An Pagbasa kan Biblia—Gikanan nin Kosog sa Bilog Kong Buhay

Isinaysay ni Marceau Leroy

“SA KAENOTENOTE linalang nin Dios an kalagñitan asin an daga,” an enot na mga tataramon na nabasa ko nin pribado sa sakong kuarto. Taano ta sekreto akong nagbasa? Siertong dai ooyonan kan sakong ama, na seradong ateista, an librong kapot ko—an Biblia.

Dai ko pa noarin man nabasa an Biblia, asin garo ako tinamaan nin kikilat huli sa enot na mga tataramon na iyan kan Genesis. Naisip ko na ‘Uni na an paliwanag dapit sa pagkaoroyon kan mga ley nin naturalesa na haloy ko nang pinagngangalasan!’ Huling napukaw nanggad an interes ko, nagbasa ako poon alas otso nin banggi sagkod alas kuatro nin aga. Iyan an kapinonan kan pambilog na buhay na rutina ko na basahon an Tataramon nin Dios. Togoti akong ipaliwanag kun paano an pagbasa kan Biblia nagin gikanan nin kosog sa bilog kong buhay.

“Babasahon Mo Na Iyan Aroaldaw”

Namundag ako kan 1926, sa Vermelles, sarong baryo na may minahan nin karbon sa amihanan na parte nin Pransia. Durante kan ikaduwang guerra mundial, an karbon sarong produkto na mahalaga para sa nasyon. Kaya bilang minero, ako bakong obligado na magserbisyo sa militar. Pero, tanganing magkaigwa nin mas marahay na buhay, nagpoon akong mag-adal nin elektrisidad asin teknolohiya nin radio, na huli kaiyan nagin interesante para sa sako an pagkaoroyon kan mga ley nin naturalesa. Kan ako 21 anyos na, tinawan ako nin kaklase ko kan kaenot-enote kong kopya nin Biblia, na nagsasabing, “Maninigo mong basahon an librong ini.” Kan matapos kong basahon iyan, kombensido ako na an Biblia Tataramon nin Dios, na sarong kapahayagan para sa katawohan.

Huling naisip ko na maoogma man an kataraed mi na basahon an Biblia, nagkua ako nin walong kopya. Nabigla ako ta tinuyatuya asin kinontra ninda ako. Nagpatanid an superstisyoso kong mga paryente, “Oras na ponan mong basahon an librong iyan, babasahon mo na iyan aroaldaw!” Talagang binasa ko iyan, asin nungka kong pinagbasolan an paggibo kaiyan. Nagin rutina ko iyan sa bilog kong buhay.

Huling narisa nin nagkapirang kataed mi an interes ko sa Biblia, itinao ninda sa sako an mga publikasyon na inako ninda hale sa Mga Saksi ni Jehova. An mga buklet na siring kan One World, One Governmenta (na maheheling digdi sa lenguaheng Pranses) nagpaliwanag kun taano ta itinotokdo kan Biblia na an Kahadean nin Dios an solamenteng paglaom para sa katawohan. (Mat. 6:10) Mas determinado ako kisa kasuarin man na sabihon sa iba an paglaom na ini.

An saro sa enot na nag-ako sako nin Biblia iyo si Noel, na amigo ko poon pagkaniaki. Huling sia aktibong Katoliko, inareglo niang makaolay mi an sarong lalaki na nag-aadal na magin padi. Natakot ako, pero aram ko sa nabasa ko sa Salmo 115:4-8 asin Mateo 23:9, 10 na dai inooyonan nin Dios an paggamit nin mga idolo sa pagsamba asin nin mga titulong pangrelihion bilang pag-apod sa mga klerigo. Nagtao ini sa sako nin kosog nin boot na idepensa an sakong bagong pagtubod. Bilang resulta, inako ni Noel an katotoohan, asin sagkod ngonyan sia nagdadanay na maimbod na Saksi.

