Estorya nin Buhay

Sarong Nakakakontento Asin Maogmang Buhay nin Gikan sa Boot na Pagsakripisyo

ISINAYSAY NI MARIAN ASIN ROSA SZUMIGA

“Gikan sa sadiri kong boot ako mag-aatang sa saimo,” an sabi kan Salmo 54:6. An tataramon na ini nagin an pinakatema kan buhay ni Marian Szumiga asin kan agom nia, si Rosa, na nag-iistar sa Pransia. Kasuarin pa sana isinaysay ninda an nagkapirang tampok na kabtang kan saindang halawig asin nakakakontentong buhay sa paglilingkod ki Jehova.

MARIAN: An sakong mga magurang mga dayong Katoliko Romano hale sa Polandia. Si Tatay sarong tawong hababa an boot. Dai sia noarin man nagkaigwa nin oportunidad na mag-eskuela. Minsan siring, durante kan enot na guerra mundial, nakanood siang bumasa asin sumurat mantang yaon sa mga trintsera bilang sarong soldados. Si Tatay sarong tawong matatakton sa Dios, alagad sa parate nadedesganar sia sa iglesia.

May sarong pangyayari na partikularmenteng dai nia nalilingawan. Sarong aldaw durante kan guerra, an sarong kapelyan nagbisita sa grupo ni Tatay. Kan pumutok sa kaharani an sarong bala sa kanyon, an kapelyan duminulag sa takot, na rinarapas nin krusipiho an saiyang kabayo tanganing padalaganon ini. Nabigla si Tatay na ginamit nin sarong “representante” nin Dios an sarong “banal” na bagay sa paghumaring makadulag sia. Sa ibong kan siring na mga eksperyensia asin makatatakot na marhay na mga pangyayari sa guerra na naheling nia, dai nagluya an pagtubod ni Tatay sa Dios. Sa parate tinatawan nia nin kredito an Dios sa pagkaligtas nia sa guerra.

“Sadit na Polandia”

Kan 1911, pinakasalan kan sakong ama an sarong daraga sa kataed na baryo. An ngaran nia Anna Cisowski. Dai nahaloy pakatapos kan guerra, kan 1919, si Tatay asin si Nanay nagbalyo hale sa Polandia pasiring sa Pransia, kun saen nakakua si Tatay nin trabaho bilang paramina nin karbon. Namundag ako kan Marso 1926 sa Cagnac-les-Mines, sa timog-solnopan kan Pransia. Pakatapos kaiyan, namirmehan an sakong mga magurang sa sarong komunidad nin mga Polaco sa Loos-en-Gohelle, na harani sa Lens sa amihanan kan Pransia. An panadero Polaco, an parabuno Polaco, asin an padi kan parokya Polaco. Bakong makangangalas na an lugar na ini inaapod na Sadit na Polandia. An sakong mga magurang naimbuelto sa mga aktibidad kan komunidad. Sa parate nag-oorganisar si Tatay nin mga programa, na may kaibang drama, musika, asin pag-awit. Sia regular man na nakikipag-olay sa padi, alagad dai sia nakokontento kun sa parate minasimbag an padi na, “Kadakol an misteryo.”

Sarong aldaw kan 1930, duwang babae an nagtuktok sa samong pinto. Sinda mga Estudyante sa Biblia, an apod sa mga Saksi ni Jehova kaidto. An sakong ama nagkua nin Biblia sa sainda, sarong libro na haloy na niang gustong basahon. Galagang binasa man ninda ni Nanay an mga publikasyon na basado sa Biblia na iwinalat kan mga babae. An sakong mga magurang napahirong marhay kan nabasa ninda sa mga publikasyon na ini. Sa ibong kan sibot nindang pamumuhay, an sakong mga magurang nagpoon nang mag-atender sa mga pagtiripon na inareglo kan Mga Estudyante sa Biblia. An pakikipag-olay sa padi nagin paorog nang paorog na nagigin mainit na diriskutiran sagkod na sarong aldaw naghuma sia na kun padagos na makikiasosyar an sakong mga magurang sa mga Estudyante sa Biblia, an sakong tugang na si Stéphanie papahaleon sa katesismo. “Dai ka na magpagal,” an simbag ni Tatay. “Poon ngonyan, an sakong aking babae asin an ibang mga aki maiba na samo sa mga pagtiripon kan Mga Estudyante sa Biblia.” Si Tatay huminale sa iglesia, asin sa kapinonan nin 1932, an sakong mga magurang nabautismohan. Kan panahon na iyan, mga 800 sana an parahayag kan Kahadean sa Pransia.

