An Satong Kayamanan sa mga Lalagan na Gibo sa Dalipay

“Igwa kami kan kayamanan na ini sa mga lalagan na gibo sa dalipay, tanganing an kosog na lihis sa ordinaryo magin sa Dios asin bakong an gikan mismo sa samo.”—2 CORINTO 4:7.

1. Paano maninigong makaparigon sa satong boot an halimbawa ni Jesus?

MANTANG minomolde ni Jehova digdi sa daga, direktang naeksperyensiahan ni Jesus an mga kaluyahan nin katawohan. An saiyang halimbawa sa pagpapadanay nin integridad maninigo nanggad na makaparigon sa satong boot! Sinasabi sa sato kan apostol: “Sa katotoohan, sa dalan na ini kamo inapod, huli ta minsan si Cristo nagtios para sa saindo, na winalatan kamo nin modelo tanganing sunodon nindo nin estrikto an saiyang mga lakad.” (1 Pedro 2:21) Paagi sa pagpamolde sa siring na paagi, dinaog ni Jesus an kinaban. Tinawan man nia nin kapusoan an saiyang mga apostol na mandaog. (Gibo 4:13, 31; 9:27, 28; 14:3; 19:8) Asin abaa karahay na pagparigon sa boot an itinao nia sa konklusyon kan saiyang pangultimong pahayag sa sainda! Sabi nia: “Isinabi ko an mga bagay na ini sa saindo tanganing paagi sa sako magkaigwa kamo nin katoninongan. Sa kinaban nagkakaigwa kamo nin kahorasaan, alagad magmapuso kamo! Nadaog ko an kinaban.”—Juan 16:33.

2. Kabaliktaran sa pagkabuta kan kinaban, anong liwanag an nasa sato?

² Kaagid kaiyan, pakapahelingan kan pagkakalaen kan pagkabuta na itinatao kan “dios kan palakaw na ini nin mga bagay” sa “liwanag kan mamuraway na maogmang bareta,” sinabi ni apostol Pablo manongod sa satong mahalagang marhay na ministeryo: “Igwa kami kan kayamanan na ini sa mga lalagan na gibo sa dalipay, tanganing an kosog na lihis sa ordinaryo magin sa Dios asin bakong an gikan mismo sa samo. Kami nagigipit sa palibot, alagad dai man naiipit na dai na makahiro; kami nahahandal, alagad dai nahahalean nin paglaom; kami pinaglalamag, alagad dai pinababayaan; kami ilinalampog, alagad dai nalalaglag.” (2 Corinto 4:4, 7-9) Minsan ngani kita tupok na “lalagan na gibo sa dalipay,” minolde kita nin Dios paagi sa saiyang espiritu sa paagi na kita puedeng biyong manggana sa kinaban ni Satanas.—Roma 8:35-39; 1 Corinto 15:57.

Pagmolde sa Suanoy na Israel

3. Paano ilinadawan ni Isaias an pagmolde sa Judiong nasyon?

³ Minomolde ni Jehova bako sanang an mga indibiduwal kundi an enterong mga nasyon. Halimbawa, kan an suanoy na Israel pamolde ki Jehova, iyan nagin mapanggana. Alagad sa katapustapusi iyan nagpakatagas sa dalan nin pakisuway. Bilang resulta, an Naghaman sa Israel nagtao nin grabeng sakit dian. (Isaias 45:9) Kan ikawalong siglo B.C.E., si Isaias nagtaram ki Jehova manongod sa risang marhay na pagkamakasalan nin Israel, na sinasabi: “O Jehova, ika an samuyang Ama. Kami an dalipay, asin ika an Paragibo nin Koron sa samo; asin kami gabos ginibo kan saimong kamot. . . . An lambang saro sa samong kawiliwiling mga bagay nagin grabeng destroso.” (Isaias 64:8-11) An Israel minolde na magin lalagan na angay sana sa kalaglagan.

