Sobra daw an Hinahagad sa Sato ni Jehova?

“Anong balos an hinahagad sa saimo ni Jehova kundi na gumibo ka nin hustisya asin mamoot sa kabootan asin na magin hababa an boot sa paglakaw sa kaibahan kan saimong Dios?”—MIQUEAS 6:8.

1. Ano daw an tibaad dahelan kun taano an nagkapira ta dai naglilingkod ki Jehova?

SI Jehova may hinahagad sa saiyang banwaan. Alagad pakatapos na basahon an nasambitan na teksto na kinotar sa hula ni Miqueas, puedeng ikonklusyon nanggad nindo na an mga kahagadan nin Dios rasonable. Minsan siring, dakol an dai naglilingkod sa satong Kaharohalangkaweng Kaglalang, asin an nagkapira na naglingkod kaidto sa saiya nagpondo na. Taano? Huli ta iniisip ninda na sobra an hinahagad sa sato nin Dios. Sobra daw? O tibaad may problema sa saboot nin saro dapit sa kahagadan ni Jehova? An sarong tala sa kasaysayan nagtatao nin pakarorop sa bagay na ini.

2. Siisay si Naaman, asin ano an ipinagibo sa saiya kan propeta ni Jehova?

² An hepe militar nin Siria na si Naaman igwa nin daot, alagad sinabihan sia na igwa nin propeta ni Jehova sa Israel na makakapaomay sa saiya. Kaya si Naaman asin an saiyang kairiba nagduman sa Israel asin sa katapustapusi uminabot sa harong kan propeta nin Dios na si Eliseo. Imbes na lumuwas sa saiyang harong tanganing taratarahon an saiyang prominenteng bisita, si Eliseo nagsugo nin surogoon na sabihan si Naaman: “Magkarigos ka nin makapito sa Jordan tanganing an saimong laman maulian dian sa saimo; asin magin ka malinig.”—2 Hade 5:10.

3. Taano ta sa primero habong gibohon ni Naaman an hinagad ni Jehova?

³ Kun sinunod ni Naaman an kahagadan na sinabi kan propeta nin Dios, maoomayan sia sa nakaririmarima nin makuring helang. Kun siring, sobra daw an hinagad sa saiya ni Jehova? Bako man. Pero, habong gibohon ni Naaman an kahagadan ni Jehova. “Bako daw na an Abana asin an Farpar, an mga salog nin Damasco, orog karahay kisa gabos na katubigan nin Israel?” an reklamo nia. “Dai daw ako puedeng magkarigos sa sainda asin sierto nanggad na magin malinig?” Huli kaiyan, huminale si Naaman na anggot.—2 Hade 5:12.

4, 5. (a) Ano an balos sa pagkuyog ni Naaman, asin ano an reaksion nia kan akoon iyan? (b) Ano an satong eestudyaran ngonyan?

⁴ Ano talaga an problema ni Naaman? Bakong ta masakit na marhay na otobon an kahagadan. An mga surogoon ni Naaman mataktikang nagsabi: “Kun dakulang bagay an itinaram sa saimo kan propeta, bako daw na gigibohon mo iyan? Kun siring, gurano pa daw ngonyan na sia nagsabi sa saimo, ‘Magkarigos ka asin magigin kang malinig’?” (2 Hade 5:13) An problema iyo an aktitud ni Naaman. Inisip nia na dai sia trinatar na may dignidad na maninigo sa saiya asin na may ipinagigibo sa saiya na garo baga sa heling nia daing epekto asin makasosopog. Minsan siring, si Naaman naghimate sa mataktikang hatol kan saiyang mga surogoon asin luminadop nin makapito sa Salog nin Jordan. Imahinara an saiyang kagayagayahan kan “an saiyang laman naulian arog kan laman nin sarong omboy na lalaki asin sia nagin malinig”! Napano sia nin pagpasalamat. Dugang pa, sinabi ni Naaman na poon kaidto, mayo na siang ibang dios na sasambahon kundi si Jehova.—2 Hade 5:14-17.

