Bagong Programa sa Aldaw nin Espesyal na Asamblea

An tema kan programa sa aldaw nin espesyal na asamblea para sa 2008 iyo an “Kita an Dalipay—Si Jehova an Satong Parakoron,” na basado sa Isaias 64:8. An sono sa Kasuratan na konseho na itatao paagi sa programang ini mapararom kan satong pag-apresyar sa kadonongan, hustisya, kapangyarihan, asin pagkamoot ni Jehova bilang an Dakulang Parakoron.

Ipapaheling kan pahayag kan paraataman sa sirkito na “Paglilingkod Bilang mga Lalagan na May Onra sa Ministeryo,” kun paano padakol nang padakol na tawo an nag-aako kan abundang bendisyon na maaraman an katotoohan asin na isabi iyan sa iba. An pahayag na “Iingatan Kamo kan Paghorophorop” ihahayag kun paano kita pinoprotehiran kan seryosong paghorophorop sa matanos na mga prinsipyo ni Jehova. Ipapahayag kan nagdadalaw na ispiker sa mga nagdadangog an mga temang “Dai ‘Magpamolde sa Sistemang Ini nin mga Bagay’” asin “Magpamolde sa Dakulang Parakoron.” An mga magurang asin hoben makakanompong nin pagparigon sa boot sa mga kabtang na “Mga Hoben na Kapakipakinabang ki Jehova” asin “An Mahalagang Marhay na Papel kan mga Magurang sa Proseso nin Pagmolde.” Paagi sa mga demonstrasyon asin interbio, maoogma kitang marhay na madangog asin maobserbaran kun ano an nagigibo kan satong mga tugang sa saindang ministeryo. An mga nagmamawot na simbolisaran an saindang pagdusay sa Dios paagi sa bautismo sa tubig maninigo na paaramon an nangengenot na paraataman sa pinakamadaling panahon na mapupuede. Seguradohon na darahon an saindong kopya kan isyu kan An Torrengbantayan na pag-aadalan sa semana kan aldaw nin espesyal na asamblea.

Inootob kan Dakulang Parakoron an ano man na katuyohan nia. Alagad an lambang saro sa sato an mapili kun ano an magigin reaksion niato sa pagmolde nia sa sato. An mga madonong na nagpapasakop sa mga pamantayan asin pagpakarhay ni Jehova puedeng mamolde, mapakarhay, asin maliwat tangani na magin kapakipakinabang na mga lalagan, siring sa sarong kumol nin dalipay sa gibohan nin koron. Kun nakikipagtabangan kita ki Jehova, ibinabantog niato an kadakulaan kan saiyang soberaniya asin mag-aako kita nin dakol na bendisyon.