Pagtabang sa mga Tawo na Magin Dayupot ki Jehova

“Mayo nin makaduduman sa Ama kun bakong huli sa sako.”—JUAN 14:6.

1. Anong togon an itinao kan binuhay liwat na si Jesus sa saiyang mga disipulo, asin ano an ibinunga mantang kinukuyog iyan kan Mga Saksi ni Jehova?

PINAGBOTAN ni Jesu-Cristo an saiyang mga parasunod na “gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu.” (Mateo 28:19) Sa nakaaging sampulong taon, labi nanggad sa tolong milyon katawo an natabangan kan Mga Saksi ni Jehova na rumani sa Dios, na pag-abot nin panahon binabautismohan sinda bilang simbolo kan saindang pagdusay sa saiya na gibohon an saiyang kabotan. Abaa an kaogmahan niato na tabangan sindang magin dayupot sa Dios!—Santiago 4:8.

2. Minsan ngani dakol na bagohan an nababautismohan, ano an nangyari?

² Minsan siring, sa nagkapirang nasyon na dakol na bagong disipulo an nabautismohan, dai nagkaigwa nin kaparehong aumento sa kabilangan nin mga parahayag kan Kahadean. Siempre, dapat na tawan nin konsiderasyon an mga nagadan, ta an taonan na bilang nin nagagadan mga 1 porsiento. Pero, sa nakaaging pirang taon, medyo dakol an suminuhay huli sa dai maaraman kun anong dahelan. Taano? Sisiyasaton kaini asin kan kasunod na artikulo kun paano nadadagkang rumani an mga tawo ki Jehova asin an posibleng mga dahelan kun taano ta minasuhay an nagkapira.

An Katuyohan kan Satong Paghuhulit

3. (a) Paano an misyon na ipinagkatiwala sa mga disipulo ni Jesus kadungan kan sa anghel na nasambitan sa Kapahayagan 14:6? (b) Ano an nagin epektibong paagi na pukawon an interes nin mga tawo sa mensahe manongod sa Kahadean, alagad ano an problema?

³ Sa “panahon [na ini] kan katapusan,” an mga disipulo ni Jesus isinugong ilakop an “tunay na kaaraman” may labot sa “maogmang baretang ini kan kahadean.” (Daniel 12:4; Mateo 24:14) An saindang misyon kadungan kan sa anghel na may “daing katapusan na maogmang bareta na ipahahayag sa mga nag-eerok sa daga, asin sa lambang nasyon asin tribo asin tataramon patin banwaan.” (Kapahayagan 14:6) Sa kinaban na ini na sibot na marhay sa pan-aroaldaw na mga bagay, sa pankagabsan an pinakaepektibong paagi na mapukaw an interes nin mga tawo sa Kahadean nin Dios asin tabangan sindang magin dayupot ki Jehova sabihan sinda manongod sa paglaom na buhay na daing katapusan sa sarong paraisong daga. Minsan ngani natural sana ini, an mga nakikiasosyar sa banwaan nin Dios tangani sanang makalaog sa Paraiso bakong masarig an pagkatongtong sa hayakpit na dalan na pasiring sa buhay.—Mateo 7:13, 14.

4. Segun ki Jesus asin sa anghel na naglalayog sa tahaw kan langit, ano an katuyohan kan satong paghuhulit?

⁴ Sinabi ni Jesus: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) An anghel na naglalayog sa tahaw kan langit nagpapahayag nin “daing katapusan na maogmang bareta” asin nagsasabi sa mga nag-eerok sa daga: “Matakot kamo sa Dios asin pamurawayon sia, huli ta nag-abot na an oras kan saiyang paghokom, asin kaya sambahon nindo an Saro na naggibo kan langit asin daga asin dagat patin mga burabod nin tubig.” (Kapahayagan 14:7) Kun siring, an pinakakatuyohan kan satong paghuhulit kan maogmang bareta tabangan an mga tawo na magin dayupot ki Jehova paagi ki Cristo Jesus.

