Bagong Programa sa Aldaw nin Espesyal na Asamblea
An tema kan programa sa aldaw nin espesyal na asamblea para sa 2009 iyo an “Padagos Mong Ingatan an Ministeryo . . . , na Iyan Otobon Mo,” basado sa Colosas 4:17. Bilang mga Kristiano, sineseryoso niato an sadol na iyan. An katuyohan niato iyo na maimbod na otobon an satong ministeryo siring kan ginibo ni Jesus. (Juan 17:14) Si apostol Pablo marahayon man na halimbawa sa sato sa bagay na ini. Determinado siang taposon an gibohon nia sa ministeryo.—Gibo 20:24.
Ipapaheling kan kabtang kan paraataman sa sirkito kun paano napapangganahan nin manlaenlaen na parahayag an mga kadepisilan sa ministeryo ninda. Dangan itatampok kan pahayag na “Kultibaron an Itinanom Nindo” kun paano talaga niato matatabangan an mga “may tamang inklinasyon sa buhay na daing katapusan.” (Gibo 13:48) Totokaron nguna, nin bersikulo-por-bersikulo, kan nagdadalaw na ispiker an 2 Corinto 6:1-10 sa pahayag na “Kun Paano Niato Irinerekomendar an Satong Sadiri Bilang mga Ministro.” Sa hapon, ipapahayag nia an temang “Pahalagahan na Marhay an Saindong Ministeryo.” Daing duda na mapaparigon an boot nindo kan mga kabtang na “Ikinakaogma nin mga Hoben Asin Gurang an Ministeryo” saka “Mga Hoben na Nag-ootob kan Ministeryo.” An mga gustong simbolisaran an saindang pagdusay paagi sa bautismo sa tubig, magsalang sa pansirkitong asamblea o aldaw nin espesyal na asamblea, maninigong impormaran an nangengenot na paraataman sa pinakamadaling panahon na mapupuede. An sarong tampok na kabtang kan gabos niatong asamblea asin kombension iyo an pagtokar kan An Torrengbantayan. Darahon an saindong kopya na pag-aadalan sa semana kan aldaw nin espesyal na asamblea.
Sa pag-iingat niato na otobon an satong ministeryo, nagmamaigot kitang siertohon na dai naaagawan nin panahon kan ibang intereses asin aktibidad an ipinagkatiwala sa sato ni Jehova. An sono sa Kasuratan na pagparigon sa boot, na itatao paagi sa programang ini sa aldaw nin espesyal na asamblea, seguradong makakatabang sa sato gabos na masabotan kun ano an kaipuhan tang gibohon tanganing magdanay na tama an sentro kan satong atension asin mahorophorop an satong ministeryo sa katuyohan na lubos na otobon iyan.