Paglaog sa Isip nin Kaaraman Dapit sa Dios—Paano?

Tibaad nagdududa an nagkapira na an dios talagang interesado na ihayag an saiyang sadiri sa mga tawo. Kun sia interesado, paano nia iyan ginigibo?

AN IKA-16 na siglong Protestanteng Repormador na si John Calvin tamang nagkonklusyon na an Dios dai mamimidbid kan mga tawo paagi sa sadiri nindang mga paghihingoa apuera sana kun ihahayag nia an saiyang sadiri sa katawohan. Minsan siring, an nagkapira tibaad nag-iisip-isip kun baga an Dios talagang interesado na ihayag an saiyang sadiri sa mga tawo. Asin kun interesado sia, paano nia iyan ginigibo?

Si Jehova, an “Kaharohalangkaweng Kaglalang,” igwa nin dahelan para sa gabos na ginigibo nia. Siring man, bilang an “Dios na Makakamhan sa Gabos,” biyong kaya niang gibohon an saiyang mga katuyohan. (Eclesiastes 12:1; Exodo 6:3) Makakasierto kita na gusto niang ihayag sa mga tawo an saiyang mga katuyohan, huling an saiyang propeta na si Amos pinasabngan na magsurat: “An Soberanong Kagurangnan na Jehova dai magibo nin ano man sagkod na dai pa nia ikinakapahayag an saiyang kompidensial na bagay sa saiyang mga lingkod na propeta.” Pero, mangnoha na sinasabing ihinahayag nin Dios an saiyang mga katuyohan sa saiyang mga lingkod sana, sa mga sinserong namomoot sa saiya. Bako daw na lohiko iyan? Kiisay nindo ihinahayag an saindong kompidensial na mga bagay? Dawa sa siisay sana o sa saindong pinakadayupot na mga kaibaiba?—Amos 3:7; Isaias 40:13, 25, 26.

Huli sa kadonongan asin kaaraman nin Dios lubos na nakakamate nin may pagkangirhat na paggalang an mga mapakumbaba, asin tama sana ini. Pero, labi pa sa may pagkangirhat na paggalang an kaipuhan tanganing personal na makinabang kita sa kadonongan asin kaaraman na ihinahayag nin Dios. Idinodoon kan Biblia na tanganing manodan an mga kaisipan nin Dios, kaipuhan niato an mapakumbabang puso: ‘Pahalagahan mo an sakong mga togon. Magtao ka nin atension sa kadonongan paagi sa saimong talinga. Ikiling mo an saimong puso sa pakabatid. Mag-apod ka sa pakasabot mismo asin magkurahaw ka sa pakabatid. Padagos na hanapon mo iyan siring baga sa plata.’—Talinhaga 2:1-4.

An mapakumbabang tawo na naggigibo nin arog kaining paghihingoa tunay nanggad na mamimidbid an Dios. An tekstong iyan sa libro nin Talinhaga nagpapadagos: “Si Jehova mismo nagtatao nin kadonongan; gikan sa saiyang ngoso may kaaraman asin pakabatid.” Iyo, an sinserong mga naghahanap kan katotoohan puedeng ‘masabotan an katanosan asin tamang paghusgar patin pagigin tanos, an bilog na dalan nin marahay.’—Talinhaga 2:6-9.

Paghanap kan Katotoohan

An The Encyclopedia of Religion nagsasabi: “Karakteristiko kan buhay nin tawo an pangangaipo na mamidbid an kalaenan kan totoo asin bakong totoo, makapangyarihan asin mayong kapangyarihan, tunay asin mapandaya, dalisay asin kontaminado, malinaw asin malibog, saka kan relatibong pagigin sobra nang marhay o bako.” Tanganing mapanigoan an pangangaipong ini, an mga tawo haloy nang naghahanap kan katotoohan. Sagkod sa punto na ginibo ninda an paghanap ki Jehova, na inaapod kan salmista na “Dios nin katotoohan,” sinda nag-oswag sa paghanap kaiyan.—Salmo 31:5.

An ngaran na Jehova literal na nangangahulogan nin “Saiyang Pinapangyayaring Magin.” (Genesis 2:4, nota sa ibaba) Sa siring, an mismong kahulogan kan ngaran nin Dios nag-aapod nin atension sa saiyang pagigin Kaglalang asin sa saiyang katuyohan. Sa katunayan, an pakamidbid asin paggamit kan ngaran na Jehova sarong midbidan kan tunay na relihion. Malinaw na rinekonoser ni Jesus an katotoohan na iyan. Nagtataram manongod sa saiyang mga parasunod, sia nagsabi sa Dios sa pamibi: “Ipinamidbid ko sa sainda an saimong ngaran asin ipapamidbid ko pa iyan, tanganing an pagkamoot na ikinamoot mo sa sako mapasa sainda asin ako sa kasaro ninda.”—Juan 17:26.

Huling nagsasarig sa saiyang pakikatood sa Dios, an sarong Hebreo kan suanoy na an ngaran Jose, kan hagadan na ihayag an kahulogan nin mga pangatorogan, kompiadong nagsabi: “Bakong sa Dios an mga interpretasyon?”—Genesis 40:8; 41:15, 16.

Pakalihis nin nagkapirang siglo, si Hadeng Nabucodonosor nin Babilonya nagkaigwa nin pangatorogan na dai kayang tawan nin kahulogan kan saiyang madodonong. Si propeta Daniel nagsabi sa hade: “Igwa nin sarong Dios sa kalangitan na Parahayag nin mga hilom, asin ipinaisi nia ki Hadeng Nabucodonosor kun ano an mangyayari sa huring kabtang kan mga aldaw.”—Daniel 2:28.

