An Dakulang Paragibo nin Koron Asin an Saiyang Gibo

“[Magin] lalagan para sa sarong katuyohan na may onra, . . . andam para sa lambang marahay na gibo.”—2 TIMOTEO 2:21.

1, 2. (a) Paano an paglalang nin Dios sa lalaki asin babae pambihirang gibo? (b) Sa anong katuyohan na linalang kan Dakulang Paragibo nin Koron si Adan asin Eva?

SI Jehova an Dakulang Paragibo nin Koron. An sarong obra maestra kan saiyang paglalang iyo an enot niatong magurang, si Adan. Sinasabi sa sato kan Biblia: “Pinorma ni Jehova Dios an tawo hale sa kabokabo kan daga asin hinangosan sia sa saiyang dongo kan hinangos nin buhay, asin an tawo nagin buhay na kalag,” an boot sabihon, “naghahangos na linalang.” (Genesis 2:7, nota sa ibaba) An enot na linalang na tawong idto sangkap, na pinorma sa mismong ladawan nin Dios, sarong ebidensia kan Saiyang banal na kadonongan asin pagkamoot sa tunay na katanosan asin hustisya.

² Ginagamit an materyales hale sa gosok ni Adan, nagmolde man an Dios nin kakomplemento asin katuwang nin lalaki—an babae. An sangkap na gayon ni Eva labi sa gayon kan pinakamay itsurang babae ngonyan. (Genesis 2:21-23) Dugang pa, an enot na tawong mag-agom tinawan nin hawak asin abilidad na sangkap an pagkadisenyo para sa paghaman kan itinao sa saindang proyekto na gibohon na paraiso an dagang ini. Tinawan man sinda kan kapangyarihan na magibo an pagboot nin Dios na sinasabi sa Genesis 1:28: “Pangagbunga asin pangagdakol kamo asin panoa nindo an daga patin sakopa nindo iyan, asin sakopon nindo an mga sira sa dagat asin an mga gamgam sa kalangitan patin an lambang nabubuhay na hayop na naghihiro sa ibabaw kan daga.” Sa katapustapusi, an lakop sa globong hardin na ini iistaran nin binilyon na magayagayang tawo, na borogkos sa klase nin pagkamoot na “sangkap na bogkos nin pagkasararo.”—Colosas 3:14.

3. Paano an enot niatong mga magurang nagin mga lalagan nin kadaihan nin onra, asin may anong resulta?

³ Makamomondo, an enot niatong mga magurang tuyong ginusto na magrebelde tumang sa autoridad kan saindang Soberanong Kaglalang, an Dakulang Paragibo nin Koron. An saindang iginawe nagin arog kan ilinaladawan sa Isaias 29:15, 16: “Herak man kan mga minararom na marhay sa pagtago ki Jehova mismo kan planong gibohon, asin an mga gibo nangyari sa madiklom na lugar, mantang sinda nagsasabi: ‘Siisay an nakakaheling sato, asin siisay an nakaaaram manongod sa sato?’ . . . Maninigo daw na ibilang an paragibo nin koron na arog sana kan dalipay? Huli ta maninigo daw na an bagay na ginibo magsabi dapit sa kaggibo kaiyan: ‘Dai nia ako ginibo’? Asin an bagay daw na hinaman minasabi dapit sa naghaman kaiyan: ‘Dai sia nagpaheling nin pakasabot’?” An saindang kasumbikalan nagbunga nin grabeng kapahamakan—an sentensiang kagadanan na daing sagkod. Apuera dian, an enterong rasa nin tawo na guminikan sa sainda nagmana nin kasalan asin kagadanan. (Roma 5:12, 18) Nadanyaran na marhay an gayon kan linalang kan Dakulang Paragibo nin Koron.

4. Para sa anong katuyohan na may onra na kita puedeng magserbi?

⁴ Minsan siring, dawa sa satong bakong sangkap na kamugtakan ngonyan, kita na mga gikan kan makasalan na si Adan makaoomaw ki Jehova sa mga tataramon kan Salmo 139:14: “Ika oomawon ko huli ta sa makangingirhat na paagi makangangalas an pagkagibo sa sako. Makangangalas an saimong mga gibo, na aram na gayo kan sakuyang kalag.” Pero kanigoan kamakamomondo na an orihinal na ginibo kan Dakulang Paragibo nin Koron nanawayan na marhay!

