Dai Magpadaog sa Kahaditan
“DI kamo noarin man maghadit dapit sa masunod na aldaw, huli ta an masunod na aldaw magkakaigwa kan sadiring mga kahaditan kaiyan. Igo na para sa kada aldaw an sadiring karatan kaiyan.” (Mateo 6:34) An hatol na iyan na itinao ni Jesu-Cristo tunay nanggad na praktikal para sa sato gabos na nabubuhay sa presenteng marikas asin nakakatension na sosyedad.
Pero sa realistikong paagi, posible daw na dai kita maghadit manongod sa satong mga problema, desisyon, obligasyon, asin responsibilidad? Minilyon na tawo an namomondo nin makuri, napupurisaw, asin nagagabatan. Iyan an dahelan kun taano an mga trangkilayser asin pankalmante ta nagin milyones dolyares na negosyo.
Kun Paano Paglalaenon
Kaipuhan kitang magplano asin mag-andam para sa satong mga obligasyon, asignasyon, desisyon, asin problema—baga man iyan apurado o bako. Ineenkaminar kita kan Biblia na ‘tumukaw asin kuentahon an gastos’ bago ponan an ano man na dakulang proyekto. (Lucas 14:28-30) Kabale digdi an pagturotimbang sa yaon na mga pagpipilian, pag-analisar sa posibleng mga epekto kan resulta, asin pagkuenta kan gastos kun manongod sa panahon, kosog, asin kuarta.
Minsan ngani maninigong maingat na estudyaran nin saro an posibleng mangyayari, bakong posible o dai makatatabang na hingoahon na isipon an gabos na posibilidad. Halimbawa, para sa pagigin ligtas sa peligro kan pamilya, puede nindong estudyaran kun ano an dapat gibohon enkaso magkasolo sa saindong harong. Puede kamong bumakal asin mag-instalar nin mga pandetektar sa aso asin pansigbo sa solo. Puede kamong magplano asin magpraktis nin mga luluwasan sa laen-laen na parte kan harong. Alagad ano an kalaenan kan rasonable, praktikal na pagplano asin kan labi-labi, bakong rasonableng kahaditan? An siring na kahaditan minapoon kun kamo magpoon na maghandal nin labi-labi sa daing katapusan na bilang nin teoriya sanang mga situwasyon, na an dakol kaiyan tibaad bunga sana nin pagparaimahinar. Tibaad pangibabawan kamo nin nakariribok na mga iniisip, na kinokombensir kamo na seguradong may nalingawan kamo o na bakong igo an ginibo nindo tanganing protehiran an saindong pamilya. An labi-labing kamondoan na ini na kamo mismo an nagtatao sa saindong sadiri puedeng makapagabat na marhay sa saindong isip kaya tibaad dai na kamo napapatorog huli kaiyan.
Si Moises sa Atubangan ni Faraon
Tinawan ni Jehova Dios nin masakit na asignasyon an saiyang propetang si Moises. Primero, kinaipuhan na si Moises umatubang sa mga Israelita asin kombensiron sinda na sia ninombrahan ni Jehova tanganing pangenotan sinda paluwas sa Egipto. Sunod, kinaipuhan na si Moises umatubang ki Faraon asin hagadon na togotan niang makahale an mga Israelita. Sa katapustapusi, kinaipuhan na pangenotan ni Moises an minilyon na kadaklan sa kaawagan pasiring sa sarong daga na sakop nin maisog na mga tawo. (Exodo 3:1-10) An gabos na ini puedeng nagin nakakukubhan kutana, alagad tinogotan daw ni Moises na an saiyang isip mapano nin labi-labing paghadit sa responsibilidad na ini?
Malinaw na si Moises naghadit manongod sa nagkapirang isyu. Hinapot nia si Jehova: “Halimbawa nakaabot na ako sa mga aki ni Israel asin sabihon ko sa sainda, ‘An Dios kan saindong mga apoon nagsobol sa sako digdi sa saindo,’ asin sinda magsabi sa sako, ‘Ano an ngaran nia?’ Ano an sasabihon ko sa sainda?” Itinao sa saiya ni Jehova an simbag. (Exodo 3:13, 14) Naghadit man si Moises manongod sa kun ano an puedeng mangyari kun habong maniwala sa saiya si Faraon. Sa giraray, sinimbag ni Jehova an propeta. An ultimong problema—inadmitir ni Moises na sia ‘bakong matibay magtaram.’ Paano ini mareremedyohan? Itinao ni Jehova si Aaron tanganing iyong magtaram para ki Moises.—Exodo 4:1-5, 10-16.