⁵ Sa bilog na kasaysayan nin tawo, hinagad ni Jehova sa mga tawo na sumunod sa laen-laen na regulasyon. Inaagda mi kamo na estudyaran an nagkapira kaini. Mantang ginigibo nindo iyan, hapota an saindong sadiri kun ano kutana an nagin reaksion nindo kun hinagad ni Jehova na gibohon nindo an siring na mga bagay. Sa huri, sisiyasaton niato kun ano an hinahagad sa sato ni Jehova ngonyan.

An Kahagadan ni Jehova kan Nakaagi

6. Ano an ipinagibo sa enot na tawong mag-agom, asin ano daw kutana an reaksion nindo sa siring na instruksion?

⁶ Pinagbotan ni Jehova an enot na tawong mag-agom, si Adan asin Eva, na mangaki, sakopon an daga, asin sakopon an mga hayop. An lalaki asin an saiyang agom binendisyonan man nin mahiwas na arog-parkeng erokan. (Genesis 1:27, 28; 2:9-15) Alagad igwa nin restriksion. Dai sinda dapat kumakan sa sarong kahoy, saro na kabilang sa dakol na namumungang kahoy sa tatamnan nin Eden. (Genesis 2:16, 17) Bako iyan na paghagad nin sobra, bako daw? Dai daw kutana kamo kaidto maoogmang gibohon an asignasyon na iyan, na may oportunidad na mabuhay sagkod lamang sa sangkap na salud? Minsan ngani may nagtungang parasugot sa tatamnan, dai daw kutana nindo sasayumahan an saiyang argumento? Asin dai daw kamo maoyon na si Jehova igwa kan diretso na ipaotob an sarong simpleng restriksion na iyan?—Genesis 3:1-5.

7. (a) Anong asignasyon an itinao ki Noe, asin anong oposisyon an inagihan nia? (b) Ano an pagheling nindo sa hinagad ni Jehova ki Noe?

⁷ Paghaloyhaloy, pinatogdok ni Jehova si Noe nin sarong dahong bilang paagi na makaligtas sa sarong lakop sa globong baha. Huli sa kadakulaan kan dahong, an trabaho bakong pasil asin posibleng ginibo sa atubangan nin grabeng pag-olog-olog asin oposisyon. Pero, kanigoan na pribilehio para ki Noe na ikaligtas an saiyang kasararo sa harong, dai na baga sabihon pa an dakol na hayop! (Genesis 6:1-8, 14-16; Hebreo 11:7; 2 Pedro 2:5) Kun kamo an tinawan kan siring na asignasyon, dai daw kutana kamo nagmaigot na otobon iyan? O makonklusyon daw kamo na sobra an hinahagad sa saindo ni Jehova?

8. Ano an ipinagibo ki Abraham, asin ano an iinilustrar kaiyan bilang resulta kan saiyang pagkuyog?

⁸ May ipinagibo an Dios ki Abraham na masakit na marhay, na sinabi sa saiya: “Daraha, tabi, an saimong aki, an bugtong mong aki na namomotan mong gayo, si Isaac, asin paduman ka sa daga nin Moria asin duman idolot mo sia bilang dolot na tinotong.” (Genesis 22:2) Huling nanuga si Jehova na an kaidto daing aki na si Isaac magkakaaki, nabalo an pagtubod ni Abraham sa kakayahan nin Dios na buhayon liwat si Isaac. Kan magprobar si Abraham na iatang si Isaac, iningatan na buhay nin Dios an hoben na lalaki. Iinilustrar kan pangyayaring ini na itatao nin Dios an saiyang sadiring Aki para sa katawohan asin sa huri bubuhayon sia liwat.—Genesis 17:19; 22:9-18; Juan 3:16; Gibo 2:23, 24, 29-32; Hebreo 11:17-19.

