na may nag-oorog na pag-oswag.
10. Ano an puwedeng ihapot manongod sa mga ginagamit ni Jesus sa gibong pagtitipon?
10 Sa pangengenot ni Cristo Jesus, an gibohon na pagtitipon binalosan nin dakulang kapangganahan. Nungka sa kasaysayan na nagkaigwa nin siring kadakol na tawo hale sa gabos na nasyon na nagkatiripon sa naliwanagan na tunay na pagsamba. Asin siisay ngonyan an mga nagsusunod sa liwanag na naggigikan sa Dios asin ki Cristo? Siisay an naggigibo kan sinasabi sa Filipos 2:15, na “nagliliwanag siring sa mga ilaw kan kinaban,” na nag-iimbitar sa iba na ‘dumolok asin kumua kan tubig nin buhay na daing bayad’?—Kapahayagan 22:17.
11. Ano an kamugtakan nin Kakristianohan kun dapit sa espirituwal na liwanag?
11 Ginigibo daw iyan kan Kakristianohan? An Kakristianohan, kaiba an saiyang nagkakabarangang relihiyon, siertong dai nagliliwanag bilang ilaw. Sa katunayan, an klero arog kan mga poon nin relihiyon kan kaaldawan ni Jesus. Dai ninda ipinaheheling an tunay na liwanag gikan sa Dios asin ki Cristo. Treinta y tres na taon na an nakaagi, sabi kan magasin na Theology Today: “Makamomondong sabihon na maninigong midbidon na an liwanag na ini dai nagsisirang sa Iglesya na may makosog na kaliwanagan. . . . An Iglesya paorog nang paorog na nagigin arog kan mga komunidad na nakapalibot dian. Iyan bako talaga an liwanag kan kinaban kundi imbes minapabalik nin mga liwanag na pinasisirang kan mismong kinaban.” Asin an kamugtakan kan Kakristianohan mas grabe pa ngani ngonyan. An inaapod na liwanag na pinasisirang nia hale sa kinaban sa katotoohan kadikloman huli ta iyan sana an ikatatao ni Satanas asin kan saiyang kinaban. Mayo, mayo nin liwanag nin katotoohan na naggigikan sa nagkokorontrahan asin biyong kinabanon na mga relihiyon nin Kakristianohan.
12. Siisay an minabilog kan tunay na nagdadarang liwanag na organisasyon ngonyan?
12 Puwedeng may kompiansang sabihon na an bagong kinaban na sosyedad nin mga Saksi ni Jehova iyo an tunay, nagdadara nin liwanag na organisasyon ngonyan. Nagkakasararo, an gabos na miembro kaiyan—mga lalaki, babae, asin siring man an mga aki—pinasisirang sa gabos na katawohan an saindang liwanag na gikan ki Jehova asin ki Cristo. Kan sarong taon, sa haros 70,000 na kongregasyon nin mga Saksi ni Jehova sa bilog na kinaban, labing marhay sa apat na milyon na paradara nin liwanag an aktibong nagtataram sa iba manongod sa Dios asin sa saiyang mga katuyohan. Asin sa kada taon ngonyan, nakaheheling kita nin nagpapadagos na dakulang pagtipon nin mga tawo na boot man na maliwanagan sa espirituwal. Ginatos na ribo an binabautismohan pakatapos na mag-adal sa Biblia asin makaabot sa tamang kaaraman kan katotoohan. Tunay nanggad, “kabotan [nin Dios] na an gabos na klase nin tawo makaligtas asin makaabot sa tamang kaaraman kan katotoohan.”—1 Timoteo 2:4.
13. Sa ano puwede niatong iagid an liwanag na naggigikan ki Jehova?
13 Puwede niatong iagid an kaliwanagan ngonyan na naggigikan ki Jehova sa nangyari kan an banwaan nin Dios kan suanoy na mga panahon naghale sa Egipto: “Si Jehova nangengenotan sainda kun aldaw sa sarong hariging panganoron tanganing mangenot sainda sa dalan, asin kun banggi sa sarong hariging kalayo tanganing mapaliwanagan sinda na maglakaw sa aldaw asin sa banggi.” (Exodus 13:21, 22) An panganoron kun aldaw asin an kalayo kun banggi na gikan sa Dios malalaoman na mga giya. Sinda malalaoman arog kan aldaw na linalang nin Dios tanganing magtao sato nin maliwanag na mga oras. Kaya makalalaom man kita ki Jehova na padagos na paliliwanagan an dalan sa espirituwal na paagi para sa mga naghahanap kan katotoohan sa maraot na huring mga aldaw na ini. Sinisierto sato kan Talinhaga 4:18: “An dalan kan mga matanos kabaing kan liwanag na paorog nang paorog na nagliliwanag sagkod na magin lubos an aldaw.”
