Lalaki Asin Babae​—May Dignidad na Papel Para sa Lambang Saro

ENOT na linalang ni Jehova Dios si Adan, dangan si Eva. Bago linalang si Eva, si Adan nagkaigwa na nin eksperyensia sa buhay. Durante kan panahon na ini, tinawan sia ni Jehova nin nagkapirang instruksion. (Genesis 2:15-20) Huling nagseserbing representante sa pagtaram nin Dios, an mga ini kaipuhan na sabihon ni Adan sa saiyang agom. Kun siring, rasonable sana na sia an mangengenot sa gabos na bagay na may koneksion sa pagsamba.

May kaparehong areglo sa Kristianong kongregasyon, asin makikinabang kita sa pagsiyasat kaiyan. Si apostol Pablo nagsurat: “Dai ako minatogot na an babae . . . magkapot nin autoridad sa lalaki, kundi dai maggirong. Huli ta si Adan an enot na linalang, dangan si Eva.” (1 Timoteo 2:12, 13) Dai ini nangangahulogan na an babae magigin biyong daing girong sa pagtiripon kan Kristianong kongregasyon. Sia magigin daing girong sa sentido na dai sia makikidiskutiran sa sarong lalaki. Dai nia memenoson an nombradong katongdan kaini o hihingoahon na magtokdo sa kongregasyon. An mga lalaki an tinawan kan asignasyon na mangenot asin magtokdo sa kongregasyon, alagad dakula an ikakakontribwir kan mga babae sa Kristianong mga pagtiripon paagi sa pakikikabtang dian sa manlaenlaen na paagi.

Sa pagtao sato nin pakarorop dapit sa kanya-kanyang papel nin mga lalaki asin babae sa areglo nin Dios, si apostol Pablo nagsurat: “An lalaki bakong gikan sa babae, kundi an babae gikan sa lalaki . . . Apuera kaiyan, may koneksion sa Kagurangnan mayo nin babae kun mayo nin lalaki asin mayo nin lalaki kun mayo nin babae [bakong independiente sa lambang saro]. Huling kun paanong an babae gikan sa lalaki, an lalaki huli man sa babae; alagad an gabos na bagay gikan sa Dios.”—1 Corinto 11:8-12.

Igwa nin Marahayon na mga Pribilehio an mga Babae

Segun sa Ley na itinao nin Dios sa Israel, an mga babae igwa nin dakol na pribilehio asin libre na gamiton an saindang inisyatiba. Halimbawa, an Talinhaga 31:10-31 nagsasabi manongod sa “may kakayahan na agom na babae” na nagbabakal nin marahayon na materyales nin tela asin naggigibo nin ekselenteng mga gubing para sa saiyang kasararo sa harong. Tara, “naggibo pa ngani sia nin pan-irarom na mga gubing asin ipinapabakal iyan”! (Bersikulo 13, 21-24) “Garo mga sakayan nin sarong negosyante,” an ekselenteng babaeng ini nakakakua nin pinakapiling pagkakan, dawa pa kaipuhan niang kuanon iyan sa hararayong lugar. (Bersikulo 14) “Inestudyaran nia an sarong oma asin binakal iyan,” asin sia “nagtanom nin sarong ubasan.” (Bersikulo 16) Huling “marahay an saiyang negosyo,” an saiyang mga aktibidad may pakinabang. (Bersikulo 18) Apuera sa ‘binabantayan an mga nangyayari sa saiyang kasararo sa harong,’ an mahigos na babaeng ini na natatakot ki Jehova daing kaimotan na nagtatabang sa iba. (Bersikulo 20, 27) Bakong makangangalas na sia inoomaw!—Bersikulo 31.

