An Bukid nin Atos—Sarong “Banal na Bukid”?

PARA sa labing 220 milyones na miembro kan Iglesia Ortodokso, an Bukid nin Atos, sarong garanggasangon na punta sa amihanan na Grecia, iyo “an kabanalbanaleng bukid sa kinaban nin Ortodoksong Kristiano.” Para sa dakol sa sainda, an peregrinasyon pasiring sa “banal na bukid” nin Atos sarong mahal na pangarap. Ano an “banal na bukid” na ini? Paano ini nagkaigwa nin siring na importansia? Asin iyan daw an “bukid” na dapat sarigan nin mga tawong may takot sa Dios para sa espirituwal na giya asin tunay na pagsamba?

An pananaram na “banal na bukid” talagang yaon sa Biblia. Iyan konektado sa banal, dalisay, asin halangkaw na pagsamba sa tunay na Dios, si Jehova. An Bukid nin Sion sa suanoy na Jerusalem nagin “banal na bukid” kan darahon duman ni Hadeng David an kaban kan tipan. (Salmo 15:1; 43:3; 2 Samuel 6:12, 17) Pakatapos na itogdok an templo ni Salomon sa Bukid nin Moria, nagin kabale sa “Sion” an lugar kan templo; huli kaini, an Sion nagdanay na “banal na bukid” nin Dios. (Salmo 2:6; Joel 3:17) Huling an templo nin Dios nasa Jerusalem, kun beses an siudad na iyan inapod man na “banal na bukid” nin Dios.—Isaias 66:20; Daniel 9:16, 20.

Kumusta man ngonyan? An Bukid nin Atos daw—o arin man na iba pang alitoktok—an “banal na bukid” na dapat dumanan nin mga tawo tanganing sumamba sa Dios sa inaakong paagi?

Sarong “Banal na Bukid” na Monasteryo

An Bukid nin Atos yaon sa porong sirangan kan Peninsula nin Chalcidice sa poro nin sarong hayakpit na parte nin daga na nag-uuldot pasiring sa Dagat na Aegean sa sirangan sana kan Thessaloníki sa modernong aldaw. Iyan sarong nakagugulat na alitoktok na marmol na an tugdok na langkaw hale sa dagat 2,032 metros.

An Atos haloy nang ibinibilang na banal na lugar. Sa mitolohiyang Griego iyan kaidto an erokan kan mga dios bago nagin erokan ninda an Bukid nin Olimpo. Kaidtong pakalihis kan panahon ni Constantinong Dakula (ikaapat na siglo C.E.), an Atos nagin banal na lugar para sa mga iglesiang Kristiano. Segun sa sarong leyenda, si “birhen” Maria, kaibanan ni Juan na Ebanghelista mantang pasiring sa Chipre tanganing songkoon si Lazaro, nagduong sa Atos bilang resulta nin biglang nag-abot na makosog na bagyo. Nagulat sa kagayonan kan bukid, hinagad nia iyan ki Jesus. Huli kaini, an Atos inapod man na “an Tatamnan kan Banal na Birhen.” Sa kabangaan kan panahon nin Bizantino, an bilog na magapong ibabaw kaiyan inapod na Banal na Bukid. An apod na ini opisyal na ginamit asin inaprobaran kan kabangaan nin ika-11 siglo paagi sa dekreto ni Emperador Constantino IX Monomaco.

Huli sa pagigin garanggasangon asin napapasuway kaiyan, an Atos iyo an klase nin lugar na angay para sa ascetikong pamumuhay. Sa nag-aging mga siglo, iyan nakaatraer sa mga tawong relihioso hale sa enterong kinaban na Ortodokso—mga Griego, Serbiano, Romaniano, Bulgario, Ruso, asin iba pa—na nagtogdok nin kadakol na monasteryo, kaiba an mga simbahan asin komunidad kaiyan. Mga 20 kaini an nagdanay.

An Bukid nin Atos Ngonyan

Ngonyan, an Atos sarong rehion na may autonomiya, na igwa nin karta na rinatipikar kan 1926. Pakalihis nin mga taon nin pag-ina, an bilang nin mga mongheng residente luminangkaw sa labing 2,000.

