Dai Pagkapantaypantay—Iyan daw an Intension nin Dios?

An simbag sa sarong tataramon bako. Helingon ta kun taano.

INTENSION nin Dios na an gabos na tawo magkaigwa nin pantay-pantay na mga oportunidad sa pagkamit nin buhay asin kaogmahan. Mapadapit sa paglalang sa tawo, mababasa ta: “An Dios nagpadagos sa pagsabi: ‘Gibohon niato an tawo sa satong ladawan, kasugad niato, asin ipasakop sa sainda an mga sira sa dagat asin an naglalayog na mga linalang sa kalangitan asin an magarong mga hayop asin an bilog na daga patin an lambang naghihirong hayop na naghihiro sa ibabaw kan daga.’” Kan matapos an paglalang digdi sa daga, “naheling nin Dios an gabos niang ginibo asin, uya! idto marahayon.”—Genesis 1:26, 31.

Ikapahahayag daw nin Dios na “marahayon” an mamondong kamugtakan nin dai pagkapantaypantay ngonyan? Dai nanggad, huli ta “an Dios pagkamoot.” (1 Juan 4:8 ) Sinasabi na sia “daing ipinaoorog” asin na “sangkap an saiyang gibo, huli ta an gabos niang dalan hustisya. Dios nin pagigin fiel, na dian sa saiya mayo nin inhustisya; matanos asin tanos sia.” (Deuteronomio 10:17; 32:4; ikomparar an Job 34:19.) Asin si apostol Pedro nagkonklusyon: “Sa katotoohan ako nakaiisi na an Dios daing ipinaoorog, kundi sa lambang nasyon an tawo na natatakot sa saiya asin naggigibo nin katanosan saiyang inaako.”—Gibo 10:34, 35.

Mantang an Dios mamomoton, mayong ipinaoorog, makatanosan, tanos sa moral, asin matanos, paano niang malalalang an mga tawo na katambay an dai pagkapantaypantay kun dapit sa saindang diretso na magkamit nin kaogmahan? Magigin biyong kontra sa saiyang personalidad na togotan an pagpalaenlaen sa tahaw nin mga tawo asin na ibugtak sinda sa sarong areglo nin dai pagkapantaypantay. Intension nia na sinda gabos ‘mamundag na talingkas asin pantay-pantay sa dignidad asin sa mga diretso.’ Pero ngonyan malinaw na bakong siring kaiyan an kamugtakan. Taano ta bako?

An Ginikanan nin Dai Pagkapantaypantay

An pagkalalang nin Dios sa mga tawo na magin pantay-pantay dai nangangahulogan na intension nia na sinda gabos magin pantay-pantay sa gabos na bagay. Puede sindang magkalaenlaen sa mga talento, interes, asin personalidad. Puede man sindang magkalaenlaen sa posisyon o grado nin autoridad. Halimbawa, an lalaki asin babae bakong pantay sa gabos na bagay, kundi linalang nin Dios an babae “bilang komplemento” kan lalaki. (Genesis 2:18) An mga magurang asin an mga aki malinaw na magkalaen an autoridad. Minsan siring, sa ibong kan mga pagkalaenlaen na ini, an gabos—lalaki, babae, asin aki—magkakamit nin pantay-pantay na mga oportunidad na panigoan an pundamental na mga kahagadan para sa kaogmahan bilang diretso na tao nin Dios. Sinda gabos magkakamit nin pantay-pantay na dignidad asin kamugtakan sa atubangan nin Dios.

Kaagid kaiyan, an espiritung mga aki nin Dios, na linalang bago an mga tawo, tinawan nin laen-laen na asignasyon asin responsibilidad. (Genesis 3:24; 16:7-11; Isaias 6:6; Judas 9) Minsan siring, sa laog kan mga limitasyon kan itinao sa sainda, an gabos nagkamit kan mga probisyon na itinao nin Dios para sa buhay asin kaogmahan sa pantay-pantay na sokol. Sa siring ipinababanaag ninda an dai pagpaorog nin Dios sa marahayon na paagi.

