Watchtower ONLINE NA LIBRARYA
Watchtower
ONLINE NA LIBRARYA
Bicol
  • BIBLIYA
  • PUBLIKASYON
  • PAGTIRIPON
  • w98 3/1 p. 30-31
  • Si Jesus Nagsugo nin 70 Disipulo

Mayong video na available para digdi.

Sori, may error sa pag-load kan video.

  • Si Jesus Nagsugo nin 70 Disipulo
  • An Torrengbantayan Nagpapahayag kan Kahadean ni Jehova—1998
  • Mga Subtema
  • Kaagid na Materyal
  • Daing Disturbong mga Ministro
  • Mga Leksion Para sa Sato
  • “Paduman Kamo Asin Gumibo Kamo nin mga Disipulo”
    “Madia Magin Parasunod Taka”
  • Kaipuhan na Gayo—Dagdag Pang mga Paraani!
    An Torrengbantayan Nagpapahayag kan Kahadean ni Jehova—1986
  • “An Maogmang Bareta Kaipuhan na Ikahulit Nguna”
    An Torrengbantayan Nagpapahayag kan Kahadean ni Jehova—1988
  • Magin Magayagayang mga Paraani!
    An Torrengbantayan Nagpapahayag kan Kahadean ni Jehova—2001
Iba Pa
An Torrengbantayan Nagpapahayag kan Kahadean ni Jehova—1998
w98 3/1 p. 30-31

Ginibo Ninda an Kabotan ni Jehova

Si Jesus Nagsugo nin 70 Disipulo

TIGRAKDAG kaidto kan 32 C.E. Anom na bulan na sana an natatada bago magadan si Jesus. Huli kaini, tanganing maparikas an gibohon na paghuhulit asin madugangan pa an pagsasanay kan nagkapira sa saiyang mga parasunod, nagpili sia nin 70 disipulo asin “isinugo sinda nin manduwaduwa na maenot sa saiya sa kada siudad asin lugar na saiya mismong dudumanan.”—Lucas 10:1.a

Isinugo ni Jesus an saiyang mga disipulo “na maenot sa saiya” tanganing an mga tawo makapagdesisyon nin mas madali kun baga sinda para o laban sa Mesiyas kun si Jesus mismo umabot sa huri. Alagad taano ta isinugo nia sinda “nin manduwaduwa”? Malinaw na tanganing sinda magparinigonan sa lambang saro kun mapaatubang sa pagtumang.

Idinodoon an pagkaapurado kan saindang trabahong paghuhulit, sinabihan ni Jesus an saiyang mga parasunod: “Totoong gayo na kadakol kan anihon, alagad ta kakadikit kan paraani. Kun siring makimaherak kamo sa Kagurangnan kan anihon na magsobol nin mga paraani sa saiyang anihon.” (Lucas 10:2) Tama an pagbabaing sa anihon, huling an ano man na pag-atraso sa tig-anihan puedeng magresulta sa pagkasayang nin mahalagang mga aanihon. Kaagid kaiyan, kun pababayaan kan mga disipulo an saindang asignasyon na paghuhulit, mahalagang marhay na mga buhay an puedeng mawara!​—Ezequiel 33:​6.

Daing Disturbong mga Ministro

Dugang pang pinagbotan ni Jesus an saiyang mga disipulo: “Dai kamo magdara nin supot, ni tinapay, ni sandalyas, asin dai nindo pagkugoson sa pagtaratara an siisay man sa dalan.” (Lucas 10:​4) Nakaugalean na nin sarong nagbibiahe na magdara bako sanang nin sarong supot asin kakanon kundi pati man nin sarong ekstrang padis na sandalyas, huli ta an suelas naiinas asin an sintas napuputol. Alagad an mga disipulo ni Jesus dai dapat maghadit manongod sa siring na mga bagay. Imbes, kaipuhan sindang magtiwala na aatamanon sinda ni Jehova paagi sa mga kapwa Israelita, na dian sa sainda kostumbre na an pagigin mapagpasakat.

Alagad taano ta sinabihan ni Jesus an saiyang mga disipulo na dai pagkugoson an siisay man sa pagtaratara? Kaipuhan daw nindang magin indiperente, daing modo pa ngani? Dai nanggad! An Griegong termino na a·spaʹzo·mai, na nangangahulogan kugoson sa pagtaratara, puedeng mangahulogan nin labi pa sa magalang na pagsabi nin “kumusta” o “marahay na aldaw.” Tibaad kaiba man dian an nakaugalean nang mga paghadok, pagkugos, asin halawig na pag-estoryahan na mangyayari kun an duwang magkabisto magkahelingan. An sarong komentarista nagsasabi: “An pagtaong-galang sa tahaw nin mga taga-Oriente bako sanang, siring sa sato, kadikit na pagduko, o pag-abrasa, kundi ginigibo paagi sa dakol na pagkugos, asin pagduko, patin paglaob pa ngani sa daga. An gabos na ini nangangaipo nin dakol na oras.” (Ikomparar an 2 Hade 4:​29.) Sa siring tinabangan ni Jesus an saiyang mga parasunod na malikayan an dai kaipuhan, minsan ngani nakaugalean, na mga disturbo.