Ipinadagos kan Dakulang Paragibo nin Koron an Saiyang Gibo

5. Paano gagamiton an abilidad kan Dakulang Paragibo nin Koron?

⁵ Marahay sana ta an abilidad kan satong Kaglalang bilang Paragibo nin Koron gagamiton bako sanang sa pagmolde kan saiyang enot na linalang na tawo. Sinasabi sa sato ni apostol Pablo: “O tawo, siisay ka nanggad na nakikipagsimbagan sa Dios? Makasasabi daw an minolde sa saiya na nagmolde dian, ‘Tadaw ta ginibo mo ako nin arog kaini?’ Ano? Bako daw na an paragibo nin koron may autoridad sa dalipay na gumibo gikan sa iyo man sanang masa nin sarong lalagan para sa kagamitan na may onra, saro pa para sa kagamitan na daing onra?”—Roma 9:20, 21.

6, 7. (a) Paano ginugusto nin dakol ngonyan na mamolde para sa kadaihan nin onra? (b) Paano minomolde an mga matanos para sa kagamitan na may onra?

⁶ Iyo, an nagkapira sa ginibo kan Dakulang Paragibo nin Koron momoldehon para sa kagamitan na may onra, asin an nagkapira, para sa kagamitan na daing onra. An mga ginugustong umiba sa kinaban sa pararom nang pararom na pagbugsok kaiyan sa kumunoy nin karatan minomolde sa paagi na matanda sa sainda para sa paglaglag. Kun an mamuraway na Hade, si Cristo Jesus, dumatong na sa paghokom, makakaiba sa mga lalagan na iyan na daing onra an gabos na matagas na arog-kanding na tawo na, arog kan sabi kan Mateo 25:46, “maduman sa pagkaparang daing katapusan.” Alagad an arog-karnerong “mga matanos,” an mga minolde para sa kagamitan na “may onra,” magmamana nin “buhay na daing katapusan.”

⁷ May kapakumbabaan, an mga matanos na ini nagpasakop sa pagmolde nin Dios. Luminaog sinda sa dalan nin Dios sa buhay. Inako ninda an hatol na yaon sa 1 Timoteo 6:17-19: “Ibugtak an [saindong] paglaom, bakong sa kayamanan na bakong segurado, kundi sa Dios, na mayaman na nagtatao sa sato kan gabos na bagay para sa satong kasiraman.” Nagmaigot sinda na “maggibo nin marahay, magin mayaman sa marahay na mga gibo, magin matinao, andam na magwaras, na nagririmpos para sa sainda man sana nin marahay na pasisikadan para sa ngapit, tangani sindang makapangapot nin marigon sa tunay na buhay.” Sinda minomolde kan katotoohan nin Dios asin naggigibo nin marigon na pagtubod sa probisyon ni Jehova paagi ki Cristo Jesus, na “nagtao kan saiyang sadiri bilang katimbang na pantubos” tanganing ibalik an gabos na nawara huli sa kasalan ni Adan. (1 Timoteo 2:6) Kun siring, kita maninigo na boluntad nanggad na kumuyog sa sadol ni Pablo na “isolog [niato] an bagong personalidad, na binabago [minomolde] paagi sa tamang kaaraman segun sa ladawan kan Saro na naglalang kaiyan.”—Colosas 3:10.

Magigin Ano Kamong Klaseng Lalagan?

8. (a) Ano an nagdedeterminar kun magigin anong klaseng lalagan an sarong tawo? (b) Anong duwang nakakokontribwir na bagay an nakapoporma sa pagkamolde nin saro?

⁸ Ano an nagdedeterminar kun magigin anong klaseng lalagan an sarong tawo? An saiyang aktitud asin gawe-gawe. An mga ini pinoporma nguna kan mga mawot asin inklinasyon kan puso. An madonong na si Hadeng Salomon nagsabi: “An puso kan daganon na tawo puedeng mag-isip kan saiyang dalan, alagad si Jehova mismo iyo an naggigiya sa saiyang mga lakad.” (Talinhaga 16:9) Ikaduwa, an mga iyan pinoporma kan mga nadadangog saka naheheling, mga pakikiasosyar saka inagihan. Kun siring, abaa kaimportante na himateon niato an hatol: “Sia na naglalakaw na kaiba nin mga madonong magigin madonong, alagad sia na nakiiiba sa mga lolong maraot an aabotan.” (Talinhaga 13:20) Arog kan patanid sa sato kan 2 Pedro 1:16, dapat na likayan niato an pagsunod sa “mga putik na osipon na tinugdas sa katusohan,” o segun sa Katoliko Romanong bersion ni Knox, “mga pabula na imbento nin tawo.” Kaiba digdi an dakol na tokdo asin kapiestahan kan apostatang Kakristianohan.