An Satong Kabtang sa Gibohon ni Jehova

5. Anong mga tataramon ni Pablo asin ni Jesus an nagpapaheling na gibohon ni Jehova an satong ginigibo, bako niato?

⁵ Sa pagsurat sa mga kapwa linahidan na Kristiano, si apostol Pablo nagtataram manongod sa “ministeryo nin pakiulian” asin sinasabi na pinapangyayari nin Dios na makiulian sa saiya an mga tawo basado sa atang na pantubos ni Jesu-Cristo. Sinasabi ni Pablo na “garo baga an Dios nakikimaherak paagi sa samo” asin na “bilang mga karibay ni Cristo kami nakikimaherak: ‘Makiulian kamo sa Dios.’” Abaa kanakaoogmang ideya! Baga man kita linahidan na “mga embahador na karibay ni Cristo” o sugo na may daganon na paglaom, maninigo na nungka niatong lingawan na ini gibohon ni Jehova, bako niato. (2 Corinto 5:18-20) An Dios talaga an nandadagka sa mga tawo asin nagtotokdo sa mga minadolok ki Cristo. Sinabi ni Jesus: “Dai nin nakadodolok sa sako kun dai sia dagkahon kan Ama na nagsugo sa sako; asin bubuhayon ko sia liwat sa huring aldaw. Nasusurat sa Mga Propeta, ‘Asin sinda gabos totokdoan ni Jehova.’ An gabos na nakadangog sa Ama asin nakanood minadolok sa sako.”—Juan 6:44, 45.

6. Paano yinuyugyug ni Jehova an mga nasyon sa naeenot na paagi, asin kadungan kaiyan, sairisay an nakanonompong nin katiwasayan sa saiyang “harong” nin pagsamba?

⁶ Sa huring mga aldaw na ini, paano dinadagka ni Jehova an mga tawo asin binubukasan sa sainda an “pintoan nin pagtubod”? (Gibo 14:27, nota sa ibaba; 2 Timoteo 3:1) An sarong importanteng marhay na paagi iyo an pagsugo sa saiyang mga Saksi na ibalangibog an saiyang mga mensahe nin kaligtasan asin nin paghokom tumang sa maraot na palakaw na ini nin mga bagay. (Isaias 43:12; 61:1, 2) An pambilog na kinaban na pagbalangibog na ini nagpapakunogkunog sa mga nasyon—sarong anino kan mapaghusgar na paglaglag na madali nang umabot. Kadungan kaiyan, an mga tawo na “mahalagang marhay” sa mga mata nin Dios dinadagkang lumuwas sa palakaw na ini asin nakanonompong nin katiwasayan sa saiyang “harong” nin tunay na pagsamba. Sa siring inootob ni Jehova an saiyang makahulang mga tataramon na isinurat ni Haggeo: “Yuyugyugon ko an gabos na nasyon, asin an kawiliwiling mga bagay kan gabos na nasyon dapat na lumaog; asin papanoon ko nin kamurawayan an harong na ini.”—Haggeo 2:6, 7, nota sa ibaba; Kapahayagan 7:9, 15.

7. Paano binubukasan ni Jehova an puso nin mga tawo asin dinadagka an mga indibiduwal na rumani sa saiya asin sa saiyang Aki?

⁷ Binubukasan ni Jehova an puso kan mga natatakot na ini sa Dios—“an pinakapiling mga bagay sa gabos na nasyon”—tangani na sinda “maghinanyog sa mga bagay na itinataram” kan saiyang mga Saksi. (Haggeo 2:7, Jewish Publication Society; Gibo 16:14) Arog kaidtong enot na siglo, kun beses ginagamit ni Jehova an saiyang mga anghel sa paggiya sa saiyang mga Saksi pasiring sa sinserong mga tawo na nag-agrangay sa saiya sa paghagad nin tabang. (Gibo 8:26-31) Mantang an mga indibiduwal nakanonood manongod sa marahayon na mga probisyon sa sainda nin Dios paagi sa saiyang Aki, si Jesu-Cristo, sinda nadadagkang rumani ki Jehova paagi sa saiyang pagkamoot. (1 Juan 4:9, 10) Iyo, dinadagka nin Dios an mga tawo na rumani sa saiya asin sa saiyang Aki paagi sa Saiyang “mamomoton na kabootan,” o “maimbod na pagkamoot.”—Jeremias 31:3, nota sa ibaba.

Siisay an Dinadagka ni Jehova?