An mga ley ni Jehova na itinao paagi ki Moises nagtao sa mga babae nin lubos na oportunidad na umoswag sa espirituwal. Halimbawa, sa Josue 8:35, mababasa niato: “Mayo ni sarong tataramon sa gabos na ipinagboot ni Moises na dai binasa nin makosog ni Josue sa atubangan kan bilog na kongregasyon nin Israel, kaibanan an mga babae asin saradit patin mga nakikihimanwa na nagraralakaw sa tahaw ninda.” May labot ki Esdras na saserdote, an Biblia nagsasabi: “Dinara [nia] an ley duman sa atubangan kan kongregasyon nin mga lalaki patin nin mga babae asin nin gabos na may igo nang isip tanganing maghinanyog, kan enot na aldaw kan ikapitong bulan. Asin padagos niang binasa iyan nin makosog sa atubangan kan pampublikong plasa na nasa atubangan kan Tata nin Tubig, poon sa amay na aga sagkod sa udto, sa atubangan kan mga lalaki asin kan mga babae patin kan iba pang mga may isip na; asin an bilog na banwaan atentibo sa pagdangog sa libro kan ley.” (Nehemias 8:2, 3) Nakinabang an mga babae sa siring na pagbasa kan Ley. Isinelebrar man ninda an relihiosong mga kapiestahan. (Deuteronomio 12:12, 18; 16:11, 14) An pinakamahalaga, an mga babae sa suanoy na Israel puedeng magkaigwa nin personal na relasyon ki Jehova Dios asin puedeng mamibi sa saiya bilang indibiduwal.—1 Samuel 1:10.

Kan enot na siglo C.E., an matatakton sa Dios na mga babae nagkapribilehio na paglingkodan si Jesus. (Lucas 8:1-3) An sarong babae linahidan nin ungguento an payo asin bitis ni Jesus durante nin sarong pamanggihan sa Betania. (Mateo 26:6-13; Juan 12:1-7) Kabilang an mga babae sa pinahelingan ni Jesus pakatapos kan saiyang pagkabuhay liwat. (Mateo 28:1-10; Juan 20:1-18) Pakasakat ni Jesus sa langit, kaiba sa grupo nin mga 120 na nagtiripon an “nagkapirang babae asin si Maria na ina ni Jesus.” (Gibo 1:3-15) An dakol o an gabos na babaeng ini daing duda na nasa sarong kuarto sa itaas sa Jerusalem kan aldaw nin Pentecostes 33 C.E., kan isinugo an banal na espiritu asin an mga disipulo ni Jesus milagrosong nagtaram nin dakol na laen-laen na lenguahe.—Gibo 2:1-12.

An mga lalaki sagkod babae kabilang sa mga nakaeksperyensia kan kaotoban kan Joel 2:28, 29, na kinotar ni apostol Pedro kan aldaw nin Pentecostes: “Ibububo ko [Jehova] an iba sa sakong espiritu sa gabos na klase nin laman, asin an saindong mga aking lalaki asin mga aking babae magpopropesiya . . . Asin pati sa sakong mga oripon na lalaki asin sa sakong mga oripon na babae ibububo ko an iba sa sakong espiritu sa mga aldaw na iyan.” (Gibo 2:13-18) Sa laog nin kadikit na panahon pakatapos kan Pentecostes 33 C.E., an mga Kristiana tinawan kan mahalagang mga balaog na espiritu. Sinda nagtaram nin ibang lenguahe asin nagpropesiya, na dai man nagtataram nin mga prediksion kundi nin mga katotoohan sono sa Kasuratan.

Sa saiyang surat sa mga Kristiano sa Roma, si apostol Pablo may kapadangatan na nagtaram manongod ki “Febe na satong tugang na babae,” na irinerekomendar sia sa sainda. Nasambitan man nia si Trifina asin Trifosa, na inaapod sindang “mga babaeng nagpapagal sa Kagurangnan.” (Roma 16:1, 2, 12) Minsan ngani an mga babaeng ini dai nagkapot nin nombradong mga katongdan sa enot na Kristianong kongregasyon, sinda asin an dakol na iba pang babae nagkaigwa kan pribilehio na mapili nin Dios na magin kairiba kan saiyang Aki, si Jesu-Cristo, sa langitnon na Kahadean.—Roma 8:16, 17; Galacia 3:28, 29.

