Likayan an mga Pandisturbo sa ‘Aldaw na Ini nin Maogmang Bareta’
INISIP-ISIP kan apat na may lepra an saindang mga pagpipilian. Mayo nin siisay man na naglimos sa sainda sa tata kan siudad. Pinapondo kan mga Sirio an pagdara nin kakanon sa Samaria tanganing an mga tawo duman magutom nin grabe asin sumuko. Mayo na nin pakinabang an paglaog sa siudad; mahalon an presyo nin kakanon. May napabareta nang sarong insidente nin kanibalismo.—2 Ha. 6:24-29.
‘Taano ta dai kita magduman sa kampo nin mga Sirio?’ an inisip kan mga may lepra. ‘Mayo man mawawara sa sato.’ Kan banggi na, nagduman na sinda. Pag-abot ninda sa kampo, toninong iyan. Mayo nin mga guardia. Nakagakod an mga kabayo asin asno, alagad mayo nin mga soldados. Pinagmasdan kan apat an laog nin sarong tolda. Mayo nin tawo duman, alagad kadakol nin kakanon asin inomon. Nagkakan asin nag-inom sinda. An mga may lepra nakaheling man nin mga bulawan, plata, gubing, asin iba pang mahahalagang bagay. Kinua ninda an nagustohan ninda, itinago iyan, asin buminalik tanganing kumua nin dagdag pa. Inabandonar na an bilog na kampo. Milagrosong pinangyari ni Jehova na madangog kan mga Sirio an tanog nin sarong puersa militar. Sa paghona na sinasalakay sinda, nagdurulag an mga Sirio. Nawalat an gabos na bagay duman, na puede nanggad kuanon nin siisay man!
Kinua asin itinago kan mga may lepra an mahahalagang bagay. Minsan siring, nakonsensia sinda kan magirumdoman ninda an kaharaning Samaria na may grabeng tiggutom. Dangan, nagsabi sinda sa lambang saro: “Bakong tama an ginigibo niato. An aldaw na ini aldaw nin maogmang bareta!” An mga may lepra nagbalik tolos sa Samaria asin sinabi an maogmang bareta na nadiskobre ninda.—2 Ha. 7:1-11.
Nabubuhay man kita sa panahon na puedeng apodon na “aldaw nin maogmang bareta.” Sa pagtokdo sa sarong lataw na kabtang kan “tanda . . . kan pagtatapos kan sistema nin mga bagay,” si Jesus nagsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mat. 24:3, 14) Paano iyan maninigong magkaigwa nin epekto sa sato?
An Personal na mga Kahaditan Puedeng Makapagabat sa Sato
Huling labi-labi an kagayagayahan sa nadiskobre ninda, temporaryong nalingawan kan mga may lepra an Samaria. Nagkonsentrar sinda sa kun ano an makukua ninda. Puede man daw na mangyari iyan sa sato? An “kakulangan nin kakanon” kaiba sa tanda na kompuesto nin laen-laen na kabtang na mangyayari sa panahon kan pagtatapos kan sistema nin mga bagay. (Luc. 21:7, 11) Pinatanidan ni Jesus an saiyang mga disipulo: “Tawan nin atension an saindong sadiri na an saindong puso dai noarin man mapagabatan nin sobrang pagkakan asin makosog na pag-inom patin mga kahaditan sa buhay.” (Luc. 21:34) Bilang mga Kristiano, maninigo kitang mag-ingat na dai pagtogotan an personal na mga kahaditan sa aroaldaw na buhay na magin dahelan na malingawan niato an katunayan na kita nabubuhay sa “aldaw nin maogmang bareta.”
An sarong Kristiana na an ngaran Blessing dai tinogotan an personal na mga pinagkakainteresan na makapagabat sa saiya. Sia nagpayunir, nakatapos nin suplementaryong edukasyon, naagom nin Bethelite pag-abot nin panahon, asin nagin miembro kan pamilyang Bethel sa Benin. Sia nagsabi: “Housekeeper ako, asin talagang ikinakaogma ko an sakong asignasyon.” Ngonyan, maogmang ginigirumdom ni Blessing an 12 taon sa bilog na panahon na paglilingkod asin ikinakaogma na napagdadanay nia an saiyang konsentrasyon sa “aldaw nin maogmang bareta” na kinabubuhayan niato ngonyan.