8. Anong klaseng mga tawo an dinadagka ni Jehova?

⁸ Dinadagka ni Jehova na rumani sa saiya asin sa saiyang Aki an mga naghahanap sa Saiya. (Gibo 17:27) Kabilang digdi an mga tawo na “nag-aaragagha asin nag-aaragrangay huli sa gabos na makauuyam nin makuring bagay na ginigibo” sa Kakristianohan asin, sa katunayan, sa bilog na kinaban. (Ezequiel 9:4) Sinda “nakamamate kan saindang espirituwal na pangangaipo.” (Mateo 5:3) Tunay nanggad, sinda an mga “mahoyo [“mapakumbaba,” nota sa ibaba] sa daga,” na mag-eerok sa paraisong daga sagkod lamang.—Sofonias 2:3.

9. Paano naheheling ni Jehova kun baga an mga tawo “may tamang tendensia sa buhay na daing katapusan,” asin paano nia dinadagka an mga ini?

⁹ Nababasa ni Jehova an puso nin sarong tawo. Sinabihan ni Hadeng David an aki niang si Salomon: “An gabos na puso sinisiyasat ni Jehova, asin an gabos na tendensia kan mga kaisipan saiyang namamansayan. Kun hanapon mo sia, mapakua sia sa saimo.” (1 Cronica 28:9) Basado sa kamugtakan kan puso asin espiritu, o nangingibabaw na aktitud, nin sarong indibiduwal, naheheling ni Jehova kun baga sia posibleng marhay na maghimate sa mga probisyon nin Dios para sa kapatawadan nin mga kasalan asin sa paglaom na buhay na daing katapusan sa matanos na bagong palakaw nin Dios. (2 Pedro 3:13) Paagi sa saiyang Tataramon, na ihinuhulit asin itinotokdo kan saiyang mga Saksi, dinadagka ni Jehova na rumani sa saiya asin sa saiyang Aki “an gabos na may tamang tendensia sa buhay na daing katapusan,” asin an mga ini ‘nagigin mga paratubod.’—Gibo 13:48.

10. Ano an nagpapaheling na an pagdagka ni Jehova sa nagkapira asin dai sa iba daing kalabot na patienot na pagtalaga?

¹⁰ May kalabot daw na sarong klase nin patienot na pagtalaga an pagdagka ni Jehova sa nagkapira asin dai sa iba? Dai nanggad! An pagdagka nin Dios sa mga tawo depende sa saindang sadiring mga kamawotan. Iginagalang nia an saindang libreng kabotan. Iinaatubang ni Jehova sa mga nag-eerok sa daga ngonyan an pagpili na kapareho kan iinatubang sa mga Israelita labing 3,000 na taon na an nakaagi, kan si Moises magsabi: “Ibinubugtak ko ngonyan sa atubangan mo an buhay asin karahayan, saka an kagadanan asin karatan. . . . Kinukua ko an kalangitan asin an daga bilang mga saksi tumang sa saindo ngonyan, na ibinugtak ko an buhay asin kagadanan sa atubangan mo, an bendisyon asin an maldisyon; asin kaipuhan na pilion mo an buhay tanganing makapagpadagos kang mabuhay, ika asin an saimong aki, paagi sa pagkamoot ki Jehova na saimong Dios, paagi sa paghinanyog sa saiyang tingog asin paagi sa pagdadanay sa saiya; huli ta sia an saimong kabuhayan asin an kahalawigan kan saimong mga aldaw.”—Deuteronomio 30:15-20.

11. Paano pipilion kan mga Israelita an buhay?

¹¹ Mangnoha na pipilion kan mga Israelita an buhay ‘paagi sa pagkamoot ki Jehova, paagi sa paghinanyog sa saiyang tingog, asin paagi sa pagdadanay sa saiya.’ Kan isabi an mga tataramon na iyan, dai pa nasasadiri kan banwaan nin Israel an Dagang Panuga. Yaon sinda sa Kaplanodohan nin Moab, na nag-aandam na dumakit sa Salog nin Jordan asin lumaog sa Canaan. Minsan ngani natural sana na an saindang mga kaisipan mapasa “mataba asin mahiwas” na daga “na nagbobolos nin gatas asin tangguli” na madali na nindang akoon, an pagkaotob kan saindang mga kamawotan depende sa saindang pagkamoot ki Jehova, sa saindang paghinanyog sa saiyang tingog, asin sa saindang pagdadanay sa saiya. (Exodo 3:8) Liniwanag ini ni Moises, na sinasabi: “Kun ika maghihinanyog sa mga togon ni Jehova na saimong Dios, na ipinagboboot ko sa saimo ngonyan, tangani na kamotan si Jehova na saimong Dios, maglakaw sa saiyang mga dalan asin otobon an saiyang mga togon asin an saiyang mga reglamento patin an saiyang hudisyal na mga desisyon, dangan segurado na ika magdadanay na buhay asin madakol, asin bebendisyonan ka ni Jehova na saimong Dios sa daga na saimong dudumanan tangani na sadirihon iyan.”—Deuteronomio 30:16.

