“An Tataramon sa Tamang Kapanahonan Kaiyan O Abaang Rahay!”

DURANTE nin sarong bilog na aldaw na asamblea kan Mga Saksi ni Jehova, ginibo ni Kim an pinakamakakaya nia na maghinanyog asin magkua nin mga nota mantang naghihingoang papagdanayon na toninong na nakatukaw an saiyang duwa may kabangang taon na aking babae. Sa katapusan kan programa, nagsalingoy ki Kim an sarong tugang na Kristiana na nagtutukaw karaya nia asin sinserong kinomendaran sia sa paagi nin pag-asikaso ninda kan saiyang agom na lalaki sa saindang aking babae durante kan programa. An komendasyon na iyan mahalagang marhay para ki Kim kaya dawa ngonyan, pakaagi nin dakol na taon, sinasabi nia: “Kun ako nakakamate na pagal na nanggad sa panahon nin mga pagtiripon, iniisip ko an sinabi kan tugang na babaeng iyan. An saiyang maboot na mga tataramon nakakaenkaminar pa man giraray sa sako na padagos na sanayon an samong aking babae.” Tunay nanggad, an napapanahon na mga tataramon puedeng makaparigon sa boot nin saro. An Biblia nagsasabi: “An tataramon sa tamang kapanahonan kaiyan O abaang rahay!”​—Talinhaga 15:23.

Pero, para sa nagkapira sa sato, tibaad depisil an pagtao nin komendasyon sa iba. Kun beses, an pakamate kan satong sadiring mga kakulangan puedeng magpadepisil na gibohon iyan. An sarong Kristiano nagsasabi: “Para sa sako, garo iyan pagtindog sa sarong malumoy na daga. Mientras na orog kong itinutulod paitaas an iba, orog ko man na namamatean na ako itinutulod paibaba.” An mga dahelan na siring kan pagkamasusupgon, kadaihan nin kompiansa sa sadiri, o an takot na mamisinterpretar puede man na magpadepisil sa pagtao nin komendasyon. Dugang pa, kun kita mismo bihira o dai nag-aako nin pagrekonoser kan kita nagdadakula, tibaad madepisilan kitang magtao nin komendasyon sa iba.

Minsan siring, an pakaaram na an komendasyon puedeng magkaigwa nin marahay na epekto sa nagtatao sagkod sa nag-aako tibaad pahiroon kitang gibohon an satong pinakamakakaya tanganing magtao nin komendasyon sa tamang panahon. (Talinhaga 3:27) Kun siring, ano an positibong mga epekto na ibinubunga kan paggibo kaiyan? Estudyaran niato sa halipot an nagkapira.

Positibong mga Epekto

An tamang komendasyon puedeng makaparigon sa kompiansa sa sadiri kan nag-aako kaiyan. “Kun tinatawan ako nin komendasyon kan mga tawo, namamatean ko na may kompiansa sinda sako, na naniniwala sinda sako,” an sabi ni Elaine, sarong agom na Kristiana. Iyo, an pagtao nin komendasyon sa saro na mayo nin kompiansa sa sadiri puedeng makapakosog sa boot kan tawong iyan tanganing atubangon an mga balakid, asin bilang resulta, nakakanompong sia nin kagayagayahan. An mga hoben nangorognang nakikinabang sa komendasyon na angay sa sainda. An sarong tinedyer na nag-aadmitir na sia pinanluluyahan nin boot huli sa saiyang negatibong mga kaisipan nagsasabi: “Pirme kong hinihingoang gibohon an sakong pinakamakakaya tanganing paogmahon si Jehova, alagad kun minsan nagsasaboot ako na dawa ano an gibohon ko, bakong igo iyan. Kun may nagtatao nin komendasyon sa sako, marahayon an pagmate ko.” Totoo nanggad an talinhaga sa Biblia: “Siring sa mga mansanas na bulawan sa mga inukit na pirak an tataramon na itinaram sa tamang kapanahonan kaiyan.”​—Talinhaga 25:11.

An komendasyon puedeng makamotibar asin makaenkaminar sa sarong tawo. An sarong bilog na panahon na ministro nagsasabi, “An komendasyon nag-eenkaminar sa sako na orog pang magmahigos asin pakarhayon an kualidad kan sakong ministeryo.” Sinasabi nin sarong ina nin duwang aki na kun nag-aako nin pagrekonoser an saiyang mga aki hale sa ibang miembro kan kongregasyon huli sa pagkomento sa mga pagtiripon, gusto nindang magkomento nin orog pa. Iyo, puedeng motibaron kaiyan an mga hoben na umoswag sa Kristianong pamumuhay. Sa katunayan, kita gabos nangangaipong aseguraron giraray na kita inaapresyar asin pinapahalagahan. Puede kitang mapagal asin magabatan huli sa kinaban na ini na pano nin tension. An sarong Kristianong magurang sa kongregasyon nagsasabi, “Sa mga panahon na ako nadedesganar, an komendasyon garo simbag sa sakong mga pamibi.” Kaagid kaiyan, si Elaine nagsasabi, “Kun beses namamatean ko na ipinapaheling ni Jehova an saiyang pag-oyon sa sako paagi sa mga ipinapahayag nin iba.”