Rosa: An sakong mga magurang hale sa Hungaria asin, arog kan pamilya ni Marian, namirmehan sa amihanan kan Pransia tanganing magtrabaho sa mga minahan nin karbon. Namundag ako kan 1925. Kan 1937, an saro sa Mga Saksi ni Jehova, si Auguste Beugin, o si Papa Auguste na apod mi saiya, nagpoon na darahan an sakong mga magurang nin An Torrengbantayan sa Hungario. Nanompongan ninda na interesante an mga magasin, alagad mayo ni saro sainda na nagin Saksi ni Jehova.

Maski ngani hoben pa ako, napahiro an sakong puso kan nabasa ko sa An Torrengbantayan, asin pinahelingan ako nin personal na interes kan manugang na babae ni Papa Auguste na si Suzanne Beugin. Nagtogot an sakong mga magurang na iiba nia ako sa mga pagtiripon. Paghaloyhaloy, kan nagpoon na akong magtrabaho, nauyam an sakong ama sa pag-atender ko sa mga pagtiripon kun Domingo. Minsan ngani sia talagang may marahay na ugale, sia nagreklamo, “Mayo ka digdi durante kan semana, asin kun Domingo minaduman ka sa mga pagtiripon nindo!” Minsan siring, padagos akong nag-atender. Kaya sarong aldaw an sakong ama nagsabi, “Mamatosmatos ka na asin humale ka!” Matangang banggi na kaidto. Desisiete anyos pa sana ako kaidto, asin dai ko aram kun masaen ako. Sa katapustapusi nagpasiring ako sa harong ni Suzanne, na naghihibi nin daing ontok. Nakiistar ako ki Suzanne sa laog nin mga sarong semana bago sinugo ni Tatay an sakong tugang na babae tanganing papulion ako. Masusupgon talaga ako, alagad an punto de vista na ipinahayag sa 1 Juan 4:18 nakatabang sako na magdanay na marigon. An tekstong iyan nagsasabi na “an sangkap na pagkamoot minasikwal nin pagkatakot.” Kan 1942, nabautismohan ako.

Sarong Mahalagang Marhay na Espirituwal na Pamana

Marian: Nabautismohan ako kan 1942, kaiba an sakong mga tugang na babae na si Stéphanie asin Mélanie patin an sakong tugang na lalaki na si Stéphane. Sa harong, nakasentro an buhay kan pamilya sa Tataramon nin Dios. Mantang nakatukaw kami sa palibot kan lamesa, binabasa samo ni Tatay an Biblia sa Polaco. Sa parate kun banggi kami naghihinanyog sa samong mga magurang mantang isinasaysay ninda an saindang mga eksperyensia sa paghuhulit kan Kahadean. An nakakaparigon sa espirituwal na mga panahon na ini nagtokdo sa samo na kamotan si Jehova asin magtiwala sa saiya nin orog pa. Huli sa maluyang salud napiritan an sakong ama na magpondo sa trabaho, alagad padagos nia kaming sinuportaran sa espirituwal asin materyal.

Mantang si Tatay ngonyan may libreng oras na, sarong beses kada semana nagkokondukta sia nin pag-adal sa Biblia sa Polaco sa mga hoben sa kongregasyon. Nakanood ako dian na magbasa sa Polaco. Inenkaminar man ni Tatay an mga hoben sa ibang paagi. Sarong beses kan si Tugang na Gustave Zopfer, na nag-aasikaso sa gibohon kan Mga Saksi ni Jehova sa Pransia kan panahon na idto, magbisita sa samong kongregasyon, inorganisar ni Tatay an sarong koro asin nakakostium na drama sa Biblia basado sa bangkete ni Hadeng Belsasar asin sa surat-kamot sa lanob. (Daniel 5:1-31) An papel ni Daniel ginibo ni Louis Piéchota, na kan huri marigon na nanindogan tumang sa mga Nazi.a Kaming mga aki pinadakula sa arog kaining mga kamugtakan. Naobserbaran mi na an samong mga magurang pirmeng sibot sa espirituwal na mga bagay. Ngonyan, narealisar ko na kanigoan kamahalagang pamana an iwinalat samo kan sakong mga magurang.