4. Anong ilustrasyon an isinaaksion ni Jeremias?

⁴ Pakalihis nin sarong siglo, mantang nagdadangadang an aldaw nin pakipagkuenta, sinabihan ni Jehova si Jeremias na kumua nin sarong lalagan na gibo sa dalipay asin ibanan an nagkapira sa kamagurangan na lalaki nin Jerusalem pasiring sa Kababan nin Hinnom, na ininstruksionan sia: “Dapat na pasaon mo an lalagan sa atubangan kan mga mata kan mga lalaking maiba sa saimo. Asin sabihon mo sa sainda, ‘Iyo ini an isinabi ni Jehova nin mga hukbo: “Papasaon ko an banwaan na ini asin an siudad na ini nin siring sa pagpasa sa lalagan kan paragibo nin koron tanganing iyan dai na masulit.”’”—Jeremias 19:10, 11.

5. Gurano kahiwas an sakop kan paghokom ni Jehova sa Israel?

⁵ Kan 607 B.C.E., si Nabucodonosor nandestroso nin grabe sa Jerusalem saka sa templo kaiyan asin dinarang bihag sa Babilonya an nagkataradang Judio. Alagad pakalihis nin 70 taon na pagkadistiero, an nagsosolsol na mga Judio nakabuelta tanganing itogdok liwat an Jerusalem asin an templo kaiyan. (Jeremias 25:11) Minsan siring, pag-abot kan enot na siglo C.E., binayaan na naman kan nasyon an Dakulang Paragibo nin Koron, asin sa katapustapusi pinababa kaiyan an sadiri sa pinakagrabeng krimen na paggadan sa mismong Aki nin Dios. Kan 70 C.E., ginamit nin Dios an Kapangyarihan Pankinaban nin Roma bilang saiyang parakastigo sa pagpoho sa Judiong palakaw nin mga bagay, na pinara an Jerusalem asin an templo kaiyan. Nungka giraray na an nasyon nin Israel momoldehon kan kamot ni Jehova bilang sarong bagay na may “kabanalan asin kagayonan.”a

Pagmolde sa Sarong Espirituwal na Nasyon

6, 7. (a) Paano ilinaladawan ni Pablo an pagmolde sa espirituwal na Israel? (b) Ano an kompletong kabilangan kan “mga lalagan nin pagkaherak,” asin paano iyan nakompuesto?

⁶ An mga Judio na nag-ako ki Jesus minolde bilang pundasyon na mga miembro nin sarong bagong nasyon, an espirituwal na “Israel nin Dios.” (Galacia 6:16) Kun siring, tama an mga tataramon ni Pablo: “Ano? Bako daw na an paragibo nin koron may autoridad sa dalipay na gumibo gikan sa iyo man sanang masa nin sarong lalagan para sa kagamitan na may onra, saro pa para sa kagamitan na daing onra? . . . An Dios, minsan ngani boot nang ipaheling an saiyang grabeng kaanggotan asin ipamidbid an saiyang kapangyarihan, nagtogot na may dakulang pakatios sa mga lalagan nin grabeng kaanggotan na ginibong angay sa kalaglagan, tanganing ipaaram nia an kayamanan kan saiyang kamurawayan sa mga lalagan nin pagkaherak, na patienot niang inandam para sa kamurawayan.”—Roma 9:21-23.

⁷ Sa huri ipinaaram kan binuhay liwat na si Jesus na an “mga lalagan nin pagkaherak” na ini magigin 144,000 an kabilangan. (Kapahayagan 7:4; 14:1) Mantang dai ikinatao kan Israel sa laman an kompletong kabilangan na iyan, ipinaabot ni Jehova an saiyang pagkaherak sa mga tawo kan mga nasyon. (Roma 11:25, 26) Marikas na nagdakula an bagohan na Kristianong kongregasyon. Sa laog nin 30 taon an maogmang bareta ‘ikinahuhulit na sa gabos na linalang sa sirong nin langit.’ (Colosas 1:23) Kinaipuhan kaini na ipairarom sa tamang pangangataman an balakid na lokal na kongregasyon na wararak.

