Nagtabang Sia na Ilakop an Liwanag “Sagkod sa Kaporoporohi kan Daga”
SI APOSTOL Pablo ginamit sa pagpalakop nin espirituwal na liwanag “sagkod sa kaporoporohi kan daga.” Bilang resulta, an dakol na “may tamang tendensia sa buhay na daing katapusan nagin mga paratubod.”—Gibo 13:47, 48; Isaias 49:6.
An makosog na pagmawot na ilakop an espirituwal na liwanag risang-risa man sa debotadong buhay asin daing kapagalan na Kristianong mga paghihingoa ni William Lloyd Barry, sarong miembro kan Namamahalang Grupo kan Mga Saksi ni Jehova. Si Tugang na Barry nagadan kan Hulyo 2, 1999, mantang igwa nin direktang kabtang sa paglilingkod sa sarong pandistritong kombension sa Hawaii.
Si Lloyd Barry namundag sa Nueva Zelandia kan Disyembre 20, 1916. Bago kaiyan an saiyang ina asin ama nagkaigwa nin aktibong interes sa mga katotoohan kan Biblia na iinatubang sa mga publikasyon ni C. T. Russell, na iwinaras kan Watch Tower Bible and Tract Society. Huli kaini, si Tugang na Barry nagdakula sa sarong debotadong Kristianong pamilya.
Minsan ngani interesado sa mga isport asin edukasyon, na nagkaigwa pa ngani nin titulo sa siensia, pinapagdanay ni Tugang na Barry an saiyang malinaw na pagtorohok sa espirituwal na mga bagay. Sa siring, kan Enero 1, 1939, naglaog sia sa bilog na panahon na ministeryo, na nagin miembro kan pamilyang Bethel sa opisina kan Sosyedad sa Australia. Pakatapos na iprohibir kan gobyerno an Sosyedad kan 1941, si Tugang na Barry padagos na nagin sibot sa pagtrabaho sa opisina, na kun beses inaasignaran na magsurat nin pampakosog sa mga kapagtubod. Nagin arogan man sia sa pangengenot sa pampublikong ministeryo.
Kan Pebrero 1942, naagom ni Tugang na Barry an saro man na bilog na panahon na lingkod. An saiyang mamomoton na agom, si Melba, fiel na naglingkod sa kaibanan nia sa bilog na mga taon na iyan sa dakol na parte kan daga. Pinonan ninda an dakulang lakdang sa paglilingkod sa ibang nasyon paagi sa pag-atender sa ika-11 klase kan Paadalan sa Biblia kan Watchtower sa Gilead duman sa Estados Unidos. Idinestino sinda sa lugar na ibibilang kan dakol na ‘sarong poro kan daga’—an Hapon. Pagkaabot ninda kan Nobyembre 1949, pinonan nindang maglingkod bilang misyonero sa duongan na siudad nin Kobe. Kan panahon na idto, 12 sana an naghuhulit kan maogmang bareta sa Hapon. Pinag-adalan ni Tugang na Barry an lenguahe asin mga ugale sa saiyang bagong erokan patin napatalubo nia an odok na pagpadangat sa mga Hapones, na pinaglingkodan nia sa laog kan suminunod na 25 taon. An saiyang pagkamoot sa mga “may tamang tendensia sa buhay na daing katapusan” heling-heling kan nagdadakol na Kristianong kasararoan nin magturugang sa Hapon, na nakatabang sa saiya na magin epektibo sa pangangataman kan sangang opisina sa laog nin mga dekada.
Kaidtong kabangaan nin 1975, kan igwa na nin mga 30,000 na Saksi sa Hapon, an mag-agom na Barry ibinalyo sa Brooklyn, Nueva York. Bilang linahidan nin espiritung Kristiano, si Tugang na Barry inimbitaran na maglingkod bilang miembro kan Namamahalang Grupo kan Mga Saksi ni Jehova. (Roma 8:16, 17) An saiyang eksperyensia sa pagsurat nakatabang na marhay sa saiyang bagong kabtang sa Departamento nin Pagsurat. Asin an saiyang mahiwas na pansangang opisina asin internasyonal na eksperyensia nakatabang sa saiya sa pagtao nin mahalagang kontribusyon bilang miembro kan Komite sa Pagpublikar kan Namamahalang Grupo.
Sa nag-aging mga taon, napagdanay ni Tugang na Barry an saiyang pagkamoot sa Oriente asin sa mga taga dian. An mga estudyante sa Paadalan nin Gilead siring man an mga miembro kan pamilyang Bethel nakasisierto na an saiyang mga pahayag asin komento magtatampok nin nakaoogmang mga estorya manongod sa dakol na naglingkod sa pagmimisyonero. An mga aktibidad na paghuhulit kan Kahadean sa ‘mga kaporoporohi kan daga’ tunay na nagigin buhay kun entusiastikong isinasaysay ni Tugang na Barry an saiya mismong mga eksperyensia. An nagkapira kaini nasambitan sa saiyang personal na estorya na ipinublikar sa The Watchtower na Setyembre 15, 1960.
Kompiado kita na bilang ‘kapwa paramana ni Cristo,’ an interes ni Tugang na Barry sa mga “may tamang tendensia sa buhay na daing katapusan” magpapadagos. Siempre, mapupungaw na marhay sa saiya an gabos na nakamimidbid asin namomoot sa saiya bilang espirituwal na tawo, na lubos na debotado ki Jehova asin igwa nin mainit na pagpadangat sa banwaan nin Dios. Pero, naggagayagaya kita na si Tugang na Barry fiel na nagtagal sagkod sa katapusan kan saiyang daganon na buhay.—Kapahayagan 2:10.
[Retrato sa pahina 16]
Si Lloyd Barry asin John Barr kan iluwas an “Insight on the Scriptures” kan 1988
[Retrato sa pahina 16]
Mga naggradwar sa ika-11 klase nin Gilead, na nagherilingan sa Hapon pakalihis nin 40 taon