Magpaheling nin Personal na Interes—Paagi sa Pagtao nin Komendasyon
1 An sinserong komendasyon nagpaparigon sa boot nin mga tawo, nagmomotibar sa sainda na gumibo nin aksion, asin nagtatao sa sainda nin kagayagayahan. Nanompongan nin dakol na parahayag na maski an halipot sanang pagpahayag nin sinserong komendasyon sa parate nakakatabang na maghinanyog an mga tawo sa ministeryo. Paano niato matatawan nin komendasyon an mga tawo mantang hinihingoa niatong sabihon sa sainda an maogmang bareta?
2 Magin Mapagmasid: Namasdan kan pinamuraway na si Jesu-Cristo an marahay na mga gibo kan pitong kongregasyon sa Asia Minor. (Kap. 2:2, 3, 13, 19; 3:8) Kaagid kaiyan, an tunay na interes sa mga tawo na nakakaolay niato sa satong ministeryo mapahiro sa sato na humanap nin mga oportunidad na magtao nin komendasyon. Halimbawa, an sarong malinig na natad, an sarong magurang na nagpapaheling nin mamomoton na pagpadangat sa saiyang mga aki, o an makikatood na huyom asin pagtaratara nin sarong kagharong gabos nagtatao sa sato nin mga oportunidad na magtao nin komendasyon. Namamasdan daw nindo asin inaaprobetsaran tolos nindo an siring na mga oportunidad?
3 Magin Matibay Maghinanyog: Kun naghuhulit sa iba, imbitaran sinda na ipahayag an saindang saboot paagi sa paghapot sa sainda nin angay na mga hapot. Magpaheling sa sainda nin onra paagi sa pag-atentong marhay sa sinasabi ninda. (Roma 12:10) Posibleng marhay na may maaaraman kamo sa sasabihon ninda na huli kaiyan makakapagtao kamo nin sinserong komendasyon dangan madudugangan an naestablisar nindo na puntong mapagkakaoyonan.
4 Gumamit nin Pakabatid: Ano an maninigo niatong gibohon kun may sabihon an kagharong na bakong kaoyon kan katotoohan sa Biblia? Imbes na kontrahon an salang sinabi, pasalamatan an sinabi kan kagharong asin magpadagos paagi sa pagsabi nin arog baga kan “Nasasabotan ko na talagang interesado kamo sa temang ini.” (Col. 4:6) Dawa kun an saro gustong-gustong makipagdiskutiran, sa parate puede niato siang komendaran huli sa saiyang tunay na interes sa temang iyan. An siring na mahoyong pamamaagi puedeng makapagian sa boot nin saro na garo baga marigon an pagkontra sa maogmang bareta.—Tal. 25:15.
5 Tangani na makaparigon sa boot, dapat na sinsero an komendasyon na itinatao niato. An paggamit nin siring na nakakaparigon na mga tataramon nagtataong onra ki Jehova asin puedeng maakit an iba sa mensahe kan Kahadean.