Kanigoan karahay na pribilehio an yaon sa diosnon na mga babae ngonyan! “Si Jehova mismo an nagtataram; an mga babaeng nagsasabi kan maogmang bareta sarong dakulang hukbo,” an sabi kan Salmo 68:11. An siring na mga babae maninigong tawan nin komendasyon. Halimbawa, an saindang ekspertong pagtotokdo sa mga pag-adal nin Biblia naggigiya sa dakol na akoon an totoong mga katokdoan na nakakapaogma sa Dios. Maninigo man sa pag-omaw an may agom na mga Kristiana na tinatabangan an saindang mga aki na magin mga nagtutubod asin sinuportaran an saindang mga agom na may dakol na obligasyon sa kongregasyon. (Talinhaga 31:10-12, 28) An daing agom na mga babae igwa man nin may dignidad na kabtang sa areglo nin Dios, asin an Kristianong mga lalaki sinasadol na “pakiolayan . . . an gurang na mga babae siring sa mga ina, an hoben na mga babae siring sa mga tugang na babae sa bilog na kabinian.”—1 Timoteo 5:1, 2.

An Manlaenlaen na Asignasyon nin Lalaki

An sarong Kristianong lalaki igwa nin papel na iinasignar nin Dios asin inaasahan na ootobon nia iyan. Si Pablo nagsabi: “Boot kong maaraman nindo na an payo kan lambang lalaki iyo an Cristo; an payo man nin babae iyo an lalaki; an payo man kan Cristo iyo an Dios.” (1 Corinto 11:3) An lalaki igwa man nin payo—an Cristo. Tunay nanggad, an lalaki maninimbag ki Cristo asin sa katapustapusi sa Dios. Asin inaasahan nin Dios na isasagibo kan lalaki an saiyang pagkapayo sa mamomoton na paagi. (Efeso 5:25) Ini na an inaasahan poon pa kan lalangon an mga tawo.

Ipinapaheling kan Biblia na tinawan nin Dios an lalaki nin mga asignasyon kaoyon kan saiyang katongdan nin pagkapayo. Halimbawa, pinagbotan ni Jehova an lalaking si Noe na gumibo nin arka para sa pagliligtas nin buhay durante kan Baha. (Genesis 6:9–7:24) Pinanugaan an lalaking si Abraham na paagi sa saiyang banhi, an gabos na pamilya asin nasyon sa daga magbebendisyon kan saindang sadiri. An pangenot na kabtang kan banhing iyan iyo si Cristo Jesus. (Genesis 12:3; 22:18; Galacia 3:8-16) Ninombrahan nin Dios an lalaking si Moises na pangenotan an mga Israelita paluwas sa Egipto. (Exodo 3:9, 10, 12, 18) Itinao ni Jehova paagi ki Moises an kodigo nin mga ley na inapod na tipan nin Ley, o an Ley ni Moises. (Exodo 24:1-18) Mayo nin eksepsion, mga lalaki an kagsurat kan Biblia.

Bilang Payo kan Kristianong kongregasyon, ‘nagtao si Jesus nin balaog na mga lalaki.’ (Efeso 1:22; 4:7-13) Kan sinasabi an mga kualipikasyon para sa mga paraataman, si Pablo nagtataram manongod sa mga lalaki. (1 Timoteo 3:1-7; Tito 1:5-9) Kaya an mga kongregasyon nin Mga Saksi ni Jehova pinaglilingkodan nin lalaking mga paraataman, o kamagurangan, asin nin mga lalaki na ninombrahan bilang ministeryal na mga lingkod. (Filipos 1:1, 2; 1 Timoteo 3:8-10, 12) Mga lalaki sana an maglilingkod bilang mga pastor sa Kristianong kongregasyon. (1 Pedro 5:1-4) Minsan siring, arog kan nasambitan na, an mga babae igwa nin marahayon na mga pribilehio na tao nin Dios.

Maogma sa Saindang Papel

An pag-otob kan saindang tao nin Dios na papel nagtatao nin kaogmahan sa mga lalaki sagkod babae. Nagbubunga nin maogmang mga pag-agoman kun inaarog kan mga agom na lalaki asin babae an halimbawa ni Cristo asin kan saiyang kongregasyon. “Mga agom na lalaki,” an surat ni Pablo, “padagos nindong mamotan an saindong agom na babae, kun paanong an Cristo namoot man sa kongregasyon asin iinatang an saiya man sana dahel kaiyan . . . An lambang saro sa saindo mamoot sa saiyang agom na babae arog kan pagkamoot nia sa saiyang sadiri.” (Efeso 5:25-33) Huli kaini, hinahagad sa mga agom na lalaki na isagibo an saindang pagkapayo, bakong sa maimot na paagi, kundi sa mamomoton na paagi. An kongregasyon ni Cristo bakong kompuesto nin sangkap na mga tawo. Alagad, namomotan asin inaataman iyan ni Jesus. Kaagid kaiyan, an Kristianong agom na lalaki maninigong kamotan asin atamanon an saiyang agom.