8. Sairisay an nagkompuesto sa primerong namamahalang grupo, asin paano nagtalubo an grupong ini?

⁸ Inandam ni Jesus an 12 apostol na magin an primerong namamahalang grupo, na pinatotood sinda pati an iba para sa ministeryo. (Lucas 8:1; 9:1, 2; 10:1, 2) Kan Pentecostes 33 C.E., inestablisar an Kristianong kongregasyon, asin sa igong panahon, pinadakula an namamahalang grupo kaiyan tanganing magin kabale an “mga apostol asin kamagurangan na lalaki sa Jerusalem.” Sa halawig na panahon, an tugang sa ina ni Jesus na si Santiago, minsan ngani bakong apostol, minalataw na naglingkod bilang tsirman. (Gibo 12:17; 15:2, 6, 13; 21:18) Segun sa historyador na si Eusebio, an mga apostol nagin espesyal na punteriya nin paglamag asin nagkawararak sa ibang lugar. An minakompuesto sa namamahalang grupo ibinagay dian.

9. Anong makamomondong pangyayari an ihinula ni Jesus?

⁹ Sa paghinanapos kan enot na siglo, ‘an kaiwal, an Diablo,’ nagpoon na ‘magsabwag nin mga doot’ sa tahaw kan garo trigong mga paramana kan “kahadean kan kalangitan.” Ihinula ni Jesus na an makamomondong pangyayaring ini totogotan sagkod sa tig-anihan sa “pagtatapos kan palakaw nin mga bagay.” Dangan, sa giraray, “an mga matanos masirang na siring kaliwanag sa aldaw sa kahadean kan saindang Ama.” (Mateo 13:24, 25, 37-43) Noarin iyan?

Pagmolde sa Israel nin Dios Ngonyan

10, 11. (a) Paano pinonan an pagmolde sa presenteng aldaw kan Israel nin Dios? (b) Anong magkalaen na mga katokdoan an yaon sa Kakristianohan asin sa maigot na Mga Estudyante sa Biblia?

¹⁰ Kan 1870, inorganisar ni Charles Taze Russell an sarong grupo sa pag-adal sa Biblia sa Pittsburgh, Pennsylvania, E.U.A. Kan 1879 pinonan niang ipublikar nin bulanan an magasin na midbid ngonyan bilang An Torrengbantayan. Ining Mga Estudyante sa Biblia, na nagin apod sa sainda, dai nahaloy nakasabot na inarog kan Kakristianohan an bakong sono sa Kasuratan na paganong mga katokdoan, arog baga kan inmortalidad kan kalag, kalayo sa impierno, purgatoryo, dios na Trinitaryo, asin pagbautismo sa omboy.

¹¹ Pero, mas mahalaga pa, ibinalik kan mga namomoot na ini sa katotoohan sa Biblia an pundamental na mga katokdoan kan Biblia, arog baga kan pagkabalukat paagi sa atang na pantubos ni Jesus asin pagkabuhay liwat sa buhay na daing katapusan sa sarong matoninong na paraisong daga sakop kan Kahadean nin Dios. Orog sa gabos, idinoon an madali nang pagkabindikar ni Jehova Dios bilang an Soberanong Kagurangnan kan uniberso. Nagtubod an Mga Estudyante sa Biblia na madali nang simbagon an Pamibi kan Kagurangnan: “Ama niamo na nasa langit, santipikaron logod an saimong ngaran. Dumatong logod an kahadean mo. Gibohon logod an boot mo, kun paano sa langit, siring man sa daga.” (Mateo 6:9, 10) Minomolde sinda kan banal na espiritu nin Dios na magin pambilog na kinaban na sosyedad nin mamomoton sa katoninongan na mga Kristiano.

