Ginibo Ninda an Kabotan ni Jehova

An Sarong Akto nin Pagpapatawad Binubukasan an Dalan Para sa Kaligtasan

AN SAMPULONG aki ni Jacob na nasa atubangan kan primer ministro nin Egipto may teribleng hilom. Kaidtong dakol nang taon an nakaagi ipinabakal ninda sa kaoripnan an saindang tugang sa ama na si Jose, na pinaplanong sabihon sa saindang ama na sia ginadan nin sarong mabangis na hayop.—Genesis 37:18-35.

Ngonyan, pakalihis nin mga 20 taon, huli sa grabe kakuring kakulangan nin kakanon napiritan an sampulong lalaking ini na magduman sa Egipto tanganing magbakal nin tipasi. Alagad dai nagin pasil an mga bagay-bagay. An primer ministro, na naglilingkod man bilang administrador sa kakanon, inakusar sinda na mga espiya. Ibinilanggo nia an saro sa sainda asin nagboot na pumuli an iba asin magbalik kaiba an saindang kangodhan na tugang, si Benjamin. Kan gibohon ninda iyan, ginibo kan primer ministro an sarong plano tanganing ikapaarestar si Benjamin.—Genesis 42:1–44:12.

Si Juda, na saro sa mga aki ni Jacob, nagprotesta. ‘Kun kami magpuli na dai kaiba si Benjamin,’ sia nagsabi, ‘magagadan an samong ama.’ Dangan nangyari an sarong bagay na dai linalaoman ni Juda ni kan siisay man sa kairiba nia sa pagbiahe. Pakatapos na pagbotan na humale sa kuarto an gabos apuera sa mga aki ni Jacob, an primer ministro nagtangis nin makosog. Dangan, kan makapahiwashiwas na, ipinahayag nia: “Ako si Jose.”—Genesis 44:18–45:3.

Pagkaherak Asin Pagkaligtas

“Ano buhay pa an sakong ama?” an ihinapot ni Jose sa saiyang mga tugang sa ama. Mayong nagsimbag. Tunay nanggad, an mga tugang ni Jose sa ama dai maaraman an sasabihon. Sinda daw maninigong magin labi-labi an kaogmahan, o sinda daw maninigong masindak? Total, kaidtong sinda mas hoben pa nin 20 taon, ipinabakal ninda an lalaking ini sa kaoripnan. Si Jose may autoridad na ipabilanggo sinda, papulion sinda na daing kakanon, o—an pinakamaraot na posibleng mangyari—ipagadan sinda! May balidong dahelan, an mga tugang ni Jose sa ama “dai lamang nakasimbag sa saiya . . . , huli ta napurisaw sinda huli sa saiya.”—Genesis 45:3.

Si Jose tolos-tolos na pinamugtak an boot kan mga lalaking ini. “Rani tabi kamo sa sako,” sia nagsabi. Sinda nagsunod. Dangan sia nagsabi: “Ako si Jose na saindong tugang, na ipinabakal nindo pa Egipto. Alagad ngonyan dai magkolog an boot nindo asin dai kamo maanggot sa saindong sadiri huli ta ipinabakal nindo ako digdi; huli ta para sa pagpapadanay nin buhay isinugo ako nin Dios nin enot sa saindo.”—Genesis 45:4, 5.

An pagkaherak ni Jose dai itinao na mayong basehan. Naobserbaran na nia an ebidensia kan saindang pagsolsol. Halimbawa, kan akusaron ni Jose an saiyang mga tugang sa ama na sinda mga espiya, sinda saiyang nadangog nin dai tinutuyo na nagpapasarabisabi sa sainda man sana: “Daing duwa-duwa na kita nagkasala mapadapit sa satong tugang . . . Kaya nag-abot sa sato an kapurisawan na ini.” (Genesis 42:21) Siring man, si Juda nagpresentar na iyo an magin oripon karibay ni Benjamin tanganing an hoben na lalaki ikabalik sa saiyang ama.—Genesis 44:33, 34.