9. Paano kita magkakaigwa nin paborableng reaksion sa pagmolde kan Dakulang Paragibo nin Koron?

⁹ Kun siring, segun sa satong reaksion, puede kitang moldehon nin Dios. Mapakumbaba sa atubangan ni Jehova, puede niatong otrohon an pamibi ni David: “Rekisaha ako, O Dios, asin midbida an sakong puso. Siyasata ako, asin arama an sakong nakariribok na mga kaisipan, asin helinga kun baga igwa sa sako nin ano man na nakararaot na dalan, asin giyahe ako sa dalan nin daing talaan na panahon.” (Salmo 139:23, 24) Ipinahuhulit ni Jehova an mensahe kan Kahadean. An satong puso naghimate na may pag-apresyar sa maogmang bareta asin sa dugang pa niang mga paggiya. Paagi sa saiyang organisasyon tinatawan nia kita nin manlaenlaen na pribilehio na konektado sa paghuhulit kan maogmang bareta; pangaptan niato an mga ini asin pakamahalon an mga iyan.—Filipos 1:9-11.

10. Paano kita maninigong maghingoa sa pagsunod sa espirituwal na mga programa?

¹⁰ Importanteng marhay na kita magtao nin dayaday na atension sa Tataramon nin Dios, na sinusunod an aroaldaw na programa nin pagbasa kan Biblia asin ginigibong tema nin orolay sa satong pamilya saka mga katood an Kasuratan saka paglilingkod ki Jehova. Sa programa sa pan-agang pagsamba na ginigibo sa oras nin pamahaw kan kada pamilyang Bethel saka grupo nin mga misyonero kan Mga Saksi ni Jehova parateng kaiba, sa orooltan na semana, an halipot na pagbasa kan Biblia o kan presenteng Yearbook. Puede daw na magkaigwa nin kaagid na areglo an saindong pamilya? Kanigoan man na pakinabang an inaako niato gabos paagi sa satong pakikiasosyar sa Kristianong kongregasyon, sa satong pagtorotiripon, asin nangorogna sa satong pakikikabtang sa semanal na pag-adal sa Torrengbantayan!

Minolde na Makaya an mga Pagbalo

11, 12. (a) Paano niato ikaaaplikar an hatol ni Santiago mapadapit sa mga pagbalo sa satong pan-aroaldaw na buhay? (b) Paano an inagihan ni Job nagpaparigon kan satong boot na papagdanayon an integridad?

¹¹ Sa satong pan-aroaldaw na buhay, itinotogot nin Dios na lumataw an nagkapirang situwasyon, na an iba tibaad magin depisil para sa sato. Ano an maninigong magin punto de vista niato digdi? Arog kan hatol kan Santiago 4:8, dai kita noarin man magkaigwa nin makuring karaotan nin boot, kundi rumani kita sa Dios, na nagtitiwala sa saiya sa bilog niatong puso, na kompiado na mantang kita ‘minarani sa saiya, sia marani sa sato.’ Totoo, kaipuhan na tagalan niato an mga kasakitan asin pagbalo, alagad an mga iyan itinotogot bilang nakakokontribwir sa pagmolde sa sato, na maogma an resulta. Sinisierto sa sato kan Santiago 1:2, 3: “Ibilang nindong bilog na kagayagayahan, mga tugang, kun kamo napapaatubang sa manlaenlaen na pagbalo, sa pakaaram na ining nabalong kualidad kan saindong pagtubod nagbubunga nin pakatagal.”

¹² Sinasabi man ni Santiago: “Kun binabalo, dai nin siisay man na magsabi: ‘Binabalo ako nin Dios.’ Huli ta paagi sa maraot na mga bagay an Dios dai puedeng baloon ni binabalo man nia an siisay man. Kundi an lambang saro nababalo paagi sa pagkabutong asin pagkaakit sa saiya kan saiyang sadiring kamawotan.” (Santiago 1:13, 14) Tibaad dakol asin sarisari an mga pagbalo sa sato, alagad arog kan nangyari ki Job, iyan gabos may kabtang sa pagmolde sa sato. Abaa karahay na pagpasarig sa boot an itinatao sa sato kan Kasuratan sa Santiago 5:11: “Uya! Inaapod tang maogma idtong mga nakatagal. Nadangog nindo an dapit sa pakatagal ni Job asin naheling an bunga na itinao ni Jehova, na si Jehova mabooton an kapadangatan asin maheherakon.” Bilang mga lalagan sa kamot kan Dakulang Paragibo nin Koron, logod na papagdanayon niato an integridad sa gabos na panahon, na may arog-Job na kompiansa sa magigin resulta!—Job 2:3, 9, 10; 27:5; 31:1-6; 42:12-15.