12. Paano nasabotan kan Mga Estudyante sa Biblia an sarong mahalagang petsa?

¹² An kompletong pag-adal sa Daniel kapitulo 4 asin iba pang hula nakakombensir sa Mga Estudyante sa Biblia na seguradong harani na an presensia ni Jesus bilang an Mesiyanikong Hade. Nasabotan ninda na an 1914 iyo an petsa na matatapos “an itinalaan na mga panahon kan mga nasyon.” (Lucas 21:24; Ezequiel 21:26, 27) Marikas na pinahiwas kan Mga Estudyante sa Biblia an saindang aktibidad, na nag-organisar nin mga klase sa Biblia (na sa huri inapod na mga kongregasyon) sa bilog na Estados Unidos. Sa kapinonan kan mga taon 1900, naghihiwas na pasiring sa Europa asin Austrolasia an saindang gibong pagtotokdo kan Biblia. Kinaipuhan an marahay na pag-organisar.

13. Anong legal na posisyon an nakua kan Mga Estudyante sa Biblia, asin anong pambihirang paglilingkod an ginibo kan enot na presidente kan Sosyedad?

¹³ Tanganing magkaigwa nin legal na posisyon an Mga Estudyante sa Biblia, iningkorporar an Zion’s Watch Tower Tract Society kan 1884 sa Estados Unidos, na may opisina prinsipal sa Pittsburgh, Pennsylvania. An mga direktor kaiyan naglingkod bilang prinsipal na Namamahalang Grupo, na dinidirehiran an lakop sa globong paghuhulit kan Kahadean nin Dios. An enot na presidente kan Sosyedad, si Charles T. Russell, nagsurat nin anom na tomo kan Studies in the Scriptures asin guminibo nin mahiwas an sakop na mga pagbiahe sa paghuhulit. Idinonar man nia sa pambilog na kinaban na gibong pan-Kahadean an dakulaon na kuarta na natipon nia bago nia pinonan an saiyang pag-adal sa Biblia. Kan 1916, mantang an Dakulang Guerra naglalakop na daing kontrol sa Europa, an pagal-pagal na si Tugang na Russell nagadan sa sarong biahe sa paghuhulit. Itinao nia an bilog niang kosog para sa pagpahiwas kan pagpatotoo manongod sa Kahadean nin Dios.

14. Paano si J. F. Rutherford ‘nakipaglaban kan marahay na pakilaban’? (2 Timoteo 4:7)

¹⁴ Si Joseph F. Rutherford, na temporaryong nagin huwes sa Missouri, an suminunod na presidente. Bilang resulta kan saiyang daing takot na pagsuportar sa katotoohan sa Biblia, an klero nin Kakristianohan nakikampi sa mga politiko sa ‘paggibo nin karatan paagi sa pagboot.’ Kan Hunyo 21, 1918, si Tugang na Rutherford asin an pito pang pangenot na Mga Estudyante sa Biblia ibinugtak sa karsel, na may dakol na sabay-sabay na sentensiang 10 o 20 taon. Nakilaban an Mga Estudyante sa Biblia. (Salmo 94:20; Filipos 1:7) Sa pag-apelar, sinda pinaluwas kan Marso 26, 1919, asin sa huri biyong napatunayan na daing sala sa bakong totoong akusasyon nin sedisyon.b An inagihan na ini nagserbing moldehon sinda na magin marigon na mga parasuportar sa katotoohan. Sa tabang ni Jehova, prinobaran ninda an gabos na mahihimong paagi na manggana sa espirituwal na pakikilaban na ibalangibog an maogmang bareta sa ibong kan pagtumang kan Dakulang Babilonya. An pakikilaban na iyan nagpapadagos sagkod sa mismong taon na ini nin 1999.—Ikomparar an Mateo, kapitulo 23; Juan 8:38-47.