Kan pumutok an Guerra Mundial II kan 1939, an paghuhulit kan Mga Saksi ni Jehova ipinagprohibir sa Pransia. Sa sarong pangyayari, an samong baryo uminagi sa pagrekisa. Pinalibotan kan mga soldados na Aleman an gabos na harong. Si Tatay naggibo nin sagin sanang salog sa irarom kan kloset nin mga gubing, asin itinatago mi an manlaenlaen na publikasyon sa Biblia sa irarom kan salog na iyan. Minsan siring, an nagkapirang kopya kan pulyetong Fascism or Freedom yaon sa sulong-sulong kan lamesang buffet. Dali-daling itinago iyan ni Tatay sa bulsa nin sarong diaket na nakasabit sa pasilyo. Duwang soldados asin sarong pulis na Pranses an nagrekisa sa samong harong. Haros pugol an samong hinangos sa kaba. An saro sa mga soldados nagpoon na rekisahon an mga gubing na nakasabit sa pasilyo, asin dai nahaloy pakatapos kaiyan naglaog sia sa kusina, na kinakamugtakan mi, kapot an mga pulyeto. Tinuruhokan nia kami, ibinugtak an mga pulyeto sa lamesa, asin ipinadagos an pagrekisa sa iba pang lugar kan harong. Tolos kong kinua an mga pulyeto asin ilinaag iyan sa sarong sulong-sulong na narekisa na kan mga soldados. An soldados dai na naghapot manongod sa mga pulyeto​—na garo baga biyo na niang nalingawan an manongod dian!

Paglaog sa Bilog na Panahon na Paglilingkod

Kan 1948, nagdesisyon akong magin andam na gamiton sa paglilingkod ki Jehova nin bilog na panahon bilang payunir. Pakalihis nin pira sanang aldaw, nakaresibi ako nin surat hale sa sangang opisina kan Mga Saksi ni Jehova sa Pransia. Yaon sa surat na ini an sakong asignasyon na maglingkod bilang payunir sa kongregasyon nin Sedan, harani sa Belhika. Naogmang marhay an sakong mga magurang na maheling na maogma kong inako an paglilingkod ki Jehova sa paaging iyan. Minsan siring, idinoon ni Tatay na an pagpapayunir bakong garo sana pagbakasyon. Iyan magabat na gibohon. Minsan siring, sinabi nia na an saiyang harong pirmeng bukas para sa sako asin makakaasa ako sa tabang nia kun magkaproblema ako. Maski mayong gayong kuarta an sakong mga magurang, ibinakal ninda ako nin sarong bagong bisikleta. Yaon pa sako an resibo kan bisikletang iyan, asin kun hineheling ko iyan, napapaluha ako. Nagadan si Tatay asin si Nanay kan 1961, alagad an madonong na mga tataramon ni Tatay nag-aaningal pa man giraray sa sakong talinga; iyan nakaenkaminar asin nakaranga sa sako sa bilog na mga taon kan sakong paglilingkod.

An saro pang gikanan nin pagparigon sa boot ko iyo an 75 anyos na Kristiana sa kongregasyon nin Sedan na an ngaran Elise Motte. Durante nin tig-init, nagbibisikleta ako pasiring sa hararayong baryo tanganing maghulit, asin minaiba sa sako si Elise sa pagsakay sa tren. Minsan siring, sarong aldaw an mga inhenyero kan tren nagwelga, asin si Elise dai makakapuli. An solusyon sanang naisip ko iyo na ilaag sia sa laganan nin bagahe sa sakong bisikleta asin ihatod sia papuli​—na bakong komportableng paagi nin pagsakay. Kan sumunod na aga, nagdara ako nin panhapin na kutson asin hinapitan si Elise sa saiyang harong. Dai na sia nagsakay sa tren, asin ibinabakal na sana nia nin mainit na inomon mi para sa pangudtohan an dai nagastos na pamasahe. Siisay an masaboot na an sakong bisikleta puedeng magin pampublikong sakayan?

