Maninigo daw Akong Umutang sa Sakong Tugang?

MAY helang an kangodhan na aki ni Simon asin kaipuhan nang marhay an bolong. Alagad tios na marhay si Simon asin dai nia kayang bakalon iyan. Ano an puede niang gibohon? Bueno, an sarong kapwa Kristiano na an ngaran Michael mas marahay kisa saiya an kamugtakan sa pinansial. Seguro pauutangon sia ni Michael. Minsan siring, sa saiyang puso aram ni Simon na imposibleng mabayadan nia an utang.a

Kan rumani sa saiya si Simon, namugtak sa alanganon si Michael. Aram niang igwa nin tunay na pangangaipo alagad may suspetsa sia na dai kayang bayadan ni Simon an kuarta huli ta sa pagpakakan pa sana kan saiyang pamilya nasasakitan na sia. Ano an maninigong gibohon ni Michael?

Sa dakol na nasyon, an mga tawo puedeng biglang mawaran kan saindang pagbuhay asin manompongan an saindang sadiri na mayo nin kuarta o seguro tanganing mataparan an mga gastos sa medikal. Tibaad mayo nin makukuang pautang sa bangko o halangkawon an tubo. Kun may emerhensia, an solamenteng solusyon tibaad garo baga an mag-utang. Pero bago umutang, may nagkapirang importanteng bagay na dapat konsideraron.

Kuentahon an Gastos

An Kasuratan nagtatao nin mga giya kapwa sa nagpapautang asin nangungutang. Paagi sa pagkuyog sa hatol na ini, malilikayan ta an dakol na dai pagkasinabotan asin kolog sa boot.

Halimbawa, an Biblia nagpapagirumdom sa sato na dai niato maninigong ibilang na basta-basta sana an pag-utang. Sinadol ni apostol Pablo an mga Kristiano sa Roma: “Dai kamo magkautang sa kiisay man nin ano man, puera sana sa pagkaminorootmootan; huli ta an namomoot sa saiyang kapwa nakaotob na kan ley.” (Roma 13:8) An pinakamarahay, sa pagkamoot sana maninigo na magkautang sa iba an sarong Kristiano. Huli kaini, puedeng ihapot nguna niato sa satong sadiri, ‘Talaga daw na kaipuhan na umutang?’

Kun an simbag iyo, kun siring madonong na isipon an mga resulta nin pangungutang. Ipinaheling ni Jesu-Cristo na an importanteng mga desisyon nagkakaipo nin maingat na paghorophorop asin pagplano. Hinapot nia an saiyang mga disipulo: “Siisay sa saindo na boot na magtogdok nin torre an dai nguna minatukaw asin kinukuenta an gastos, tanganing helingon kun igwa sia nin igo tanganing iyan matapos?” (Lucas 14:28) Aplikado an prinsipyong ini kun nag-iisip kun baga dapat na umutang sa sarong tugang. An pagkuenta sa gastos sa pag-utang nangangahulogan nin pagkuenta kun paano asin noarin niato iyan babayadan.

Diretso kan nagpapautang na aramon kun paano asin noarin babayadan an utang. Paagi sa maingat na pagturotimbang sa mga bagay-bagay, ikatatao niato sa saiya an espesipikong simbag. Nakuenta na daw niato an gastos sa pagbayad sa utang sa laog nin rasonableng peryodo nin panahon? Siempre, mas madaling sabihon sa satong tugang: “Babayadan taka tolos. Aram mo baga na puede mo akong pagtiwalaan.” Alagad bako daw na maninigo niatong gibohon an siring na mga bagay sa mas responsableng paagi? Sa kapinonan pa sana maninigo na kitang magin desidido na bayadan an utang, huling iyan an hinahagad sa sato ni Jehova. “An maraot nangungutang asin dai nagbabayad,” an sabi kan Salmo 37:21.

Paagi sa pagkuenta kun paano asin noarin niato babayadan an utang, ipinagigirumdom niato sa satong sadiri an seryosong kapanugaan na ginigibo niato. Iniinaan kaini an posibilidad na kita magkautang nin dai kinakaipuhan. Kun puede tang likayan an pag-utang, igwa nin mga bentaha. An Talinhaga 22:7 nagpapatanid: “An nangutang surogoon kan tawo na nagpautang.” Dawa kun an nagpautang asin nangutang magtugang sa espirituwal, an utang puedeng makaapektar sa saindang relasyon minsan paano. An mga dai pagkasinabotan huli sa mga utang nakaraot pa ngani sa katoninongan nin nagkapirang kongregasyon.

