Kita an Klase na May Pagtubod
Pagpahayag kan Maogmang Bareta sa Kaomahan nin Paroy sa Taiwan
AN Taiwan sa parate igwa nin abundang oran, na huli kaiyan nagkakaigwa iyan nin duwang marahay na ani nin paroy kada taon. Pero, kun minsan, dai nag-ooran sa panahon na iyan kaipuhan, asin an mga banhi nagagadan. Kun ini mangyari, minaontok na daw an paraoma? Dai. Aram nia na kaipuhan an pagmamaigot. Nagpapatambo sia nin bagong mga banhi asin tinatanoman giraray an kaomahan. Dangan, kun rumahay an mga kamugtakan, an paraoma nagkakaigwa nin marahay na ani. Kun beses, an espirituwal na pagtanom asin pag-ani kaagid na gayo kaiyan.
Pagmamaigot sa Espirituwal na Pag-ani
Sa nag-aging mga taon an mga Saksi ni Jehova sa Taiwan nagmaigot sa pagtanom asin pag-ani nin mga banhi nin katotoohan sa Kasuratan sa nagkapirang lugar na garo bakong mabunga. An sarong halimbawa iyo an Distrito nin Miao-li. Kakadikit kan nagin paghimate sa paminsanminsan na paghihingoa na magpatotoo sa lugar na ini. Kaya kan 1973 idinestino duman an mag-agom na espesyal payunir bilang bilog na panahon na mga parabalangibog nin Kahadean. Sa primero, may nagkapirang nagpaheling nin interes sa maogmang bareta. Minsan siring, an interes na iyan dai naghaloy nawara. Dangan an mga espesyal payunir idinestino sa ibang lugar.
Kan 1991 idinestino duman an duwa na naman na espesyal payunir. Alagad sa giraray ipinarisa kan mga pangyayari na bako pang tama an mga kamugtakan para sa espirituwal na pagtalubo. Pakalihis nin pirang taon, idinestino an mga espesyal payunir sa linalaoman na magigin mas mabungang mga langtad. Sa siring, an daga dai tinamnan sa laog nin sarong peryodo nin panahon.
An Ibinalik na mga Paghihingoa Uminani nin Kapangganahan
Kan Setyembre 1998 napagdesisyonan na gibohon an paghihingoa na hanapon an mas mabungang mga lugar sa mahiwason na teritoryo sa Taiwan na mayo pang nakadestinong maghulit. Paano ini magigibo? Paagi sa pagdestino nin mga 40 temporaryong espesyal payunir na mahulit sa mas matawong mga teritoryo na mayo pang nakadestinong maghulit.
Kabilang sa mga teritoryong napili para sa kampanya an duwang magkataed na siudad sa Distrito nin Miao-li. Apat na daing agom na tugang na babae an mahulit duman sa laog nin tolong bulan tanganing probaran an teritoryo. Dai nahaloy pag-abot ninda, nagsurat sinda nin maogmahon na mga bareta manongod sa dakol na interesadong tawo na nanonompongan ninda. Kan matapos ninda an tolong bulan na pagpapayunir sa lugar na iyan, kadakol na kan inaadalan ninda sa Biblia. Naestablisar man ninda an sarong grupo nin pag-adal sa libro sa tabang nin sarong magurang sa kaharaning kongregasyon.
An tolo sa mga tugang na babaeng ini malinaw na nagsabi na boot nindang ipadagos na atamanon an lumbod pang “mga banhi” na nagtatalubo nin marahay. Bilang resulta, an duwa sa sainda ninombrahan bilang permanenteng espesyal payunir, asin an ikatolo nagpadagos na maghulit duman bilang regular payunir. An sarong magurang sa kaharaning kongregasyon nagbalyo sa lugar na iyan tanganing tabangan sinda. Labing 60 an nag-atender sa kaenot-enoteng pampublikong pahayag sa lugar na iyan. Ngonyan an kaharaning kongregasyon nagtatabang sa bagohan na grupong ini na magkaigwa nin regular na mga pagtiripon kun Domingo apuera sa nagkapirang grupo nin pag-adal sa libro. Dai mahahaloy puedeng maestablisar an sarong bagong kongregasyon sa lugar na ini.
An Pagmamaigot Nagbubunga nin mga Bendisyon sa Ibang Parte kan Taiwan
An ibang lugar naghimate sa kaagid na paagi. Sa Distrito nin I-lan sa amihanan-sirangan na parte kan isla, naestablisar an sarong bagong Pag-adal sa Libro kan Kongregasyon sa lugar na hinulitan kan temporaryong mga espesyal payunir.
Mantang naghaharongharong sarong banggi, an sarong temporaryong espesyal payunir nakatagbo nin sarong hoben na lalaki asin ipinaheling sa saiya an sarong imbitasyon na may lista kan mga pagtiripon kan kongregasyon. Sia tolos-tolos na naghapot: “Puede akong mag-atender sa pagtiripon sa agang banggi? Kun iyo, ano an isusulot ko?” An payunir na ini pinamamayohan an walong pag-adal sa Biblia kaiba kan mga interesado kada semana. An nagkapira sa mga inaadalan sa Biblia dai nahaloy nagpaplano na mismong magin parahayag kan maogmang bareta, na may pasohan na mabautismohan.
May saro pa sa banwaan man sanang ini na parasimba sa laog nin dakol nang taon alagad dai nakanonompong nin saro na matokdo sa saiya sa Biblia. Kan madangog nia an manongod sa areglo sa pag-adal sa Biblia, inaprobetsaran nia an oportunidad. Inenkaminar sia na andamon nin patienot an saiyang leksion. Kan dumatong an temporaryong espesyal payunir tanganing pamayohan an pag-adal, nanompongan nia na inandam na kan babae an saiyang leksion na pag-aadalan paagi sa pagbakal nin kuaderno na sinuratan nia kan inimprentang mga hapot sa saiyang pag-aadalan. Dangan isinurat nia an saiyang mga simbag sa kada hapot. Kinopya man nia sa saiyang kuaderno an gabos na sitadong teksto sa saiyang leksion. Kan dumatong an tugang na babae tanganing pamayohan an enot na pag-adal, ikinaandam na kan babae an enot na tolong leksion!
Kaagid na mga resulta an naheling man sa banwaan nin Dongshih sa Taiwan sentral. An temporaryong mga espesyal payunir nakapasakamot nin labing 2,000 na brosyur sa laog kan tolong bulan na paghuhulit ninda duman. Kan ikatolong bulan, namamayo na sinda sa 16 na pag-adal sa Biblia. An dakulang kabtang kan banwaan nadestroso nin sarong linog na tuminama sa Taiwan sentral kan Setyembre 21, 1999, alagad an nagkapirang interesado nagpapadagos na umoswag sa espirituwal, maski ngani kaipuhan nindang magbiahe nin sagkod sarong oras tanganing makaatender sa mga pagtiripon sa pinakaharaning Kingdom Hall. Iyo, kaipuhan an pagmamaigot tanganing magkaigwa nin marahay na ani, baga man sa materyal o espirituwal na ani.
[Mapa sa pahina 8]
(Para sa aktuwal na format, hilingon an publikasyon)
TSINA
Taiwan Strait
TAIWAN
[Credit Line]
Mountain High Maps® Copyright © 1997 Digital Wisdom, Inc.