Si Silas—Sarong Gikanan nin Pamparigon sa Boot

POON sa enot na Kristianong kasaysayan, mahalagang marhay an aktibidad kan fiel na nagbibiaheng mga paraataman kapwa sa pagparigon sa boot kan mga kongregasyon kan banwaan nin Dios asin sa pagpalakop kan maogmang bareta sa pinakaharayong mga parte kan daga. Kabilang sa kaenot-enoteng mga paraataman na ninombrahan iyo si Silas, sarong propeta asin pangenot na miembro kan kongregasyon sa Jerusalem. Mahalagang marhay an nagin papel nia sa importanteng mga pangyayari sa paghuhulit asin saro sia sa mga misyonero na enot na nag-ebanghelyo sa teritoryo nin Europa. Ano an naggibo ki Silas na partikularmenteng kualipikadong marhay na gibohon an gabos na ini? Asin anong mga karakteristiko kan saiyang personalidad an marahay na arogon niato?

An Isyu sa Pagturi

Kan an posibleng pagponan nin pagkabaranga na hapot dapit sa pagturi lumataw kan mga 49 C.E., kinaipuhan kan namamahalang grupo sa Jerusalem na magpaluwas nin malinaw na giya sa mga Kristiano tanganing resolberan an isyu. Sa mga kamugtakan na ini, si Silas, na inapod man na Silvano, naglataw sa rekord kan Biblia. Puedeng saro sia sa mga nagdesisyon na pakatapos kaiyan pinili bilang sugo kan “mga apostol asin kamagurangan na lalaki,” tanganing ikomunikar an desisyon ninda sa “mga tugang sa Antioquia asin Siria patin Cilicia.” Sa Antioquia, ipinaabot ni Silas asin Judas (Barsabas), kaiba si Bernabe asin Pablo, an bareta na dara ninda, na posibleng isinasaysay nin berbal an mga nangyari sa miting sa Jerusalem, an naabot na mga konklusyon, asin an laog kan surat. Sinda man “nagparigon sa boot kan mga tugang paagi sa balakid na diskurso asin nagpakosog sa sainda.” An maogmang resulta iyo na an mga Kristiano sa Antioquia ‘naggayagaya.’—Gibo 15:1-32.

Sa siring dakula an nagin kabtang ni Silas sa pagresolber sa pundamental na isyung ini. Alagad bakong pasil an asignasyon na ini. Mayo nin paagi na aramon an magigin reaksion kan kongregasyon sa Antioquia manongod sa napagdesisyonan. Sa siring, “nangaipo iyan nin saro na igwa nin dakol na kadonongan asin taktika tanganing ipaliwanag an isinurat kan mga apostol,” an sabi nin sarong komentarista. An pagkapili ki Silas para sa seryosong asignasyon na ini may sinasabi sa sato manongod sa siertong klase nin persona nia. Puede siang panarigan na fiel na magrepresentar sa mga direktiba kan namamahalang grupo. Sierto na sia saro man na madonong na paraataman na kayang magpangyari nin pakiulian kun may kontrobersia na nagsasapeligro sa kongregasyon.

Mga Biahe Kaiba ni Pablo

Bakong segurado kun baga si Silas nagbuelta sa Jerusalem pakatapos kan misyon na iyan o dai. Sa paano man, pakatapos kan dai pagkaintindihan ni Bernabe asin Pablo dapit ki Juan Marcos, pinili ni Pablo si Silas, na nasa Antioquia kan panahon na idto, para sa iba naman na biahe na an enot na plano songkoon liwat an mga siudad na hinulitan ni Pablo durante kan saiyang enot na biahe sa pagmimisyonero.—Gibo 15:36-41.

An pagkapili ki Silas puedeng naapektaran kan saiyang positibong saboot manongod sa misyon sa mga Hentil asin kan autoridad na ikatatao nia bilang propeta asin representante sa pagtaram kan namamahalang grupo sa pagpaabot kan saindang mga desisyon sa mga nagturubod sa Siria asin Cilicia. Marahayon an mga resulta. An librong Gibo nagsasaysay: “Ngonyan mantang sinda nagbibiahe sa mga siudad itinatao ninda sa mga yaon duman an mga kasugoan na ootobon na pinagdesisyonan kan mga apostol asin kan kamagurangan na lalaki na yaon sa Jerusalem. Kun siring tunay na an mga kongregasyon nagpadagos na maparigon sa pagtubod asin magdakol an bilang aroaldaw.”—Gibo 16:4, 5.