Dinalaw ko man an tugang kong babae. An saiyang agom may mga libro dapit sa espiritismo asin riniribok nin mga demonyo. Minsan ngani an pagmate ko kan primero garo baga mayo ako nin kosog, an teksto na arog kan Hebreo 1:14 nakakombensir sa sako na suportado ako kan mga anghel ni Jehova. Kan iaplikar kan bayaw ko an mga prinsipyo sa Biblia asin haleon nia an gabos na may koneksion sa okulto, nakatalingkas sia sa pang-iimpluwensia nin mga demonyo. Sia asin an tugang kong babae pareho nagin maigot na Saksi.

Kan 1947, nagdalaw sa samong harong si Arthur Emiot, na Amerikanong Saksi. Huling naogma akong marhay, hinapot ko sia kun saen nagtitiripon an mga Saksi. Sinabi nia sa sako na igwa nin sarong grupo sa Lievin, mga 10 kilometros an rayo. Depisil makabakal dawa nin bisikleta kan panahon na idto, kaya sa laog nin nagkapirang bulan, naglalakaw ako pasiring asin papuli hale sa mga pagtiripon. Walong taon nang ipinagbabawal an paghuhulit kan Mga Saksi ni Jehova sa Pransia. Igwa sana nin 2,380 Saksi sa bilog na nasyon—dakol sa sainda an nag-imigrar hale sa Polandia. Alagad kan Setyembre 1, 1947, legal na rinekonoser giraray an satong paghuhulit sa Pransia. Nag-establisar giraray nin sangang opisina sa Paris, duman sa Villa Guibert. Huling mayo ni sarong payunir sa Pransia, nagkaigwa nin pangapodan sa Disyembre 1947 isyu kan Informant (na ngonyan An Satong Ministeryo sa Kahadean) para sa mga general pioneer na maghuhulit nin 150 oras kada bulan. (Kan 1949, iyan ibinaba sa 100 na oras.) Tanganing magin lubos na kaoyon kan sinabi ni Jesus sa Juan 17:17 na ‘an tataramon nin Dios katotoohan,’ ako nagpabautismo kan 1948, asin nagin payunir kan Disyembre 1949.

Hale sa Presohan Pabalik sa Dunkerque

Dai nahaloy an enot na destino ko sa Agen, na nasa timog na parte kan Pransia. Huling naghale na ako sa minahan, puede akong obligaron na magserbisyo sa militar. Nagsayuma akong mag-ayon sa armi, kaya prineso ninda ako. Minsan ngani dai ako tinogotan na magkaigwa nin Biblia, nakakua ako nin pira sanang pahina kan libro nin Salmo. Naparigon ako sa pagbasa kaiyan. Kan ako makaluwas, kaipuhan kong magdesisyon: Mapondo daw ako sa bilog na panahon na paglilingkod tanganing mamirmehan sa sarong lugar? Sa giraray, nakatabang sa sako an nabasa ko sa Biblia. Hinorophorop ko an sinabi ni Pablo sa Filipos 4:11-13: “Ako makakaguibo kan gabos na bagay dian sa saiya na nagpapakosog sako.” Nagdesisyon akong magpadagos sa pagpapayunir. Kan 1950, tinawan ako nin bagong destino—sa Dunkerque, sarong banwaan na duman nakapaghulit na ako kan enot.

Mayo ako nin ano man pag-abot ko duman. Grabe an danyos sa banwaan na iyan durante kan Guerra Mundial II, asin masakit makahanap nin madadagosan. Nagdesisyon akong dalawon an sarong pamilya na dati kong hinuhulitan, kaya labi-labi an kagayagayahan kan kagharong na babae: “Ay, Mr. Leroy, nakaluwas ka na palan! Sinabi kan agom ko na kun dakol na lalaki an arog mo, nungka kutanang nagkaigwa nin giera.” Igwa sinda nin dagosan para sa mga bisita, kaya pinadagos ninda ako duman sagkod na dai pa nagpopoon an panahon nin mga turista. Kan aldaw man sanang idto, inalok ako nin trabaho ni Evans na tugang ni Arthur Emiot.b Saro siang interprete sa pier asin naghahanap sia nin guardia na mabantay sa barko kun banggi. Ipinamidbid nia ako sa saro sa pangenot na mga opisyal (first officer) kan barko. Maniwangon ako pakaluwas ko sa presohan. Kan ipaliwanag iyan ni Evans sa opisyal, sinabihan ako kaini na magkakan na lang ano man an magustohan ko sa repridyeretor. Sa saro sanang aldaw, nagkaigwa ako nin dagosan, trabaho, asin kakanon! Tunay nanggad na napakosog an kompiansa ko sa sinabi ni Jesus sa Mateo 6:25-33.