15. Taano ta mahalaga sa kasaysayan an taon 1931?

¹⁵ Kaidtong mga taon nin 1920 asin 1930, an linahidan na Israel nin Dios padagos na minolde sa irarom kan pagdirehir kan Dakulang Paragibo nin Koron. Suminilyab an makahulang liwanag hale sa Kasuratan, na nagtatao nin onra ki Jehova asin nakasentro sa Mesiyanikong Kahadean ni Jesus. Kan 1931 an Mga Estudyante sa Biblia naggayagaya na akoon an bagong ngaran, an Mga Saksi ni Jehova.—Isaias 43:10-12; Mateo 6:9, 10; 24:14.

16 asin kahon sa pahina 19. Kasuarin nakompleto an bilog na kabilangan kan 144,000, asin ano an ebidensia digdi?

¹⁶ Kan mga taon nin 1930 an kabilangan kan “mga inapod asin pinili patin fiel,” an 144,000, garo baga kompleto na. (Kapahayagan 17:14; helingon an kahon sa pahina 19.) Dai niato aram kun pira sa mga linahidan an natipon kan enot na siglo asin sa tahaw kan “mga doot” durante kan mamondong mga siglo kan lakop na apostasiya kan Kakristianohan. Alagad kan 1935 may total sa bilog na kinaban na 52,465 parahayag, sa pinakahalangkaw na kabilangan na 56,153, na nagpaheling kan saindang langitnon na paglaom paagi sa pakikabtang sa mga emblema sa Memorial. Ano an kaaabtan kan dakol na titiponon pa?

“Uya! Sarong Dakulang Kadaklan”

17. Ano an makasaysayan na nangyari kan 1935?

¹⁷ Sa sarong kombension na ginibo poon Mayo 30 sagkod Hunyo 3, 1935, sa Washington, D.C., E.U.A., si Tugang na Rutherford nagtao nin pahayag na nagin tanda nin pagkaliwat na may titulong “An Dakulang Kaburonyogan.”c An grupong ini, “na dai nin siisay man na makabibilang,” malataw mantang patapos na an pagtatak sa 144,000 kan espirituwal na Israel. An mga ini matubod man sa nakatutubos na kakayahan kan “dugo kan Kordero,” si Jesus, asin matao nin sagradong paglilingkod sa areglo sa templo ni Jehova para sa pagsamba. Bilang sarong grupo, sinda ‘maluwas sa dakulang kahorasaan’ na buhay, tanganing magmana kan daganon na Paraiso na dian “an kagadanan mawawara na.” Sa laog nin nagkapirang taon bago an kombension na idto, an grupong ini inapod na mga Jonadab.—Kapahayagan 7:9-17; 21:4; Jeremias 35:10.

18. Sa anong mga paagi na makahulogan an taon 1938?

¹⁸ An taon 1938 makahulogan sa malinaw na pagsabi kun siisay an duwang grupo. An isyung Marso 15 asin Abril 1, 1938, kan The Watchtower nag-atubang kan may duwang kabtang na leksion na “His Flock” (sa Bicol, “An Saiyang Aripompon”) asin liniwanag an kanya-kanyang lugar kan linahidan na natatada asin kan kairiba ninda, an dakulang kadaklan. Dangan an mga isyung Hunyo 1 asin Hunyo 15 may mga artikulong pag-aadalan manongod sa “Organization” (sa Bicol, “Organisasyon”), na basado sa Isaias 60:17. An gabos na kongregasyon hinagadan na hagadon sa Namamahalang Grupo na magnombra nin lokal na mga lingkod, sa siring pinapangyayari an mas marahay, ordenado nin Dios, na teokratikong areglo. Iyan nanggad an ginibo kan mga kongregasyon.

19 asin nota sa ibaba. Anong aktuwal na mga pangyayari an nagpapatunay na an pankagabsan na pangapodan sa “ibang karnero” labi nang 60 taon ngonyan?