Pagmolde sa Satong mga Aki

13, 14. (a) Noarin maninigong ponan nin mga magurang na moldehon an saindang mga aki, na tinatanaw an anong pangultimong resulta? (b) Anong maogmang mga resulta an masisitar nindo?

¹³ An mga magurang puedeng makikabtang sa pagmolde kan saindang mga aki, poon sa pagkaomboy kan mga aki, asin abaa karahay na mga nagdadanay na may integridad an puedeng luwasan kan satong mga hoben! (2 Timoteo 3:14, 15) Ini nagin totoo dawa kun labi-labi an mga pagbalo. Kaidtong nagkapirang taon na an nakaagi, kan nasa kasagsagan an paglamag sa sarong nasyon sa Aprika, sarong mapagtitiwalaan na pamilya an nag-aasikaso kan tagong pag-imprenta kan An Torrengbantayan sa sarong kamalig sa likod kan harong. Sarong aldaw may mga soldados na padangadang sa tinampo, na sinasarosaro an mga harong sa paghanap nin mga hoben na lalaki na ilalaog sa militar. May panahon pang makatago an duwang solterito sa pamilyang ini, alagad seguradong mabubuyagyag an imprentahan sa ibubungang pagrekisa kan mga soldados. Ini puedeng magbunga kan pagpadusa o posibleng paggadan sa enterong pamilya. Ano daw an magigibo? Nagtaram an duwang solterito, na mapusong sinisitar an Juan 15:13: “Mayo nin siisay man na namoot nin orog pa kaini, na itao nin saro an saiyang kalag dahel sa saiyang mga katood.” Sinda nag-insistir na magdanay sa sala. Matatagboan sinda kan mga soldados asin daing duda na padudusahan sinda nin maringis o gagadanon pa ngani sinda kun sinda magsayuma nang ilaog sa militar. Alagad ta dai na marekisa pa an mga ini. Maliligtas an imprentahan asin an ibang miembro kan pamilya. Minsan siring, nagkaigwa nin pambihirang resulta. Aktuwal na linipasan kan mga soldados an sarong harong na ini, na nagdagos sa iba! An mga lalagan na tawong idto na minolde para sa kagamitan na may onra naligtas, kaiba an imprentahan, tanganing magpadagos sa pagpublikar nin napapanahon na espirituwal na kakanon. An saro sa duwang solterito asin an tugang niang babae naglilingkod ngonyan sa Bethel; sia pa man giraray an nagpapadalagan kan dating imprentahan.

¹⁴ An mga aki pa puedeng tokdoan kun paano mamimibi, asin sinisimbag nin Dios an saindang mga pamibi. An sarong pambihirang pangyayari kaini kaidtong mga daing herak na pangadan sa Rwanda. Kan an sarong sais anyos saka an saiyang mga magurang inandam na kan mga rebelde na gadanon paagi sa granada, an aking babae namibi nin makosog saka odok na logod dai sinda paggadanon tangani na makapagpadagos sa paglilingkod ki Jehova. An mga magadan kutana sa sainda napahiro na dai sinda gadanon, na sinasabi, “Dai niamo kamo mahimong gadanon huli sa aking babae na ini.”—1 Pedro 3:12.

15. Manongod sa anong nakararaot na mga impluwensia nagpatanid si Pablo?

¹⁵ An kadaklan sa satong mga aki dai kaipuhan na umatubang sa mga situwasyon na arog kadepisil kan mga isinaysay sa enotan, alagad kadakol na pagbalo an inaatubang ninda sa eskuelahan asin sa marigsok na mga sosyedad ngonyan: an usmak na pananaram, pornograpiya, hababaon na klaseng pag-aling-aling, asin impluwensia nin kairiba na gumibo nin sala lakop sa dakol na lugar. Paorootro, si apostol Pablo nagpatanid tumang sa mga impluwensiang ini.—1 Corinto 5:6; 15:33, 34; Efeso 5:3-7.

