Makatatagal daw sa Kalayo an Saindong Gibo?
“An lambang saro mag-ingat kun paano an pagtogdok nia sa ibabaw [kan pundasyon].”—1 CORINTO 3:10.
1. Ano an paglaom nin fiel na mga Kristiano mapadapit sa may esperansang magin mga disipulo?
PINAGMAMASDAN nin mag-agom na Kristiano an saindang aking bagong mamundag. Naheheling nin sarong parahayag kan Kahadean an galaga, interesadong panlauog nin sarong inaadalan sa Biblia. An sarong Kristianong magurang sa kongregasyon na nagtotokdo hale sa plataporma may nariparo sa mga nagdadangog na sarong bagong interesado na entusiastikong hinahanap sa saiyang Biblia an mga teksto. An fiel na mga lingkod na ini ni Jehova pano nin paglaom an mga puso. Natural sanang iniisip-isip ninda, ‘An tawo daw na ini makanonood na kamotan saka paglingkodan si Jehova—asin magdadanay na fiel?’ Siempre, bakong automatiko an siring na resulta. Kaipuhan na may gibohon.
2. Paano ipinagirumdom ni apostol Pablo sa mga Kristianong Hebreo an halaga kan gibong pagtotokdo, asin ini tibaad magin dahelan na gibohon niato an anong pagsiyasat sa sadiri?
2 Ekspertong paratokdo mismo, idinoon ni apostol Pablo an halaga kan gibong pagtotokdo saka paggibo nin mga disipulo kan sia sumurat: “Kaipuhan na kamo mga paratokdo na huli sa panahon.” (Hebreo 5:12) An mga Kristiano na saiyang kaolay kadikiton an pag-oswag, kun iisipon kun gurano na sinda kahaloy na nagturubod. Imbes na andam nang magtokdo sa iba, kaipuhan na ipagirumdom pa sa sainda an pundamental na mga aspekto kan katotoohan. Ngonyan, marahay na kita gabos pensaron sa panapanahon an satong mga abilidad bilang paratokdo asin helingon kun paano kita makagigibo nin mga pag-oswag. Nakataya an mga buhay. Ano daw an magigibo niato?
3. (a) Sa ano ikinomparar ni apostol Pablo an paggibo nin Kristianong disipulo? (b) Bilang mga paratogdok na Kristiano, ano an dakula niatong pribilehio?
3 Sa mas pinahiwas na ilustrasyon, ibinaing ni Pablo sa pagtogdok nin sarong edipisyo an paggibo nin mga disipulo. Nagpoon sia sa pagsabi: “Kami mga katabang nin Dios. Kamo an oma nin Dios na kinukultibar, an edipisyo nin Dios.” (1 Corinto 3:9) Kaya nakikakabtang kita sa pagtotogdok na may koneksion sa mga tawo; nagtatabang kita na itogdok sinda na magin mga disipulo ni Cristo. Ginigibo niato iyan bilang mga katabang kan Saro na “naggibo kan gabos na bagay.” (Hebreo 3:4) Abaa kadakulang pribilehio! Helingon niato kun paano an ipinasabong na hatol ni Pablo sa mga taga Corinto makatatabang sa sato na magin mas eksperto sa satong gibo. Partikularmente na kita makonsentrar sa satong “abilidad sa pagtotokdo.”—2 Timoteo 4:2.
Pagbugtak kan Tamang Pundasyon
4. (a) Ano an katongdan ni Pablo sa Kristianong pagtotogdok? (b) Taano ta masasabi na si Jesus sagkod an mga nagdadangog sa saiya nakaaaram kan halaga nin marahay na mga pundasyon?
4 Tanganing magin marigon asin durable an sarong edipisyo, iyan nagkakaipo nin marahay na pundasyon. Sa siring, nagsurat si Pablo: “Segun sa dai na kutana maninigong kabootan nin Dios na itinao sa sako, bilang madonong na namamahala sa trabaho ako nagbugtak nin pundasyon.” (1 Corinto 3:10) Ginagamit an kaagid na ilustrasyon, si Jesu-Cristo nagtaram manongod sa sarong harong na nakatagal sa bagyo huli ta puminili nin masarig na pundasyon an kagtogdok kaiyan. (Lucas 6:47-49) Aram ni Jesus an gabos manongod sa halaga nin mga pundasyon. Yaon sia kan tugdason ni Jehova an mismong daga.a (Talinhaga 8:29-31) An mga nagdadangog ki Jesus may pagpahalaga man sa marahay na mga pundasyon. Mga harong sana na may marahay na pundasyon an makatatagal sa mga biglang pagbaha saka linog na kun beses nangyayari sa Palestina. Pero ano an pundasyon na nasa isip ni Pablo?