Ipaliwanag kun Taano ta Kaipuhan an Kuarta

Diretso kan nagpapautang na aramon kun paano man nanggad niato gagamiton an inutang. Apuera sa utang na ini, may utang man daw kita sa iba? Kun iyo, maninigo niatong linawon ini, ta igwa iyan nin epekto sa satong kakayahan na magbayad.

Nangorognang importante na aramon an kalaenan nin utang para sa negosyo asin utang na kaipuhan para sa sarong emerhensia. An tugang mayo nin Makakasuratan na obligasyon na magpautang para sa pagpundar nin sarong negosyo, alagad posible na may tendensia siang tumabang kun an sarong tugang, sa dahelan na bako man sia mismo an may sala, nasa kamugtakan sia na mayong pangasto para sa pundamental na mga pangangaipo na arog baga nin kakanon, gubing, o kinakaipuhan na medikal na pag-ataman. An pagigin prangka asin totoo sa mga bagay na ini makatatabang na maebitaran an mga dai pagkasinabotan.​—Efeso 4:25.

Gumibo nin Kasuratan

An nasusurat na rekord kan kontrata sarong mahalagang marhay na paagi tanganing malikayan niato an mga dai pagkasinabotan sa ngapit. Madaling malingawan an espesipikong mga detalye nin kontrata apuera sana kun iyan may kasuratan. Kaipuhan niatong isurat an kantidad na inutang asin kun noarin iyan babayadan. Marahay kun an nangutang asin nagpautang pareho pumirma sa kontrata asin na an kada saro sa sainda magsaray nin sadiring kopya. Ipinaheheling kan Biblia na an pinansial na mga transaksion maninigong dokumentado. Kan madali nang laglagon kan mga Babilonyo an Jerusalem, pinabakal ni Jehova si Jeremias nin lote sa saro kan saiyang mga paryente. Makikinabang kita sa pagrepaso sa prosedimiento.

“Binakal ko ki Hanamel na aking lalaki kan sakong amaon sa ama an oma na yaon sa Anatot,” sabi ni Jeremias. “Asin pinonan kong timbangon sa saiya an kuarta, pitong siklo asin sampulong pidaso nin pirak. Dangan ako nagsurat sa sarong kasuratan asin itinimbre an selyo patin nagkua nin mga saksi mantang tinitimbang ko an kuarta sa timbangan. Pakatapos kaiyan kinua ko an kasuratan sa pagbakal, an saro na selyado segun sa togon asin mga regulasyon, asin an saro na iwinalat na bukas; dangan itinao ko an kasuratan sa pagbakal ki Baruc na aking lalaki ni Nerias na aking lalaki ni Masea sa atubangan ni Hanamel na aking lalaki kan amaon ko sa ama asin sa atubangan kan mga saksi, idtong mga nagsurat sa kasuratan sa pagbakal, sa atubangan kan gabos na Judio na nagtutukaw sa Patyo kan Bantay.” (Jeremias 32:​9-12) Minsan ngani an nasambitan na halimbawa may labot sa pagbakal imbes na sa pag-utang, ipinaheheling kaiyan an importansia nin pag-asikaso sa mga transaksion sa kuarta sa malinaw, espesipikong paagi.​—Helingon an The Watchtower, May 1, 1973, pahina 287-8.

Kun may lumataw na mga problema, an mga Kristiano maninigong maghingoa na resolberan iyan kaoyon kan hatol ni Jesus na nasusurat sa Mateo 18:​15-​17. Alagad an sarong magurang sa kongregasyon na naghingoang makatabang sa siring na mga bagay nagkomento: “Sa haros gabos na kaso, mayo nin nasusurat na kontrata. Bilang resulta, mayo nin malinaw na pagkasinabotan an mag-ibong na lado sa kun paano babayadan an utang. Kombensido ako na an paggibo nin kasuratan kan mga bagay na ini sarong tanda nin pagkamoot, bakong nin kadaihan nin tiwala.”

Oras na makagibo na kita nin kontrata, tunay nanggad na maninigo niatong pagmaigotan na otobon an satong tataramon. Si Jesus nagsadol: “Pabayaan sana na an saindong tataramon na Iyo mangahulogan nin Iyo, an saindong Dai, Dai; huli ta an labi digdi gikan sa maraot na saro.” (Mateo 5:37) Kun huli sa dai linalaoman na problema dai kita makabayad sa tamang panahon, maninigo na ipaliwanag niato tolos-tolos sa nagpautang an situwasyon. Seguro totogotan nia kitang magbayad sa mas hababang kantidad sa mas halawig na peryodo nin panahon.

