Pagsasanay sa Gilead sa Kabanalbanaleng Pagtubod

“AN SATONG mga estudyante sinanay nang marhay sa kabanalbanaleng pagtubod.” Ini an pambukas na mga tataramon sa programa nin graduwasyon kan ika-95 klase kan Paadalan sa Biblia kan Watchtower sa Gilead, na ginibo kan Domingo, Setyembre 12, 1993. Kan agang iyan an 4,614 imbitadong bisita asin miembro kan pamilyang Bethel na nagtiripon sa Jersey City Assembly Hall pinangenotan sa pambukas na pamibi ni George Gangas. Si Tugang na Gangas 65 taon nang miembro kan pamilyang Bethel asin sa edad na 97 iyo an pinakagurang na miembro kan Namamahalang Grupo.

Si Albert Schroeder, miembro man kan Namamahalang Grupo asin tsirman kan programa, nagsabi: “Sa laog nin limang bulan an kurso sa Gilead basado sa kabanalbanaleng pagtubod.” Alagad ta ano an “kabanalbanaleng pagtubod”? Ipinaliwanag nia na an “kabanalbanaleng pagtubod” na ini, na sinambit sa Judas 20, iyo an bilog na katotoohan sa Biblia. Kaya an kurso sa Gilead basado sa Tataramon ni Jehova, an Biblia, na iyo an pangenot na librong pinag-aadalan kaiyan.

Nag-ako an mga Estudyante nin Orog Pang Pagtotokdo

An enot na espiker iyo si John Stuefloten kan Komite sa Watchtower Farms, na nagtaram manongod sa temang “Pagkinabang Gikan sa Impluwensia nin Madonong na mga Tawo.” Nagsasabi an Biblia na an mga “naglalakaw na kaiba nin mga madonong magigin madonong.” (Talinhaga 13:20) Durante kan kurso sa Gilead, guminamit an mga estudyante nin labing 900 na oras sa pag-adal sa Biblia. Hinapot ni Tugang na Stuefloten an mga estudyante: “Paano an impluwensia ni Jehova makaaapektar saindo sa ngapit? Maduman kamo sa 18 nasyon na may kabilogan na populasyon na mga 170 milyones katawo. Kun siring paano nindo maiimpluwensiahan an mga tawong iyan?” Paagi sa pagpabanaag kan kadonongan ni Jehova, an bagohan na mga misyonero makatatabang sa iba na magin mga parasamba ni Jehova, an Gikanan nin daing sagkodan na kadonongan.

“Pagigin Gabos na Bagay sa Gabos na Klase nin Tawo” an tema kan sunod na pahayag, na ipinahayag ni Lloyd Barry kan Namamahalang Grupo. (1 Corinto 9:​22, King James Version) Mga 45 taon na an nakaagi, si Tugang na Barry mismong estudyante sa ika-11 klase sa Gilead. Ngonyan an ika-95 klase pinahalagahan an pag-ako nin praktikal na sadol gikan sa dating misyonero na may dakol na taon na eksperyensia sa ibang nasyon. Pinakosog nia an mga estudyante na umarog tolos sa mga tawo sa saindang bagong teritoryo sa ibang nasyon paagi sa pag-aram kan lokal na kultura asin pakanood kan bernakular na lenguahe. Sinabi nia na ini pinakamarahay na magigibo paagi sa pakikiiba asin paghuhulit kaiba kan mga tawo sa lokal siring man paagi sa pag-adal kan saindang mga kaugalean asin pag-arog kaiyan kun angay.

Sunod, si Dean Songer kan Komite kan Pabrika nagtaram manongod sa nakaiintrigang tema na “Pinatalingkas sa Obligasyon.” Pakalihis nin labing 35 taon sa pambilog na panahon na paglilingkod, nasasabotan ni Tugang na Songer kun ano an kahulogan kan nakasentro an atension, simpleng buhay, na nagkokonsentrar sa gibohon na kaipuhan mahaman, na mayong materyal na mga kahaditan. Asin iyan an pinakasustansia kan saiyang sadol sa mga estudyante. An mga paraawit sa templo ni Jehova pinatalingkas sa mga obligasyon kan ibang Levita tanganing lubos na idusay an saindang sadiri sa saindang espesyal na asignasyon. (1 Cronica 9:33) Sa kaagid na paagi, pinatalingkas na an mga misyonero sa Gilead gikan sa ordinaryong mga bagay na siring baga nin sekular na trabaho tanganing makakonsentrar sinda sa saindang espesyal na paglilingkod. Nagtapos si Tugang na Songer paagi sa sadol na ini: “Papagdanayon na nakasentro an saindong punto-de-vista asin na simple an saindong buhay. An saindong paninimbagan bilang mga pinatalingkas sa obligasyon iyo na magtrabaho sa aldaw asin sa banggi, na nag-oomaw ki Jehova.”

Suminunod an miembro kan Namamahalang Grupo na si Daniel Sydlik na may temang “Pagtotokdo sa Iba Kun Paano Makukua an Pinakamarahay Gikan sa Buhay.” Pinakosog nia an mga estudyante “na bako sanang itokdo an doktrina kundi na magkaigwa nin igong kapusoan na itokdo sa mga tawo kun ano an dapat nindang gibohon tanganing ikaoyon an saindang buhay sa kabotan nin Dios.” An matibay na mga paratokdo kaipuhan na makapahiro sa boot asin makamotibar. “Magin puka sa pagtokdo sa mga tawo na pataluboon an Kristianong mga pamantayan imbes na magtokdo sana nin mga pagboot asin regulasyon,” an sabi nia asin idinugang sa konklusyon: “Orog sa gabos na bagay, namomotan na mga tugang, tokdoan an saindong sadiri asin tokdoan an iba kun paano mamoot, huli ta iyan an sangkap na bogkos nin pagkasararo.”​—1 Corinto 13:​1-3; Colosas 3:14.

