May Pakinabang daw an Pagigin Maimbod?
“DAKULANG marhay an ibinabayad mo para sa seguro sa salud,” an sabi ni Karl, sarong representante nin seguro.a “Kun mabalyo ka sa sakong kompanya, makakatipid ka nin 15 euro kada bulan, na dakulang kantidad.”
“Puedeng totoo iyan,” an simbag ni Jens. “Alagad nagkapirang taon na akong nagkukua kan sakong seguro sa salud sa kompanyang iyan. Sinda nagin matinabang na marhay sa sako kan nakaagi, asin gusto kong magdanay na maimbod sa sainda.”
“An kaimbodan sarong marahay na kualidad,” an simbag ni Karl. “Pero, nagkakagastos ka sa pagigin maimbod!”
Tama si Karl. Sa parate, tibaad may gastos an pagigin maimbod sa iba. Naghahagad man iyan nin panahon, kosog, asin dedikasyon. Maninigo daw dian an kaimbodan?
Inoomaw nin Dakol Pero Dai Ginigibo
Sa sarong surbey na ginibo sa Alemania kan Allensbach Opinion Research Institute, an 96 porsiento kan mga hinapot minansay an kaimbodan na kawiliwiling kualidad. An ikaduwang surbey kan Allensbach na ginibo sa mga 18 sagkod 24 anyos nagpapaheling na an kaimbodan ibinibilang kan 2 sa 3 hinapot na “nasa uso,” an boot sabihon, paborable an pagmansay ninda dian.
Minsan ngani inoomaw nin dakol an kaimbodan, ibang orolay na an aktuwal na pagigin maimbod. Halimbawa, sa nagkapirang nasyon sa Europa, an mga mag-agom o magkakapamilya parateng kadikiton na kaimbodan an ipinapaheling sa lambang saro. An mga magkatood parateng bakong maimbod sa lambang saro. Asin sa pundamental nawara na an kaimbodan na kan nakaaging mga panahon nagserbing bogkos sa mga among asin empleyado o sa sarong negosyo asin sa mga parokyano kaiyan. Taano man?
Kun beses, huli sa sibot na pamumuhay mayo na nin panahon o emosyonal na kosog para sa mga kapanugaan na naghahagad nin kaimbodan. An mga tawong nadesganar asin nasudya an linalaoman sa mga relasyon sa ibang tawo tibaad nag-aalangan na ngonyan na magin maimbod sa siisay man. Tibaad mas suno kan iba an klase nin buhay na yaon ngonyan sa aga mayo na, na dai naghahagad nin kaimbodan.
Ano man an rason, an kaimbodan sarong moral na karahayan na mas parateng inoomaw kisa ginigibo. Huli kaini, estudyaran niato an mga hapot na: May pakinabang daw an pagigin maimbod? Kun iyo, siisay daw an dapat niatong pahelingan nin kaimbodan, asin sa anong mga paagi? Ano an mga pakinabang sa pagigin maimbod?
[Nota sa Ibaba]
a Sinalidahan an mga ngaran sa artikulong ini asin sa masunod.
[Blurb sa pahina 3]
An kaimbodan sarong moral na karahayan na mas parateng inoomaw kisa ginigibo