Andam na sa simbag sa saiyang mga hapot asin may pagtubod sa Dios, ginibo ni Moises an sono sa ipinagboot ni Jehova. Imbes na pasakitan an saiyang sadiri nin makatatakot na mga iniisip sa kun ano an puedeng mangyari kun atubangon na nia si Faraon, “siring nanggad an ginibo” ni Moises. (Exodo 7:6) Kun nagpadaog sia sa mga kahaditan, pinaluya nanggad kutana kaini an pagtubod asin kapusoan na kaipuhan sa paggibo kan asignasyon sa saiya.
An timbang na paagi nin pag-otob ni Moises sa asignasyon sa saiya sarong halimbawa kan inapod ni apostol Pablo na “marahay na kaisipan.” (2 Timoteo 1:7; Tito 2:2-6) Kun dai ginibo ni Moises na magin marahay an saiyang kaisipan, sia pasil sana kutanang pinangibabawan na gayo kan kadakulaan kan asignasyon sa saiya kaya posibleng dai kutana nia iyan inako.
Pagkontrol sa Saindong mga Iniisip
Ano an reaksion nindo kun sa aroaldaw na buhay nindo kamo mapaatubang sa mga pagbalo sa saindong pagtubod o sa mga kasakitan? Kamo daw may tendensiang mataranta na an iniisip sana iyo an mga balakid asin kadepisilan na yaon sa enotan? O minamansay daw nindo iyan sa timbang na paagi? Siring sa sasabihon nin nagkapira, ‘Dai nindo pag-atubangon an problema sagkod na mayo pa iyan.’ Tibaad dai man ngani kaipuhan na atubangon an imahinasyon sanang problema na iyan! Kaya taano ta pasasakitan an sadiri sa sarong bagay na tibaad dai noarin man mangyayari? An Biblia nagsasabi: “An kahaditan sa puso nin tawo iyo an mapaduko dian.” (Talinhaga 12:25) An resulta sa parate iyo na magpapanuodma an saro sa paggibo nin desisyon, na nagdidigson sagkod na huri nang marhay.
An mas masakit iyo an espirituwal na danyos na puedeng ibunga kan labi-labing kahaditan. Sinabi ni Jesu-Cristo na an pagpahalaga sa “tataramon kan kahadean” puedeng biyong mapogolan kan mapandayang kapangyarihan nin kayamanan asin kan “kahaditan kan palakaw na ini nin mga bagay.” (Mateo 13:19, 22) Kun paanong an mga tonok puedeng makaolang sa mga banhi na tumalubo nin husto asin mamunga, an dai kinokontrol na kahaditan puede man na makaolang sa sato na umoswag sa espirituwal asin mamunga sa kaomawan nin Dios. An sadiring gibo, mapanlaglag na labi-labing kamondoan nakapogol pa ngani sa nagkapira sa pagdusay kan saindang sadiri ki Jehova. Naghahadit sinda, ‘Paano kun dai ko maotob an sakong pagdusay?’
Sinabihan kita ni apostol Pablo na sa satong espirituwal na pakikilaban, kita naghihingoa na darahon “an lambang kaisipan sa pagkabihag tanganing iyan magin makinuyog ki Cristo.” (2 Corinto 10:5) An satong pangenot na kaiwal, si Satanas na Diablo, maoogmang marhay na aprobetsaran an satong mga kahaditan tanganing padesganaron kita asin paluyahon kita sa pisikal, emosyonal, asin espirituwal. Eksperto sia sa paggamit nin mga pagduda tanganing siloon an mga dai nagmamaan. Iyan an dahelan na pinatanidan ni Pablo an mga Kristiano na dai ‘tawan nin lugar an Diablo.’ (Efeso 4:27) Bilang an “dios kan palakaw na ini nin mga bagay,” mapangganang “binuta [ni Satanas] an isip kan mga dai nagtutubod.” (2 Corinto 4:4) Dai noarin man logod niato sia pagtogotan na kontrolon an satong isip!