Pakalihis nin mga bulan nin pagsasanay, nangorognang namotan kan mga estudyante an saindang duwang instruktor sa Gilead. Si Jack Redford, dating misyonero mismo, enot na nagtaram, manongod sa temang “Pinili Nindo an Tama.” Sa suanoy na kinaban nin Judio, bago nagin Kristianong apostol, si Pablo may katongdan, marahay na dangog, impluwensia, asin pinansial na seguridad. Pero sa Filipos 3:​8, sinabi ni Pablo na an gabos na ini “tapok,” o “basura,” sono sa pagkatradusir kan Phillips. An saiyang puso nasa ministeryo, asin pinili nia an tama. Sa kabaliktaran, an kadaklan sa katawohan ngonyan ipinaheheling paagi sa saindang mga pagpili sa buhay na ibinibilang nindang mas mahalaga an saindang materyal na mga rogaring kisa sa buhay na daing katapusan. An mga misyonero sa Gilead pinili an tama. Si Jack Redford nagtapos paagi sa pagsabing: “Mayo nin ikaaalok saindo an kinaban kan Diablo na makakokomparar sa paglilingkod bilang misyonero. Ingatan an dai masokol an halagang pribilehiyong iyan, asin pabayaan an kinaban na asikasohon an basura kaiyan!”

Sa nakaaging 32 na taon na, si Ulysses Glass instruktor sa Gilead. Tinawan nia an mga estudyante nin pirang pamamaaram na sadol na may temang “Solamente an Dios an Makakagibo nin Kahoy,” na kinukua an saiyang pahayag sa Salmo 1:3. An modernong teknolohiya nungka na napantayan an pagkagibo sa kahoy, na dinisenyo nin Dios. Sa sarong sentido, an tunay na mga Kristiano siring sa mga kahoy, na itinanom asin binabaribi ni Jehova. Sinabi ni Tugang na Glass na sa laog nin limang bulan, an mga estudyante “regular na binaribi gikan sa burabod nin nagtataong-buhay na tubig sa Tataramon nin Dios,” siring sa mga kahoy sa espirituwal na kakahoyan o paraiso. Minsan siring, bilang mga misyonero, kaipuhan nindang bantayan an saindang “espirituwal na mga gamot tumang sa ano man na danyos.” Sinadol sinda na ‘padagos na uminom kan tubig nin buhay gikan ki Jehova huli ta solamente an Dios an makakagibo nin kahoy.’

An pangultimong pahayag itinao ni Carey Barber, miembro kan Namamahalang Grupo. Pakalihis nin 70 taon na pambilog na panahon na paglilingkod, may pagtitiwalang makatataram si Tugang na Barber manongod sa temang “Magtao ki Jehova nin Esklusibong Debosyon.” An kadaklan sa katawohan dai nagtao nin esklusibong debosyon ki Jehova. (Deuteronomio 5:9) Minsan siring, arog kan idinoon ni Tugang na Barber, sa ibong kan satong pagkabakong sangkap, “talagang posible na magin biyong dusay sa Dios.” Idinugang nia: “Mayo nin siisay man na tunay na makakasabi: ‘An Diablo an nagpagibo kaiyan sako.’” Pero an Diablo puwede kitang daogon kun sia dai niato tutumangon. (Santiago 4:7) An pagdadanay na sibot sa gibohon ni Jehova iyo an pinakamarahay na paagi sa pagtumang ki Satanas asin sa saiyang kinaban asin pagtao nin esklusibong debosyon ki Jehova.

Nombrado Bilang mga Misyonero

An programa sa aga tinapos paagi sa opisyal na pagnombra sa gabos na 46 na estudyante bilang misyonero. Nag-ako nin mga diploma an 23 na mag-agom na nagsasabi sa sarong kabtang na an mga naggraduwar “espesyalmenteng kuwalipikado sa trabahong pag-edukar, na pinalalakop an marahay na boot asin naggigibo sa kapakanan kan permanenteng katoninongan asin kan ley nin sangkap na areglo asin katanosan sa tahaw nin gabos na banwaan.” An ika-95 klase sa Gilead siertong magmamaigot na otobon an kagalanggalang na gibohon na ini sa 18 nasyon na sinugoan sainda. An mga asignasyon lakop sa kinaban asin kaiba an mga nasyon sa Asia, Aprika, Europa, Latin Amerika, asin an Caribeano.

Sa hapon, pakatapos nin pinahalipot na Pag-adal sa Torrengbantayan na pinangenotan ni Charles Woody kan Komite kan Departamento sa Paglilingkod, an bagohan na mga naggraduwar sa Gilead itinao an saindang programa bilang mga estudyante, na may temang “Inandam Kami kan Gilead na Magtokdo Bilang mga Misyonero.” Tinapos an sesyon paagi sa dramang “An mga Pagpipilian na Napaaatubang Sato.”

Pakatapos kan nakapupukaw na programang ini, an bagohan na mga misyonero andam na ngonyan na isugo sa apat na kanto kan daga sa paghiras sa iba kan “kabanalbanaleng pagtubod.”