Huli kaini, si Jose may katanosan na itao an pagkaherak. Sa katunayan, aram nia nin biyo na an paggibo kaiyan puedeng magbunga kan kaligtasan kan saiyang bilog na pamilya. Kun siring, sinabihan ni Jose an saiyang mga tugang sa ama na magbalik sa saindang ama, si Jacob, asin sabihon sa saiya: “Iyo ini an isinabi kan saimong aking si Jose: ‘Ibinugtak ako nin Dios na kagurangnan sa bilog na Egipto. Pumadigdi ka sa sakuya. Dai ka mag-atraso. Asin mag-erok ka sa daga nin Gosen, asin magdanay ka sa harani ko, ika asin an saimong mga aki asin an mga aki kan saimong mga aki asin an saimong mga kahayopan asin an saimong mga baka patin an gabos mong sadiri. Asin tatawan taka nin kakanon duman.’”—Genesis 45:9-11.

Si Jose na Orog na Dakula

Si Jesu-Cristo puedeng apodon na si Jose na Orog na Dakula, huli ta igwa nin risang marhay na pagkakaagid an duwang tawong ini. Arog ni Jose, si Jesus minaltrato kan saiyang mga tugang, mga kapwa gikan ni Abraham. (Ikomparar an Gibo 2:14, 29, 37.) Pero an duwang tawong ini pareho nakaeksperyensia nin ekstraordinaryong pagkabaliktad nin mga kamugtakan. Pag-abot nin panahon, naliwat an posisyon ni Jose na pagigin oripon sa pagigin primer ministro, segunda sana ki Faraon. Kaagid kaiyan, ibinangon ni Jehova si Jesus hale sa mga gadan asin ilinangkaw sia sa superyor na posisyon “sa too nin Dios.”—Gibo 2:33; Filipos 2:9-11.

Bilang primer ministro, si Jose puedeng magtao nin kakanon sa gabos na minaduman sa Egipto tanganing magbakal nin tipasi. Ngonyan, si Jose na Orog na Dakula igwa sa daga nin grupong fiel asin madonong na oripon na paagi ninda sia nagtatao nin espirituwal na kakanon “sa igong panahon.” (Mateo 24:45-47; Lucas 12:42-44) Tunay nanggad, an mga minadolok ki Jesus ‘dai na magugutom ni mapapaha man, huli ta an Kordero, na nasa tahaw kan trono, papastoran sinda, asin gigiyahan sinda sa mga burabod kan tubig nin buhay.’—Kapahayagan 7:16, 17.

Leksion Para sa Sato

Si Jose nagtatao nin pambihirang halimbawa nin pagkaherak. An estriktong hustisya naghahagad kutana na padusahan nia an mga nagpabakal sa saiya sa kaoripnan. Sa kabaliktaran, puede man kutana siang pahiroon nin sentimiento na dai na intindihon an saindang kasalan. Arin man kaiyan dai ginibo ni Jose. Imbes, binalo nia an pagsolsol kan saiyang mga tugang sa ama. Dangan, kan maheling nia na an saindang pagkamondo tunay, pinatawad nia sinda.

Puede niatong arogon si Jose. Kun an sarong nagkasala tumang sa sato nagpapaheling nin tunay na pagbakle, maninigo tang patawadon sia. Siempre, maninigo na nungka tang togotan an sentimiento sana na butahon kita sa grabeng salang ginibo. Sa ibong na lado, maninigo na dai niato togotan an paghinanakit na butahon kita sa mga gibo nin tunay na pagsolsol. Kaya “padagos [kitang] magpatiriostios asin sueltong magpatarawadtawadan.” (Colosas 3:13) Sa paggibo kaiyan, inaarog niato an satong Dios, si Jehova, na “andam na magpatawad.”—Salmo 86:5; Miqueas 7:18, 19.