May Makukuang Tabang
Kun napapaatubang sa mga problema an sarong aki puedeng dumolok sa sarong mamomoton na ama asin mag-ako nin giya asin pagranga. Kaagid kaiyan, puede niatong irani sa satong langitnon na Ama, si Jehova, an satong mga problema. Sa katunayan, inaagda kita ni Jehova na itao sa saiya an mga pagabat sa sato asin mga kahaditan. (Salmo 55:22) Arog nin sarong aki na dai na naghahadit manongod sa saiyang mga problema pakatapos na mag-ako sia nin asegurasyon hale sa saiyang ama, maninigo na bako sanang itao niato ki Jehova an mga pagabat sa sato kundi ipabaya iyan sa saiya.—Santiago 1:6.
Paano niato itinatao ki Jehova an satong mga kahaditan? An Filipos 4:6, 7 minasimbag: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.” Iyo, bilang simbag sa satong daing ontok na pamimibi asin pagngayongayo, si Jehova puedeng magtao sa sato nin panlaog na katrangkilohan na maprotehir sa satong isip na dai mapurisaw sa dai kaipuhan na mga kahaditan.—Jeremias 17:7, 8; Mateo 6:25-34.
Pero tanganing makaoyon sa satong mga pamibi, maninigo na dai niato isuhay an satong sadiri, baga man sa pisikal o mental. (Talinhaga 18:1) Imbes, marahay na estudyaran ta an mga prinsipyo asin giya sa Biblia na may koneksion sa satong problema, sa siring linilikayan an pagsarig sa satong sadiring pakasabot. (Talinhaga 3:5, 6) An mga hoben asin gurang pareho puedeng kumonsulta sa Biblia asin mga publikasyon kan Watch Tower para sa supisyenteng impormasyon mapadapit sa pagdedesisyon asin pagresolber sa mga problema. Dugang pa, sa Kristianong kongregasyon, binendisyonan kita nin madonong asin may kabatidan na kamagurangan asin iba pang maygurang na Kristiano na pirmeng andam na makipag-olay sa sato. (Talinhaga 11:14; 15:22) An mga bakong imbuelto sa emosyonal na paagi asin igwa kan kaisipan nin Dios dapit sa sarong bagay parate na puedeng makatabang sa sato na mansayon an satong mga problema sa ibang anggulo. Asin minsan ngani dai sinda madesisyon para sa sato, sinda puedeng magin dakulang gikanan nin pamparigon sa boot asin suporta.
“Maghalat Ka sa Dios”
Daing siisay man na makakanegar na husto na an tension sa pag-atubang sa talagang yaon na mga problema niato kada aldaw kaya dai na iyan dapat dagdagan pa paagi sa paghadit manongod sa imahinasyon na mga problema. Kun kita nahahandal asin dai mapamugtak huli sa paghadit dapit sa tibaad mangyari, kun siring dumolok kita ki Jehova paagi sa pamibi asin pagngayongayo. Kumonsulta sa saiyang Tataramon asin organisasyon para sa giya, kadonongan, asin marahay na kaisipan. Manonompongan niato na ano man an magin situwasyon, may makukuang tabang sa pag-atubang kaiyan.
Nagagabatan asin purisaw, an salmista nag-awit: “Taano ta namomondo ka, O kalag ko, asin taano ta nariribok ka sa laog ko? Maghalat ka sa Dios, huli ta pag-oomawon ko pa sia bilang an dakulang kaligtasan kan sakong pagkatawo asin bilang sakuyang Dios.” (Salmo 42:11) Iyan logod an satong magin saboot.
Iyo, magplano para sa rasonableng puedeng laoman, asin ipabaya ki Jehova an mga pagkanorongod. “Ibugtak nindo an gabos nindong kahaditan sa saiya, huli ta sia may pagmakolog sa saindo.”—1 Pedro 5:7.
[Retrato sa pahina 23]
Arog ki David, ibinubugtak daw nindo ki Jehova an mga pagabat sa saindo asin mga kahaditan?