Sarong Hade na may Kayamanan Asin Kadonongan

Sa paghona daw nindo kayamanan an mapaogma sa saindo? Kun may magtao sa saindo nin dakulang kantidad nin kuarta, dai daw kamo maoogma? Magigin maogma gayod kamo. Posibleng maisip nindo kun paano nindo iyan gagastoson.

TOTOO, kadakol nin mga bagay na mababakal tanganing gibohon na mas maginhawa asin nakaoogma an buhay. An kuarta puede man na magin “para sa proteksion” sa dai linalaoman na mga problema, na siring kan helang o kawaran nin trabaho.​—Eclesiastes 7:12.

Alagad ano an relasyon nin kuarta asin kaogmahan? Sa paghona daw nindo, siring kan dakol, an kaogmahan resulta nin kayamanan? An paghanap nin simbag sa mga hapot na ini tibaad magin masakit huli ta an kuarta pasil na sokolon, o bilangon, mantang an kaogmahan dai. Dai nindo puedeng ibugtak sa timbangan an kaogmahan asin timbangon iyan.

Dangan, siring man, may nagkapirang mayaman na tawo na garo baga maogma, mantang an iba miserable. Totoo man iyan sa mga dukha. Pero, an kadaklan na tawo​—dawa idtong mga mayaman na—​naniniwala na an mas dakol na kuarta matao sa sainda nin orog na kaogmahan.

An sarong tawo na nagsurat manongod sa siring na mga bagay iyo si Hadeng Salomon kan suanoy na Israel. Sia saro sa pinakamayaman na tawo na nabuhay kasuarin pa man. Puede nindong basahon an paglaladawan kan saiyang dakulaon na kayamanan sa ika-10 kapitulo sa libro nin Biblia na Enot na Hade. Halimbawa, mangnoha na an bersikulo 14 nagsasabi: “An timbang kan bulawan na nag-abot ki Salomon sa sarong taon anom na gatos may anom na polo may anom na talentong bulawan.” An kabilangan na iyan katimbang nin 25 tonelada nin bulawan. Ngonyan, an siring kaiyan kadakol na bulawan magkakantidad nin labi nanggad sa $200,000,000, E.U.!

Pero, si Salomon bako sanang mayaman; sia binendisyonan nin Dios nin kadonongan. An Biblia nagsasaysay: “Si Hadeng Salomon nakalalabi sa kayamanan asin kadonongan kisa sa gabos na ibang hade sa daga. Asin an gabos na tawo sa daga naghihimuyawot na makaatubang si Salomon tanganing madangog an saiyang kadonongan na ibinugtak nin Dios sa saiyang puso.” (1 Hade 10:​23, 24) Kita man puedeng makinabang sa kadonongan ni Salomon, mantang an saiyang mga isinurat kabtang kan rekord kan Biblia. Helingon niato kun ano an sinabi nia manongod sa relasyon nin kayamanan asin kaogmahan.

[Pasasalamat para sa pinagkuanan kan retrato sa pahina 3]

Rineprodusir hale sa Die Heilige Schrift - Übersetzt von Dr. Joseph Franz von Allioli.

Druck und Verlag von Eduard Hallberger, Stuttgart