An Kristianang agom “maninigong magkaigwa nin hararom na paggalang sa saiyang agom.” (Efeso 5:33) Mapadapit digdi, puede niang ibilang na halimbawa an kongregasyon. An Efeso 5:21-24 nagsasabi: “Magpasarakopsakop kamo huli sa pagkatakot ki Cristo. Magpasakop an mga agom na babae sa saindang agom na lalaki nin siring sa Kagurangnan, huli ta an agom na lalaki iyo an payo kan saiyang agom na babae kun paanong si Cristo iyo man an payo kan kongregasyon, mantang sia an paraligtas kan hawak na ini. Sa katunayan, kun paanong an kongregasyon nagpapasakop ki Cristo, siring man an mga agom na babae sa saindang agom na lalaki sa gabos na bagay.” Minsan ngani tibaad depisil kun beses para sa agom na babae na magpasakop sa saiyang agom, ini “angay [tama] sa Kagurangnan.” (Colosas 3:18) Magigin mas pasil an pagpapasakop sa saiyang agom na lalaki kun ginigirumdom nia na ini nakakapaogma sa Kagurangnan na Jesu-Cristo.

Dawa kun an saiyang agom bakong kapagtubod, an sarong Kristianang agom maninigong magpasakop sa pagkapayo kaini. Si apostol Pedro nagsasabi: “Kamong mga agom na babae, magpasakop kamo sa saindong agom na lalaki, tangani na, kun an siisay man dai nagkukuyog sa tataramon, sinda madara minsan daing tataramon paagi sa gawe-gawe kan saindang agom na babae, huli sa pakaheling mismo sa saindong mabining gawe-gawe na may hararom na paggalang.” (1 Pedro 3:1, 2) Si Sara, na may paggalang sa saiyang agom, si Abraham, nagkapribilehio na ipangaki si Isaac asin magin apoon ni Jesu-Cristo. (Hebreo 11:11, 12; 1 Pedro 3:5, 6) An mga agom na babae na minagawe nin siring ki Sara siertong babalosan nin Dios.

Nangingibabaw an katoninongan asin armoniya kun inootob kan mga lalaki asin babae an saindang tao nin Dios na papel. Ini nagreresulta sa pagkakontento asin kaogmahan ninda. Dugang pa, an pagsunod sa mga kahagadan na sono sa Kasuratan nagtatao sa lambang saro nin dignidad na konektado sa pribilehiadong kabtang sa areglo nin Dios.

[Kahon sa pahina 7]

Kun Ano an Saboot Ninda Manongod sa Saindang Tao nin Dios na Papel

“Isinasagibo kan sakong agom an saiyang pagkapayo sa mamomoton asin maboot na paagi,” an sabi ni Susan. “Parate niamong pinag-oolayan an mga desisyon, asin kun nagdedesisyon sia kun ano an gigibohon o dai gigibohon, aram ko na para sa kapakinabangan niamo iyan. An areglo ni Jehova para sa Kristianang mga agom talagang nakakapaogma sa sako asin nakakapakosog sa samong pag-agoman. Dayupot an relasyon niamo asin nagtitinabangan kami tanganing maabot an espirituwal na mga pasohan.”

An sarong babae na an ngaran Mindy nagkomento: “An papel na iinasignar ni Jehova sa saiyang mga lingkod na babae sarong pag-asegurar kan pagkamoot nia para sa sato. Namamatean ko na an pagtao ko nin onra asin paggalang sa sakong agom saka an pagsuportar sa saiya sa mga katongdan nia sa kongregasyon iyo an paagi ko nin pagpaheling nin pag-apresyar ki Jehova para sa areglong ini.”

[Mga Ritrato sa pahina 5]

Kaoyon kan katongdan nin pagkapayo nin lalaki, tinawan nin Dios si Noe, Abraham, asin Moises nin manlaenlaen na asignasyon

[Ritrato sa pahina 7]

“An mga babaeng nagsasabi kan maogmang bareta sarong dakulang hukbo”