Mantang nagbibiahe an mga misyonero, duwang beses sindang isinuki nin direksion kan banal na espiritu sa plano nindang ruta. (Gibo 16:6, 7) Si Timoteo idinagdag sa mga kaiba sa biahe, sa Listra, pakatapos nin dai sinabing “hula” may labot sa saiya. (1 Timoteo 1:18; 4:14) Paagi sa sarong bisyon ki Pablo, na igwa man nin balaog na paghula, an magkairibanan sa biahe pinagbotan na maglayag pasiring sa Macedonia, sa Europa.—Gibo 16:9, 10.

Hinampak Asin Ibinilanggo

Sa Filipos, “an pangenot na siudad kan distrito,” si Silas nag-agi nin dai malilingawan na sakit. Pakatapos na palayason ni Pablo an sarong espiritu nin pagtoodtood sa sarong oripon na babae, an mga kagsadiri kaini, kan maheling na mayo na sindang mapagkukuanan nin entrada, ginuyod si Silas asin Pablo sa atubangan kan mga mahistrado kan siudad. Bilang resulta, inagihan kan duwa an pagmenus na ipresentar sa publiko bilang paragibo nin maraot, na ginisi an saindang pan-ibabaw na mga gubing, asin hinampak nin mga badas sa sadan.—Gibo 16:12, 16-22.

An mga paghampak na idto bako sanang makatatakot na marhay na padusa, na haros dai kayang tagalan nin tawo alagad, sa kamugtakan ni Pablo asin Silas, iyan ilegal man. Taano? An mga ley kan Roma nagsasabi na mayo nin Romanong siudadano na puedeng hampakon. Romanong siudadano si Pablo, asin posible na si Silas iyo man. ‘Pakahampaka nin dakol’ sa sainda, si Pablo asin Silas ibinilanggo na nakapandog an saindang mga bitis. Ini “makatatakot na instrumento,” an paliwanag ni Gustav Stählin, “na dian an mga tabay kan mga preso puedeng biskaon sagkod sa gusto ninda, tanganing dai sinda patorogon.” Pero, sa kamatangaan nin banggi, na an saindang likod daing duwa-duwa na pano nin makokolog na lugad, “si Pablo asin Silas namimibi asin nag-oomaw sa Dios paagi sa awit.”—Gibo 16:23-25.

May iba pa ining sinasabi manongod sa personalidad ni Silas. Sia magayagaya ta sinda nagtitios dahel sa ngaran ni Cristo. (Mateo 5:11, 12; 24:9) Malinaw na an espiritu man sanang iyan kaidtong nakaaging misyon sa Antioquia an nagpangyari ki Silas asin sa saiyang kairiba na magin epektibo sa pagparigon asin pagpakosog kan kongregasyon, na nagpagayagaya sa saindang mga kapwa Kristiano. Siertong nadugangan an kagayagayahan ni Pablo asin Silas kan sinda milagrosong makaluwas sa bilanggoan paagi sa sarong linog asin matabangan nindang tumubod sa Dios an gusto nang maghugot na bantay sa bilanggoan asin an saiyang pamilya.—Gibo 16:26-34.

Dai natakot si Pablo ni si Silas sa paghampak asin pagbilanggo. Kan ipasabi na sinda paluwason, nagsayuma sinda na humale sa Filipos nin patago huli sa pagkasopog, siring sa pagsuponer kan mga mahistrado. Nanindogan sinda asin binaliktad ninda an kamugtakan para sa arogante asin bakong makatanosan na mga opisyal na idto. “Hinampak ninda kami nin hayag na dai hinokoman, kami na mga siudadano nin Roma, asin binilanggo kami; asin ngonyan paluluwason sana kami sa hilom?” an hapot ni Pablo. “Dai nanggad! kundi pumadigdi sinda asin iluwas kami.” Natatakot sa magigin resulta, nanompongan kan mga mahistrado na sinda obligado na pakiolayan an duwa na humale sa siudad.—Gibo 16:35-39.

Sa siring pakatapos na idoon sa kaisipan kan mga autoridad an saindang mga diretso bilang Romano, sinunod ni Pablo asin Silas an kahagadan kan mga mahistrado—alagad bakong bago magpaaram sa saindang mga katood. Kaoyon kan sa ngonyan karakteristiko kan bilog na biahe sa paghuhulit, sa giraray si Silas asin an saiyang kaiba “nagparigon sa boot” kan mga tugang dangan naghale.—Gibo 16:40.