Pagpasirang kan Liwanag kan Kahadean
14. Ano an dapat na magin pinakakatuyohan kan mga paradara nin liwanag?
14 Mantang si Jehova an Gikanan nin kaliwanagan, asin si Cristo an Pangenot na Parapasirang kan liwanag na iyan, an mga parasunod ni Jesus maninigo man na pasirangon iyan. Sinabi nia manongod sainda: “Kamo iyo an liwanag kan kinaban. . . . Pasiranga an saindong liwanag sa atubang nin mga tawo, tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.” (Mateo 5:14, 16) Asin ano an pinakatema kan liwanag na ini na kaipuhan na pasirangon kan saiyang mga parasunod sa atubang nin katawohan? Ano an kinakaipuhan nindang itokdo sa kulminasyon na ini kan kasaysayan nin kinaban? Dai sinabi ni Jesus na an saiyang mga parasunod maghuhulit nin demokrasya, diktadura, pagkakasaro nin Iglesya asin Estado, o iba pang kinabanon na ideolohiya. Imbes, sa Mateo 24:14 ihinula nia na sa atubang nin paglamag sa bilog na kinaban, “an maogmang baretang ini kan kahadean ihuhulit sa bilog na inierokan na daga para sa pagpatotoo sa gabos na nasyon, dangan madatong an katapusan.” Kaya an mga paradara nin liwanag ngonyan nagtataram sa iba manongod sa Kahadean nin Dios, na matapos kan kinaban ni Satanas asin dadarahon an matanos na bagong kinaban.—1 Pedro 2:9.
15. Sa ano madolok an mga boot nin liwanag?
15 An mga namomoot sa liwanag dai malilingling kan mga paghihingako asin pasohan kan kinaban na ini. An gabos na paghihingako asin pasohan na iyan mawawara sa dai na mahahaloy, huli ta an kinaban na ini nagrarani na sa katapusan. Imbes, an mga namomoot sa katanosan mamawoton na akoon an maogmang bareta na ipinahahayag kan mga nagpapasirang nin liwanag kan Kahadean nin Dios sagkod sa kaporoporohi nin daga. Iyo ini an mga ihinula sa Kapahayagan 7:9, 10, na nagsasabing: “Ako nagheling, asin, uya! an sarong dakulang kadaklan, na dai nin siisay man na makabibilang, hale sa gabos na nasyon asin tribo asin banwaan patin tataramon, na nagtitindog sa atubang kan trono [nin Dios] asin sa atubang kan Kordero [si Cristo] . . . Asin sinda padagos na nagkukurahaw sa makosog na tingog, na nagsasabi: ‘Utang niato an kaligtasan sa satong Dios, na nagtutukaw sa trono, asin sa Kordero.’” An bersikulo 14 nagsasabi: “An mga ini an nagluwas sa dakulang kahorasaan.” Iyo, nakaligtas sinda sa katapusan kan kinaban na ini pasiring sa daing katapusan na bagong kinaban na sakop kan Kahadean nin Dios.
An Naliwanagan na Bagong Kinaban
16. Ano an mangyayari sa kinaban ni Satanas sa dakulang kahorasaan?
16 An bagong kinaban malalakopan nin makinang na liwanag nin katotoohan. Iyo nanggad, horophoropa an magigin kamugtakan sa aldaw pakalihis na taposon nin Dios an palakaw na ini nin mga bagay. Si Satanas, an saiyang mga demonyo, asin an saiyang politikal, komersial, asin relihiyosong palakaw mawawara na—sinda gabos! Mawawara naman an bilog na kasangkapan nin propaganda ni Satanas. Kaya pakalihis kan dakulang kahorasaan, dai na magkakaigwa pa ni sarong inimprentang diaryo, magasin, libro, pampleta, o pulyeto na nagsusuportar sa maraot na kinaban na ini. Dai na magkakaigwa nin bareta nin nakararaot na mga impluwensia sa kinabanon na mga istasyon nin telebisyon o radyo. Biyo nang hahaleon an entirong nakaiilong palibot kan kinaban ni Satanas sa saro sanang makosog na tira!—Mateo 24:21; Kapahayagan 7:14; 16:14-16; 19:11-21.