Sa katapustapusi, sinabihan ni Jesus an saiyang mga disipulo na kun sinda minalaog sa sarong harong asin pinadagos, sinda maninigong ‘mag-ontok sa harong na iyan, na kinakakan asin iniinom an mga bagay na itatao ninda.’ Alagad kun sinda lumaog sa sarong siudad asin bakong marahay an pag-ako, sinda maninigong “dumuman sa mahiwas na mga dalan kaiyan asin magsabi, ‘Maski an kabokabo na duminokot sa samong mga bitis hale sa saindong siudad pinapahid mi tumang saindo.’” (Lucas 10:​7, 10, 11) An pagpahid o pagpagpag nin kabokabo sa bitis nin saro mangangahulogan na an mga disipulo matoninong na minahale sa harong o siudad na habong mag-ako na sa kahurihurihi an Dios na an bahala sa kaaabtan. Alagad an mga may kabootan na nag-ako sa mga disipulo ni Jesus naglinyang umako nin mga bendisyon. Sinabihan ni Jesus an saiyang mga apostol sa saro pang okasyon: “An minaako sa saindo minaako man sa sako, asin an minaako sa sako minaako man sa saiya na nagsugo sa sako. Asin an siisay man na magtao sa saro sa saradit na ini nin minsan sarong baso nin malipot na tubig na inomon huli ta sia sarong disipulo, totoong sinasabi ko sa saindo, sa ano man na paagi dai sia mawawaran kan saiyang balos.”​—Mateo 10:​40, 42.

Mga Leksion Para sa Sato

An sugo na maghulit kan maogmang bareta kan Kahadean nin Dios asin gumibo nin mga disipulo ginigibo na ngonyan kan labi na sa 5,000,000 na Saksi ni Jehova sa bilog na kinaban. (Mateo 24:14; 28:​19, 20) Aram ninda na an saindang mensahe apretado. Kun siring, ginagamit ninda sa pinakamarahay na paagi an saindang panahon, na linilikayan an mga disturbo na maolang sa sainda sa pagtao nin bilog na atension sa saindang importanteng asignasyon.

An Mga Saksi ni Jehova nagmamaigot na magin makikatood sa gabos na natatagboan ninda. Minsan siring, dai sana sinda nakikikabtang sa daing pakinabang na erestoryahan, ni nakikilabot sa mga debate manongod sa mga isyung sosyal o sa nasusudyang mga pagprobar kan kinaban na ini na ikorehir an mga inhustisya. (Juan 17:16) Imbes, isinesentro ninda an saindang pakikipag-olay sa solamenteng panhalawig na terminong solusyon sa mga problema nin tawo​—an Kahadean nin Dios.

Sa parate, an Mga Saksi ni Jehova maheheling na naghuhulit nin padis-padis. Bako daw na mas dakol an magigibo kun an lambang saro sa sainda maghuhulit nin solo? Tibaad. Pero, minimidbid kan mga Kristiano ngonyan an pakinabang sa paghuhulit na kaiba nin sarong kapagtubod. Iyan nagtatao nin proteksion kun naghuhulit sa peligrosong mga lugar. An paghuhulit na igwa nin kapadis nagpapangyari man na an mga bagohan makinabang sa abilidad kan mas may kabatidan na mga parahayag kan maogmang bareta. Totoo, an duwa makakokontribwir sa pagrinibayan nin pagparigon sa boot.​—Talinhaga 27:17.

Daing duda, an paghuhulit an pinakaapretadong trabaho na ginigibo sa “huring mga aldaw” na ini. (2 Timoteo 3:​1) An Mga Saksi ni Jehova naoogma na sinda sinusuportaran nin sarong pambilog na kinaban na kasararoan nin magturugang na dian sinda “daramay na naghihingoa para sa pagtubod sa maogmang bareta.”​—Filipos 1:​27.

[Nota sa ibaba]

a An nagkapirang Biblia asin suanoy na Griegong manuskrito nagsasabi na an isinugo ni Jesus “pitong polo may duwang” disipulo. Minsan siring, kadakol kan nagsusuportar na manuskrito sa pagsabi nin “pitong polo.” An teknikal na baryasyon na ini maninigo na dai rumayo sa pinakapunto, na si Jesus nagsugo nin sarong dakulang grupo kan saiyang mga disipulo tanganing maghulit.

    Bicol Publications (1983-2025)
    Mag-log Out
    Mag-log In
    • Bicol
    • I-share
    • Settings na Gusto Mo
    • Copyright © 2025 Watch Tower Bible and Tract Society of Pennsylvania
    • Kasunduan sa Paggamit
    • Palisiya sa Privacy
    • Privacy Settings
    • JW.ORG
    • Mag-log In
    I-share