5. Siisay an pundasyon kan Kristianong kongregasyon, asin paano ini ihinula?
5 Si Pablo nagsurat: “Mayo nin tawo na makabubugtak nin ano man na ibang pundasyon ki kan ibinugtak na, na iyo si Jesu-Cristo.” (1 Corinto 3:11) Bako ini an kaenot-enote na si Jesus ibinaing sa pundasyon. Sa katunayan, an Isaias 28:16 naghula: “Ini an isinabi kan Soberanong Kagurangnan na Jehova: ‘Uya sakuyang ibinubugtak bilang pundasyon sa Sion an sarong gapo, nabalong gapo, an mahalagang marhay na anggulo nin seguradong pundasyon.’” Haloy nang katuyohan ni Jehova na an saiyang Aki magin an pundasyon kan Kristianong kongregasyon.—Salmo 118:22; Efeso 2:19-22; 1 Pedro 2:4-6.
6. Paano ibinugtak ni Pablo an angay na pundasyon sa mga Kristianong taga Corinto?
6 Ano an pundasyon para sa indibiduwal na mga Kristiano? Arog kan sabi ni Pablo, mayo nin pundasyon para sa tunay na Kristiano kundi an ibinugtak sa Tataramon nin Dios—si Jesu-Cristo. Tunay nanggad na iyan an pundasyon na ibinugtak ni Pablo. Sa Corinto, na labi-labi an pagpahalaga sa pilosopiya, dai nia hiningoang gulaton an mga tawo nin kinabanon na kadonongan. Imbes, si Pablo naghulit “ki Cristo na ipinako sa harigi,” na ipinahayag kan mga nasyon na daing saysay bilang dakulaon na “karungawan.” (1 Corinto 1:23) Itinokdo ni Pablo na si Jesus an prinsipal na personahe sa mga katuyohan ni Jehova.—2 Corinto 1:20; Colosas 2:2, 3.
7. Ano an manonodan niato sa pagkasambit ni Pablo sa saiyang sadiri bilang “madonong na namamahala sa trabaho”?
7 Sinabi ni Pablo na ginibo nia an siring na pagtotokdo “bilang madonong na namamahala sa trabaho.” An deklarasyon na ini bakong mahambog. Iyan pagrekonoser sana sa marahayon na balaog na itinao sa saiya ni Jehova—an pag-organisar o pamamahala sa trabaho. (1 Corinto 12:28) Totoo, kita ngonyan mayo kan milagrosong mga balaog na itinao sa mga Kristiano kan enot na siglo. Asin tibaad dai niato iniisip na kita mga paratokdong may espesyal na balaog. Alagad sa sarong mahalagang sentido, kita siring kaiyan. Estudyare: Itinatao sa sato ni Jehova an saiyang banal na espiritu tanganing tabangan kita. (Ikomparar an Lucas 12:11, 12.) Asin kita may pagkamoot ki Jehova asin kaaraman sa pundamental na mga tokdo kan saiyang Tataramon. An mga ini totoong marahayon na mga balaog na magagamit sa pagtotokdo sa iba. Magdesisyon kita na gamiton an mga iyan sa pagbugtak kan angay na pundasyon.
8. Paano niato ibinubugtak si Cristo bilang pundasyon sa may esperansang magin mga disipulo?
8 Kun ibinubugtak niato si Cristo bilang pundasyon, dai niato sia iiniintrodusir bilang daing maginibong omboy sa sarong sabsaban, ni bilang kapantay ni Jehova sa sarong Trinidad. Dai, an siring na mga ideya na bakong sono sa Kasuratan pundasyon para sa palsipikadong mga Kristiano. Imbes, itinotokdo niato na sia an pinakadakulang tawo na nabuhay kasuarin man, na itinao nia an saiyang sangkap na buhay para sa sato, asin na ngonyan sia an nombradong Hade ni Jehova na naghahade sa langit. (Roma 5:8; Kapahayagan 11:15) Hinihingoa man niato na motibaron an satong mga inaadalan na lumakaw sa mga gira ni Jesus asin arogon an saiyang mga kualidad. (1 Pedro 2:21) Boot niato na sinda mapahirong marhay kan kaigotan ni Jesus para sa ministeryo, kan saiyang pakikidamay sa mga hamak saka inaapi, kan saiyang pagkaherak sa mga parakasala na biyong pinapanluluya kan sadiri nindang pakamate nin kasalan, kan saiyang masarig na kapusoan sa atubangan nin mga pagbalo. Totoo nanggad, si Jesus kahangahangang pundasyon. Alagad ano an kasunod?