Makamomondo, an sarong espiritung linalang dai nakontento sa daing ipinaoorog na areglo nin Dios. Ginusto nia an labi pa kisa itinao sa saiya nin Dios, na naghihimuyawot nin mas halangkaw na posisyon. Paagi sa pagpatalubo kan salang kamawotan na ini, ginibo nia an saiyang sadiri na karibal ni Jehova, na bilang an Kaglalang tama sanang magkapot kan posisyon na supremo sa gabos. An rebeldeng espiritung aki nin Dios na ini sa huri sinutsutan an mga tawo na hagadon sa Dios an labi sa itinao Nia sa sainda. (Genesis 3:1-6; ikomparar an Isaias 14:12-14.) Sa siring, an probisyon ni Jehova para sa mga tawo na magkamit nin buhay asin kaogmahan garo baga biglang nawaran nin pagkatimbang. An espiritung rebelde na ini, na ipinamidbid kan Kapahayagan 20:2 bilang “an Diablo asin Satanas,” nagin an maraot na pundador kan dai pagkapantaypantay nin tawo.

Mababago Pa daw an Situwasyon?

An simbag sa sarong tataramon iyo!

Alagad siisay an makapangyayari kan minamawot na mga pagbabago? An mga namomoon na tawo, na an nagkapira daing duwa-duwa na biyong sinsero, maigot na naghingoa sa laog nin dakol na siglo na magibo iyan. Limitado an saindang kapangganahan, na minagiya sa dakol na tawo na magkonklusyon na bakong realistiko na laoman na mareresolberan pa an problema nin dai pagkapantaypantay nin tawo. Minsan siring, an punto de vista nin Dios nasusurat sa Isaias 55:10, 11: “Kun paanong an oran minaibaba, asin an niebe, hale sa kalangitan asin dai na minabalik dian, sagkod na dai kaiyan tookon an daga asin papangyarihon iyan na magbunga asin magtubo, asin tawan nin banhi an parasabwag asin nin tinapay an makakan, magigin siring man an sakong tataramon na magluwas sa sakong ngoso. Dai iyan mabalik sa sako na daing laog, kundi gigibohon nanggad kaiyan an sakong boot, asin iyan siertong magigin mapanggana sa sakuyang sinobolan kaiyan.”

Nakararanga nanggad na maaraman na si Jehova Dios hayag na nagsabi na ootobon nia an saiyang orihinal na katuyohan na tawan nin pantay-pantay na mga oportunidad para sa buhay asin kaogmahan an gabos na tawo! Bilang Dios nin katotoohan, inobligar nia an saiyang sadiri na otobon an saiyang ipinanuga. Marahay sana ta sia igwa kan kabotan sagkod kakayahan na gibohon iyan. Paano nia gigibohon ini?

An simbag nasa Kahadean na itinokdo ni Jesu-Cristo na ipamibi kan gabos niang parasunod: “Ama niamo na nasa langit, . . . Dumatong logod an kahadean mo. Gibohon logod an boot mo, kun paano sa langit, siring man sa daga.” (Mateo 6:9, 10) Iyo, an Kahadean nin Dios an kasangkapan na gagamiton ni Jehova sa ‘pagronot asin pagtapos kan gabos na ining kahadean na yaon ngonyan, asin iyan mismo magdadanay sagkod sa mga panahon na daing talaan.’—Daniel 2:44.

Sakop kan pamamahala kan langitnon na Kahadean, matunga an sarong bagong sosyedad nin tawo. Mapadapit digdi, si apostol Juan nagsurat sa huring libro kan Biblia, an Kapahayagan: “Naheling ko an sarong bagong langit asin sarong bagong daga; huli ta nakalihis na an dating langit asin an dating daga.” (Kapahayagan 21:1) Mawawara na an mandatang mga aspekto nin dai pagkapantaypantay—an kadukhaan, helang, ignoransia, pagpalaenlaen, asin iba pang kasakitan nin tawo.a

Sa laog nin labi nang sarong siglo, dinadara kan Mga Saksi ni Jehova an atension kan mga tawo sa Kahadean na iyan. (Mateo 24:14) Paagi sa mga babasahon asin personal na tabang, sinda naghingoang tabangan an mga tawo na magkaigwa nin kaaraman dapit sa katuyohan nin Dios na nasusurat sa Biblia. Minsan siring, an saindang gibong pagtotokdo sa bilog na kinaban bako sanang nagtao sa mga tawo kan paglaom na mabuhay na may pagkapantaypantay asin kaogmahan sa ngapit kundi nagbunga man nin mga pakinabang ngonyan mismo sa pagpapondo sa damat nin dai pagkapantaypantay. Helingon niato kun paano.

[Nota sa Ibaba]

[Blurb sa pahina 5]

Intension nin Dios na an gabos na tawo magkaigwa nin pantay-pantay na mga oportunidad para sa buhay asin kaogmahan