12. Ano an maninigong itokdo sa sato kan halimbawa kan mga Israelita manongod sa satong paghuhulit asin pagtotokdo?

¹² Bako daw na maninigong may itokdo sa sato an nasambitan sa enotan manongod sa satong paghuhulit asin pagtotokdo sa panahon na ini kan katapusan? Iniisip-isip niato an Paraisong daga asin nagtataram kita manongod dian sa satong ministeryo. Alagad ni kita ni an mga disipulong nagigibo niato dai makaheheling sa kaotoban kan panuga kun kita o sinda naglilingkod sa Dios huli sa maimot na mga dahelan. Arog kan mga Israelita, kita asin an mga tinotokdoan niato dapat na makanood na ‘kamotan si Jehova, maghinanyog sa saiyang tingog, asin magdanay sa saiya.’ Kun ini gigirumdomon niato kun ginigibo niato an satong ministeryo, kita sa katunayan nakikipagtabangan sa Dios sa pagdagka sa mga tawo na rumani sa saiya.

Mga Kapwa Trabahador nin Dios

13, 14. (a) Segun sa 1 Corinto 3:5-9, paano kita nagigin kapwa trabahador nin Dios? (b) Kiisay dapat na itao an onra para sa ano man na aumento, asin taano?

¹³ Ipinag-ilustrar ni Pablo an pakipagtabangan sa Dios paagi sa pagtaram manongod sa pagkultibar sa oma. Isinurat nia: “Kun siring, ano si Apolos? Iyo, ano si Pablo? Mga ministro na huli sa sainda kamo nagin nagturubod, sono sa itinao kan Kagurangnan sa lambang saro. Ako an nagtanom, si Apolos an nagbaribi, alagad an Dios iyo an nagpapatubo kaiyan; kaya ni an nagtatanom daing halaga ni an nagbabaribi, kundi an Dios na nagpapatubo kaiyan. Ngonyan an nagtatanom asin an nagbabaribi saro sana, alagad an lambang saro maako kan saiyang balos sono sa saiyang pagpapagal. Huli ta kami mga kapwa trabahador nin Dios. Kamo an oma nin Dios na kinukultibar.”—1 Corinto 3:5-9.

¹⁴ Bilang mga kapwa trabahador nin Dios, dapat na fiel niatong itanom an “tataramon kan kahadean” sa puso nin mga tawo, dangan baribian an ano man na interes na ipinaheling paagi sa inandam na marhay na mga pagdalaw liwat asin pag-adal sa Biblia. Kun marahay an daga, an puso, gigibohon ni Jehova an saiyang kabtang paagi sa pagpatubo kan banhi nin katotoohan sa Biblia na magin mabungang tanom. (Mateo 13:19, 23) Saiyang dadagkahon an tawo na rumani sa saiya asin sa saiyang Aki. Kun siring, sa katapustapusi, an ano man na aumento sa kabilangan nin mga parabalangibog kan Kahadean huli sa ginigibo ni Jehova sa puso nin mga tawo, na pinatutubo an banhi nin katotoohan asin dinadagka an mga iyan na rumani sa saiya asin sa saiyang Aki.

Pagtotogdok na Magdadanay

15. Anong ilustrasyon an ginamit ni Pablo tanganing ipaheling kun paano niato matatabangan an iba na mapatalubo an pagtubod?

