Lalaki Asin Babae—Linalang Para sa Lambang Saro
DANAY nang hinihimuyawot nin lalaki asin babae kaidto pa na magin magkaibaiba. Naggikan sa Dios an pagmawot na ini. Naheling ni Jehova na bakong marahay para sa enot na lalaki, si Adan, na magpadagos na nagsosolosolo. Kaya naglalang an Dios nin “katabang para sa [lalaki], bilang komplemento nia.”
Pinangyari ni Jehova na makatorog nin nanok si Adan, dangan kinua nia an saro sa gosok kaini asin ‘ginibo nia na magin babae an gosok asin dinara sia sa lalaki.’ Napaluksong marhay an puso ni Adan kan maheling an magayon na linalang na ini ni Jehova kaya nasabi nia: “Sa katapustapusi ini tolang nin sakong mga tolang asin laman nin sakong laman.” Huli sa saiyang mga kualidad na sa babae, an sangkap na babae, si Eva, tunay na madaling kamotan. Asin an sangkap na si Adan maninigo sa paggalang huli sa saiyang dignidad na sa lalaki. Sinda linalang para sa lambang saro. An Biblia nagsasabi: “Kaya ngani babayaan nin lalaki an saiyang ama asin an saiyang ina asin sia dapat na magdanay sa saiyang agom na babae asin sinda dapat na magin sarong laman.”—Genesis 2:18-24.
Minsan siring, an mga pamilya ngonyan nagkakasuruwayan, asin an relasyon nin lalaki asin babae parateng may pan-aabuso o pinapangibabawan nin kaimotan. An espiritu nin pakipagkompetensia sa pag-oltanan nin lalaki asin babae nagin dahelan nin iriwal asin dai pagkakaoyon. An gabos na ini sarongat sa katuyohan nin Dios para sa lalaki asin babae. An lalaki dinisenyo na otobon an sarong marahayon na papel digdi sa daga. An babae magkakaigwa nin daing kaagid asin mahalagang kabtang bilang komplemento kan saiyang agom. Sinda magtitinabangan na may pagkakaoyon. Poon sa kapinonan kan pag-eksister nin tawo, an diosnon na mga lalaki asin babae maimbod na naghingoang otobon an mga papel na katuyohan ni Jehova para sa sainda, asin ini nakadugang sa saindang kaogmahan asin pagkakontento. Ano an mga papel na ini, asin paano niato maootob iyan?
[Ritrato sa pahina 3]
An lalaki asin babae dinisenyo na otobon an may dignidad na papel sa areglo nin Dios