An pag-ako nin komendasyon puedeng makapamate nin dayupot na relasyon. An pagtao nin tunay na komendasyon nagpapaheling nin pagkamaginirumdom asin nagpapamate nin pagkaigwa nin mainit na pakikiiba, katiwasayan, asin apresasyon. Ebidensia iyan na talagang namomotan niato an satong mga kapwa Kristiano asin pinapahalagahan sinda. Si Josie, na sarong ina, nagsasabi: “Kinaipuhan ko kaidtong manindogan para sa katotoohan sa sarong pamilyang nababanga huli sa relihion. Kan panahon na idto, an pagrekonoser kan maygurang sa espirituwal na mga indibiduwal nakaparigon sa sakong determinasyon na dai sumuko.” Tunay nanggad, “kita mga miembro na kabtang kan lambang saro.”​—Efeso 4:25.

An pagmawot na magtao nin komendasyon nakakatabang sa sato na maheling an marahay sa iba. Hineheling niato an marahay na mga kualidad nin iba, bakong an mga kaluyahan ninda. An sarong Kristianong magurang sa kongregasyon na an ngaran David nagsasabi, “An pagigin mapag-apresyar sa ginigibo kan iba makakatabang sa sato na mas parateng magtao nin komendasyon sa iba.” An pagsaisip na si Jehova asin an saiyang Aki mainomaw nanggad sa mga tawong bakong sangkap mapahiro sa sato na magin mainomaw man.​—Mateo 25:21-​23; 1 Corinto 4:5.

Mga Maninigo sa Komendasyon

Si Jehova Dios, huli sa saiyang pagigin Kaglalang, an pangenot sa gabos na maninigong omawon. (Kapahayagan 4:11) Minsan ngani dai nia kita kaipuhan tangani na parigonon an saiyang kompiansa sa sadiri o tangani na motibaron sia, kun inoomaw niato si Jehova huli sa saiyang kadakulaan asin mamomoton na kabootan, sia minarani sa sato asin napapatalubo niato an relasyon sa saiya. An pag-omaw sa Dios nagpapatalubo man nin nakakarahay asin tama sanang pagmansay sa satong sadiring mga nagibo asin nagpapangyari sa sato na iatribwir an satong mga kapangganahan ki Jehova. (Jeremias 9:​23, 24) Iinaalok man ni Jehova sa gabos na tawong maninigo an paglaom na buhay na daing katapusan, asin iyan saro pang nakakamotibar na dahelan na omawon sia. (Kapahayagan 21:​3, 4) Si Hadeng David kan suanoy galagang ‘mag-omaw sa ngaran nin Dios’ asin ‘ibantog an saiyang kadakulaan paagi sa pagpapasalamat.’ (Salmo 69:30) Iyan man logod an magin kamawotan niato.

An mga kapwa parasamba maninigo sa angay na komendasyon. Kun kita nagtatao kaiyan, kita minahiro kaoyon kan pagboot nin Dios na “konsideraron niato an lambang saro tanganing mandagka sa pagkamoot asin sa marahay na mga gibo.” (Hebreo 10:24) Si apostol Pablo arogan sa bagay na ini. Sia nagsurat sa kongregasyon sa Roma: “Enot sa gabos, ako nagpapasalamat sa sakong Dios paagi ki Jesu-Cristo may labot sa saindo gabos, huli ta an saindong pagtubod nababareta sa bilog na kinaban.” (Roma 1:8) Kaagid kaiyan, rinekonoser ni apostol Juan an kapwa nia Kristiano na si Gayo huli sa saiyang marahayon na halimbawa nin ‘paglakaw sa katotoohan.’​—3 Juan 1-4.

Ngonyan, kun an sarong kapwa Kristiano magpaheling nin arog-Cristong kualidad na maninigong arogon, magtao nin inandam na marhay na kabtang, o magtao nin odok sa pusong komento durante nin sarong pagtiripon, may marahay na oportunidad kita na ipaheling an satong pag-apresyar sa indibiduwal na iyan. O kun an sarong aki naghihingoang marhay na hanapon an mga teksto durante nin mga pagtiripon kan kongregasyon, puede kitang magtao nin komendasyon. Si Elaine, na nasambitan kasubago, nagsasabi: “Nagkakalaenlaen kita sa mga balaog na nasa sato. Paagi sa pagrisa kan ginigibo nin iba, ipinapaheling niato an satong pag-apresyar sa laen-laen na balaog sa tahaw kan banwaan nin Dios.”

Sa Laog kan Pamilya

Kumusta man an pagpahayag nin pag-apresyar sa mga miembro kan sadiri niatong pamilya? An agom na lalaki asin babae nangangaipo nin dakol na panahon, paghihingoa, asin mamomoton na atension sa pagtao nin espirituwal, emosyonal, asin materyal na suporta sa saindang pamilya. Daing duwa-duwa na sinda maninigo na makadangog nin komendasyon hale sa lambang saro asin hale sa saindang mga aki. (Efeso 5:33) Halimbawa, mapadapit sa sarong may kakayahan na agom na babae, an Tataramon nin Dios nagsasabi: “An saiyang mga aki nagtirindog asin inapod siang maogma; an saiyang kagsadiri minatindog, asin sia nag-oomaw sa saiya.”​—Talinhaga 31:​10, 28.