An balang saro kan mga monasteryo igwa nin sadiring sistema nin mga oma, kapilya, asin erokan. An pinakasantuaryo kan mga ermitanyo manonompongan sa sadit na baryo nin Karoúlia, na nasa itaas kan tugdok na mga kantil sa poro kan Bukid nin Atos. Digdi an taraed na indibiduwal na mga payag maaabot sana paagi sa nakariribong na mga dalan-dalan, tongtongan na mga gapo, asin kadena. Sa Atos, an mga monghe namumuhay sagkod ngonyan sa saindang suanoy na liturhikong rutina aroaldaw, na naggagamit kan relong Bizantino (na an aldaw minapoon sa pagsolnop kan saldang) asin kan kalendaryong Julian (13 aldaw na atrasado sa Gregoriano).

Minsan ngani sinasabi na utang kan relihiosong lugar na ini an “kabanalan” kaiyan sa sarong babae, sa laog nin 1,000 taon an mga monghe asin ermitanyo kaiyan idineklarar an bilog na peninsula na sirrado sa gabos na klase nin buhay na babae—tawo asin hayop—kaiba an siisay man na lalaking kapon o daing barabas. Kasuarin pa sana, pinagian an reglamento mapadapit sa mga daing barabas asin nagkapirang babaeng hayop, alagad sagkod ngonyan an mga babae estriktong prohibido sagkod sa 500 metros kan baybayon nin Atos.

Sarong “Banal na Bukid” Para sa Gabos

An Atos daw an “banal na bukid” na maninigong dumanan kan may takot sa Dios na mga Kristiano tanganing sumamba? Sa pakipag-olay sa sarong Samaritana na an paniwala an Dios maninigong sambahon sa Bukid nin Gerizim, lininaw ni Jesus na mayo nang literal na bukid na gagamiton pa bilang lugar para sa pagsamba sa Dios. “Madatong an oras na bakong sa [Gerizim] ni sa Jerusalem na sasambahon nindo an Ama,” an sabi ni Jesus. Taano? “An Dios Espiritu, asin idtong nagsasamba sa saiya kaipuhan na magsamba sa espiritu asin katotoohan.”—Juan 4:21, 24.

Sa pagsambit sa satong panahon, ihinula ni propeta Isaias na an sarong simbolikong “bukid kan harong ni Jehova magigin marigon sa ibabaw kan alitoktok kan kabukidan” asin ‘ilalangkaw sa ibabaw kan mga bolod,’ asin an mga tawo sa gabos na nasyon maturukad dian sa piguratibong paagi.—Isaias 2:2, 3.

An mga lalaki asin babae na boot na magkaigwa nin inooyonan na relasyon sa Dios inaagda na sumamba ki Jehova sa “espiritu asin katotoohan.” Minilyon sa bilog na kinaban an yaon na sa ‘bukid ni Jehova.’ Inootro ninda, kaibanan an iba pa, an saboot nin sarong abogadang Griego na nagsabi mapadapit sa Atos: “Duda ako kun an espirituwalidad nalalaom sa mga lanob o sa mga monasteryo.”—Ikomparar an Gibo 17:24.

[Kahon sa pahina 31]

Haloy Nang Natatagong Kayamanan

Sa nag-aging mga siglo, an mga mongheng Atonita nakatipon nin kayamanan na kabale an kinakarkulong 15,000 na manuskrito, na an nagkapira sinasabing may petsa na kaidto pang ikaapat na siglo, na dahel dian iyan an saro sa pinakamahal na mga koleksion sa kinaban. Igwa nin mga balumbon, kompletong mga tomo asin pahina kan Ebanghelyo, salmo asin himno, apuera kan daan nang marhay na mga ipininta, ladawan, inukit, asin pinanday. Kinakarkulo na yaon sa Bukid nin Atos an un-kuarto kan mga manuskritong Griego sa kinaban, minsan ngani dakol an kaipuhan pang ilaag nin tama sa katalogo. Kan 1997, sa kaenot-enote, nagtogot an mga monghe na an nagkapira sa saindang mga kayamanan eeksibit sa Thessaloníki.

[Pasasalamat para sa pinagkuanan kan retrato sa pahina 31]

Telis/Greek National Tourist Organization