Pag-otob sa Sakong Panuga na Maglingkod sa Dios

ISINAYSAY NI FRANZ GUDLIKIES

Apat sana sa sakong grupo nin labing sanggatos na soldados an natadang buhay. Napapaatubang sa kagadanan, luminuhod ako asin nanuga sa Dios, ‘Kun makaligtas ako sa guerra, pirme akong maglilingkod sa saimo.’

IPINANUGA ko iyan kaidtong 54 taon na an nakaagi, kan Abril 1945, kan ako soldados sa hukbong Aleman. Idto kan madali nang matapos an Guerra Mundial II, asin an hukbong Sobyet todo-todo an pagsalakay pasiring sa Berlin. An samong mga tawohan nakapuesto harani sa banwaan nin Seelow sa Salog nin Oder, mayo pang 65 kilometros hale sa Berlin. Duman kami aldaw-banggi na pinapaputokan nin makosog na artileriya, asin dakol sa sakong grupo an nagagadan.

Sa kaenot-enote sa sakong buhay, kaidto ko dai napogolan an sakong sadiri asin namibi ako na nagluluha sa Dios. Nagirumdoman ko an sarong teksto sa Biblia na parateng kinokotar kan sakong matatakton sa Dios na ina: “Apoda ako sa aldaw nin kapurisawan. Ililigtas taka, asin pamumurawayon mo ako.” (Salmo 50:15) Duman sa mga trintsera asin natatakot na magadan, sinabi ko an sinambit sa enotan na panuga sa Dios. Paano ko nahimong otobon iyan? Asin taano ako ta nagin miembro kan hukbong Aleman?

Pagdakula sa Lituania

Kan 1918, durante kan Guerra Mundial I, idineklarar kan Lituania an independensia kaiyan asin inestablisar an demokratikong sistema nin gobyerno. Namundag ako kan 1925 sa distrito nin Memel (Klaipėda) harani sa Dagat Baltico. An distrito ininkorporar pa sana sa Lituania kan taon bago ako namundag.

Kami kan sakong limang tugang na babae maogma kan aki pa. Si Tatay garo dayupot na katood, na pirmeng ipinag-iibaiba kaming mga aki. An samong mga magurang miembro kan Iglesia Ebangheliko, alagad dai sinda nag-atender sa mga seremonya huli ta si Nanay anggot sa pagsaginsagin kan ministro. Pero, namotan nia an Dios asin an saiyang Tataramon, an Biblia, na mahilig niang basahon.

Kan 1939, sinakop kan Alemania an parte kan Lituania na ineerokan mi. Dangan, sa pagpoon kan 1943, inapod ako para sa serbisyo militar sa hukbong Aleman. Naerido ako sa saro sa mga ralaban, alagad pakatapos na rumahay sa mga pagkaerido, nagbalik ako sa Labanan sa Sirangan. Kan panahon na ini iba na an dalagan kan guerra asin an mga Aleman nag-aatras na sa hukbong Sobyet. Kaidto ako dikit pang magadan, na isinaysay sa introduksion.

Pag-otob sa Sakong Panuga

Durante kan guerra, an mga magurang ko nagbalyo sa Oschatz, Alemania, na yaon sana sa timog-sirangan nin Leipzig. Huli sa epekto kan guerra, masakit na hanapon sinda. Alagad sa katapustapusi abaang ogma niamo na magkairibahan giraray! Dai nahaloy pakatapos kaiyan, kan Abril 1947, nag-iba ako ki Nanay sa sarong pampublikong pahayag na itinao ni Max Schubert, saro sa Mga Saksi ni Jehova. Nagtubod si Nanay na nanompongan na nia an tunay na relihion, asin pakatapos na umatender sa pirang pagtiripon, pareho na kami nin paniniwala.

Dai nahaloy pakatapos kaiyan, nahulog si Nanay sa sarong eskalera, na ikinaerido asin ikinagadan nia pakalihis nin pirang bulan. Mantang nasa ospital bago sia nagadan, may init na pinarigon nia an sakong boot: “Parate kong ipinamibi na logod kisuerra saro sa sakong mga aki makanompong kan dalan pasiring sa Dios. Ngonyan naheheling ko na sinimbag an sakong mga pamibi, asin puede na akong magadan na matoninong.” Kanigoan an pag-antisipar ko sa panahon na si Nanay mabangon sa kagadanan asin maaraman nia na naotob an saiyang mga pamibi!—Juan 5:28.