Pero, an bakong paborableng mga kamugtakan dai kita pinalilibre sa satong mga paninimbagan. An tawo na may takot ki Jehova ginigibo an saiyang pinakamakakaya na otobon an saiyang tataramon. (Salmo 15:4) Minsan ngani tibaad dai mangyari an siring sa linalaoman niato, maninigo kitang magin andam na gumibo nin mga pagsasakripisyo na bayadan an satong utang, huling iyan an satong Kristianong paninimbagan.

Magmaan sa Pagpautang

Siempre, bako sanang an nangungutang an kaipuhan na maingat na magturotimbang sa mga bagay-bagay. Kaipuhan man na kuentahon kan tugang na inuutangan an gastos. Bago magpautang, madonong kita kun kita matao nin panahon na horophoropon iyan nin maingat asin basado sa mga katunayan. An Biblia nagsasadol na magmaan, na sinasabi: “Dai ka makiiba sa mga nagtitinapakan nin kamot, sa mga naggagarantiya para sa mga utang.”​—Talinhaga 22:26.

Bago kamo magtao, horophoropon kun ano an puedeng mangyari kun dai makabayad sa saindo an tugang. Kamo daw mismo magkakaigwa nin magabat na mga problema sa pinansial? Minsan ngani tibaad totoong marahay an intension kan tugang, puedeng magbago an mga kamugtakan o masala an saiyang mga kalkulasyon. An Santiago 4:14 nagpapagirumdom sa sato: “Dai nindo aram kun ano an magigin buhay nindo sa aga. Huli ta kamo sarong alopoop na minatunga sa kadikit na panahon dangan nawawara sana.”​—Ikomparar an Eclesiastes 9:11.

Nangorogna sa kaso nin utang para sa negosyo, madonong na horophoropon an reputasyon kan nangungutang. Midbid daw sia na mapagtitiwalaan asin masasarigan, o sia daw mangmang sa pagkapot nin pinansial na bagay? Tendensia daw nia an magparapangutang sa kongregasyon? Madonong na isaisip an mga tataramon na ini: “An siisay man na kablas nagtutubod sa gabos na tataramon, alagad an alisto an isip naghohorophorop sa saiyang mga lakad.”​—Talinhaga 14:15.

Kun minsan, an utang tibaad bako man nganing para sa pinakaikararahay kan nangungutang. Iyan madaling magin pagabat para sa saiya, na naghahale kan saiyang kagayagayahan. Gusto ta daw na magin “surogoon” niato an tugang na iyan? Puede daw na makaapektar an utang sa satong relasyon, na magigin dahelan nin pag-alangan o pagkasopog pa ngani kun dai sia makabayad?

Kun igwa nin tunay na pangangaipo, puede daw niatong horophoropon na magregalo na sana imbes na magpautang, minsan ngani tibaad mas sadit an kantidad? Ineenkaminar kita kan Kasuratan na magin madinamayon kun naheheling niatong nangangaipo an satong tugang. “An matanos nagpapaheling nin kabootan asin nananao nin mga regalo,” an awit kan salmista. (Salmo 37:21) An pagkamoot maninigong magpahiro sa sato na gibohon an satong mahihimo na tumao nin praktikal na tabang sa nangangaipong mga tugang.​—Santiago 2:​15, 16.

Maingat na Horophoropon an Saindong mga Lakad

Mantang an utang may posibilidad na pagponan nin dai pagkakaoyon, puede niatong mansayon iyan bilang ultimong paagi imbes na sarong pasil na remedyo. Siring kan nasabi na kasubago, an nangungutang maninigong magin prangka sa nagpapautang, na naggigibo nin kasuratan kun paano asin noarin babayadan an utang. Asin enkaso igwa nin tunay na kasakitan, an regalo an tibaad magin pinakamarahay na solusyon.

Dai pinautang ni Michael si Simon. Imbes, tinawan sia ni Michael nin mas sadit na kantidad bilang regalo. Pinasalamatan ni Simon an tabang na iyan para sa bolong kan saiyang aki. Asin naogma si Michael na ikinapaheling nia an saiyang sa tugang na pagkamoot sa praktikal na paagi. (Talinhaga 14:21; Gibo 20:35) Si Michael asin Simon pareho inaantisipar an panahon sa irarom kan pamamahala kan Kahadean na “ililigtas [ni Cristo] an dukha na naghahagad nin tabang” asin mayo nang magsasabi, “Naghehelang ako.” (Salmo 72:12; Isaias 33:24) Sagkod sa panahon na iyan, maingat niatong horophoropon an satong mga lakad enkaso makamate kitang obligado na umutang sa sarong tugang.

[Nota sa Ibaba]

[Retrato sa pahina 25]

An paggibo nin kasuratan kan mga kontrata sa utang sarong tanda nin pagkamoot, bakong nin kadaihan nin tiwala