Dugang na Paninimbagan

Kan 1950, hinagad sako na maglingkod bilang paraataman sa sirkito para sa bilog na amihanan nin Pransia. Mantang 23 anyos pa sana ako, an enot na reaksion ko iyo an pagkatakot. Naghohona ako na napasala sana an sangang opisina! Dakol na hapot an nasa isip ko: ‘Ako daw kualipikado sa espirituwal sagkod sa pisikal sa gibohon na ini? Makakaya ko daw an iba-ibang dagosan kada semana?’ Apuera kaini, magpoon kan ako sais anyos, nagkaigwa ako nin helang sa mata na inaapod na divergent strabismus. An kamugtakan na ini nagpangyari na an saro kong mata magin banlag. Nagin masusupgon ako huli kaini, na naghahadit sa magigin reaksion kan iba. Marahay sana, ta sa kamugtakan na iyan nag-ako ako nin dakol na tabang hale ki Stefan Behunick, na naggradwar sa paadalan nin mga misyonero sa Gilead. Pinahale si Tugang na Behunick sa Polandia huli sa paghuhulit nia asin idinestino sia giraray sa Pransia. Talagang napahanga ako sa kosog kan boot nia. Hararom an saiyang paggalang ki Jehova asin sa katotoohan. May mga nagsasaboot na sia estriktong marhay sako, alagad dakol akong nanodan sa saiya. An pagkapusoan nia nakatabang sa sako na tumalubo na may kompiansa.

An gibohon sa sirkito nagtogot na kamtan ko an nagkapirang marahayon na eksperyensia sa paglilingkod sa langtad. Kan 1953, hinagad sa sako na dalawon ko an sarong Mr. Paoli, na nakaistar sa timog kan Paris asin nagsususkribe nin An Torrengbantayan. Nagkamidbidan kami, asin naaraman ko na nagretiro na sia sa armi asin nanompongan nia na interesanteng gayo An Torrengbantayan. Sinabi nia sako na pakatapos niang basahon an sarong artikulo manongod sa Memorial kan kagadanan ni Cristo sa sarong nakaagi pa sanang isyu, sinelebrar nia an Memorial na sia sana asin ginamit nia an natatada pang oras sa banggi sa pagbasa nin Mga Salmo. An samong pag-oolay naglawig nin haros bilog na hapon. Bago ako humale, napag-olayan mi man sa halipot an manongod sa bautismo. Pagkatapos pinadarahan ko sia nin imbitasyon na umatender sa samong pansirkitong asamblea, na gigibohon sa kapinonan kan 1954. Uminabot sia, asin kabilang sa 26 na nabautismohan sa asambleang idto si Tugang na Paoli. Gikanan pa man giraray nin kagayagayahan para sa sako an mga eksperyensiang arog kaiyan.

Rosa: Kan Oktubre 1948, nagpoon akong maglingkod bilang payunir. Pagkatapos maglingkod sa Anor, harani sa Belhika, idinestino ako sa Paris, kaiba an saro pang payunir, si Irène Kolanski (Leroy na ngonyan). Nag-istar kami sa sarong sadit na kuarto sa Saint-Germain-des-Près sa pinakasentro kan siudad. Huli ta saro akong daragang taga baryo, napapahanga akong marhay sa mga taga Paris. Iniimahinar ko na gabos sinda moderno asin madonong na marhay. Alagad tolos kong naaraman sa paghuhulit sa sainda na mayo man sindang pagkakalaen sa ibang mga tawo. Parate kaming inaalaw kan mga nagbabantay sa mga edipisyo, asin depisil makapoon nin mga pag-adal sa Biblia. Dawa siring, may mga minaako sa samong mensahe.

Durante nin sarong pansirkitong asamblea kan 1951, kaming duwa ni Irène ininterbio manongod sa paglilingkod mi bilang payunir. Todan nindo kun siisay an nag-interbio samo? Sarong hoben na paraataman sa sirkito na an ngaran Marian Szumiga. Nagkamidbidan na kami kan enot, alagad pagkatapos kan asambleang iyan, nagpoon na kaming magsuratan. Magkapareho kami ni Marian sa dakol na bagay, kaiba na an bagay na kaming duwa nabautismohan sa iyo man sanang taon asin nagpoon na magpayunir sa parehong taon. Pero, an pinakaimportante pareho ming gusto na magdanay sa bilog na panahon na paglilingkod. Kaya pagkatapos nin mapagngayongayong pagturotimbang sa mga bagay-bagay, nagpakasal kami kan Hulyo 31, 1956. Huli sa lakdang na iyan, nagpoon an biyong pagbabago sa buhay ko. Kinaipuhan na bako sanang matuod ako sa pagigin may agom kundi patin sa pag-iba ki Marian sa gibohon sa sirkito, na nangangahulogan nin laen-laen na torogan kada semana. Sa primero, depisil iyan, alagad dakulang kagayagayahan an naghahalat samo.