17, 18. Paano nindo ilaladawan an espirituwal na palibot pakalihis kan katapusan nin kinaban ni Satanas?
17 Magigin dakulaon nanggad na kaginhawahan iyan! Magpoon sa aldaw na iyan, solamente an kapakipakinabang, nakapakokosog na espirituwal na liwanag na naggigikan ki Jehova asin sa saiyang Kahadean an maimpluwensia sa katawohan. Ihinuhula kan Isaias 54:13: “An gabos mong aki magigin mga tawong tinokdoan ni Jehova, asin an katoninongan kan saimong mga aki magigin abunda.” Mantang an pamamahala nin Dios iyo na an nagsasakop sa bilog na daga, an saiyang panuga iyo na, arog kan sinasabi sa Isaias 26:9, “an katanosan manonodan nanggad kan mga nag-eerok sa mabungang daga.”
18 Tolos-tolos, an bilog na mental asin espirituwal na palibot babagohon para sa ikararahay. An nakapakokosog na mga bagay magigin an lataw na aktibidad kan aldaw imbes na an makamomondo, inmoral na mga bagay na lakop nang marhay ngonyan. An gabos na nabubuhay sa panahon na iyan totokdoan kan katotoohan manongod sa Dios asin sa saiyang mga katuyohan. Sa lubos na sentido, maootob an hula sa Isaias 11:9, na nagsasabing: “An daga mapapano nanggad kan kaaraman dapit ki Jehova kun paanong an tubig nakatatahob sa mismong kadagatan.”
Apuradong Sumunod sa Liwanag
19, 20. Taano an mga boot na sumunod sa liwanag ta kaipuhan na magin alisto?
19 Ngonyan, sa ultimong mga taon kan maraot na palakaw na ini, apuradong sumunod sa liwanag kan kinaban. Asin kaipuhan kitang magin mapagbantay, huli ta igwa nin mainit na pakikilaban na olangon kita sa paglakaw sa liwanag. An pagtumang na ini naggigikan sa mga kapangyarihan nin kadikloman—ki Satanas, sa saiyang mga demonyo, asin sa saiyang organisasyon sa daga. Kaya si apostol Pablo nagpapatanid: “Magmata kamo, magpuka kamo. An saindong kaiwal, an Diablo, naglalakaw na siring sa nangangarob na leon, na naghahanap nin masisiba.”—1 Pedro 5:8.
20 Maglalaag si Satanas nin gabos na olang sa dalan kan mga nagdodolok sa liwanag, huli ta boot nia na sinda magpadagos sa kadikloman. Iyan puwedeng pangigipit kan mga paryentes o dating katood na nagkokontra sa katotoohan. Iyan puwedeng mga pagduda dapit sa Biblia huli sa pagkabuta nin saro sa mga tokdo nin falsong relihiyon o sa propaganda nin daing pagtubod na mga ateista asin agnostiko. Iyan puwedeng an sadiring makasalan na tendensia nin saro na minagibong depisil na otobon an banal na mga kahagadan.
21. Anong paghiro an dapat na gibohon kan gabos na boot na mabuhay sa bagong kinaban nin Dios?
21 Ano man na mga kaolangan an yaon, boot daw nindong magkamit nin buhay sa sarong bagong kinaban na mayo nin kadukhaan, krimen, inhustisya, asin guerra? Boot daw nindong magkamit nin sangkap na salud asin buhay na daing sagkod sa sarong paraisong daga? Kun siring akoon asin sunodon si Jesus bilang an liwanag kan kinaban asin maghinanyog sa mensahe kan mga nangangapot nin marigon sa “tataramon nin buhay” asin sa mga “nagliliwanag siring sa mga ilaw kan kinaban.”—Filipos 2:15, 16.
Paano Nindo Sisimbagon?
◻ Paano ipinaheheling kan mga poon nin relihiyon na sinda mamomoton sa kadikloman?
◻ Ano an iginawe ni Jesus sa mga tawo?
◻ Paano nagpadagos an pagtitipon sa mga paradara nin liwanag?
◻ Anong mahalagang mga pagbabago an mangyayari sa dai na mahahaloy?
◻ Taano ta apuradong sumunod sa liwanag kan kinaban ngonyan?
[Ritrato sa pahina 14, 15]
An matagas an pusong mga Fariseo ilinuwas an lalaki na an mga mata binuklat ni Jesus