¹⁹ An report sa Yearbook of Jehovah’s Witnesses kan 1939 nagsabi: “An linahidan na mga parasunod ni Cristo Jesus na ngonyan yaon digdi sa daga sadit an kabilangan, asin nungka na madakula an saindang kabilangan. An mga ini inaapod sa Kasuratan na ‘natatada’ kan mga gikan nin Sion, an organisasyon nin Dios. (Kap. 12:17) Tinitipon ngonyan kan Kagurangnan an saiyang ‘ibang karnero,’ na makompuesto sa ‘dakulang kaburonyogan’. (Juan 10:16) An mga tinitipon ngonyan kairiba kan natatada, na nagtatabang sa natatada. Poon sa panahon na ini an mga minakompuesto sa ‘ibang karnero’ madakol sagkod na an ‘dakulang kaburonyogan’ matipon.” An linahidan na natatada minolde tanganing asikasohon an pagtipon kan dakulang kadaklan. An mga ini dapat na mamolde man ngonyan.d

20. Anong mga pagbago sa organisasyon an gradwal na nahayag poon kan 1942?

²⁰ Kan Enero 1942, kan nasa kasagsagan an Guerra Mundial II, si Joseph Rutherford nagadan asin sinalidahan ni Nathan Knorr bilang presidente. An ikatolong presidente kan Sosyedad mahal na marhay na nagigirumdoman huli sa pag-establisar nin teokratikong mga paadalan sa mga kongregasyon asin kan Paadalan nin Gilead para sa pagpatood sa mga misyonero. Kaidtong taonan na pagtiripon kan Sosyedad kan 1944, ipinaisi nia na an carta kan Sosyedad rinerebisar tanganing an pagkamiembro ibabasar, bakong sa materyal na mga ambag, kundi sa espirituwalidad. Sa laog kan suminunod na 30 taon, an mga trabahador sa langtad duminakol poon sa 156,299 sagkod sa 2,179,256 sa bilog na kinaban. Durante kan 1971-75 kaipuhan an dugang pang mga pagbago sa organisasyon. Dai na kaya nin sarong tawo na naglilingkod bilang presidente na lubos na pangatamanan an gibong pan-Kahadean sa bilog na daga. An Namamahalang Grupo, na may nagbabarobalot na tsirman, pinadakula na magkaigwa nin 18 linahidan na miembro, na ngonyan an haros kabanga natapos na an saindang buhay digdi sa daga.

21. Ano an nagpagin kualipikado kan mga miembro kan sadangoton na aripompon para sa Kahadean?

²¹ An nawawalat pang mga miembro kan sadangoton na aripompon minolde sa laog nin dakol na dekada nin mga pagbalo. Sinda makosog an boot, mantang dai mamamaluan na inako ninda an ‘patotoo kan espiritu.’ Sinabihan sinda ni Jesus: “Kamo an mga nakidamay sa sako sa mga pagbalo sa sako; asin ako nakikipagtipan sa saindo, kun paanong an sakong Ama nakipagtipan sa sako, para sa sarong kahadean, tanganing kamo kumakan asin uminom sa lamesa ko sa sakong kahadean, asin tumukaw sa mga trono tanganing maghokom sa doseng tribo nin Israel.”—Roma 8:16, 17; Lucas 12:32; 22:28-30.

22, 23. Paano minomolde an sadangoton na aripompon asin an ibang karnero?

²² Mantang naiinaan an kabilangan kan linahidan nin espiritu na natatada digdi sa daga, an maygurang na mga tugang na kabilang sa dakulang kadaklan tinawan nin espirituwal na pangangataman sa haros gabos na kongregasyon sa bilog na kinaban. Asin mantang natatapos na kan huring gurang nang linahidan na mga saksi an saindang buhay digdi sa daga, an prinsipeng mga sa·rimʹ sa ibang karnero natokdoan nang marhay na gibohon an mga katongdan sa pag-administrar bilang grupong namamayo digdi sa daga.—Ezequiel 44:3; Isaias 32:1.