Pagtotogdok na Tama an Materyales
9. Minsan ngani sa pangenot si Pablo parabugtak nin pundasyon, ano an pagmalasakit nia sa mga nag-ako kan katotoohan kan saiyang itinotokdo?
9 Si Pablo nagsurat: “Ngonyan kun may magtogdok sa ibabaw kan pundasyon nin bulawan, pirak, mga gapong mahahalagang marhay, materyales na kahoy, doot, pinaggapasan, an gibo nin lambang saro mahahayag, huli ta an aldaw an mapahayag kaiyan, huli ta iyan mahahayag paagi sa kalayo; asin an kalayo mismo an mapatunay kun baga anong klase an gibo nin lambang saro.” (1 Corinto 3:12, 13) Ano an boot sabihon ni Pablo? Estudyare an kamugtakan sa likod. Sa pangenot si Pablo parabugtak nin pundasyon. Sa saiyang mga pagbiahe sa pagmimisyonero, sia nagbiahe sa siudad-siudad, na naghuhulit sa dakol na nungka na nakadangog kaidto manongod ki Cristo. (Roma 15:20) Mantang inaako nin mga tawo an katotoohan na saiyang itinotokdo, naorganisar an mga kongregasyon. Hararom an pagmakolog ni Pablo sa mga fiel na ini. (2 Corinto 11:28, 29) Minsan siring, hinagad kan saiyang gibo na sia magpadagos sa pagbiahe. Kaya pakatapos nin 18 bulan na pagbugtak nin pundasyon sa Corinto, naghale sia tanganing maghulit sa ibang siudad. Pero interesado siang marhay sa kun paano ipinadagos nin iba an nagibo nia duman.—Gibo 18:8-11; 1 Corinto 3:6.
10, 11. (a) Paano pinaglaen ni Pablo an magkakalaen na klase nin materyales sa pagtogdok? (b) Anong klase nin literal na mga edipisyo an posibleng yaon sa suanoy na Corinto? (c) Anong klaseng mga edipisyo an mas posibleng makatagal sa pagkasolo, asin anong praktikal na halimbawa an itinatao kaiyan para sa Kristianong mga paragibo nin disipulo?
10 Minalataw na an nagkapira na nagtotogdok sa ibabaw kan pundasyon na ibinugtak ni Pablo sa Corinto maluyang klase an trabaho. Tanganing ikabuyagyag an problema, pinaglaen ni Pablo an duwang klase nin materyales sa pagtogdok: bulawan, pirak, asin mga gapong mahahalagang marhay sa sarong lado; kahoy, doot, asin pinaggapasan sa ibong. An sarong edipisyo puedeng itogdok sa de kualidad, durable, dai nasosolong materyales; o puedeng dali-daling patindogon an saro na an ginagamit ikaaapon, temporaryo, asin madaling masolo na materyales. An dakulang siudad na arog kan Corinto sierto na dakol an duwang klaseng ini nin edipisyo. May kahangahangang mga templo na gibo sa dakula, mamahalon na mga bloke nin gapo, na tibaad may kabtang na napapatos o nasasamnohan nin bulawan asin pirak.b An durableng mga edipisyong ini tibaad nakagugulat na nanlalangkawan sa kaharaning mga payag, barong-barong, asin puesto sa sadan na gibo sa maharaphasap na mga pilar na kahoy asin naaatopan nin dagami.