Kan Agosto 8, 1947, apat na bulan sana pakatapos na madangog an pahayag ni Tugang na Schubert, nabautismohan ako sa sarong asamblea sa Leipzig bilang simbolo kan sakong pagdusay ki Jehova Dios. Sa katapustapusi pinoponan ko nang otobon an sakong panuga sa Dios. Dai nahaloy ako nagin payunir, an apod sa bilog na panahon na mga ministro kan Mga Saksi ni Jehova. Kan panahon na idto haros 400 na payunir an nag-eerok sa kan huri nagin Aleman na Republika Demokratika, o Sirangan na Alemania.

Enot na mga Pagbalo sa Pagtubod

An sarong kataed sa Oschatz nagprobar na enganyaron ako sa Marxismo, na inaalok ako nin edukasyon sa unibersidad na sustentado kan Estado kun ako maayon sa Partido sa Pagkasararong Sosyalista kan Alemania (SED). Sinayumahan ko an alok, siring kan pagsayuma ni Jesus sa alok ni Satanas.—Mateo 4:8-10.

Sarong aldaw kan Abril 1949, duwang pulis an nagduman sa pinagtatrabawohan ko asin hinagad na umiba ako sa sainda. Dinara ako sa lokal na opisina kan serbisyo sa pagtipon nin sekretong impormasyon kan Sobyet kun saen inakusar ako nin pagtrabaho para sa mga kapitalista sa Solnopan. An sabi ninda, puede kong patunayan an sakong pagigin inosente paagi sa pagpapadagos kan sakong pagharongharong alagad isusumbong ko sa sainda an siisay man na negatibo an sinasabi manongod sa Unyon Sobyet o sa SED o an siisay man na nagduduman sa mga pagtiripon kan Mga Saksi ni Jehova. Kan magsayuma ako na makikooperar, ibinilanggo ako sa sarong selda. Kan huri, dinara ako sa garo korte militar. An sentensia sa sako: 15 taon nin puersahan na pagtrabaho sa Siberia!

Nagdanay akong kalmado, asin hinangaan iyan kan mga opisyal. Dangan sinabihan ninda ako na an sentensia sa sako magdadanay na balido alagad igo na daa na ako magreport sarong beses kada semana sagkod na ako andam nang makikooperar sa sainda. Huling gusto kong hagadon an konseho nin mas maygurang na mga Saksi, nagbiahe ako pasiring sa Magdeburg, an lugar kaidto kan sangang opisina kan Watch Tower Society. Bakong pasil an biahe, huli ta ako minamanmanan. Si Ernst Wauer, na naglilingkod sa Departamento Legal sa Magdeburg, nagsabi sa sako: “Lumaban ka asin manggagana ka. Makikompromiso ka asin madadaog ka. Iyan an samong nanodan sa kampo de konsentrasyon.”a An konsehong iyan nakatabang sa sako na otobon an sakong panuga na maglingkod sa Dios.

Pagprohibir Asin Pagkaarestar Liwat

Kan Hulyo 1950, irinekomendar ako na maglingkod bilang nagbibiaheng paraataman. Minsan siring, kan Agosto 30, sinakyada kan mga pulis an samong solar sa Magdeburg, asin iprinohibir an samong paghuhulit. Kaya naliwat an sakong asignasyon. Kami ni Paul Hirschberger maglilingkod sa mga 50 kongregasyon, na mga duwa o tolong aldaw sa kada kongregasyon, na tinatabangan an mga tugang na magin organisado sa pagpadagos kan saindang ministeryo sa irarom nin pagprohibir. Kan sumunod na mga bulan, anom na beses akong nakadulag sa pag-arestar kan mga pulis!

Sa saro kan mga kongregasyon may nakalaog na pinasaloiban kami sa Stasi, an Serbisyo sa Seguridad kan Estado. Sa siring, kan Hulyo 1951, kami ni Paul inarestar sa tinampo nin limang lalaki na may kapot na mga badil. Sa paggirumdom, naheling mi na dai kami nagsarig sa organisasyon ni Jehova na maninigo mi kutanang ginibo. Pinatanidan na kami kan samong mas matuang mga tugang na lalaki na nungkang magbiahe na magkaibanan. An sobrang kompiansa nagresulta sa pagkawara kan samong katalingkasan! Dugang pa, dai mi napag-olayan nin patienot kun ano an sasabihon kun kami arestaron.