Sarong Nakakakontentong Buhay

Marian: Sa nag-aging mga taon, nagkapribilehio kaming tumabang sa pag-andam nin nagkapirang kombension. Espesyalmenteng naoogma akong girumdomon an saro na ginibo kan 1966, sa Bordeaux. Kan panahon na iyan, prohibido an mga aktibidad kan Mga Saksi ni Jehova sa Portugal. Kaya an programa kan asamblea ginibo man sa Portugues para sa kapakinabangan kan mga Saksing idto na makakapagbiahe pasiring sa Pransia. Ginatos sa samong Kristianong mga tugang hale sa Portugal an uminabot, alagad an problema iyo an dadagosan ninda. Huling an mga Saksi sa Bordeaux mayo nin igong lugar sa harong ninda, inarkila mi an sarong daing laog na sinehan tanganing magamit na dormitoryo. Hinale mi an gabos na tukawan, asin ginamit mi an kurtina sa entablado tanganing gibohon an hall na duwang dormitoryo, an saro para sa mga tugang na lalaki asin an saro para sa mga tugang na babae. Nag-instalar man kami nin mga banyo asin lababo, naglaag kami nin mga ohot sa sementadong salog, asin tinahoban iyan nin mga canvas sheet. Kontento an gabos sa areglong ini.

Pagkatapos kan mga sesyon sa kombension, binibisita mi an samong mga tugang sa dormitoryo. Marahayon nanggad an palibot. Naparigon nanggad an samong boot kan mga eksperyensia ninda sa ibong kan mga taon nin pagtagal ninda sa pagtumang! Kan humale na sinda pagkatapos kan asamblea, napaluha kami gabos.

Saro pang pribilehio an uminabot duwang taon bago kaini, kan 1964, kan hinagad sako na maglingkod bilang paraataman sa distrito. Sa giraray nag-isip-isip ako kun baga kualipikado ako sa ipinapagibong iyan. Alagad an saboot ko, kan hagadon sako kan mga may paninimbagan na akoon ko an asignasyon na iyan, malinaw na naghohona sinda na may kakayahan ako na gibohon iyan. Sarong marahayon na eksperyensia na maglingkod kaiba an iba pang nagbibiaheng mga paraataman. Dakol na marhay akong nanodan sainda. Dakol sa sainda an tunay na mga halimbawa nin pasensia asin pagmamaigot, mga kualidad na mahalagang marhay sa pagheling ni Jehova. Nasabotan ko na kun makanood sana kitang maghalat, aram ni Jehova an tamang panahon para sato.

Kan 1982 hinagad man samo kan sangang opisina na pangatamanan an sarong sadit na grupo nin 12 parahayag na Polaco sa Boulogne-Billancourt, na yaon sa luwas kan Paris. Nakakabigla iyan. Aram ko an teokratikong mga termino sa Polaco, alagad nadedepisilan akong gumibo nin mga sentence. Pero, nakatabang na marhay sako an kabootan asin pagigin andam na magkooperar kan mga tugang na idto. Ngonyan, igwa nin mga 170 parahayag sa kongregasyon na iyan, kabilang an haros 60 payunir. Kan huri, nagdalaw man kami ni Rosa sa mga grupo asin kongregasyon na Polaco sa Austria, Dinamarca, asin Alemania.

Pagbabago nin mga Kamugtakan

An pagdalaw sa manlaenlaen na kongregasyon an samong buhay, alagad huli sa sakong nagluluyang salud kinaipuhan na pumondo kami sa samong ministeryong pagbibiahe kan 2001. Nakakua kami nin apartment sa banwaan nin Pithiviers, kun saen nag-iistar an tugang kong si Ruth. May kabootan na ninombrahan kami kan sangang opisina bilang mga espesyal payunir na an kahagadan na oras angay sa samong mga kamugtakan.