11 Ano an mangyayari sa mga edipisyong ini sa sarong pagkasolo? An simbag sayod na sayod kaidtong kaaldawan ni Pablo arog sa kaaldawan niato. Sa katunayan, an siudad nin Corinto kinongkistar saka sinolo kan Romanong si Heneral Mumio kaidtong 146 B.C.E. An dakol na tinogdok sa kahoy, doot, o pinaggapasan seguradong biyong nalaglag. Kumusta man an masarig na mga edipisyong gapo, na sinamnohan nin pirak asin bulawan? Daing duda na an mga ini nagdanay. An mga inaadalan ni Pablo sa Corinto tibaad inaagihan aroaldaw an siring na mga edipisyo—magagayon na edipisyong gapo na nakaligtas sa mga kalamidad na haloyon nang guminaba sa bakong durableng kataraed na edipisyo. Kun siring, buhay na buhay an pagkadoon ni Pablo sa saiyang punto! Kun nagtotokdo, kaipuhan na ibilang niato an satong sadiri na mga paratogdok. Gusto niatong gumamit kan pinakamarahay, pinakadurableng materyales na mahihimo. Sa siring an satong gibo mas posibleng magdanay. Ano an durableng materyales na iyan, asin taano ta mahalagang marhay na gamiton iyan?
Makatatagal daw sa Kalayo an Saindong Gibo?
12. Sa anong mga paagi na an nagkapira sa mga Kristianong taga Corinto sapote an pagtogdok?
12 Malinaw nanggad, naniwala si Pablo na an nagkapira sa mga Kristiano sa Corinto maluyang klase an pagtogdok. Ano an diperensia? Arog kan ipinaheheling kan konteksto, an kongregasyon pinepeste nin pagkabaranga, an paghanga sa mga tawo sa ibong kan peligro sa pagkasararo kan kongregasyon. An nagkapira nagsasabi, “Ako ki Pablo,” mantang an iba nag-iinsistir, “Ako ki Apolos.” An nagkapira minalataw na halangkawon an pagheling sa sadiri nindang kadonongan. Bakong makangangalas, an ibinunga pagkaigwa nin sa laman na kaisipan, pagkabakong maygurang sa espirituwal, asin lakop na “pag-imon asin pasuruhay.” (1 Corinto 1:12; 3:1-4, 18) An mga aktitud na ini seguradong nabanaag sa pagtotokdo sa kongregasyon asin sa ministeryo. An resulta iyo na sapote an saindang paggibo nin disipulo, na garo pagtotogdok na maluyang klase an materyales. Iyan dai makaliligtas sa “kalayo.” Anong kalayo an sinasabi ni Pablo?
13. Ano an irinerepresentar kan kalayo sa ilustrasyon ni Pablo, asin ano an maninigong aramon nin gabos na Kristiano?
13 May kalayo na inaatubang niato gabos sa buhay—an mga pagbalo sa satong pagtubod. (Juan 15:20; Santiago 1:2, 3) Kaipuhan na maaraman kan mga Kristiano sa Corinto, kun paanong kaipuhan na maaraman niato ngonyan, na an gabos na tinotokdoan niato kan katotoohan talagang mababalo. Kun maluyang klase an satong pagtokdo, tibaad magkaigwa nin makamomondong mga resulta. Si Pablo nagpatanid: “Kun an gibo nin siisay man na saiyang itinogdok dian magdanay, sia maako nin balos; kun an gibo nin siisay man masolo, sia mawawaran, alagad sia mismo maliligtas; pero, kun iyo, iyan magigin garo nag-agi sa kalayo.”c—1 Corinto 3:14, 15.
14. (a) Paano puedeng ‘mawaran’ an Kristianong mga paragibo nin disipulo, pero paano sinda puedeng makaligtas na garo nag-agi sa kalayo? (b) Paano niato maiinaan an peligrong mawaran?
14 Nakapapepensar nanggad na mga tataramon! Puedeng magin makologon sa boot na magmaigot sa pagtabang sa saro na magin disipulo, tangani sanang paghelingon sia na padaog sa sugot o paglamag asin sa kahurihurihi bayaan an dalan kan katotoohan. Iyan an inaadmitir ni Pablo sa pagsabi nia na kita nawawaran sa siring na mga kaso. Tibaad makologon sa boot an eksperyensiang iyan kaya sinasabi na an satong kaligtasan “garo nag-agi sa kalayo”—siring sa tawo na nawaran kan gabos sa sarong pagkasolo asin sia mismo haros dai nakaligtas. Sa kabtang niato, paano niato maiinaan an peligrong mawaran? Magtogdok na durable an materyales! Kun tinotokdoan niato an satong mga inaadalan tanganing maabot an saindang puso, na pinahihiro sindang pahalagahan an mahalagang marhay na Kristianong mga kualidad na arog baga kan kadonongan, pakamansay, takot ki Jehova, asin tunay na pagtubod, kun siring kita nagtotogdok na durable, dai nasosolo an materyales. (Salmo 19:9, 10; Talinhaga 3:13-15; 1 Pedro 1:6, 7) An mga nagkakaigwa kan mga kualidad na ini mapadagos na gibohon an kabotan nin Dios; nasa sainda an seguradong paglaom na magdanay na buhay sagkod lamang. (1 Juan 2:17) Pero, paano niato magagamit sa praktikal na paagi an ilustrasyon ni Pablo? Estudyare an nagkapirang halimbawa.