Nagsosolo sa sakong selda, nagluluha akong nakimaherak ki Jehova na logod tabangan ako na dai ko mapasaloiban an sakong mga tugang o ikakompromiso an sakong pagtubod. Kan makatorog na ako, bigla akong napagmata huli sa boses kan sakong katood na si Paul. Nasa itaas sana kan sakong selda an kuarto kun saen sia inuusisa kan Stasi. Huling maalingahot asin maarasahas an banggi, bukas an pinto sa balkon, asin haros gabos nadadangog ko. Kan huri, kan ako usisahon, pareho an mga isinimbag ko, na ikinabigla kan mga opisyal. An paboritong teksto sa Biblia ni Nanay, na “Apoda ako sa aldaw nin kapurisawan. Ililigtas taka,” pirmeng nagsasabong sa isip ko, asin naparigon na marhay an boot ko.—Salmo 50:15.

Kasunod kan pag-usisa, kami ni Paul naglimang bulan na detenido bago bistahon sa bilanggoan nin Stasi sa Halle asin kan huri sa Magdeburg. Mantang nasa Magdeburg, paminsanminsan nagsasabong sa isip ko an kaidto sirradong mga pasilidad kan samong sangang opisina. Minawot ko na kutana nagtatrabaho ako duman imbes na nakabilanggo! Kan Pebrero 1952 iinanunsiar an sentensia sa samo: “10 taon sa bilanggoan asin 20 taon na mayo kan mga diretso sibil.”

Pagdadanay na May Pagtubod sa Bilanggoan

An mga Saksi ni Jehova na sinentensiahan nin kisuerra sampulong taon may napapalaen na identipikasyon sa laog nin pirang panahon ninda sa bilanggoan. Sarong pulang laso an itinahi sa sarong tabay kan sarwal asin sa sarong takyag kan samong diaket. Siring man, sarong sadit, bilog na pidaso nin pulang karton an ikinabit sa luwas kan pinto kan samong selda tanganing patanidan an mga guardia na kami peligrosong kriminal.

An totoo an mga autoridad ibinilang kami na pinakamaraot na kriminal. Dai kami tinogotan na magkaigwa nin Biblia huli ta siring sa ipinaliwanag nin sarong guardia: “An saro sa Mga Saksi ni Jehova na may kapot na Biblia siring sa sarong kriminal na may kapot na badil.” Tanganing makatipon nin mga kapidaso kan Biblia, binasa mi an mga isinurat kan Rusong parasurat na si Leo Tolstoy, na pirmeng nagkokotar nin mga teksto sa Biblia sa saiyang mga libro. Tinuom mi an mga tekstong ini sa Biblia.

Bago ako inarestar kan 1951, nakatrato ko si Elsa Riemer. Parate nia akong sinosongko sa bilanggoan sagkod na mapupuede asin pinadadarahan ako nin mga parsel nin pagkakan sarong beses kada bulan. Nagtago man sia nin espirituwal na kakanon sa saiyang parsel. Sarong beses, ilinaog nia sa nagkapirang longganisa an mga artikulo hale sa sarong Torrengbantayan. Parateng ginigiris kan mga guardia an mga longganisa tanganing helingon kun igwang nakatago sa laog, alagad ngonyan an parsel nag-abot kan madali nang matapos an aldaw nin pagtrabaho, asin dai iyan siniyasat.

Kan panahon na idto, kami ni Karl Heinz Kleber may kaibang tolong preso na bakong Saksi sa sarong sadit na selda. Paano mi babasahon An Torrengbantayan na dai kami maheheling? Bueno, nagsagin kaming nagbabasa nin sarong libro, alagad sa laog itinago mi an mga artikulo kan Torrengbantayan. Ipinasa mi man an mahalagang marhay na espirituwal na pagkakan na ini sa mga kapwa Saksi sa bilanggoan.

Mantang nasa bilanggoan inaprobetsaran mi man an mga oportunidad na sabihon sa iba an manongod sa Kahadean nin Dios. Naogma ako na maheling an saro sa sakong mga kapwa preso na nagtubod bilang resulta.—Mateo 24:14.