9. Taano ta bakong sobra an hinagad ni Jehova ki Abraham?

⁹ Tibaad isipon nin nagkapira na sobra an hinahagad ni Jehova Dios ki Abraham. Alagad sobra daw? Talaga daw na bakong mamomoton para sa satong Kaglalang, na kayang bumuhay liwat kan mga gadan, na hagadon sa sato na magin makinuyog sa saiya dawa kun ini magresulta sa satong temporaryong pagtorog sa kagadanan? Bakong siring kaiyan an inisip ni Jesu-Cristo asin kan saiyang enot na mga parasunod. Andam sinda na magtios nin pisikal na pagmaltrato, dawa kagadanan mismo, tanganing gibohon an kabotan nin Dios. (Juan 10:11, 17, 18; Gibo 5:40-42; 21:13) Kun hinahagad nin mga kamugtakan, andam daw kamo na gibohon man iyan? Estudyare an nagkapirang bagay na hinagad ni Jehova sa mga nag-oyon na magin saiyang banwaan.

An Ley ni Jehova sa Israel

10. Sairisay an nanuga na gigibohon an gabos na hinahagad ni Jehova, asin ano an itinao nia sa sainda?

¹⁰ An mga gikan ni Abraham paagi sa saiyang aki na si Isaac asin makoapo na si Jacob, o Israel, nagin an nasyon nin Israel. Ilinigtas ni Jehova an mga Israelita sa pagkaoripon sa Egipto. (Genesis 32:28; 46:1-3; 2 Samuel 7:23, 24) Dai nahaloy pakatapos kaiyan, sinda nanuga na gigibohon an ano man na hagadon sa sainda nin Dios. Sinda nagsabi: “Andam kaming gibohon an gabos na itinaram ni Jehova.” (Exodo 19:8) Kaoyon kan kamawotan kan mga Israelita na pamahalaan nia, an nasyon tinawan ni Jehova nin labing 600 na ley, kabale an Sampulong Togon. Pag-abot nin panahon, an mga ley na ini nin Dios, na itinao paagi ki Moises, iyo mismo an inapod na Ley.—Esdras 7:6; Lucas 10:25-27; Juan 1:17.

11. Ano an sarong katuyohan kan Ley, asin ano an nagkapirang regulasyon na nakatabang na maotob iyan?

¹¹ An sarong katuyohan kan Ley iyo na protehiran an mga Israelita paagi sa pagtao nin kapakipakinabang na mga regulasyon na iyong sinusunod sa mga bagay na arog kan seksuwal na moralidad, mga transaksion sa negosyo, asin pag-ataman sa aki. (Exodo 20:14; Levitico 18:6-18, 22-24; 19:35, 36; Deuteronomio 6:6-9) Nagtao nin mga susundon sa kun paano tatrataron an kapwa tawo siring man an mga hayop nin saro. (Levitico 19:18; Deuteronomio 22:4, 10) An mga kahagadan dapit sa taonan na mga kapiestahan asin pagtiripon para sa pagsamba nakatabang na maprotehiran sa espirituwal an banwaan.—Levitico 23:1-43; Deuteronomio 31:10-13.

12. Ano an pangenot na katuyohan kan Ley?

¹² An sarong pangenot na katuyohan kan Ley nasambitan ni apostol Pablo, na nagsurat: “Iyan idinagdag tanganing mahayag an mga kalapasan, sagkod na dumatong an banhi [si Cristo] na pinanugaan.” (Galacia 3:19) An Ley nagpagirumdom sa mga Israelita na sinda bakong sangkap. Kun siring, rasonable sana na kinaipuhan ninda an sarong sangkap na atang na lubos na makahahale kan saindang mga kasalan. (Hebreo 10:1-4) Kaya katuyohan kan Ley na andamon an banwaan sa pag-ako ki Jesus, na iyo an Mesiyas, o Cristo. Si Pablo nagsurat: “An Ley nagin satong paratokdo na minagiya pasiring ki Cristo, tanganing kita ikapahayag na matanos huli sa pagtubod.”—Galacia 3:24.

Magabat daw an Ley ni Jehova?

13. (a) Ano an pagheling kaidto kan bakong sangkap na mga tawo sa Ley, asin taano? (b) Talaga daw na magabat an Ley?