15. Sa anong mga paagi na masisierto niato na linilikayan niato an sapoteng pagtogdok mapadapit sa satong mga inaadalan sa Biblia?
15 Kun nagtotokdo sa mga inaadalan sa Biblia, maninigo na nungka niatong palangkawon an mga tawo kisa ki Jehova Dios. An kamawotan niato bakong tokdoan sinda na ibilang kita na pangenot na gikanan nin kadonongan. Boot niato na sinda pagiya ki Jehova, sa saiyang Tataramon, asin sa saiyang organisasyon. Sa katuyohan na iyan, dai sana niato itinatao an sadiri niatong mga opinyon bilang simbag sa saindang mga hapot. Imbes, tinotokdoan niato sindang hanapon an mga simbag, na ginagamit an Biblia asin an mga publikasyon na itinao kan “fiel asin madonong na oripon.” (Mateo 24:45-47) Sa kaagid na mga dahelan, nagmamaan kita na dai magin masinadiri sa satong mga inaadalan sa Biblia. Imbes na ikaanggot kun an iba nagpapaheling nin interes sa sainda, maninigo na enkaminaron niato an satong mga inaadalan na “humiwas” sa saindang mga kapadangatan, na minimidbid asin inaapresyar an pinakadakol na mapupuede sa laog kan kongregasyon.—2 Corinto 6:12, 13.
16. Paano makapagtotogdok an kamagurangan na dai nasosolo an materyales?
16 An Kristianong kamagurangan igwa man nin mahalagang marhay na kabtang sa pagtogdok nin mga disipulo. Kun sinda nagtotokdo sa atubangan kan kongregasyon, hinihingoa nindang magtogdok na dai nasosolo an materyales. Tibaad nagkakalaenlaen na marhay an saindang abilidad sa pagtotokdo, eksperyensia, asin personalidad, alagad dai ninda kinakapital an mga pagkakalaen na ini tanganing akiton sa sainda an mga parasunod. (Ikomparar an Gibo 20:29, 30.) Dai niato aram nin eksakto kun taano an nagkapira sa Corinto ta nagsasabi, “Ako ki Pablo” o, “Ako ki Apolos.” Alagad masisierto niato nin biyo na an siisay man sa fiel na mga magurang na ini sa kongregasyon dai nagpalakop kan siring na nakababangang kaisipan. Si Pablo dai nabola kan siring na mga saboot; mapuersa niang pinatunayan na falso an mga iyan. (1 Corinto 3:5-7) Siring man ngonyan, ginigirumdom nin kamagurangan na sinda nagpapastor sa “aripompon nin Dios.” (1 Pedro 5:2) Iyan bakong sadiri nin siisay man na tawo. Kaya an kamagurangan marigon na naninindogan tumang sa ano man na tendensia na dominaron nin sarong tawo magsalang an aripompon o an grupo nin kamagurangan. Sagkod na an kamagurangan minomotibar nin mapakumbabang kamawotan na maglingkod sa kongregasyon, aboton an mga puso, asin tabangan an mga karnero na maglingkod ki Jehova nin bilog na kalag, sinda nagtotogdok na dai nasosolo an materyales.
17. Paano an Kristianong mga magurang naghihingoa na magtogdok na dai nasosolo an materyales?
17 An Kristianong mga magurang interesado man na marhay sa bagay na ini. Abaa an paghimuyawot ninda na maheling an saindang mga aki na nabubuhay sagkod lamang! Iyan an dahelan na sinda nagmamaigot na marhay na “itadom” an mga prinsipyo kan Tataramon nin Dios sa puso kan saindang mga aki. (Deuteronomio 6:6, 7) Gusto ninda na an saindang mga aki mamidbid an katotoohan, bako sanang bilang mga reglamento o litaniya nin mga detalye, kundi bilang pano nin aktibidad, nakakokontento, asin maogmang pamumuhay. (1 Timoteo 1:11) Tanganing ikatogdok an saindang mga aki na magin fiel na mga disipulo ni Cristo, an mamomoton na mga magurang naghihingoa na gumamit nin materyales na dai nasosolo. Sinda mapasensiang nagtatrabaho sa pagtabang sa saindang mga aki, na tinatabangan sindang haleon an mga kualidad na ikinaoongis ni Jehova asin kultibaron an mga kualidad na namomotan nia.—Galacia 5:22, 23.