Ipinapaheling kan mga halimbawa ni Jose asin Daniel na an kadonongan asin kaaraman nin Dios makukua sana kan mga naglilingkod ki Jehova Dios. Siempre, an pag-ako niato kan pabor nin Dios tibaad mangahulogan nin pagbaya sa dating pinangangaptan na mga punto de vista. An enot na siglong mga Judio na nagin mga Kristiano kaipuhan na iyan mismo an gibohon. Huling pinadakula tanganing igalang asin kuyogon an mga ley na inestablisar sa irarom kan Judiong sistema nin mga bagay, kaipuhan ninda nin panahon tanganing akoon si Jesus bilang an Mesiyas. Sia nagdatong tanganing otobon an Ley ni Moises, na nagserbing “anino kan marahay na mga bagay na madatong.” (Hebreo 10:1; Mateo 5:17; Lucas 24:44, 45) Iyan sinalidahan kan “ley kan Cristo,” na nakakalabi nanggad sa Ley ni Moises.—Galacia 6:2; Roma 13:10; Santiago 2:8.

Gabos kita namundag sa kinaban na siblag sa Dios. Huli sa kasalan na minana sa enot na tawong mag-agom, kita namundag na may pakikiiwal sa Dios, na mayong tamang kaaraman manongod sa saiyang mga katuyohan. Nagmana man kita nin madayang puso. (Jeremias 17:9; Efeso 2:12; 4:18; Colosas 1:21) Tanganing makamtan an pakikikatood nin Dios, kaipuhan niatong manodan na arogon an kaisipan nin Dios. Bakong pasil an paggibo kaiyan.

Tibaad depisil na haleon an falsong relihiosong mga ideya o kaugalean, partikularmente kun an mga iyan itinokdo sa sato poon pa sa pagkaaki. Alagad, madonong daw na magpadagos sa salang dalan? Bako nanggad! Mas madonong nanggad na bagohon an kaisipan nin saro asin paagi kaiyan kamtan an pag-oyon nin Dios.

Pakamidbid sa Pinakapaagihan nin Dios sa Pagtotokdo

Saen niato manonompongan an tabang sa pagsabot sa Tataramon nin katotoohan dangan sa pamumuhay kaoyon kaiyan? Sa Israel kan suanoy, nagtao an Dios nin mamomoon paagi sa pinagtitiwalaan asin maimbod na mga indibiduwal na nasa katongdan na may paninimbagan. Ginigiyahan man kan Payo kan Kristianong kongregasyon ngonyan, si Cristo, an mga sinserong naghahanap kan katotoohan. Ginigibo nia iyan paagi sa saiyang pinagtitiwalaan asin maimbod na mga parasunod, na minakompuesto kan pinakapaagihan na responsable sa pagdirehir asin pagprotehir sa maigot na mga naghahanap kan katotoohan. (Mateo 24:45-47; Colosas 1:18) Alagad paano mamimidbid nin saro an pinakapaagihan nin Dios sa pagtotokdo?

An tunay na mga parasunod ni Jesu-Cristo naghihingoa na ipabanaag an kaparehong mga kualidad na ipinaheling ni Jesus bilang tawo. Sa kinaban na nag-oorog an karigsokan, an saindang pagigin daing kaagid sa pagpaheling nin siring na espirituwal na mga kualidad nagpapangyari sa mga parasunod na ini na madaling mamidbid. (Helingon an kahon sa pahina 6.) Nababanaag daw an mga kualidad na ini sa relihion na kinabibilangan nindo o sa mga relihion kan saindong kataraed? Magigin kapakipakinabang para saindo na siyasaton an bagay na ini paagi sa tabang kan Biblia.

Iniimbitaran niamo kamo, samong mga parabasa, na gibohon iyan paagi sa sarong kurso nin pag-adal sa Biblia. Kan nakaaging taon, sa promedyo, labing 6,000,000 na indibiduwal o pamilya sa 235 nasyon an nag-aaprobetsar sa areglong ini na makipag-adal sa Biblia sa mga Saksi ni Jehova. An pagkaigwa kan kadonongan asin kaaraman nin Dios sarong nagpapadagos, nakakakontento, asin kapakipakinabang na gibohon. Taano ta dai nindo ponan na magkaigwa kan kadonongan asin kaaraman nin Dios? Dai nindo iyan noarin man pagbabasolan. Iyo, puede talaga niatong mamidbid an Dios!

[Kahon sa pahina 6]

AN MGA NAGHIHIRO NA KAOYON NIN DIOS . . .

nagdadanay na neutral sa mga iriwal sa politika.—Isaias 2:4.

nagpapaluwas nin marahay na bunga paagi sa paggibo kan kabotan nin Dios.—Mateo 7:13-23.

nagpapaheling nin tunay na pagkamoot sa lambang saro.—Juan 13:35; 1 Juan 4:20.

nagtataram nin oroyon sa gabos na lugar.—Miqueas 2:12.

dai inaarog an salang mga aktitud asin paggawe kan kinaban sa palibot ninda.—Juan 17:16.

nagpapatotoo sa katotoohan asin naggigibo nin mga disipulo.—Mateo 24:14; 28:19, 20.

naoogma sa pakikipagtipon nin regular para sa pagparinigonan nin boot.—Hebreo 10:25.

nag-oomaw sa Dios bilang sarong internasyonal na grupo.—Kapahayagan 7:9, 10.

[Mga Ritrato sa pahina 7]

An kaaraman nin Dios nakukua bilang indibiduwal, pamilya, asin kongregasyon