16. Paano an saro puedeng magin lalagan para sa kagamitan na may onra?

¹⁶ Pakapagtaram manongod sa mga lalagan na “an nagkapira para sa katuyohan na may onra alagad an iba man para sa katuyohan na mayong onra,” si Pablo nagsasabi: “Kun siring, kun an siisay man lumikay sa mga nahuhuri, sia magigin lalagan para sa sarong katuyohan na may onra, sinantipikar, nagagamit kan saiyang kagsadiri, andam para sa lambang marahay na gibo.” Kaya enkaminaron niato an satong mga hoben na bantayan an saindang pag-iriba. Sinda logod ‘dumulag sa mga mawot na konektado sa pagkabarobata, kundi sumunod sa katanosan, pagtubod, pagkamoot, katoninongan, kaibanan kaidtong mga nag-aapod sa Kagurangnan gikan sa malinig na puso.’ (2 Timoteo 2:20-22) An pampamilyang programa para sa ‘pagpakinosogkosogan’ puedeng magin mahalagang marhay sa pagmolde sa satong mga hoben. (1 Tesalonica 5:11; Talinhaga 22:6) An aroaldaw na pagbasa asin pag-adal sa Biblia, na ginagamit an angay na mga publikasyon kan Sosyedad, puedeng magin marahay na tabang.

Pagmolde Para sa Gabos

17. Paano kita momoldehon nin disiplina, asin may anong nakagagayagayang resulta?

¹⁷ Tanganing mamolde kita, si Jehova nagtatao nin hatol hale sa saiyang Tataramon asin paagi sa saiyang organisasyon. Nungka na labanan an siring na diosnon na hatol! Madonong na maghimate dian, asin pabayaan iyan na pormahon kamo para sa may onrang paggamit ni Jehova. An Talinhaga 3:11, 12 nagsasadol: “An disiplina ni Jehova, O aki ko, dai mo ipagsikwal; asin dai mo ikasurang nin makuri an saiyang pagsagwe, huli ta an namomotan ni Jehova saiyang sinasagwe, kun paanong an sarong ama nagsasagwe sa aki na saiyang ikinaoogma.” An dugang pang garo sa amang hatol itinatao sa Hebreo 12:6-11: “An namomotan ni Jehova saiyang dinidisiplina . . . Totoo, mayong disiplina na sa presente garo nakagagayagaya, kundi nakamomondo; pero pagkatapos duman sa mga napatood kaiyan iyan nagbubunga nin matoninong na bunga, arin na baga, an katanosan.” An mayor na pinakapaagihan kan siring na disiplina dapat na an ipinasabong na Tataramon nin Dios.—2 Timoteo 3:16, 17.

18. Kun dapit sa pagsolsol, ano an nanonodan niato sa Lucas kapitulo 15?

¹⁸ Si Jehova maheherakon man. (Exodo 34:6) Kun ipinaheheling an odok sa pusong pagsolsol dawa sa pinakamagabat na kasalan, sia nagpapatawad. Dawa an mga “gastador” sa presenteng aldaw puedeng moldehon na magin mga lalagan para sa kagamitan na may onra. (Lucas 15:22-24, 32) An satong mga kasalan tibaad bakong arog kagabat kan sa gastador. Alagad an satong mapakumbabang reaksion sa hatol sono sa Kasuratan pirmeng magbubunga kan pagkamolde sa sato na magin mga lalagan para sa kagamitan na may onra.

19. Paano kita makapagpapadagos na maglingkod bilang mga lalagan na may onra sa kamot ni Jehova?

¹⁹ Kan enot niatong manodan an katotoohan, nagpaheling kita nin pagigin andam na pabayaan si Jehova na pormahon kita. Kita puminondo sa kinabanon na pamumuhay, nagpoon na isolog an bagong personalidad, asin nagin nagdusay saka bautisadong mga Kristiano. Kinuyog niato an hatol kan Efeso 4:20-24, na ‘hinahale an daan na personalidad na komporme sa dati niatong paggawe, kaiba an mapandayang mga mawot kaiyan, asin isinosolog an bagong personalidad na linalang segun sa kabotan nin Dios sa tunay na katanosan asin kaimbodan.’ Kita logod personal na magpadagos na malugyat sa kamot ni Jehova, an Dakulang Paragibo nin Koron, na pirmeng naglilingkod bilang mga lalagan para sa saiyang may onrang paggamit!

Bilang Pagrepaso

◻ Ano an katuyohan kan Dakulang Paragibo nin Koron mapadapit sa satong daga?

◻ Paano kamo puedeng moldehon para sa kagamitan na may onra?

◻ Sa anong paagi na puedeng moldehon an satong mga aki?

◻ Ano an maninigong magin punto de vista niato sa disiplina?

[Retrato sa pahina 10]

Kamo daw momoldehon para sa kagamitan na may onra o hahaboan?

[Retrato sa pahina 12]

An mga aki puedeng moldehon poon sa pagkaomboy