¹⁵ Minsan ngani ipinaggagayagaya an aumento, odok niatong minamawot na maheling an mga tawo na padagos na namomoot ki Jehova, naghihinanyog sa saiyang tingog, asin nagdadanay sa saiya. Ikinamomondo niato kun naheheling niato an nagkapira na nanlilipot asin minasuhay. May magigibo daw kita na maebitaran ini? Sa saro pang ilustrasyon, ipinaheheling ni Pablo kun paano niato matatabangan an iba na mapatalubo an pagtubod. Isinurat nia: “Mayo nin tawo na makabubugtak nin ano man na ibang pundasyon ki kan ibinugtak na, na iyo si Jesu-Cristo. Ngonyan kun may magtogdok sa ibabaw kan pundasyon nin bulawan, pirak, mga gapong mahahalagang marhay, materyales na kahoy, doot, pinaggapasan, an gibo nin lambang saro mahahayag, huli ta an aldaw an mapahayag kaiyan, huli ta iyan mahahayag paagi sa kalayo; asin an kalayo mismo an mapatunay kun baga anong klase an gibo nin lambang saro.”—1 Corinto 3:11-13.

16. (a) Paano nagkakalaen sa obheto an duwang ilustrasyon na ginamit ni Pablo? (b) Paano an satong pagtotogdok puedeng lumuwas na maluyang klase asin nasosolo?

¹⁶ Sa ilustrasyon ni Pablo manongod sa oma, an pagtubo depende sa maatom na pagtanom, regular na pagbaribi, asin bendisyon nin Dios. An saro pang ilustrasyon kan apostol nagdodoon kan paninimbagan kan ministrong Kristiano sa linuluwasan kan saiyang pagtotogdok. Sia daw nagtogdok sa seguradong pundasyon na ginagamitan nin de kalidad na materyales? Nagpapatanid si Pablo: “An lambang saro mag-ingat kun paano an pagtogdok nia.” (1 Corinto 3:10) Mantang napukaw na an interes nin tawo paagi sa pagsabi sa saiya kan manongod sa paglaom na buhay na daing katapusan sa Paraiso, ikinokonsentrar daw niato an satong pagtotokdo sa mga pundamental sanang kabtang kan kaaraman sa Kasuratan dangan pangenot nang idinodoon an dapat na gibohon kan tawo tanganing magkamit nin buhay na daing sagkod? Ini sana daw an satong itinotokdo: ‘Kun gusto mong mabuhay sagkod lamang sa Paraiso, dapat na ika mag-adal, mag-atender sa mga pagtiripon, asin makikabtang sa paghuhulit’? Kun iyo, dai niato itinotogdok an pagtubod kan tawo sa masarig na pundasyon, asin an itinotogdok niato tibaad dai makatagal sa kalayo nin mga pagbalo o magdanay minsan agihan nin halawig na panahon. An paghihingoang dagkahon an mga tawo na rumani ki Jehova paagi sana sa paglaom na buhay sa Paraiso karibay nin pira sanang taon na ginamit sa paglilingkod sa saiya garo pagtogdok na ginagamitan nin “materyales na kahoy, doot, pinaggapasan.”

Pagpatalubo sa Pagkamoot sa Dios Asin ki Cristo

17, 18. (a) Ano an kaipuhan nanggad tangani na magtagal an pagtubod nin saro? (b) Paano niato matatabangan an saro na mag-erok an Cristo sa saiyang puso?

¹⁷ Tanganing magtagal an pagtubod, iyan dapat na basado sa personal na relasyon ki Jehova Dios paagi ki Jesu-Cristo. Bilang mga tawong bakong sangkap, makakamtan sana niato an siring na matoninong na relasyon sa Dios paagi sa saiyang Aki. (Roma 5:10) Girumdoma na sinabi ni Jesus: “Mayo nin makaduduman sa Ama kun bakong huli sa sako.” Tanganing matabangan an iba na mapatalubo an pagtubod, “mayo nin tawo na makabubugtak nin ano man na ibang pundasyon ki kan ibinugtak na, na iyo si Jesu-Cristo.” Ano an kalabot digdi?—Juan 14:6; 1 Corinto 3:11.