Likayan an mga Pandisturbo na Nakakaubos nin Oras
Kan sugoon ni Jesus an 70 disipulo, sia nagsabi: “Totoo nanggad na kadakol kan anihon, alagad ta kakadikit kan paraani. Kun siring, makimaherak kamo sa Kagurangnan kan anihon na magsobol nin mga paraani sa saiyang anihon.” (Luc. 10:2) Kun paanong an pag-atraso sa panahon nin pag-ani puedeng magresulta sa pagkasayang nin mga anihon, an pagpabaya sa paghuhulit puede man na magresulta sa kagadanan nin mga tawo. Kaya sinabi pa ni Jesus: “Dai nindo pagkugoson bilang pagtaratara an siisay man na nasa dalan.” (Luc. 10:4) An termino sa orihinal na lenguahe na “pagtaratara” puedeng mangahulogan nin orog pa sa pagsabi sana nin “kumusta” o “marahay na aldaw.” Puede man na kaiba dian an pagkurugosan asin haralawig na pakikipag-olay na puedeng mangyari kun may nanunuparan na sarong katood. Sa siring, ininstruksionan ni Jesus an saiyang mga parasunod na likayan an dai kinakaipuhan na mga pandisturbo asin lubos na gamiton an saindang panahon. Dapat na apurado nindang ikahulit an mensahe.
Isip-isipa kun gurano kadakol na oras an mauubos huli sa mga pandisturbo. Sa laog nin dakol na taon, an telebisyon an pinakanakakaubos nin oras sa dakol na lugar. Pero, kumusta man an telepono sagkod cellular phone, asin komputer? Ipinaheling nin sarong surbey na ginibo sa 1,000 adulto sa Britania na “an sarong ordinaryong Britano naggagamit kada aldaw nin 88 minutos sa telepono, dugang pang 62 minutos sa cellular phone, 53 minutos sa pag-e-mail asin 22 minutos sa pag-text.” An total na oras na ginagamit ninda labing doble nanggad sa oras na ginagamit nin auxiliary payunir kada aldaw! Gurano kadakol na oras an ginagamit nindo sa arog kaiyan na pakikikomunikar?
Si Ernst asin Hildegard Seliger maingat sa kun paano ninda ginagamit an saindang oras. Sa kabilogan, sinda nabilanggo nin labing 40 taon sa mga kampo de konsentrasyon nin Nazi asin mga presohan nin Komunista. Pagkapatalingkas sa sainda, nagpayunir sinda sagkod na matapos ninda an saindang daganon na buhay.
Dakol an nakipagsuratan sa mag-agom na Seliger. Puede kutanang gamiton kan mag-agom an kadaklan kan saindang oras sa pagbasa asin paggibo nin mga surat. Minsan siring, an espirituwal na mga bagay an nagin pinakamahalaga sa saindang buhay.
Siempre, pinapahalagahan niato gabos an pakikikomunikar sa satong mga namomotan, asin mayo man nin maraot dian. Kapakipakinabang an pagkaigwa nin piniling marhay asin laen-laen na aktibidad sa satong pangaroaldaw na rutina. Minsan siring, madonong na magin listo kita na kontrolon an mga pandisturbo na nakakaubos nin oras durante kan aldaw na ini nin paghuhulit kan maogmang bareta.
Lubos na Ihulit an Maogmang Bareta
Saro nanggad na bendisyon na mamuhay sa “aldaw nin maogmang bareta.” Dai kita magin arog kan apat na may lepra na nalingling kan primero. Girumdomon na nagkongklusyon sinda: “Bakong tama an ginigibo niato.” Siring man, bakong tama na togotan niato an personal na mga gibohon o mga pandisturbo na nakakaubos nin oras na makaolang sa sato sa lubos na pakikikabtang sa ministeryo.
Mapadapit digdi, igwa kita nin marahayon na halimbawang dapat sunodon. Sa paghorophorop ni apostol Pablo sa enot na 20 taon kan saiyang ministeryo, sia nagsurat: “Lubos kong ikinahulit an maogmang bareta manongod sa Cristo.” (Roma 15:19) Dai tinogotan ni Pablo an ano man na makapaluya sa saiyang kaigotan. Magmaigot kita arog nia mantang ihinahayag niato an mensahe kan Kahadean sa ‘aldaw na ini nin maogmang bareta.’
[Ritrato sa pahina 28]
Dai tinogotan ni Blessing an personal na mga pinagkakainteresan na makaolang sa saiyang bilog na panahon na paglilingkod
[Ritrato sa pahina 29]
An mag-agom na Seliger maingat sa kun paano ninda ginagamit an saindang oras