An mga aki maninigo man sa komendasyon. Makamomondo, may mga magurang na marikas magsabi sa saindang mga aki kun ano an linalaoman ninda sa mga ini alagad bihirang magtao nin komendasyon sa mga ini huli sa paghihingoa kan mga ini na magin magalang asin makinuyog. (Lucas 3:22) Kun itinatao sa enot na mga taon kan pagtalubo nin aki, sa parate an komendasyon nagpapangyari na makamate an aki na sia kaipuhan asin mas tiwasay.

Totoo, kaipuhan an paghihingoa sa pagtao nin komendasyon sa iba, alagad nag-aani kita nin dakol na pakinabang sa paggibo kaiyan. Sa katunayan, mientras na mas mahigos kita sa pagtao nin komendasyon sa mga maninigo kaiyan, maorog man an satong kaogmahan.​—Gibo 20:35.

Umako Asin Magtao nin Komendasyon na May Tamang Saboot

Minsan siring, an pag-ako nin komendasyon puedeng bumalo sa nagkapira. (Talinhaga 27:21) Halimbawa, puedeng pataluboon kaiyan sa mga indibiduwal na may tendensiang magin mapalangkaw an mga saboot nin pagigin nakakalabi. (Talinhaga 16:18) Huli kaini, may dahelan na magin mapagmaan. Si apostol Pablo nagtao kan realistikong sadol na ini: “Sinasabihan ko an lambang saro dian sa saindo na dai mag-isip dapit sa saiyang sadiri nin orog kisa maninigong isipon; kundi na mag-isip tanganing magkaigwa nin toltol na kaisipan, an balang saro siring sa sokol nin pagtubod na itinao nin Dios sa saiya.” (Roma 12:3) Tanganing tabangan an iba na dai mahulog sa siod nin sobrang pagheling sa sadiri, tibaad madonong na dai magpokus sa mga karakteristiko na siring baga nin pagigin matali o magayon. Imbes, maninigo niatong rekonoseron an iba huli sa saindang marahay na mga gibo.

Kun itao asin akoon na may tamang saboot, an mga tataramon nin komendasyon puedeng makaapektar sa sato sa positibong paagi. Tibaad mapahiro kitang rekonoseron an satong utang na boot ki Jehova para sa ano man na marahay na bagay na nagibo niato. An komendasyon puede man na makaenkaminar sa sato na padagos na gumawe sa marahay na paagi.

An sinsero asin angay nanggad na komendasyon sarong regalo na gabos kita puedeng magtao. Kun pinag-isipan niatong marhay na magtao kaiyan sa sarong tawo, tibaad labi pa an magin kahulogan kaiyan para sa nag-ako kisa marerealisar niato noarin man.

[Kahon/Ritrato sa pahina 18]

Sarong Surat na Nakapahiro sa Saiyang Puso

Nagigirumdoman na marhay kan sarong nagbibiaheng paraataman an sarong okasyon kan sindang mag-agom bumalik sa saindang dagosan pakatapos nin sarong malipoton na aldaw nin tiglipot sa ministeryo. Sia nagsasabi: “An sakong agom nalilipot asin nanluluya an boot, asin sinabi nia sako na sa boot nia dai na nia kayang magpadagos. ‘Mas marahay pa nanggad,’ an sabi nia, ‘na maglingkod sa bilog na panahon na ministeryo na nakaasosyar sa sarong kongregasyon, magpirme sa sarong lugar, asin magkondukta kan sadiri mi mismong mga pag-adal sa Biblia.’ Dai nguna ako nagdesisyon, na sinasabi na magpapadagos kami sagkod na matapos an semana asin hehelingon mi kun ano an magigin saboot nia sa panahon na iyan. Kun talagang gusto pa man giraray niang pumondo, igagalang ko an saiyang mga saboot. Kan aldaw man sanang idto, naghapit kami sa opisina sa koreo asin nakua mi duman an sarong surat hale sa sangang opisina na personalmenteng nakaadres sa saiya. An surat igwa nin mamomoton na komendasyon para sa saiyang mga paghihingoa sa ministeryo sa langtad asin sa saiyang pakatagal, na rinerekonoser kun gurano kadepisil na magtorog sa ibang kama sa kada semana. Napahiro nanggad sia kan komendasyon na iyan kaya sia dai na noarin man nagtaram manongod sa pagpondo sa gibohon na nagbibiahe. Sa katunayan, nagkapirang beses na pinarigon nia an sakong boot na magpadagos kan ako nag-isip na pumondo.” An mag-agom na ini nagdanay sa gibohon na nagbibiahe sa laog nin haros 40 taon.

[Ritrato sa pahina 17]

Siisay sa mga kakongregasyon nindo an maninigo sa komendasyon?

[Ritrato sa pahina 19]

Nag-ooswag an mga aki sa mamomoton na atension asin komendasyon