¹³ Minsan ngani “banal asin matanos patin marahay” an Ley, an pagheling dian kan dakol magabat. (Roma 7:12) Huling sangkap an Ley, dai maabot kan mga Israelita an halangkaw na pamantayan kaiyan. (Salmo 19:7) Iyan an dahelan na an apod dian ni apostol Pedro “sarong sakal na minsan an satong mga apoon ni kita dai kayang pasanon.” (Gibo 15:10) Siempre, an Ley mismo bakong magabat, asin an pagkuyog dian nagtaong pakinabang sa banwaan.

14. Ano an pirang halimbawa na nagpapaheling na an Ley nagin para sa kapakinabangan na marhay kan mga Israelita?

¹⁴ Halimbawa, sa irarom kan Ley an sarong parahabon dai ibinibilanggo kundi kaipuhan na magtrabaho tanganing mabayadan nin doble o labi pa an saiyang hinabon. Sa siring an biktima dai nawaran, ni may pagabat na inimponer sa mahigos na mga tawo tanganing masuportaran an sarong sistema nin presohan. (Exodo 22:1, 3, 4, 7) Prohibido an peligrosong mga kakanon. An karneng orig, kun daing gayo naluto, puedeng magdara nin trichinosis, asin an koneho puedeng magdara nin tularemia. (Levitico 11:4-12) Kaagid kaiyan, an Ley nagin proteksion paagi sa pagbawal sa pagkapot kan mga bangkay. Kun may makadota sa bangkay, kahagadan sa saiya na sia maghanaw patin labahan an saiyang gubing. (Levitico 11:31-36; Bilang 19:11-22) An mga odo dapat na italbong, na pinoprotehiran an banwaan tumang sa paglakop nin mga mikrobio, na an pag-eksister kan mga iyan nadiskobre sana nin mga sientista kan nakaagi pa sanang mga siglo.—Deuteronomio 23:13.

15. Ano an nagin pagabat sa mga Israelita?

¹⁵ An Ley dai naghagad nin sobra sa banwaan. Alagad dai iyan masasabi dapit sa mga tawo na nag-asumir kan papel na mga parainterpretar kan Ley. Mapadapit sa mga susundon na ipinaotob ninda, an A Dictionary of the Bible, na an editor si James Hastings, nagsasabi: “An lambang togon sa Biblia napalibotan nin magkakakonektar na saradit na regulasyon. . . . Sa siring may ginibong pagprobar na ipasairarom kan Ley an lambang maiisip na kaso, asin na kontrolon paagi sa daing herak na lohika an bilog na gawe-gawe nin tawo sa estriktong paagi. . . . Pinogolan an tingog nin konsensia; hinalean nin epekto an buhay na puersa kan tataramon nin Dios asin tinahoban nin kadakol na panluwas na susundon.”

16. Ano an sinabi ni Jesus manongod sa magabat na mga susundon asin tradisyon kan mga namomoon sa relihion?

¹⁶ Ideninunsiar ni Jesu-Cristo an mga namomoon sa relihion na nag-imponer nin kadakol na susundon, na sinasabi: “Sinda nagbobogkos nin magabat na mga pasanon asin ibinubugtak iyan sa mga abaga nin mga tawo, alagad sinda mismo harabong humiro kaiyan minsan kan saindang moro.” (Mateo 23:2, 4) Idinoon nia na huli sa saindang magabat na gibo nin tawong mga susundon asin tradisyon, kabale an detalyadong paglinig, ‘an tataramon nin Dios nagin basang.’ (Marcos 7:1-13; Mateo 23:13, 24-26) Pero dawa bago nagdigdi sa daga si Jesus, an mga paratokdo sa relihion sa Israel minisrepresentar an talagang kahagadan ni Jehova.