Hale sa Macedonia Pasiring sa Babilonya

Dai nademoralisar kan kutana nagin negatibong eksperyensia, si Pablo, Silas, asin an saindang kairiba nagpadagos sa bagong mga langtad sa pagmimisyonero. Sa Tesalonica may inatubang giraray sindang mga problema. Huli sa kapangganahan ni Pablo sa saiyang ministeryo sa laog nin peryodong tolong Sabbath, nagsururog an nauuring mga paratumang, kaya nagin madonong para sa mga misyonero na humale sa siudad sa banggi. Sinda nagpasiring sa Berea. Kan maaraman an mga nagibo ni Pablo asin kan saiyang kairiba sa siudad na iyan, an mga paratumang nagduruman hale pa sa Tesalonica. Si Pablo naghale na solo, mantang si Silas asin Timoteo nagdanay sa Berea tanganing asikasohon an grupo nin bagong mga interesado. (Gibo 17:1-15) Tinagbo ni Silas asin Timoteo si Pablo sa Corinto, na may darang maogmang bareta asin posibleng sarong regalo hale sa fiel na mga katood sa Macedonia. Siertong nagpangyari ini sa nagkakaipong apostol na pumondo sa sekular na trabaho, na kinua nia paramientras, asin bumalik na may bagsik sa bilog na panahon na paghuhulit. (Gibo 18:1-5; 2 Corinto 11:9) Sa Corinto, si Silas asin Timoteo inaapod man na paraebanghelyo asin bilang mga kaibaiba ni Pablo. Kaya malinaw na an saindang mga aktibidad dai man nagluwayluway sa siudad na iyan.—2 Corinto 1:19.

An paggamit kan pronombreng “kami” sa bilog na laog kan mga surat sa mga taga Tesalonica—na pareho isinurat hale sa Corinto sa peryodong ini—ipinamugtak na nangangahulogan na si Silas asin Timoteo may kabtang sa pagsurat. Minsan siring, an ideya na pagsurat an trabaho ni Silas sa pangenot basado sa sinasabi ni Pedro manongod sa saro kan saiyang mga surat. Sinasabi ni Pedro na saiyang isinurat an saiyang enot na surat “paagi ki Silvano, sarong fiel na tugang.” (1 Pedro 5:12) Minsan ngani puedeng mangahulogan sana ini na si Silvano an paradara, an pagkakalaen nin estilo kan duwang surat ni Pedro puedeng magparisa na ginamit nia si Silas bilang parasurat kan enot na surat alagad bakong kan ikaduwa. Sa siring, an saro pa sa dakol na talento asin teokratikong pribilehio ni Silas posibleng iyo an pagigin sekretaryo.

Sarong Halimbawa na Dapat Arogon

Kun kita pumondo nguna asin pensaron an mga bagay na aram niatong ginibo ni Silas, kahangahanga an saiyang rekord. Saro siang ekselenteng halimbawa para sa mga misyonero asin nagbibiaheng paraataman sa presenteng aldaw. Sia daing kapasloan na nagbiahe nin hararayo na may dakulang pagsasakripisyo sa kabtang nia, bakong tangani na magkamit nin materyal na bentaha o prestihio, kundi tanganing tabangan an iba. Katuyohan nia na parigonon an boot ninda paagi sa madonong asin mataktikang hatol, inandam na marhay asin buhay na mga diskurso, siring man kan saiyang kaigotan sa ministeryo sa langtad. Ano man an papel nindo sa tahaw kan organisadong banwaan ni Jehova, kun kamo naghihingoa man na magin positibo—dawa sa atubangan nin problema—kamo man magigin gikanan nin pamparigon sa boot para sa saindong mga kapagtubod.

[Mapa sa pahina 29]

(Para sa aktuwal na format, helingon an publikasyon)

An Ikaduwang Biahe sa Pagmimisyonero ni Pablo

An Dakulang Dagat

Antioquia

Derbe

Listra

Iconio

Troas

Filipos

Amfipolis

Tesalonica

Berea

Atenas

Corinto

Efeso

Jerusalem

Cesarea

[Pasasalamat para sa pinagkuanan]

Mountain High Maps® Copyright © 1997 Digital Wisdom, Inc.