¹⁸ An pagtogdok dian ki Cristo bilang an pundasyon nangangahulogan nin pagtotokdo sa paagi na an inaadalan sa Biblia nakapatatalubo nin hararom na pagkamoot ki Jesus paagi sa lubos na pakaaram sa Saiyang katongdan bilang Parabalukat, Payo kan kongregasyon, mamomoton na Halangkaw na Saserdote, asin natutukaw nang Hade. (Daniel 7:13, 14; Mateo 20:28; Colosas 1:18-20; Hebreo 4:14-16) Iyan nangangahulogan nin pagpangyari na si Jesus magin tunay na marhay para sa sainda kaya sia haros nag-eerok na sa saindang puso. An pamibi niato para sa sainda maninigo na magin arog kan kahagadan ni Pablo para sa mga Kristiano sa Efeso. Isinurat nia: “Ilinuluhod ko an sakong mga tuhod sa Ama, . . . tanganing itao nia sa saindo . . . [na] an Cristo mag-erok sa saindong puso paagi sa saindong pagtubod na may pagkamoot; tanganing kamo makagamot asin mapatindog sa pundasyon.”—Efeso 3:14-17.

19. Ano an maninigong ibunga kan pagpatalubo nin pagkamoot ki Cristo sa puso kan satong mga inaadalan sa Biblia, alagad ano an dapat na itokdo?

¹⁹ Kun kita nagtotogdok sa paagi na an pagkamoot ki Cristo nagtatalubo sa puso kan satong mga inaadalan, ini rasonable sanang magbubunga kan pagtalubo nin pagkamoot ki Jehova Dios. An pagkamoot, pagmate, asin pakikidamay ni Jesus eksaktong ladawan kan mga kualidad ni Jehova. (Mateo 11:28-30; Marcos 6:30-34; Juan 15:13, 14; Colosas 1:15; Hebreo 1:3) Kaya mantang si Jesus namimidbid asin namomotan nin mga tawo, sainda man na mamimidbid asin mamomotan si Jehova.a (1 Juan 4:14, 16, 19) Kaipuhan na tokdoan niato an mga inaadalan sa Biblia na si Jehova an nasa likod kan gabos na ginibo ni Cristo para sa katawohan asin na kun siring utang niato sa Saiya an pasasalamat, pag-omaw, asin pagsamba bilang an “Dios kan satong kaligtasan.”—Salmo 68:19, 20; Isaias 12:2-5; Juan 3:16; 5:19.

20. (a) Paano niato matatabangan an mga tawo na magin dayupot sa Dios asin sa saiyang Aki? (b) Ano an eestudyaran sa kasunod na artikulo?

²⁰ Bilang mga kapwa trabahador nin Dios, tabangan niato an mga tawo na magin dayupot sa saiya asin sa saiyang Aki, na tinatabangan sindang pataluboon an pagkamoot asin pagtubod sa saindang puso. Sa siring magigin tunay si Jehova para sa sainda. (Juan 7:28) Paagi ki Cristo, mahihimo nindang magkaigwa nin haraning marhay na relasyon sa Dios, asin sinda mamomoot sa saiya asin magdadanay sa saiya. Dai ninda tatalaanan nin sagkodan na panahon an saindang mamomoton na paglilingkod, na nagtutubod na an makangangalas na mga panuga ni Jehova maootob sa itinalaan niang panahon. (Lamentacion 3:24-26; Hebreo 11:6) Minsan siring, mantang tinatabangan an iba na mapatalubo an pagtubod, paglaom, asin pagkamoot, dapat na parigonon niato an satong pagtubod tanganing iyan magin siring sa masarig na barko na kayang sagupaon an makosogon na mga bagyo. Ini eestudyaran sa kasunod na artikulo.

[Nota sa Ibaba]

Bilang Repaso

◻ Paano niato parateng pinupukaw an interes nin mga tawo sa mensahe manongod sa Kahadean, alagad ano an peligro?

◻ Anong klaseng mga tawo an dinadagka ni Jehova na rumani sa saiya asin sa saiyang Aki?

◻ Sa ano depende an paglaog kan Israel sa Dagang Panuga, asin ano an manonodan niato digdi?

◻ Ano an kabtang niato sa pagtabang sa mga tawo na magin dayupot ki Jehova asin sa saiyang Aki?

[Retrato sa pahina 10]

Minsan ngani ipinaaabot niato sa mga tawo an paglaom na buhay na daing katapusan sa Paraiso, an satong pangenot na obheto dagkahon sinda na rumani ki Jehova

[Mga retrato sa pahina 13]

Puedeng magin epektibong marhay an satong mga pagdalaw liwat kun kita mag-aandam na marhay