Nakarerepresko an Komendasyon
1 “Bako po na nagin marahay na aki ako ngonyan?” an nagsisiloksigok na sinabi kan sadang na aking babae kan matorog na. Nabigla an saiyang ina sa hapot na iyan. Apisar na narisa nia kun guranong pagmamaigot an ginibo kan saiyang sadang na aking babae na magtoltol sa aldaw na iyan, dai lamang sia nakapagpahayag ni sarong tataramon nin pag-apresyar. An luha kan sadang na aking babaeng iyan maninigong magpagirumdom na kita gabos—hoben asin gurang—nangangaipo nin komendasyon. Narerepreskohan daw niato an mga nasa palibot niato paagi sa pagpahayag nin apresasyon sa marahay na ginigibo ninda?—Tal. 25:11.
2 An mga kapwa Kristiano nagtatao sa sato nin dakol na marahay na dahelan na tawan sinda nin komendasyon. An kamagurangan, ministeryal na mga lingkod, asin mga payunir nagmamaigot na otobon an saindang mga paninimbagan. (1 Tim. 4:10; 5:17) An matatakton sa Dios na mga magurang ginigibo an pinakamakakaya ninda na padakulaon an mga aki ninda sa mga dalan ni Jehova. (Efe. 6:4) An Kristianong mga hoben maigot na linalabanan “an espiritu kan kinaban.” (1 Cor. 2:12; Efe. 2:1-3) An iba fiel na naglilingkod ki Jehova sa ibong nin naglalangkaw na edad, mga problema sa salud, o iba pang mga pagbalo. (2 Cor. 12:7) An gabos na siring maninigong tawan nin komendasyon. Rinerekonoser daw niato an saindang kaomaw-omaw na mga paghihingoa?
3 Personal Asin Espesipiko: Tunay nanggad na inaapresyar niato gabos na matawan nin komendasyon bilang kongregasyon. Minsan siring, orog pa nganing nakarerepresko an komendasyon kun iyan sinasabi sa sato nin personal. Halimbawa, sa kapitulo 16 kan saiyang surat sa mga taga Roma, espesipikong ipinahayag ni Pablo an pag-apresyar mapadapit ki Febe, Prisca asin Aquila, Trifina asin Trifosa, asin Persida, kabilang sa iba pa. (Roma 16:1-4, 12) Kanigoan kanakarerepresko nanggad kan mga tataramon nia para sa mga fiel na idto! An siring na pag-omaw nag-aasegurar giraray sa satong mga tugang na lalaki asin babae na sinda kaipuhan asin orog kitang pinadadayupot sa lambang saro. Nakapagtao daw kamo kasuarin pa sana nin espesipikong personal na komendasyon?—Efe. 4:29.
4 Gikan sa Puso: Tangani na magin tunay na nakarerepresko, dapat na sinsero an komendasyon. Aram nin mga tawo kun baga kita nagtataram gikan sa puso o kita ‘labi-labi sanang nag-oomaw paagi sa tataramon.’ (Tal. 28:23) Mantang sinasanay niato an satong sadiri na mangnohon an marahay sa iba, mapahihiro an satong puso na magtao nin komendasyon. Logod na kita magin matinao nin tunay na komendasyon, sa pakaaram na “an tataramon sa tamang kapanahonan kaiyan O abaang rahay!”—Tal. 15:23.