Kan magpoon na an panahon nin mga turista, kaipuhan mi kan sakong kapartner sa pagpayunir na si Simon Apolinarski na maghanap nin ibang madadagosan, alagad determinado kaming magdanay sa samong destino. May nag-alok sa samo na magdagos sa sarong lumang kuadra nin kabayo, na duman an torogan mi kutson na gibo sa dagami. Ginamit mi an samong panahon sa paglilingkod. Hinulitan mi an kagsadiri kan kuadra, asin saro sia sa dakol na nag-ako kan katotoohan. Dai naghaloy, may nagluwas na artikulo sa lokal na peryodiko, na nagpapatanid sa mga taga Dunkerque dapit sa “biglang paglakop kan aktibidad kan Mga Saksi ni Jehova sa rehion.” Pero, kami lang ni Simon asin pira sanang parahayag an Saksi duman! Sa ibong nin mga kadepisilan, naparigon kami paagi sa paghorophorop sa samong Kristianong paglaom asin pag-isip-isip kun paano kami inataman ni Jehova. May mga 30 regular na parahayag sa Dunkerque kan tawan ako nin bagong asignasyon kan 1952.

Napakosog Para sa Bagong mga Paninimbagan

Pakalihis nin halipot na panahon sa siudad nin Amiens, ninombrahan ako bilang espesyal payunir sa Boulogne-Billancourt, sarong banwaan na harani sa Paris. Nagkaigwa ako nin dakol na tinotokdoan sa Biblia, asin pag-abot nin panahon, an nagkapira sa sainda naglaog sa bilog na panahon na paglilingkod asin pagmimisyonero. An hoben na lalaki na si Guy Mabilat, nag-ako kan katotoohan asin nagin paraataman nin sirkito dangan paraataman nin distrito. Pag-abot nin panahon, sia an nagdirehir sa pagtogdok kan imprentahan sa presenteng Bethel sa Louviers, na medyo harayo sa Paris. Huli sa parateng pakikipag-olay sa ministeryo dapit sa Biblia, orog na nakatadom sa isip ko an Tataramon nin Dios, na nakapagayagayang marhay asin nakatabang sa sako na mapaoswag an sakong kakayahan sa pagtotokdo.

Dangan kan 1953, bigla na sana akong ninombrahan bilang paraataman nin sirkito sa Alsace-Lorraine, sarong rehion na duwang beses sinakop kan Alemania sa pag-oltanan kan 1871 asin 1945. Huli kaini, kaipuhan kong makanood na magtaram nin Aleman. Kan magpoon ako sa gibohon sa sirkito, pira sana an auto, telebisyon, o makinilya sa rehion na iyan asin mayo nin mga transistor radio o personal computer. Alagad bako man mamondo o sobra kasimple an buhay ko. Sa katunayan, iyan magayagayang marhay na panahon. An pagsunod sa sadol kan Biblia na papagdanayon ‘an simpleng mata’ (NW) nangangahulogan na mas dikit kaidto an nakakadisturbo sa paglilingkod ki Jehova kisa sa ngonyan.—Mat. 6:19-22.

Para sa sako, an “Matriumpong Kahadean” na Asamblea kan 1955 sa Paris sarong dai malilingawan na okasyon. Duman ko nakamidbid an magigin agom ko, si Irene Kolanski, na naglaog sa bilog na panahon na paglilingkod kan taon bago ako maglaog dian. An saiyang mga magurang na taga Polandia maigot asin haloy nang Saksi. Dinalaw sinda ni Adolf Weber sa Pransia. Sia nagin hardinero ni Tugang na Russell asin nagpa-Europa tanganing ipahayag an maogmang bareta. Ikinasal kami ni Irene kan 1956, asin nagin kaibaiba ko sia sa gibohon sa sirkito. Sia marahayon nanggad na suporta para sa sako poon kaidto sagkod ngonyan!