An Talagang Hinahagad ni Jehova

17. Taano ta dai nasonoan ni Jehova an mga dolot na tinotong kan daing pagtubod na mga Israelita?

¹⁷ Paagi ki propeta Isaias, si Jehova nagsabi: “Omoy na ako sa mga dolot na tinotong na mga karnero asin sa taba nin matatabang hayop; asin sa dugo nin mga ogbon na baka asin mga lalaking kordero patin mga lalaking kanding habo na ako.” (Isaias 1:10, 11) Taano ta dai nasonoan nin Dios an mga dolot na hinagad nia mismo sa Ley? (Levitico 1:1–4:35) Huli ta dai sia iginalang kan banwaan. Kun siring, sinda sinadol: “Pangaghugas kamo; pangaglinig kamo; halea nindo an karatan kan saindong mga gibo sa atubangan kan sakuyang mga mata; umontok na kamo sa paggibo nin maraot. Pag-adal kamong gumibo nin marahay; hanapa nindo an hustisya; itanos nindo an nan-aapi; tawe nindo nin katanosan an ilo; suroga nindo an balo.” (Isaias 1:16, 17) Bako daw na tinatabangan kita kaini na masabotan an hinahagad ni Jehova sa saiyang mga lingkod?

18. Ano an talagang hinahagad kaidto ni Jehova sa mga Israelita?

¹⁸ Ipinaheling ni Jesus an talagang hinahagad nin Dios. Ginibo nia iyan kan hapoton sia, “Arin an nakalalabi sa gabos na togon sa Ley?” Si Jesus nagsimbag: “‘Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.’ Iyo ini an nakalalabi sa gabos asin enot na togon. An ikaduwa, na arog kaini, iyo ini, ‘Kamotan mo an saimong kataed nin siring sa saimo man sana.’ Sa duwang togon na ini nasasarig an bilog na Ley, asin an Mga Propeta.” (Mateo 22:36-40; Levitico 19:18; Deuteronomio 6:4-6) Iyan man an idinoon ni propeta Moises kan sia maghapot: “Ano an hinahagad sa saimo ni Jehova na saimong Dios kundi an matakot ka ki Jehova na saimong Dios, tanganing maglakaw sa gabos niang dalan asin kamotan sia patin maglingkod ki Jehova na saimong Dios sa bilog mong puso asin sa bilog mong kalag; na kuyogon an mga togon ni Jehova asin an saiyang mga ipinakukuyog?”—Deuteronomio 10:12, 13; 15:7, 8.

19. Paano hiningoa kan mga Israelita na magsagin banal, alagad ano an sinabi sa sainda ni Jehova?

¹⁹ Apisar kan saindang salang gibo, gusto kan mga Israelita na magsagin banal. Minsan ngani kahagadan kan Ley na mag-ayuno sana sa taonan na Aldaw nin Pagtubos, sinda nagpoon na mag-ayuno nin parate. (Levitico 16:30, 31) Alagad sinaway sinda ni Jehova, na nagsasabi: “Bako daw na ini an pag-ayuno na pinili ko? An paghubad kan mga ramal nin karatan, an paghale kan mga gapos kan sakal, asin an pagpatalingkas sa mga inaapi, asin barion nindo an lambang sakal? Bako daw na iyan an paghiras kan saimong tinapay sa nagugutom, asin palaogon mo sa saimong harong an mga tawong dukha, daing harong? Na, kun makaheling ka nin huba, tahoban mo sia, asin dai ka magtago sa sadiri mong laman?”—Isaias 58:3-7.

20. Huli sa ano na sinaway ni Jesus an relihiosong mga parasaginsagin?

²⁰ An nagpapakangmatanos na mga Israelitang idto igwa nin problema na kapareho kan sa relihiosong mga parasaginsagin na sinabihan ni Jesus: “Nagtatao kamo nin tinagba kan yerbabuena asin kan anis patin kan komino, alagad liningawan nindo an mas magabat na mga bagay kan Ley, arin na baga, an hustisya asin pagkaherak patin pagigin fiel. An mga bagay na ini obligasyon na gibohon, pero bakong tanganing basangbasangon an ibang bagay.” (Mateo 23:23; Levitico 27:30) Bako daw na tinatabangan kita kan mga tataramon ni Jesus na masabotan an talagang hinahagad sa sato ni Jehova?