²³ An sadangoton na aripompon asin an ibang karnero pareho padagos na minomolde na magin mga lalagan para sa kagamitan na may onra. (Juan 10:14-16) Baga man an paglaom niato nasa “bagong kalangitan” o nasa “sarong bagong daga,” logod na kita bilog na pusong maghimate sa pangagda ni Jehova: “Mag-ogma kamo, banwaan, asin maggayagaya kamo sagkod lamang sa sakong linalalang. Huli ta uya linalalang ko an [langitnon na] Jerusalem na magin dahelan nin kagayagayahan asin an saiyang banwaan na magin dahelan nin kaogmahan.” (Isaias 65:17, 18) Logod na kitang tupok na mga tawo pirmeng maglingkod na mapakumbaba, na minomolde kan “kosog na lihis sa ordinaryo”—an kapangyarihan nin Dios na banal na espiritu!—2 Corinto 4:7; Juan 16:13.

[Mga nota sa ibaba]

Nagigirumdoman daw Nindo?

◻ Sa pagpamolde sa saiyang Ama, paano nagin satong Arogan si Jesus?

◻ Anong pagmolde an nangyari sa suanoy na Israel?

◻ Paano an “Israel nin Dios” minomolde sagkod ngonyan?

◻ Sa anong katuyohan na minolde an “ibang karnero”?

[Kahon sa pahina 18]

Dugang Pang Pagmolde sa Kakristianohan

An sarong bareta kan Associated Press hale sa Atenas, Grecia, nagsabi kan minasunod manongod sa nombrado kasuarin pa sana na namamayo sa Iglesia Griego Ortodokso: “Sia sinasabing mensahero nin katoninongan. Alagad an namomoon sa Iglesia Griego Ortodokso mas garo heneral na nag-aandam para sa ralaban.

“‘Andam kita, kun kaipuhan, na magpabolos nin dugo asin magsakripisyo. Kita, bilang sarong iglesia, nag-aarang nin katoninongan . . . Alagad binebendisyonan niato an sagradong mga armas kun iyan hinahagad kan panahon,’ sabi ni Arsobispo Christodoulos kasuarin pa sana kan aldaw nin piesta kan Asuncion de la Virgen, na sineselebrar man bilang an aldaw kan puersa armada nin Grecia.”

[Kahon sa pahina 19]

“Mayo Na nin mga Dagdag!”

Sa sarong gradwasyon sa Gilead kan 1970, si Frederick Franz, bise-presidente kaidto kan Watch Tower Society, nagsabi sa mga estudyante kan posibilidad na sinda, na gabos kabilang sa ibang karnero na may daganon na paglaom, tibaad magbautismo sa saro na tibaad maghingakong kabilang sa linahidan na natatada. Puede daw ining mangyari? Bueno, ipinaliwanag nia na si Juan Bautista kabilang sa ibang karnero, asin binautismohan nia si Jesus saka an nagkapira sa mga apostol. Dangan idinagos nia sa paghapot kun baga may pangapodan pa para sa pagtipon nin dugang pa kan mga kabilang sa natatada. “Mayo, mayo na nin mga dagdag!” sabi nia. “An pangapodan na iyan natapos kaidto pang 1931-35! Mayo na nin mga dagdag. Kun siring, sairisay an pira sanang bagong makiasosyar na nakikakabtang sa mga emblema sa Memorial? Kun sinda kabilang sa natatada, sinda mga kasalida! Sinda, bakong mga dagdag sa mga kabilang sa linahidan, kundi mga kasalida kan mga tibaad napasuhay sa pagtubod.”

[Retrato sa pahina 15]

Pinahahalagahan nanggad niato an satong kayamanan na paglilingkod!

[Retrato sa pahina 16]

An suanoy na Israel nagin lalagan na angay sana sa kalaglagan