Pakalihis nin duwang taon, saro pang sorpresa an nag-abot sa sako—ninombrahan ako bilang paraataman nin distrito. Huling kulang nin kualipikadong mga tugang na lalaki, padagos pa man giraray akong nagdalaw sa nagkapirang kongregasyon bilang paraataman nin sirkito. Kanigoan kasibot na panahon idto! Apuera sa paghuhulit nin 100 na oras kada bulan, kaipuhan kong magtao nin mga pahayag, magdalaw sa tolong grupo nin pag-adal sa libro, magsiyasat nin mga rekord, asin mag-andam nin mga report kada semana. Paano pa daw ako magkakaigwa nin panahon na basahon an Tataramon nin Dios? Saro sanang solusyon an naisip ko—naggunting ako nin mga pahina sa lumang Biblia asin dinadara ko an nagkapira kaiyan. Sa mga panahon na naghahalat ako sa sarong tawo na makikitagbo sa sako, ilinuluwas ko an mga pahinang iyan tanganing basahon. An halipot na mga panahon na idto nin espirituwal na kaginhawahan nakapakosog sa sakong determinasyon na magpadagos sa sakong asignasyon.

Kan 1967, inimbitaran kami ni Irene na magin permanenteng miembro kan pamilyang Bethel sa Boulogne-Billancourt. Nagpoon akong magtrabaho sa Departamento sa Paglilingkod, asin pakalihis nin labing 40 taon, iyan pa man giraray an pribilehio ko. An sarong nakakagayagayang aspekto kan trabaho ko iyo an pagsimbag sa mga surat na may mga hapot dapit sa Biblia. Ikinakaogma kong marhay an pagsiyasat sa Tataramon nin Dios asin an “pagdepensa . . . sa maogmang bareta”! (Fil. 1:7, NW) Ikinakaogma ko man an pamamayo sa mga pagtokar dapit sa Biblia sa pang-agang pagsamba bago mamahaw. Kan 1976, ninombrahan ako bilang miembro kan Komite kan Sangay sa Pransia.

An Pinakamarahay na Pamumuhay

Minsan ngani nakaeksperyensia ako nin masakit na mga panahon, ngonyan an pinakadepisil na panahon sa buhay ko, huling limitado na an nagigibo mi ni Irene dahel sa paggurang asin mga problema sa salud. Sa ibong kaiyan, napagdadanay na buhay an samong paglaom paagi sa magkaibanan ming pagbasa asin pag-adal kan Tataramon nin Dios. Ikinakaogma ming magbus pasiring sa teritoryo kan samong kongregasyon tanganing sabihon sa iba an paglaom na ini. An pinagsaro ming eksperyensia na labing 120 taon sa bilog na panahon na paglilingkod nakakapahiro sa samo na bilog na pusong irekomendar ini sa gabos na nagmamawot na magkaigwa nin nakakaogma, magayagaya, asin kapakipakinabang na buhay. Kan isurat ni Hadeng David an mga tataramon sa Salmo 37:25, sia ‘gurang’ na, alagad arog nia, “dai ko [man] naheling na an siisay man na matanos lubos na pinabayaan.” (NW)

Sa bilog kong buhay, pinapakosog ako ni Jehova paagi sa saiyang Tataramon. Labing 60 taon na an nakaagi, sinabi kan mga paryente ko antes pa na magigin rutina ko sa bilog na buhay an pagbasa kan Biblia. Tama sinda. Iyan nagin rutina sa aroaldaw na nungka kong pinagbasolan!

[Mga Nota sa Ibaba]

[Ritrato sa pahina 5]

Kami ni Simon

[Ritrato sa pahina 5]

Sarong Biblia na kapareho kan kaenot-enoteng kopya na itinao sa sako

[Ritrato sa pahina 5]

Kan naglilingkod bilang paraataman nin distrito

[Ritrato sa pahina 6]

Kan aldaw kan samong kasal

[Ritrato sa pahina 6]

Ikinakaogma mi ni Irene an pagbasa asin pag-adal kan Tataramon nin Dios