Pagbalik sa Bilog na Panahon na Ministeryo

Kan Abril 1, 1957, pakalihis nin haros anom na taon sa bilanggoan, pinaluwas ako. Pakaagi nin mayo pang duwang semana, pinakasalan ko si Elsa. Kan mabaretaan kan Stasi an pagluwas ko, naghanap sinda nin sarahotan na ikabalik ako sa karsel. Tanganing malikayan an posibilidad na iyan, buminalyo kami ni Elsa sa linderos tanganing mag-erok sa Solnopan na Berlin.

Pag-abot mi sa Solnopan na Berlin, boot na maaraman kan Sosyedad an samong mga plano. Ipinaliwanag mi na an saro sa samo magpapayunir mantang an saro magtatrabaho nin sekular.

“Ano sa pagmate nindo kun pareho kamo magin payunir?” an hapot sa samo.

“Kun iyan posible,” an simbag mi, “mapoon tolos kami.”

Sa siring tinawan kami nin sadit na paragastos kada bulan tanganing tabangan kaming masustentohan an samong sadiri, asin nagpoon kaming maglingkod bilang espesyal payunir kan 1958. Kanigoan an kagayagayahan mi na maheling an mga indibiduwal na inadalan mi sa Biblia na magbago kan saindang buhay tanganing magin mga lingkod ni Jehova! An sunod na sampulong taon sa paglilingkod bilang espesyal payunir nagtokdo sa samo na magtinabangan na gayo bilang mag-agom. Si Elsa pirmeng nasa kataed ko, dawa kun naghihirahay ako kan kotse. Kami magkaibanan man na nagbabasa, nag-aadal, asin namimibi.

Kan 1969 iinasignar kami sa gibohon na nagbibiahe, na sinosongko an ibang kongregasyon kada semana tanganing maglingkod sa mga pangangaipo kan mga miembro kaiyan. Si Josef Barth, sarong lalaki na eksperyensiado sa gibohon na nagbibiahe, itinao sa sako an konsehong ini: “Kun gusto mong magin mapanggana sa saimong asignasyon, magin ka sanang tugang sa mga tugang.” Hiningoa kong iaplikar an konsehong iyan. Bilang resulta, nagkaigwa kami nin maogmang marhay asin may pagkaoroyon na relasyon sa mga kapwa Saksi, na nagpagin pasil sa pagtao nin hatol kun iyan kinakaipuhan.

Kan 1972, nadiskobre na si Elsa igwa nin kanser asin inoperaran. Kan huri, nagkarayuma man sia. Minsan ngani nagtitios nin kolog, nag-iiba pa giraray sia sa sako kada semana, na naglilingkod sa mga kongregasyon, naghuhulit kaiba kan mga tugang na babae sa ministeryo sagkod na kaya nia.

Kinakaipuhan na mga Pagliliwat

Kan 1984 an sakong mga panugangan nangaipo nin dayaday na pag-ataman, kaya binayaan mi an gibohon na nagbibiahe tanganing tumabang na atamanon sinda sagkod kan sinda magadan pakalihis nin apat na taon. (1 Timoteo 5:8) Dangan, kan 1989, si Elsa naghelang nin grabe. Nakaoogma, medyo nagrahay sia, alagad kinaipuhan na ako an mag-asikaso kan gabos na gibohon sa harong. Sagkod ngonyan pinag-aadalan ko an pagtao nin atension sa saro na pirmeng may makolog. Pero, sa ibong kan tension asin sakit, napagdanay mi an samong pagkamoot sa espirituwal na mga bagay.

Ngonyan, marahay ta payunir pa kami. Minsan siring, nasabotan mi na an mahalaga, bakong an samong kamugtakan o kun gurano kadakol kan samong nagigibo, kundi an pagdadanay mi na fiel. Boot ming maglingkod sa samong Dios, si Jehova, bako sanang nin pirang taon, kundi sagkod sa panahon na daing sagkod. An samong eksperyensia nagin marahayon na pagsasanay para sa ngapit. Asin si Jehova tinawan kami kan kosog tanganing omawon sia dawa sa pinakamasakit na mga kamugtakan.—Filipos 4:13.

[Nota sa Ibaba]

[Retrato sa pahina 23]

Nabilanggo ako digdi sa Magdeburg

[Pasasalamat para sa pinagkuanan]

Gedenkstätte Moritzplatz Magdeburg für die Opfer Politischer Gewalt; Foto: Fredi Fröschki, Magdeburg

[Retrato sa pahina 23]

Kan kami kasalon kan 1957

[Retrato sa pahina 23]

Kaibanan si Elsa ngonyan