21. Paano sinumaryo ni propeta Miqueas kun ano an hinahagad asin dai hinahagad sa sato ni Jehova?

²¹ Tanganing linawon kun ano an hinahagad asin dai hinahagad sa sato ni Jehova, an propeta nin Dios na si Miqueas naghapot: “Ano an sakong idodolot sa atubang ni Jehova? Ano an sakong ihohorohod sa Dios sa itaas? Idodolot ko daw saiya an bilog na mga tinutong, na may bakang sarong taon an edad? Maoogma daw si Jehova sa rinibong karnero, sa manampulong ribong salog nin lana? Itatao ko daw an panganay kong aki huli sa sakong pagrebelde, an bunga kan sakong tulak huli sa kasalan kan sakong kalag? Sinabihan ka nia, O daganon na tawo, kun ano an marahay. Asin anong balos an hinahagad sa saimo ni Jehova kundi na gumibo ka nin hustisya asin mamoot sa kabootan asin na magin hababa an boot sa paglakaw sa kaibahan kan saimong Dios?”—Miqueas 6:6-8.

22. Ano an partikular na hinagad ni Jehova sa mga sakop kan Ley?

²² Kaya, kun siring, ano an partikular na hinagad ni Jehova sa mga namuhay na sakop kan Ley? Siempre, dapat nindang kamotan si Jehova Dios. Apuera kaini, si apostol Pablo nagsabi: “An bilog na Ley naootob sa saro sanang tataramon, na iyo ini: ‘Kamotan mo an saimong kataed siring sa saimo man sana.’” (Galacia 5:14) Kaagid kaiyan, sinabihan ni Pablo an mga Kristiano sa Roma: “An namomoot sa saiyang kapwa nakaotob na kan ley. . . . An pagkamoot iyo an kaotoban kan ley.”—Roma 13:8-10.

Bako Iyan na Sobra

23, 24. (a) Taano ta maninigo na nungkang magin sobra para sa sato an paggibo kan hinahagad ni Jehova? (b) Ano an sunod niatong eestudyaran?

²³ Dai daw kita naaapektaran kan bagay na si Jehova saro nanggad na mamomoton, maasikaso, maheherakon na Dios? An saiyang Aking bugtong, si Jesu-Cristo, nagdigdi sa daga tanganing ibantog an kadakulaan kan pagkamoot nin Dios—tanganing ipaaram sa mga tawo kun gurano sinda kamahal na marhay para ki Jehova. Sa pagpaheling kan pagkamoot nin Dios, si Jesus nagsabi mapadapit sa hamak na dignos: “Ni saro sa sainda dai mahoholog sa daga na dai naaaraman kan saindong Ama.” Kaya nagkonklusyon sia: “Dai kamo matakot: orog kamong mahalaga kisa dakol na dignos.” (Mateo 10:29-31) Sierto nanggad, maninigo na nungkang magin sobra para sa sato na gibohon an ano man na hagadon kan siring kamamomoton na Dios!

²⁴ Minsan siring, ano an hinahagad sa sato ni Jehova ngonyan? Asin taano ta garo baga iniisip nin nagkapira na sobra an hinahagad nin Dios? Paagi sa pagsiyasat sa mga hapot na ini, maninigo niatong masabotan kun taano ta sarong makangangalas na pribilehio an paggibo kan ano man na hinahagad ni Jehova.

Masisimbag daw Nindo?

◻ Taano an nagkapira ta tibaad nagsasayumang maglingkod ki Jehova?

◻ Paano nagkalaenlaen an mga kahagadan ni Jehova sa bilog na nag-aging mga taon?

◻ Ano an nagin mga katuyohan kan Ley?

◻ Taano ta bakong sobra an hinahagad sa sato ni Jehova?

[Retrato sa pahina 18]

An gibo nin tawong mga susundon, arog baga kan detalyadong paglinig, nagpagabat sa pagsamba