Rosa: An enot na taon pagkatapos na pumondo kami sa gibohon sa sirkito depisilon na marhay para sako. Nagin grabeng marhay an mga pagbabago kaya nakamate ako nin pagigin daing serbi. Dangan ipinagirumdom ko sa sakong sadiri, ‘Puede mo pa man giraray na gamiton an saimong panahon asin natatadang kosog sa kapakipakinabang na paagi sa paglilingkod bilang sarong payunir.’ Ngonyan, naoogma akong gumibo kaiba an iba pang payunir sa samong kongregasyon.

Pirme Kaming Pinapangatamanan ni Jehova

Marian: Nagpapasalamat ako ki Jehova na si Rosa an nagin kadamaydamay ko sa nakaaging 48 taon. Durante kan mga taon na idto nin gibohon na nagbibiahe, sia nagin dakulaon na suporta sa sako. Minsan sarong beses dai ko sia nadangog na nagsabing, ‘Gusto ko kutanang mamirmehan kita sa sarong lugar asin magkaigwa nin sadiri tang harong.’

Rosa: Kun beses may minasabi sa sako, “Bakong normal an buhay nindo. Pirme kamong nakikiistar sa iba.” Alagad ano talaga an sarong “normal na buhay”? Sa parate pinapalibotan niato an satong sadiri nin dakol na bagay na puedeng makaolang sa satong pagmamaigot na magibo an espirituwal na mga aktibidad. An talagang kaipuhan ta sana iyo an komportableng kama, lamesa, asin pira sanang kaipuhan na ibang bagay. Bilang mga payunir kadikiton an samong materyal na mga bagay, pero igwa kami kan gabos na bagay na kaipuhan mi tanganing gibohon an kabotan ni Jehova. Kun beses may minahapot sa sako, “Ano an gigibohon nindo kun gurang na kamo na mayo nin sadiring harong asin mayo nin pension?” Dangan, kokotaron ko an mga tataramon sa Salmo 34:10: “Kun dapit sa mga naghahanap ki Jehova, dai sinda magkukulang nin ano man na marahay.” Pirme kaming pinapangatamanan ni Jehova.

Marian: Iyo nanggad! Sa katunayan, labi pa an itinao samo ni Jehova kisa sa kaipuhan. Halimbawa, kan 1958, ako an napili na magrepresentar sa samong sirkito sa internasyonal na kombension sa Nueva York. Minsan siring, mayo kami nin kuarta na pambakal nin tiket ni Rosa. Sarong banggi may sarong tugang na lalaki na nagtao samo nin sobre na may nakasurat na “Nueva York.” An laog kaiyan na regalo nagpangyari na makabiahe si Rosa kaiba ko!

Kaming duwa ni Rosa dai nanggad nagbabasol na ginamit mi an dakol na taon sa paglilingkod ki Jehova. Mayo nin nawara sa samo kundi nag-ako kami nin gabos na bagay​—sarong nakakakontento asin maogmang buhay sa bilog na panahon na paglilingkod. Si Jehova marahayon nanggad na Dios. Nakanood kaming magtiwala nin biyo sa saiya, asin ruminarom an samong pagkamoot sa saiya. An nagkapira sa satong Kristianong mga tugang itinao an saindang buhay huli sa kaimbodan ninda. Minsan siring, nagtutubod ako na sa pag-agi nin mga taon, puede man na isakripisyo nin sarong tawo an saiyang buhay nin dikit-dikit. Iyan an pinagmamaigotan ming gibohon ni Rosa sagkod ngonyan, asin determinado man kaming gibohon iyan sa ngapit.

[Nota sa Ibaba]

[Ritrato sa pahina 20]

Si François asin Anna Szumiga saka an mga aki ninda, si Stéphanie, Stéphane, Mélanie, asin Marian kan mga 1930. Nakatindog si Marian sa bangko

[Ritrato sa pahina 22]

Sa itaas: Nag-aalok nin mga publikasyon sa Biblia sa sarong puesto sa sadan sa Armentières, sa amihanan na Pransia, kan 1950

[Ritrato sa pahina 22]

Sa wala: Si Stefan Behunick kaiba si Marian kan 1950

[Ritrato sa pahina 23]

Si Rosa (pinakaporo sa wala) kaiba an saiyang kapartner na payunir si Irène (ikaapat hale sa wala), na iinaanunsio an sarong asamblea kan 1951

[Ritrato sa pahina 23]

Si Marian asin Rosa kan aldaw bago an saindang kasal

[Ritrato sa pahina 23]

An transportasyon sa mga pagdalaw sa sirkito sa pangenot paagi sa bisikleta