Siisay an May Paninimbagan?
18. Kun isinisikwal nin disipulo an ikararahay na tokdo, taano ta tibaad bako man iyan na sala kan mga naghihingoa na magtokdo asin magpatood sa saiya?
18 An orolay na ini nagpapalataw nin sarong importanteng hapot. Kun an saro na hinihingoa niatong tabangan mapasuhay sa katotoohan, iyan daw nangangahulogan na kita nagkulang bilang mga paratokdo—na seguradong maluyang klase an materyales sa satong pagtogdok? Dai man pirme. Tunay na ipinagigirumdom sa sato kan mga tataramon ni Pablo na dakulang paninimbagan an makikabtang sa pagtogdok nin mga disipulo. Gusto niatong gibohon an gabos na makakaya niato na magtogdok nin marahay. Alagad dai sinasabi sa sato kan Tataramon nin Dios na isaabaga an bilog na paninimbagan asin magpasan nin pagkakulpable kun an mga hinihingoa niatong tabangan tumalikod sa katotoohan. May ibang mga nakakokontribwir na bagay na napapalabot apuera sa satong kabtang bilang mga paratogdok. Halimbawa, mangnoha an sinasabi ni Pablo mapadapit ngani sa paratokdo na maluyang klase an trabaho sa pagtogdok na ini: “Sia mawawaran, alagad sia mismo maliligtas.” (1 Corinto 3:15) Kun an tawong ini puedeng sa kahurihurihi magkamit nin kaligtasan—mantang an Kristianong personalidad na hiningoa niang itogdok sa saiyang inaadalan ilinaladawan na ‘nasolo’ sa nagkakalayong pagbalo—ano an dapat na ikonklusyon niato? Daing duwa-duwa, na an inaadalan an ibinibilang ni Jehova na sa pangenot may paninimbagan sa saiyang sadiring mga desisyon kun baga sia masunod sa fiel na dalan o dai.
19. Ano an kokonsideraron niato sa kasunod na artikulo?
19 An personal, o indibiduwal, na paninimbagan bagay na dakula an halaga. Iyan nakaaapektar sa lambang saro sa sato. Sa partikular, ano an itinotokdo kan Biblia manongod sa bagay na iyan? Ini an kokonsideraron kan satong masunod na artikulo.
[Mga Nota sa Ibaba]
a An “pundasyon kan daga” puedeng nanonongod sa pisikal na mga puersa na marigon na nagtitindi dian—asin sa gabos na bagay sa kalangitan. Saro pa, an daga mismo ginibo sa paagi na iyan nungka na “matatanyog,” o malalaglag.—Salmo 104:5.
b An “mga gapong mahahalagang marhay” na nasambitan ni Pablo bako man talagang mga mutya, arog baga kan mga brilyante asin rubi. Iyan puedeng halangkaw an presyo na mga gapo sa pagtogdok na arog baga kan marmol, alabastro, o granito.
c Ibinubugtak ni Pablo sa pagduda an kaligtasan, bakong kan kagtogdok, kundi kan “gibo” kan kagtogdok. An pagkatradusir kan The New English Bible sa bersikulong ini: “Kun an edipisyo nin sarong tawo magdanay, sia babalosan; kun iyan masolo, kaipuhan na tioson nia an kawaran; alagad ta makaliligtas an saiyang buhay, arog kan tibaad pagkaligtas nin saro sa sarong pagkasolo.”
Ano an Isisimbag Nindo?
◻ Ano an “pundasyon” sa sarong tunay na Kristiano, asin paano iyan ibinubugtak?
◻ Ano an manonodan niato sa laen-laen na klase nin materyales sa pagtotogdok?
◻ Ano an irinerepresentar kan “kalayo,” asin paano iyan puedeng magpangyari sa nagkapira na ‘mawaran’?
◻ Paano an mga paratokdo kan Biblia, kamagurangan, asin mga magurang makapagtotogdok na dai nasosolo an materyales?
[Retrato sa pahina 9]
Sa dakol na suanoy na siudad, an dai nasosolong mga edipisyong gapo nag-eksister kadungan nin mas maluyang mga tinogdok